Isa 21 | XteSC | STEP | Awenemna upuda, Allahdi ila laut mokon deipka pirmanai, me wenenga palpal damai kunung nesala, Babel mutu neng tep, ne Yesaya damai yana pepra deipneu. Ila kange mun kuna deiyo keca yankamre ngeda, ukupmanto, ila puto kum pung pepra, yakaredi dana deia, dana deia, dana deia, tamuptopra yakaramretopu kupra, iknapi dam tara di, (arah selatan tara), ila mali kunung mutu, Negeb mutu neitamai di ila ikin kecada yankamre.

Isaiah 21

Ken deiki di Babel mutu cap, Edom mutu cap, Allahdi wenepra popkamrenge tep, seku upu

1 Awenemna upuda, Allahdi ila laut mokon deipka pirmanai, me wenenga palpal damai kunung nesala, Babel mutu neng tep, ne Yesaya damai yana pepra deipneu. Ila kange mun kuna deiyo keca yankamre ngeda, ukupmanto, ila puto kum pung pepra, yakaredi dana deia, dana deia, dana deia, tamuptopra yakaramretopu kupra, iknapi dam tara di, (arah selatan tara), ila mali kunung mutu, Negeb ^{▼▼Negeb – Amutuda, Israel tara mutu dinin, pio dapu tara dinin, arah selatan kwamu. Amutuda, ila bupu kupka cadi, me pio gum mutu kupka cadi, nimida atara neitamai men kurami. Pio katawai mutupu kwamu.} mutu neitamai di ila ikin kecada yankamre. 2 Ne Yesaya ken mana deiki di epsi ngeda, ne pio kwar kupneu. Aken mapsa deiki epsi ngeda, yuk mutu yu nengdi, Babel mutu nesalada dopra, sun podan neng deiki deipkamenge tep, kunmaupa epsi. Ton nengdi, yuk nesala tep, mawa di tali upu peramitopu, ataruda, tupa tali mok upu penkamenge.

Aken mapsi ngeda, ton tara nesaladi, yuk mutu neng tep, sun bung keca yumada, upula doramitopu, ataru peda yangedi, ton mutu neng talenung bung keca yuma dalupra doropkamenge. Ange yumada, ukunmaupa epsi. Tonda, Elam ^{▼▼Elam – Amutuda, Iran mutu dinin, keteng yakan tara kwamu.} amutuda jen neng yangedi, Babel mutu nesala poryankamenga tepa. Tonda Madai ^{▼▼Madai – Madai mutuda, Iran tara neitamai kwamu.} mutu jen neng yangedi, Babel mutu nesala yana, warekra popkamenga tepa. Ada, Babel mutu nengdi, yuk mutu nesala yuma, ikin keca sun nong deiki derirepa, kange mun kuramnga tep, Allahdi Babel neng tep, sun puto gum kupra deipkamre.

3 Ken manengato kupmasidi, akeca yuma kunmaupa epsinge cap, gekepsinge capda, wang-wang pepneupa, moupra men kael kepsi. Ukupsa deiki di, neda kange mun kupneudi, kwar kupneu. Ukupmantoda, mundu douamre ner, mi deiyo sengrepa kange mun kuramretopu kupneu. Ukupneua deiki di, kange mun kupmaneupa, upu ton men gekepmanto kupsi. Tonda, ‘Ange yumada ware kupkamre do?’ tenen, mambul kange doupmasa cadi, telep kupra men epmanto kupsi. 4 Ange epsidi, ne dipru neitamaida, kware pio weik kupneu. Tonda akunmaupa epsinge tep, ne pio kwar kupneu. Sintara kuptupa, tali kange doupra, teleppu kuptene,’ tenepsi dinino, alukunda konum yauopda, ne kange telep men kupneu. Atumi lukunda neitamaida, kware kunmaneu. Kware pio weik kupneupa, yo moropsemaneu.

5 Ne aken mapmasidi taru di dinmasipa, ila kailya kalepra jepkamaia tep, ketenepmaipa epsi. Nimi bo neng ton upupmaipa, sun ati yana bukra jenkamaia tep, bungna telep ason deiki ketenepra deipmai. Aketenepra deipmaiaida, upupmai nimi bo neng upupmai nengda, akati wekra bukmaidi, jen keca cap, me cap jenmai. Ayana bukra jenmai nengda, men kael kepmainge dinin, dato-dato di, “Angepu kupkurume,” pepupa gekepi. Ada, “Sun Jen talena neng deiyo kepra kurumu neng yumada, nimi podana tep keca cap, ‘Mar popserur’ tenen, nong lelimna keca, er si perisai dopmumdi, akeca deiki minyak me likra deipmemdi, akeca adipapu keteneipkurume,” peipupa, gekepsi.

