Isa 18 | XteSC | STEP | Kus mutu neitamai dinin, utara tamnada, Sudan mutu kunung Nesalada kange mun kupkamre. Sudan mutu neitamaida, tali gam kuredi, pol di birikra lakra embarur keca, sun pol lelim weik perur mutu kununga cadi, akeca pol lelim peprepa, sun gekepkamenge. Sun mutuda, ila laut mokon damai kurure.

Isaiah 18

Allahdi Sudan mutu neng wenepkamra tep, pepu upu

1 Kus mutu neitamai dinin, utara tamnada, Sudan mutu kunung Nesalada kange mun kupkamre. Sudan ^{▼▼Sudan – Amutu si tep nengeda, pumun taru Ibrani upu deiki di perami sida, Cush mutu perami. Ton Allah upu buku neitamaida, Etiopia mutu sengnunge, tonda Mesir mutu sengnunge. Ukutaruda, amutu er si ton, Sudan mutu, tonda Mesir mutu perameng. Amutu si yuk-yuk penung dinino, amutuda tek sisi tenpua. Pumun taruda, Cush yala nengdi, Mesir mutu di bena Yerusalem mutu yana pepi.} mutu neitamaida, tali gam kuredi, pol di birikra lakra embarur keca, sun pol lelim weik perur mutu kununga cadi, akeca pol lelim peprepa, sun gekepkamenge. Sun mutuda, ila laut mokon damai kurure. 2 Sun Sudan mutu kunung nesaladi, ila embarur me, er si Nil, ame deiki, gapung co deiki bukra yakana tep, nimi ton wepra deipmengedi, me pirman tali tengamre mutmuta utopu keca dopra, gapung co utopu keca betapra ketenepkamenge. Ame deiki embana tep dopkameng kecada, sun wepra deipmengepa, upu peryankameng neng tep, ‘Upu perbenkurume,’ peipkamenge.

Ada, adipapu sun upu pepmumpa, gekenkameng mutu nesalada, pio telep ulumna bol doupra kunung neng cap, tonda nong ila lyoma di nepra kunung neng cap, ila puto cap, nimi ponung neng kununga cadi, nimi pona tep, ila kael balila neng cap kununga deiki di, yuk mutu nesala yuma sun tep, kware weik dangnunge. “Amutu nesala tep, adipapu upu doupra perbenkurume,” peipkamenge. Sun aneng kunung mutuda, me di wilipnenembeua deiki di, sun mutu yuk-yuk bokra kununge.

3 Tuai mutu ban-ban yuma kurum nesalao, sun yumadi dipetepkurume! Mar podana gonga kepkunga tep, nimi yuma bulupkamenga tep, petenkamna tep nengeda, opkal bol er si bendara, ila-ila mutu deiki ikra deipmengepa, sundi moupra epkamrume. Tonda, sundi pung pena keca er si terompet, lelim ila di pepmengepa gekepkamrume. Aupu lelim gekepmumnyopda, sun tuai mutu kurum nesala yumadi moupra tenenkamrume. 4 Allah Yahwehdi ne Yesaya damai yana pepra deipneu.

“Ne kununai im deiki tara, nedi ange yuma epkamne. Ukupmantoda, pio ila keteng bupu kunmarepane, kumanya pio ton men embaramretopu kupkamne. Neda Allah Yahweh dim peprappu kunkamne. Ukupmantoda, wa pepra kouamenganen, kin taru li keprepa, mo puru tu deiki sakrepa, keteng bupu di dua dim pepra weleramretopu kupkamne. Ada, amutu nesala kupkameng keca epnya peda, nedi puto kepra, akeca-keca ton men kupkamne. Dinapu kunkamne.

5 Dinino, anggur du mouna li konum damai kupre taruda, anggur du kapul men mouprepapu, er kait pomyanen kapra sangamre dinin, anggur du kapul men ekapre dipapu, muru dipapu kupra saramretopu kupkamre. Tonda, ukupmantoda, ne Yahwehdi wa pena tep tema doprapnedi, anggur amul dona tep, teru yambulnge sengtamkamne. Ada, ne Allahdi, amutu nesaladi dopra deipmanepa yanmange jen talena neng yumada, popra nyektapkamne. 6 Ne Allahdi amutu jen neng popra, sun nong yuma tu deiki tali katuaipu tapkamne. Ukupkamna tep, sun apoptapmane neng, sun nong dopra jena tep, tali embaramre mada bupu li tarupu yangedi, yana dopra, sun nong tu jepkamenge. Ange utopu, bul li taru kepyopda, tali bura tara gam kuramre yu keca yangedi, sun aneng nong galemna tu jepkamenge.” Allahdi peipneu.

7 “Ataru dipapu amutu nesaladi, pio telep karen keca doupra, Allah Yahweh tep kareryankamenge. Anesala sun urasinda, pio telep ulum-ulum ngepu doupra kunung neng cap, tonda nong ila lyoma di nepra kunung neng cap, ila puto cap, nimi ponung neng kununga cadi, nimi pona tep ila kael deiki di balila cap kununga deiki di, yuk mutu nesala yumadi sun tep, kware weik dangnunge. Sun aneng kunung mutuda, me di wilipnen embeua deiki di, sun mutu yuk-yuk bokra kununge. Sundi telep karen keca doupra duyankameng mutuda, Allah Yahweh akeca-keca yuma deiki tara, ila puto di erepra kurura cadi, erda im deiki jen talena malaikat yuma talerure. Er tep akeca karenkamenge.

Ada Sion mutu, Allah Yahwehdi, ‘Ne si aceipu deipkamne. Amutuda ne mawa mutu,’ pepra deiamu mutu damai duyankamenge. Allah Yahwehda, akeca-keca yuma deiki tara ila puto di erepra kurura cadi, erda im deiki jen talena malaikat yuma talerure. Er Allah tepapu doupra kareryankamenge,” nabi Yesayadi pepu.