Isa 19 | XteSC | STEP | Aupuda, Mesir mutu kunge nesala tep, Allahdi ne Yesaya damai yana aupu peipneu. “Ne Allahda sika di gum dinin, menmena embaramre dua deiki welepra buknedi, Mesir mutu damai sepdara yankamne. Mesir mutu nesaladi isok urasin utopu keca petupra deipmengedi, isok-isok si eremnung keca yumada, ne Allah tep kwar weik kuprepa, moropsepkamenge. Tonda, sun Mesir mutu kunung nesala yumada, pio kwar weik kuprepa, sun dipru bulungsangkamre.

Isaiah 19

“Allahdi Mesir mutu kunge nesala tep, ikin keca deipkamre,” pepu upu

1 Aupuda, Mesir mutu kunge nesala tep, Allahdi ne Yesaya damai yana aupu peipneu.

“Ne Allahda sika di gum dinin, menmena embaramre dua deiki welepra buknedi, Mesir mutu damai sepdara yankamne. Mesir mutu nesaladi isok urasin utopu keca petupra deipmengedi, isok-isok si eremnung keca yumada, ne Allah tep kwar weik kuprepa, moropsepkamenge. Tonda, sun Mesir mutu kunung nesala yumada, pio kwar weik kuprepa, sun dipru bulungsangkamre. 2 Ne Allahdi sun Mesir mutu nesala yuma tep, sun dipru neitamai pel dopnepa, sun yumadi sun kayapu neng sisa dinin, ‘Song’ tenedana cap, podana cap deiyo keca karepkamne. Ukupnepa, sun kayapu nengdi, sun kayapu neng tep, popdanapu kupkamenge. Utopu, er kabo sisa dinin, ortara ati ngebodi, er kabo ton tara ati ngebo tep, ‘Song,’ tenedangedi podankamenge. Utopu, ton tara mutu neitamai ila ati arum dopra kunge nengdi, ton tara ila ati arum domi mutu neng tep pondankamenge. Tonda utopu, ton tara nimi deiyo kepra talepidi kunung nengdi, ortara neng tep, podankamenge.

3 Ne Allahdi sun Mesir mutu neitamai kunung nengdi, ‘Ukupkamepe,’ tenenung nge yumada, gum kupra deipkamne. Tonda, sun kange pingpinga di telep kupra kunkamenge nge peda, gum kupra deipnepa, sun dipru bulungsangkamre. Sun anengdi sun si eremenge isok berhala-hala ^{▼▼berhala-hala – Aupu deiyoda, ada, isok si eremna tep, patung petupra deiamidi, isok si eremami.} tep, ‘Nun melipseo,’ pepra moronkamenge. Tonda, sundi, ‘Nun ware kuptepe do’ tenen, ange-ange kupmumdi melipseso,’ pepra moronkamenge. Autopu tonda, sun asuru kwa neng tep, ‘Lap pepserume,’ pepra, ton moronkamenge. “Tonda nimi sambala tep, lap pepserume,” pepra ton moronkamenge. 4 Ne Allahdi Mesir mutu kunge nesala deiyo kepra talepkamre Rajada, dipru balila keca karepnepa, aRaja ngebo erdi sun Mesir mutu nesala tep, yu deiki dipapu talepkamre. Neda Allah Yahweh, ila puto di akeca-keca yuma erepra, deiki tara kunun ngebodi, im deiki jen talena malaikat yuma, sun deiyo ngebo kunedi, ne tenepnetopu yuma kunune. Nedi aupu konum pepsena tep, tek sisi nong kupkamre ja, pepsene.

