Isaiah 2

“Sion mutuda, antamdana tep deiyo mutu kurure,” pepu upu

1Aupuda, Allahdi Yehuda yala nesala cap, Yerusalem mutu kurami nesala cap tep, Amos er mi Yesaya tep peipu upu ake.

2Tonda, sirya dor gawal dakamre taruda, Allah er si eremna tep domi ati, tupa akupu mutu deikida, ila mambul mutu kunkamre. Mutu-mutu yuma, ila mutu akapu dinin, amutupuda, ila mambul mutu kunkamre. Yerusalem mutu dana-dana tara buku mutuda, yambul mambul dinin, amutupuda, ila mambul mutu erepra tekamre. Ukupra tekre pangeda, mutu dana-dana kunge nesala, yala-yala neng gung weika di bulupra, amutu diryakankamenge. 3Sun mutu dana-dana kunge nesala yala-yala yumadi, upenkamenge. “Gume, amutuda, Allah er si Yahwehdi wepra deiamu mutu cadi, amutu dirbenkupe,” penkamenge. Tonda, “Uo, Israel nesala sun apu bo Yakub tep, kalekra melimamu Allahda, er ati amutu deiki domi ngeda, bulupra dirbenkamepe,” penkamenge.

Tonda, “Nun yumadi Allah er ati domi mutu deiki welepmepe taruda, Allahdi, ‘Ukuna telepe, ukunada mali,’ tenere keca peteremkamsere. Aupu gekepmepyopda, erdi peseretopu, talepra dumsisipu kunkamepe. Erdi melipserepa, er bisipu dombankamepe,” penkamenge. Ange tep nengeda, Allahdi, ‘Ukunkamrume, angeda men kunkamrume,’ pepra peteremsere upuda, Sion mutu di gonga kepmengedi, mutu ban-ban yuma peterep embankamenge. Allahdi pesere upuda, Yerusalem mutu di pesengepa, gekenkamrume.

4Mutu ban-ban yuma kunge nesala tep, ‘Telep nesala ake, mali nesala ake,’ pepra, Allahdi upu bongdinkamsere. Tonda, nesala ban-ban yumadi, ‘Podankamep’ tenen, upu deiki pedangedi, wilimdaramenge nge tep, erdi upu bongdinkamsere. ‘Nimi popkup’ tenen, co takke lupra si ketenemdinge keca cap, sun parang ya cap, kapak ya capda, dopropmengedi, uku dongopmengepa, uku jepredi boun kupyopda, tu palin keca ketenemna tep, taingkamenge. Ukunkameng taruda, mutu-mutu yuma kunkameng nesaladi, ton cap men podankamenge. Ton tara nengdi, ton tara neng tep, ‘Porbenkup’ tenen, ya dopra men porbankamenge. Tonda, nimi porbana tep peteremdaramenge ngeda, ton cap men kunkamenge.

5Atep nengeda, uo, Yakubdi deipupa, dadeipdanen yakaramrum nesala yumada, yakamumpa, nun yumada, Allah er dirin deikipu talepra dombankamepe. Ada weica dopmepedi, nun bankup bisi dirin deiprepa, bisi telep kura epmempedi, barameptopu, Allah Yahwehdi, ‘Ukunkamrume, angeda pio men kunkamrume,’ pepra deipsisi utopu, nundi angepu talepra domembankamnup tara yumada, Allah er upu deiki di dirine kemdiserure.

Allahdi sun dipru eremna neng tep, wenepredi gum kupra deipkamra tep, seku upu

6Nabi Yesayadi pepu.

Uo, ne nai Allah, Yakub erdi deipupa, dadeipdanen yakangedi, ukutaru akunup nesala, kan nyapu sisa Israel nesalada, kandi konum tapmume! Ukupmuma deiyoda, nun Israel tara akunmap mutu dinin, ortara keteng yakan tara neitamai di kunung nesala, sundi tali keca tep, ‘Teka’ tenen, talenung mali kun kecada, nun pedi ange talepra dombanupe. Tonda, sun Filistin nesaladi, ‘Amenda taru, ware kupkamser do?’ tenen, isok pel ton dopmenga deiki di, ‘E, nundi amenda kunkamep ngeda, ake,’ tenepmengedi kununge. Akununga utopu, nun Israel tara neng peda, utopu kunupe.

Tonda, sun atara kunge nesaladi, kan Allah tep pio men kael keamidi, kan si men eremnung nesala tep, antapmengedi, ‘E, nun cap, sun cap, kikiman tonpa kunkamepe,’ pepra, pedina upu pedangedi, buru taledanunga utopu, nun peda utopu kunupe. Ada sun tali dakunge nesaladi amali keca kuramnungtopu, nun Israel yala nesala peda, utopu kunupe.

