Isa 20 | XteSC | STEP | Asyur mutu deiyo kepra taleamu ngebo, er si Raja Sargondi, er jen talena neng yuma, sun ila deiyo ngebo tep pepu. “Kandi Filistin mutu neitamai, tenpu ila ati arum, ada Asdod mutu kunung nesala poprbenkurume,” pepra dipupa, erdi amutu kurami nesala bena poprapudi, amutu yuma dalupra dopropu.

Isaiah 20

Nabi Yesayada, Allahdi peiputopu, petenkemna tep bananga keipra deipka tep, seki upu

1 Asyur mutu deiyo kepra taleamu ngebo, er si Raja Sargondi, er jen talena neng yuma, sun ila deiyo ngebo tep pepu. “Kandi Filistin mutu neitamai, tenpu ila ati arum, ada Asdod mutu kunung nesala poprbenkurume,” pepra dipupa, erdi amutu kurami nesala bena poprapudi, amutu yuma dalupra dopropu. 2 Ataruda, Allah Yahwehdi, nimi si Amos, erdi deiamu ngebo, Yesaya tep, “Kandi apepkenetopu kupkurume,” pepra yana peipu. Apeipu upuda ake. “Kanda mali opkal, er si karong goni kenengamumnge cap, yan bol kemamumnge, er si sandal capda, ataruda bena kwiripra tapkurume,” pepu. Upepupa, Yesayadi amali opkal karong goni cap, yan bol, er sida sandal cap kepra benapudi, ange yumada kwiripra tapudi, keteng tamun weneri deiki di, tali nong banangapu embenamu. Akuramu ngeda, keteng tamun weneri neitamai yuma di, er banangapu embaramu.

3 Keteng tamun weneri konum kupkopda, Allah Yahwehdi, Asdod mutu kurami nesala tep, yana upu ton peipu. Ada, “Ne amutara pel don ngebo, nabi Yesayada, keteng tamun weneri deiki di, opkal cap, yan bol cap, kemna gum dipapu, nong banangapu embena kuramu. Ukupra embaramu ngeda, sun diramrumaidi, Yesayada embaramu. Ada, Mesir mutu neng cap, Sudan ^{▼▼Sudan – Amutu sida weneri sengnunge. Menop taruda, Cush mutu perami dinin, amenda taruda, si butene ton perami. Ada, amutu tenpu dinin, Etiopia mutu, tonda Sudan mutu si ton perami. Dinino, amutuda tenpua.} mutu neng cap tep, ila ikin keca kupkamre ngeda, ada Asyur mutu Rajadi, sun tep amenda taru kupkamunge tep, nedi peipsipa, nabi Yesayadi petenkeiamseue. 4 Apeten keiamseunge deiyoda ake. Ada, Asyur mutu nimi deiyo kepra talepkamre ngebodi, sun abutene mutu nesala, ada Mesir cap, Sudan mutu cap, kurerung nesala yumada, adipapu tomoprapredi, sun amutu nesala yuma doupra wenemna ati bena dongopkamre. Nabi Yesayadi, banangapu embena kuramutopu, sun anesala yuma peda, nong banangapu benkamenge. Ada, nimi deiyo neng pe, tali amutara kunung nesala cap, wisi neng cap, kaber neng cap, sun yumada opkal cap, yan bol cap kemna gum dipapu, nong banangapu doupra benkamre. Ada, sun Mesir mutu kunung nengda, ila ali dangna cap, malya demna cap, kunkamenga tep, nong banangau doupra, karen mutu dubenkamre.

5 Asyur mutu deiyo ngebodi, amutu butene tomopredi popra, karen mutu dubenkamre taruda, sun yuk mutu nesaladi, Mesir mutu nesala cap, Sudan mutu nesala cap tep, ‘Uo, nunda sun dipapu melipkamseng ja,’ tenepmepu nesala dinino, ‘Uo konum dubenmang adano,’ tenepra, mali kange dounkamenge. Mali kange doupra kunkameng nesalada, amutu nesala butene dubengepa, epmengedi, ‘Uo ware kuptepe do? Nun mambul kupsere. Sundi, nun melipkamsenge,’ teneramepu nengda, ‘Konum gum kupre,’ tenen, kange mun kupkamre. 6 Ataruda, ila laut mokon pirman tara kunung nesaladi upepkamenge. “Uo, Diso. Nundi sun abutene mutu nesala tep, Asyur mutu ngebodi poryakasere taruda, sundi yana melipkamseng ja,’ peramepu nengda, ataru sunda wareto kupre do? Atep nunda ware kuptepe do? Ware kupra bura saka sepdaro betepe do? Ware neng melipsetengedi, lyepropkamsetenge do?’ pepra, asimpetedankamenge. Allahdi pepu.