5 Ataruda, ila di embaramre me, er si Nil meda, cepropnen baramyanen, amenda taru cepropredi gelal cepropkamre. Ukupnyopda, ame gum kuprepa, tu kalkalpu kupkamre. 6 Ila Nil me di, teru kwakra er buru-buru popredi, embaramre me yumada, me cepropredi yambulpu tapyopda, aneitamai di, mali tong penkamre. Tonda ame pirmanai tali paramredi bongorur mutmutada nunupra kolupropkamre. Tonda, ila Nil me di bokra, yambulanun embaramre me yumada, cepropredi gum kuprepa, kolupropkamre. 7 Nil me embeua pirmanai, ukupu wa pepra bolongnung kecada, koluproprepa kumanya di, pung pepra yaredi, doupra bendopkamre. Tonda, Nil me damaida, tu telepai tep, nimidi wa pepra kourameng keca yuma, kolupropredi, gum kupbankamre.

8 Tonda, aNil me mekin ikan yakra tomonung neng yumada, ikan yuma depropmengepa, kange mun kuprepa, ikin kange doupmengedi engepkamenge. Ange utopu, tapu cap, takke keca cap di, mekina enung neng yuma pe, mekina tomon keca, er si jala di tomonung neng yuma peda, engepkamenge. Nil me pumbon kuramre mekina yuma gum kupkamra cadi, pio men tomonkamenge. Atep, sundi mali kange doupra kunkamenge. 9 – 10 Tonda, kain lenan opkal winunga deiyo neng cap, tonda aboun kain wina deiyo keca, ame damai di bongorur keca, er si rami halus sengnunga deiyo neng peda, engenkamenge. Sun telep boun kurun opkal ketekemna deiyo neng capda, kange mun kuprepa, engenkamenge. Ada, lenan opkal wina deiyonge cap, boun kurun opkal ketekemna deiyo keca cap yumada, gum kupkamra tep, kange mun kange doupra, engepmengedi ikin kange doupmengedi kunkamenge. Tonda, sun pel dopmengepa, sun deiyo nengdi, co bo weik karepmengepa, doronung nesala yuma peda, ikin weik kupkamra cadi, sun peda engepra kunkamenge.

11 Mesir mutu neitamai, ila ati arum, er si Zoan mutu talepra kunung deiyo neng yumada, pio walwal keipdangedi, walwal nengpu kunkamenge. Tonda, Mesir mutu ila nimi deiyo ngebo Raja kurur ila ati arum, amutu er si Memfis mutu talepra kunge deiyo-deiyo neng peda, ila kael kemna neng kurami dinin, ataruda, Mesir mutu taleamu ngebo Raja Firaun tep, ‘Ange yumada kuprume,’ pepra, upu kareptenga peda, apepmenge upu yumada, walwalpu kupkamra cadi, nong telep kupra men kupkamre. Atep nengeda, sun aneng yumada, ware kupra sun mutu ila nimi deiyo ngebo tep, ‘Nunda amutu ila kael keamepu neng kunupe. Pumun taru amutu taleami deiyo nengdi, deiamipa, dadeipdanen yakarami nengdi deipseia tep, nun upu gekepserume,’ peptum do?

12 Uo, sun Mesir mutu nesalao. Sun ila kael kemna deiki di, ‘Ange-ange yumada kupkurume,’ pepra, upu kareamsei ila kael nengda, ukutaru dan kunung do? Sun mutu ila kael neng tupa kutengopda, sun anengdi sun mutu deiyo neng tep, ‘Allah erda akeca-keca yuma deiki tara erepra, ila puto ngebo kuredi, im deiki malaikat yuma talerur ngebodi, erdi teneamudi amenda taru kupkamser kecada, ake,’ pepra, lape peptum do? Gum do? Mesir mutu neitamai ila kael neng tupa akungopda, sundi, sun Mesir mutu nesala tep, ‘Allahdi angeda ton kupkamre,’ pepra, sun damai tep lap pepsetenge. Gum dingeda, gume.