7Israel yala nesala kunup mutu neitamaida, kunumna weik gat keca, emas cap, perak capda, weik akurure. Tonda, yuk kunumna weik bung keca yala-yala yuma peda, weik akurepa talenupe. Kuda bisam men nukmanto ton akurure. Tonda, nimi porbana tep, kuda bisamdi gipra, tu deiki embaramre keca, er si kereta perang capda, men nukmanto weik talenupe. 8Angepu gum dinin, tonda nun amutu-mutu neitamai, akunupai yumada, nundi, ‘E, akecada nun nai bo akurure’ tenen, isok si eremna tep keca petupra derinup keca, er si patung weik ketenepra deiamupunge talenupe. Tonda, nun pe buru di nimi urasin utopu kupra, petupra deipmepe dingeda, er akeca sipu erepmepedi, er gispal dona tep, nun urasin tu deiki deipmepedi, aisok keca tep si eremnupe. Nun pe buru du di akeca ketenepra deiamepu dinin, atali keca tep si eremnupe.

9Ukupra pio mali weik kuramnupa deiki di, Allah kandi nun Israel nesala yuma tep amu kepra deipsemempa, ali dakmepedi, kan amutarapu kunupe. Mali kunupa deiki di, nun yuma, nun dipru buluksangrepa, amu kepmepedi, kan amutarapu kunupe. Pio ali weik dangnupe. Atep nun nai Allah, kandi nun kankan pio mali kunge nesaladi, mali weik kunge keca tep nengeda, men daepropkamrume.

10Uo, sun amali weik kurum nesalada, mutu buma bukamnga amutara gel tengna do, gel imir pumbon do, amutarapu wekamrume. Agum dingeda, sun anesalada, butbuta neitamai dipu amu kepdarumdi, inipkamrume. Deiyoda, sun amali kurum nesaladi, ‘Uo, nun mali kunange tep, Allah er yu weik deipseredi, nun nong deiki kupkamsere’ tenen, kware weik kunkamrume. Tonda, ‘Allah er ila puto cap, pio telep kurya cap deiki di, er pe dirine weik kururnge, nun damai yana popserur’ tenen, kware weik kunkamrume.

11Ne tek sisi pepsene. Ware nesala do yuma, sun dipru eremengedi, sun asuru erepra gemenung nesala cap, tonda, ‘Nunda pio mambule’ tenen, salnong-nong kamnung nesala capda, Allahdi sun tep amu tara kepra deipkamsere. Ukupserepa, sun ali dakmumdi, kange mun kange doupra kunkamrume. Ataru konum yaryopda, Allahdi wenepseredi, dipru eremna deiki di gemenung nesala yuma tep, geipra amu tara kepra deipyopda, nesala ban-ban yumadi Allah er tepapu, “Uo, ila mambul, pio telep kure ngeboda, er pua,” pepra, Allah er sipu eremkamenge. 12Angeda tali tep men pepsene. Allahdi konum tenemutopu, atumi konum kupre pangeda, Allah Yahweh akeca-keca yuma deiki tara erepra, im deiki jen talen malaikat yuma, sun ila deiyo ngebo kurura cadi, sun dipru erepra salnong-nong kamnung nesala yuma cap, dipru erepra gemenung nesala yuma capda, amu tara kepra deipkamre. Tonda, tuai nesala ban-ban yumadi, ‘Uo akecada, ila mambule, ange puda pio telepe’ tenen, gemepra salnong-nong kamengedi, eremnung keca yumada, Allahdi akeca yuma yanipredi, pio amu tara kepra deipkamre. Tenpunge peda, men tapkamre.

13Tonda, ware nesala do yuma, sundi, ‘Libanon mutu tengamre ila lyom cemara co yuma cap, Basan mutu tengamre ila gat co yala-yala yuma capda, pio mambule, angeda pio urasin telep kuramretopu, nun peda utopu kunupe,’ tenepmengedi, sun pedi, sun pe tep, erepdanung nesalada, Allahdi sun dopra amu kepredi, gum kupra deipkamre. 14Angetopu, ware neng do yuma, sundi, ‘E, sun diso! Ortara ila-ila lyom mutu erepra bukunge cap, ila mutu buma yuma capda, urasin pio telep, puto weik keca kuramretopu, nun peda utopu puto weik nesala kunupe,’ tenedangedi dipru erepdanung nengda, Allahdi pio amu kepra deipkamre.

