Isa 17 | XteSC | STEP | Allahdi, Yesaya damai yan peipu. “Damsyik mutuda, ila ati arum dopra kununge,” pepra tupa men penkamenge. Deiyoda, amenda taru, nedi akati arum dominge yumada, urupra sikke buktapnedi, gum kupra deipnepa, ati walangpu kupkamre. Akati-akati nong gum dinin, tali gel deipra domengaipu kupkamre.

Isaiah 17

Allah Yahwehdi Siria mutu neitamai yuma dinin, mutu si Damasyik mutu kunge nesala yuma wenepkamunge tep, pepu upu

1 Allahdi, Yesaya damai yan peipu.

“Damsyik ^{▼▼Damasyik – Damasyik ila ati arum domi mutuda, Israel nesala dapu tara (arah utara) kurami nesala, sun pemerintah deiyoi mutu kwamu. Atara yuma tep nengeda, Siria mutu, tonda Aram mutu peramyada, si butene perami dinin, atara mutuda tenpua.} mutuda, ila ati arum dopra kununge,” pepra tupa men penkamenge. Deiyoda, amenda taru, nedi akati arum dominge yumada, urupra sikke buktapnedi, gum kupra deipnepa, ati walangpu kupkamre. Akati-akati nong gum dinin, tali gel deipra domengaipu kupkamre. 2 Ukupnyopda, Siria ^{▼▼Siria – Siria perami tara mutuda, Israel nesala bokdapidi, dapu tara (arah utara) kuramyai tep, asi perami. Tonda, amutu tep, Aram mutu peramyada, si butene perami dinin, atara mutuda tenpua.} tara neitamai kunung mutu yumada, nimi ton men kunkamenge. Pio tep tapronkamenge. Ukupmengedi, acei mutu neitamaida, nimidi gam keca peinai keipkamenge. Agam keca kunkamengeda, nimi tenpu ngebo peda yaredi, men yana enepkotepkamra cadi, adomba bisam cap, kambing bisam capda, acapu mapmengedi kware men kunkamenge.

3 Atep nengeda, Damsyik mutu nengdi, nimi deiyo kepra taleamenge ngeda, gum kupkamre. Ukupkamne taruda, Efraim mutu neitamai di, ‘Nun podan neng poryasenung’ tenen, ila gat gel di lyom beilya wipdongopra kuramenge mutu peda, nedi go karepnepa, yu jen nengdi ange yuma dakra sikke buktapkamenge. Siria tara mutu neitamai kunge nesalada, pio weika di poptapkameng dinin, amutu tupa gam kunmange neng tep, yuk neng epmengedi, ‘Uo, sunda puto boun neng kununge. Sunda mambul pio gume,’ pepra, malye daemkamenge. Sun Siria mutu nesalada, yuk Israel yala nesala tep, autupra malya demengetopu kunkamenge. ‘Angeda, tek sisi ukupkamre, tali men pepne’ kael kepkamrum’ tenen,’ Ne Allah Yahweh akeca-keca yuma talepra, deiki tara erepra, ila puto kunun ngebodi konum pepra deipsi. Neda im deiki jen talena malaikat yuma, sun deiyo ngebo kunune.

4 Ataru konum damai kepyopda, Yakubdi ^{▼▼Yakub – Yakub pepkada, tek sisi sun Israel yala nesala tep pepu. Yakubda, sun co puna ngebo kuramnga cadi, er si ton pepnopda, sundi, ‘E, ada Israel yala nesala tep, pepu,’ tenenunge.} deiamupa, dadeidanen yakarami nesala, sun Israel nesala talerami bung keca cap, isomka kamaminge cap, pio telep kupra pel doraminge yuma capda, ne Allahdi gum kupra deipkamne. Ukupnyopda, sunda pio kan-kan nesala kungedi, bol mali doupra kunkamenge. Ukupmantoda, pio ila pu jeramre ngebo, bol mali douramretopu kunkamenge. 5 Ataru keprepa, sun Israel nesala peda, yambulanunpu tupa gam kunkamenge. Ukupmantoda, gandum wa Rafaim mutu banai pepra kouamipa, yuk nesaladi yana, agandum sekrapmengedi, kipra jepropipa, gum kwamutopu, kupkamenge. Ada gam tupa kunkameng nesalada, yambulanunpu tupa kunkamenge. Weika di gume. Tek sisi, nimidi kouamenge nge sekmengedi, kipra jepropmengepa, gandum yambulanunpu tupa kuramretopu, sun Siria tara nesala peda, yambulanunpu tupa gam kunkamenge.

6 Ataruda, sun Siria tara neitamai kunge Israel yala nesalada, yambulanunpu kunkamenge nge tep, ukupmantonge ton pepkusene. Ada, gandum du konum kipmenge taruda, du yambulanun ton tuai sangamretopu kupkamenge. Tonda, zaitun co du mouamrepa, weik tara dakropmengedi, aco deiki tara co du sirikainge tamamengtopu kupkamsenge. Aco deiki tarada, co du buteneto, wenerito tupa akuramretopu, ataruda Siria tara mutu neitamaida, Israel yala nesala yambulanunpu tapsengepa, tupa gam kunkamenge. Weik gume. Angeda tek sisi kupkamra tep, neda Israel yala nesala, sun nai bo Allah Yahwehdi konum pepsene.