13 Gume, ila ati arum er si Zoan mutu kunge deiyo-deiyo neng cap, Mesir mutu talepra kure Raja ngeboda, ila ati arum, er si Memfis mutu cap kunge deiyo-deiyo neng cap yumada, konum pio walwal nengpu kununge. Tek sisi sun anengda, nimi deiyo kepra kungedi, sun Mesir mutu yala-yala neng yuma telep kupra men talenunge. Ukutaruda, sundi taleami nesala yumada, mali bisipu doupra banunge. 14 Allah Yahweh, erdi sun Mesir mutu nimi deiyo kepra talenung neng tep nengeda, kange yawaramnange kareprepa, kange boktopredi wang-wang penapu kununge. Ukununga cadi, sun Mesir mutu talepra nimi deiyo neng yumadi, walwalpu kungedi, Mesir mutu kunge nesala yumada, tali bisi doupra benkamenge. Ukupmantoda, yu me jena nengdi, kange yawaraprepa, bisi bandenkap, orbenapna, abenapna kupbandenkap, sun pe dukna deikipu maramengtopu, Mesir mutu deiyo neng peda utopu, pio walwalpu kunkamenge.

15 Atep nengeda, Mesir mutu nengdi nimi deiyo kepra talepidi, Mesir mutu kunung nesala tep, melipra telep men kweipkamenge. Angetopu, amutu neitamaida, pio amutara kure ngeboda, tenpu ngebo peda, amutu nesala men melipkamre. Atep, sun ila mambul neng pe, mambul pio gum neng, tali kankan nesala peda, Mesir mutu kunge nesala tep, ‘Telep kuptepe kecada ake,’ pepra pio men lap peptenge. Pio walwalpu kupbankamenge. Telep ngebo ton belepra, nimi deiyo ngebo kuredi, amutu nesala tep, ton men telep kupra deipkamre.

“Doryankamre taruda, Mesir mutu kunge nesaladi, Allah tep kware weik kunkamenge,” pepu upu

16 Ataru konum kepyopda, Mesir mutu neitamai kunung nesala yumada, nerapu kuramengtopu, puto boun kupmengedi, kware weik dangkamenge. Deiyoda, Allah Yahweh, er ila puto buru eprepra, sun amutu kunung nesala deiki deipredi, sun tep wenepredi popre pangeda, sun amutu nesala yumadi epmengedi, yo berber pepra, kwar dangkamenge. Deiyoda, Allah Yahweh erda akeca-keca yuma talepra, deiki tara erepra, ila puto ngebo kuredi, im deiki jen talena malaikat yuma talerura tepa. 17 Ataruda, Mesir mutu kunkameng nesalada, Yehuda mutu neitamai kunkameng nesala cap, amutu nengdi kunkameng keca cap, gekepmengedi kwar kuprepa, sun yo moropsemkamre. Ada, sun Mesir mutu nesaladi tamupra tenepkamenge. ‘Uo, Allah Yahweh erda akeca-keca yuma talepra, deiki tara erepra kurur ila puto ngebodi, im deiki jen talena malaikat yuma talerura cadi, nun Mesir mutu nesala tep, popra wenepkamsere. Allahdi teneamutopu keca yuma, tek sisi nun deiki deipkamsera tepa,’ tenepmengedi kwar pio dangkamenge.

Allahdi Mesir mutu cap, Asyur mutu cap, Israel mutu cap, kange di tamupra telep kweipkamra tep, pepu upu

18 Allahdi akeca yuma pel dopkamre taruda, Mesir mutu neitamaida, nimidi domi ila ati arum pamubari kunkameng nesalada, sundi Ibrani upupu kael kepmengedi penkamenge. Sun amutu kunkameng nesaladi, ‘Tek sisi, Allah Yahweh, akeca-keca yuma deiki tara erepra, ila puto kurur ngebodi, im deiki kunge jen talena malaikat yuma, sun deiyo ngebo kurure. Atep nengeda, er si tepapu, pio eremkamepe,’ pepkamenge. Apamu bari mutu neitamaida, tenpu ila ati arum dopra kunkamengai er sida, Keteng Mutu penkamenge. 19 Ataruda, Mesir mutu neitamai sisada, Allah Yahweh er si eremna cap, er gispal dongedi gam keca popra duyangedi karena cap tep, pala gel taplakra deipmengedi, ila mesba dopra deipkamenge. Tonda, Allah Yahweh er si tupa tenena cap, eremna cap tep peten kemdinaida, Mesir mutu tuda atara, yuk mutu tuda ortara wilimdonaida, ila lyom gel dopra deipmengedi ikamenge.