15Tonda, ware neng do yuma, sundi, ‘E, sun diso! Ortara ila lyom ati dopmepunge cap, tonda ila ati arum dopmepudi dana-dana tara ongopgenepra wipmepu lyom gel beilya cap akapmasera cadi, kalengdapedi, yuk mutu yu nengdi, men yana popsetenge. Teleppu kunkamepe,’ tenenung nesala yumada, Allah erdi dakra tapredi, anesalada pio amutarapu deipkamre.

16Tonda, ware neng do yuma, sundi, ‘E, nundi ila kapal laut mokon deiki embaramrenge cap, tonda pio urasin telep kapal yuma capda, akapmasera cadi, akeca di, bung keca weik kipmepedi yuk mutu dubena kunupmepyopda, pio isomka neng kunupe,’ tenenung nesala yumada, Allah erdi dakra taprepa, laut mokon di jepropyopda, erdi anesala dopra pio amutarapu deipkamre. 17Allahdi ange yuma kupkamra deiki di, sun salnong-nong kamnung nesala cap, tonda dipru eremna deiki di gemenung nesala capda, amu kepra deipkamre. Dipru eremna nesala yuma, geipra amu tara konum kepra deipyopda, ataruda nesala ban-ban yumadi, yuk neng tep si men eremkameng dinin, sun yumadi Allah er tepapu, “Uo, ila mambul kupra, pio telep kure ngeboda, er pua,” pepra, Allah er sipu eremkamenge.

18Ukupkamra cadi, sun tuai nesaladi, tali keca tep, ‘Nun nai bo ake’ tenen, tuai keca dopra, nimi urasin utopu kupra petupra deipmengedi, isok sipu eremnung patung keca yumada, Allah er dipapu akeca yuma, gawal dakredi, gum kupra deipkamre.

19Allahdi ukupkamra cadi, sun tuai ban-ban yuma kurum nesala yumada, kware kunkamrume. Ukuprumu dingeda, mutu buma bukwa amutara gel tengna pumbon do, gel imir pumbon do, tu paliyamenga pum bonpu do, wekrumudi inipkamrume. Ada, sun anesala yumadi, ‘Uo, Allah er yu kuprepa, ila puto deiki di wenepseredi, nun nong deiki deipkamsere’ tenen, ila kware kuprepa, inimbenkamenge.

Tonda, Allah er pio telep cap, ila puto cap kurya tep, er pe ila dirine kupkamre ngeda, ‘Men eptepe’ tenen, inimbenkamenge. Atenepu tumi kepyopda, tuai ban-ban yuma kunge nesala yumadi, dipru pu jepredi, buluksakrepa, kware pio weik kuprepa kunkamnunge. 20Tonda, atumi konum kupyopda, nesala yumada, sundi talerami kunumna weik gat keca, perak cap, emas cap, dopramidi, ‘Isok si eremkamop’ tenen, akeca deiki di nimi urasin utopu kupra, petupra deiami keca, isok si eremna tep tali keca yumada, adipapu tapra bendopkamenge. Ukupkamengada, sun anesala kuramengaida, polyawa ma cap, bura tara embaramre kupe cap kuryaipu, isok si eremna tep petupra derinung patungda, tapra bendopkamenge.

21Ukupkamengada, tali tep gume. Ada, sun tuai ban-ban yuma kunge nesala yumada, kware kunkamenge. Ukupmengedi, mutu buma bukwa amutara gel tengna pumbon do, gel imir pumbon do, wekmengedi inipkamnunge. Ada, sun anesala yumadi, ‘Uo, Allah er yu kuprepa, ila puto deiki di wenepseredi, nun nong deiki deipkamsere’ tenen, ila kware kuprepa, inimbenkamenge. Tonda, Allah er pio telep cap, ila puto cap kurya peten kemnange tep, er pe ila dirine kupkamre ngeda, ‘Epmepedi, adipapu depnup’ tenen, inimbenkamenge. Angeda Allahdi, ‘Tuai nesala ban-ban yuma tep, kange mun keca sun nong deiki deipnyopda, ila kware weik kunkamnunga’ tenen, yankamre tumi deiki di ukupkamre ja.

22Ange tep nengeda, sun Israel yala nesala cap, tuai mutu ban-ban yuma kurum nesala cap, nimi sisadi deiamenge neng tep, ‘Er angebodi, nun ikin kupsere taruda, melipra lyepkamser ja,’ men tenenkamrume. Tuai kunge nesala yumada, sun u bon bisi neitamaida, isin deiki di gam kununge. Sunda tali tuai nesala cadi, ware kuptenga deiki di, sun tuai kurum nesala tep, melipra lyepsetenge do? Gume, angeda pio men kupmanto, dakwapye,’ pepsene. Allahdi upeipupa, nabi ngebo Yesaya gekepudi, Israel yala nesala tep lap pepu.