7 Siria tara nesala wenepkamne taruda, ataru kunge nesala yumada, sun nai bo Allah, sun nong tep ketekemdina deiyo ngebo tep, moupra tenenkamenge. Tonda, Israel nesala pio melimrur ngebo, mali kuna gum dipapu, pio Dumsisi Kurur Ngebo, Lengna Ngebo, ^{▼▼Lengna Ngebo – Lengna pepkada, ada mali kuna pio gum dipapu, pio dumsisi kurur ngebo’ tenen, Allah tep asi penupe. Tonda, Pio Dumsisi Ngebo penupe. Allahdi Israel nesala tep, pio melipra kalengamnga cadi, sundi, ‘Israel sun Pio Lengna Ngebo,’ sun ‘Dumsisi Kuna Ngebo,’ peramitopu, tupa penupe.} er tepapu, teka tenepmengedi, moupra tenenkamenge. Sundi sun nai bo Allah tep, ‘Uo, melipseo,’ pepra, moronkamnenge. 8 Ataruda, sun nesala yumada, sun pe buru deiki di, betapra derinung keca tep, isok si eremna keca tep, ‘Nun nai bo melipkamser ja,’ men tenenkamenge. Tonda, atali keca gispal dona tep, mesba-mesba betapra deipmengedi, gam keca popra uku dongoramengai ton, men tenenkamenge. Sun pe buru di petupra deiaminge yuma cap, siltong telep keca isok tep uku dongomnungai cap, tonda isok si Asyera, isok ner, er urasin atonun petupra deipmengedi, si eremnung keca peda, tupa teka tenepra men kunkamenge.

9 Ataru konum damai kepyopda, Israel mutu neitamai ila ati arum dopra kungedi, ‘Nun podan neng yana popsenung’ tenen, lyom gel beilya wipra, puto kepra deipmengedi, kalengnung mutu yumada, nedi go karepnepa, yu nengdi ange yuma dakra sikke buktapmengopda, ati walangpu kupkamre. Ukupmantoda, men taru, Israel nesala baipa, Hewi yala neng cap, Amori yala neng cap, sun kurami mutu poptapra, sikke buktamitopu, sun pe mutu utopu kupkamre. Akeca-keca yumada, gawal dakra gum kweipkamne.

10 Israel nesalao, sun yuma gekepso! Ne Allahdi ange yuma kupkamsenada, tali tep men kupkamne. Deiyoda, ake. Allahdi sun yuma lyepromseu deiyo ngeboda, ne pua. Tonda, ne Allahdi sun tep tupa melimamsisidi, neda ila gel mutu kuna erepra buknepa, ‘Yu nengdi popsenung’ tenen, agel deiki welepmengedi inimamengtopu, kuramsisi. Ne dipapu sun tep pio melipra kalengamsisi. Dinino sundi ne tep konum lupronerume.

Ange tep nengeda, sundi sun isok-isok gispal dona tep, ‘Nun isok-isokdi melipkamseng’ tenen, urasin telep yal keca ^{▼▼yal keca – Ange pepka deiyoda, ake. Pumun taruda, Allah tep teka men tenerami nesaladi, ‘Nun nai bo isokdi melipseredi, telep kupra gam pio kunkamepe. Tonda, nyapu weika di derinkamepe’ tenen, urasin telep kun keca, menmena paramrenge doupra, aisok si eremna tep, wa pepra kourami.} dopra, wa pepra kourume. Ange utopu, telep paramre keca teru ton sekrumudi, ange isok si eremna tep tupa kourume. 11 Dinino, sundi kourum kecada, akoupmum taru dipapu sik gum, adipapu bongopra gapu paktua peda, akeca di du men moupkamre. Tonda, yuk yala keca ton koupmumpa, er kaitda, atumi dipapu poptua peda, akoun keca er nongda, tek sisi pio men kemrure. Ataru neitamai di, nong utopu kukerur nge cap, du mouramrenge capda, kange mun, kange mun deiki kuna cap, tonda pu jen-jena deiki kuna cappu, tupa kunkamserure. Nedi wenepkamsena deiki di, akeca yumada, gum kupkamre.

Israel yala nesala, sun mar podan nesaladi, popkamre taru tep, pepu upu

12 Sun gekepso! Sunda bicaue! Yuk-yuk mutu dakunge nesalada, denge pio weik bupra wekmengedi, upu weika di pepkamenge! Sun abupra wekmange nesaladi, upu ila di pepkamengada, ukupmanto laut me kait welepredi, sun damai yana sakrepa, lelim weik peramretopu kupkamenge. Gekepso! Sun abupra wekmang nesaladi, upu ila di pepkamengada, ukupmanto, mo pio weik cemre pangeda, ila me opredi, lelim pio weik peramretopu pepkamenge. 13 Teka, sun pona tep, yuk mutu nesala yankamengada, me opredi yakaramretopu kupra, lelim weik pepmengedi yankamenge. Ukupkameng taruda, Allahdi sun yuk mutu di yankameng nesala tep, upu weika di pepra wenepredi, upu sekdongopkamre. Ukupre pangeda, sun ayakanmange nesala yumada, kwarapra karen-karenpu sepra bendopkamenge. Sun anesalada, gandum du sisa wepropmengedi, er kasbal tapmengepa, kumanya di doupra baramretopu kupkamenge. Tonda buteda, kumanya yaredi, pung pepredi doupra baramretopu, aneng peda, utopu kupkamenge.

14 Dinino, atumida, lukunda keana taruda, sun mutu yankameng jen talena nengda, sun mutu tupa kuramenge taruda, sun anesala damaida ila kwar kun kecapu kupmengepa, sun kwar weik kupkamre. Dinino berekre pangeda, sun ajen neng yuma konum gum kupropkamre. Akupkamrenge yumada, nun keca dalupra dorosenung nesala, Allahdi sun deiki deipkamre. Tonda, nun tep, sikke buktapkamseng nesalada, Allahdi sun nong deiki ila kange mun keca doupra deipkamre.