20 Amesba cap, ila lyom gel ikameng nge dopra deipkamengada, Allah Yahweh akeca-keca yuma talepra, deiki tara erepra, ila puto kure ngeboda, im jen talena malaikat yuma talerur ngeboda, Mesir mutu neitamai kurepa, ‘Allah er sipu eremkamepe’ tenen, peten kemdina tep dopra deipkamenge. Ukupkamenga cadi, Mesir mutu nesala tep, yuk mutu nengdi yana, ikin keca deipmengedi, ‘Anesala popmepedi, talenkamep’ teneptenga peda, Mesir mutu nengdi Allah tep, ‘Uo, nun damai yana melipseo!’ pepra moropmengopda, Allah erdi nimi ton doproiprepa, yana sun podan neng yumada popredi, melipra lyepropkamre.

21 Ataru neitamaida, Allah Yahweh, er pedipapu, ‘Sun Mesir mutu kunung nesaladi, ne kael kepkamneng’ tenen, sun damai katuai kupra deipkamre. Adeiki di, sun Mesir mutu nesaladi Allah Yahweh er si cap, er kure keca cap, kael kepmengedi, er sipu eremkamenge. Sun Mesir mutu nesaladi Allah er si eremna tep, yapi keca popra yangedi uku dongoryakankamenge. Tonda, er gispal dona tep, telep keca doupra, er tepapu kareryakankamenge. Mesir mutu nesala, sundi Allah Yahweh tep, ‘Uda naio, kan damaipu kunkamepe. Kan si eremna tep, nunda ukupkamepe, ukupkamepe,’ pepra, pedina upu deiki di yana pepmengedi, ‘Ukupkamepe,’ pepra peipmengetopu, tek sisi sundi kunkamenge.

22 Allah Yahwehdi Mesir mutu nesala, sun mali kunange tep popra wenepkamre. Konum popra wenepyopda, er dipapu tamupra sun tep, kange di tamupra telep kupra kweteipkamre. Mesir mutu nesalada, tamupra Allah damaipu yana moropkamenge. Sundi Allah tep, ‘Naio, melipseo,’ pepra moropmengopda, erdi sun melimna tep, sun ikin keca gum kupra deipredi, sun tep kwetepra derinkamre. 23 Ataru neitamaida, Mesir mutu cap, Asyur mutu cap, daneitamaida, ila bisi ton yapra deipkamenge. Ila pala bisi yapra deipmengepa, amutu butene neitamai kunung nesalada, abisipu orbenmananen, atara yanmananen, kemkamenge. Sun abutene mutu kunung nesalada, Mesir mutu neng cap, Asyur mutu neng cap, sun kikiman Allah er upupu gekengedi, er sipu eremkamenge.

24 Tonda, ataru neitamaida, Israel nesala mutu kunung nesalada, Mesir mutu nesala cap, Asyur mutu nesala capda, kikiman ila mambul tenepra kunkamenge. Sun yumadi, Allah er si eremna tep wisipropkamenge. Sun aweneri mutu kunung nesalada, tenpu kepropmengedi kikiman kunkamenga deiki di, Allah Yahweh erdi sun yuk mutu ban-ban yuma kunung nesala peda, telep kupra deipkamre. 25 Allah Yahweh, akeca-keca yuma talepra, deiki tara erepra, ila puto di talepra kurur ngebodi, im deiki jen talena malaikat yuma, sun deiyo ngebo kurura cadi, er dipapu sun anesala yuma telep kupra deipredi, aupu pepkamre. “Mesir mutu nesala, sunda ne nyapu kununga cadi, nedi sun tep telep kupra deipsene. Asyur mutu nesala, sunda nedi ketekepra deiamsisa cadi, nedi sun tep telep kupra deipsene. Israel nesala sunda, nedi wepra anuamsisidi, ne mawa nesala keipsisa cadi, nedi sun tep telep kupra deipsene,” pepkamre. Nabi Yesayadi aupu pepra seku.