6 Upepkopda, Allahdi akeca-keca yuma talepra ila puto weik ngebodi, ne Yesaya tep, upepneu. “Kanda bememdi, Yerusalem ati arum dopra kunungai kalengna ngebo ton, dopra deipmempa, erdi akati arum beilya buplan damai kalengrure. Akalengna ngebo tep pepkurume. ‘Kandi epmem ngeda, adipapu amupra peryankurume,’ pepra deipkurume. 7 Akalengna ngebo dinmarepanen, ‘Nimi ton kereta kuda deiki bukmangepa duyakankamang do, tonda kuda bisam bali deiki bukra yakankamang neng do, tonda unta bisam bali deiki bukra yakankamang neng do, keledai bisam bali deiki bukra yakankamang neng do?’ tenen, ange tep moupra kalekredi, pio moupra dinkamrure.

Allahdi Yesaya tep, “Kandi aupu perbenkurume,” pepra deipu.

8 Uda, ken mapmasidi, epsi ngeda, abisi bon kalengna ngebodi, ila upu deiki di pepmaupa gekepmasi. Ada, “Uo, ne deiyo ngebo, neda ataru-ataru yumada, keteng komuni pe, lukunda neitamai peda, pio kalengnapu kunune. ‘Yu nengdi poryasenung’ tenen, lyom gel di deipra, ati dominge deiki teknedi, pio kelakra dinapu kunune,” pepmaupa gekepmasi. 9 Tonda, abuplan bisi bon kalengna ngebodi pepmau. Ada, “Sun yuma diso! Sun jen talena nengda, kuda bisam bali deiki bukra yakanmang nengda, nimi butene-butene kepra yakanmang nengda, konum bukra yakanmang adano! Tonda, abisi buplan bonai kalengna ngebo dipapu, “Uo, Babel mutu ila ati arum yumada, konum uruptapmangdi, dakra tapmange. Tonda, sun amutu nesaladi si eremna tep, patung ketekepra deiami keca yumada, dakra tapmangpa, sikke bukra tu deikipu sakmange,” pepra, lap pepmaupa, gekepsi.

10 Gekepsidi, ne Yesayadi pepne. “Uo, ne yala neng, sun Yudea tara kurum Israel yala nesalao! Ukupmanto, ‘Gandum du sakamre’ tenen, gandum paramrenge sekmengedi, keteng di kolupredi, du keca bongopra sangamretopu, sun Babel mutu nesala, sun podan nengdi, sun tep ikin keca weik, sun nong deiki deipidi, konum yanipdongomsei. Tonda, ukupmantoda, gandum du bam keca, kumanya di duberepa, du telepnge dopropkunga tep, nimidi gandum du keca erepra doupmengepa, kumanya di puprepa, bam keca duberedi, gandum du wertamamretopu, Allahdi konum kuamseu.

Ukutaruda, ne Yesayadi Israel nesala sun nai bo Allah Yahwehdi lap peipmanu upu pepkusene. Allah Yahwehda, akeca-keca yuma talepra, erepra deiki tara kurur ila puto ngebodi, im deiki jen talena malaikat yuma, sun deiyo ngebo kurure. Erdi sun Israel yala nesala tep, pio kalekra diseredi, melipra lyemdoserure. Atep, sun kai telep upu ne deiki konum peipneu ngeda, lap pepkusene.

Doryankamre taru di, Edom mutu wenepkamrenge tep, pepu upu

11 Dumah ^{▼▼Dumah – Amutu si tep nengeda, pumun taru ‘Dumah’ perami dinin, yuk mutu si ton, Edom cap, Sier cap ton perami dinin, atara amutuda tenpu kwamu. Ada Yudea mutu dinin, pio iknapi dam tara, arah selatan kwamu mutu tep pepi.} mutu tep, Allahdi, “Ukupkamne,” pepra, ne Yesaya damai peipneu. Ada tenpu ngebo, Edom mutu neitamai kure ngebodi, ne tep upupneudi aupu pepneu. “Uo, ne kalengna ngebo, alukundada tupa ipkamar do? Berengna tep nengeda, ware kuprap taru kuprepa, berekamar do?” pepra asipneue. 12 Upepra asipneupa, nedi tamupra er angebo tep pepsi. “Berengnada yankure, dinino amenda taruda lukunda peda tamupra yankamare. Ange tep, amenda taru, ‘Ton cap asipetepkune,’ tenepmemnyopda, tamupra yana asimyankamanerume,” pepsi. ^{▼▼pepsi – Aupuda, domona upu utopu pepkada, deiyoda ake. Ada, amenda taru kupkamre ngeda, kapul men kael keptepe. Atep, ‘Amenda tarupu tamupra yana asipetepkamrume’ tenen, pepu.}

Doryankamre taru di, Arab tara mutu wenepkamrenge tep, pepu upu

13 Arab tara mutu kurum nesala tep, Allahdi, ‘Ukupkamne,’ pepra, ne Yesaya damai yana peipneu. Aupuda ake.

Uo, sun Dedan yala neng kurumada, sun bung keca kunumna tep, Unta bisam bali deiki bukra yakarum nengo. Sundi sun inipra mapkamrumnya tep, Arab tara mutu neitamaida, tali paramre takke keca cap, bura tara mutmuta palpal cap, aceipu yana inipra kunkamrume. 14 Atep, sun Tema mutu kurum nesalao, sun aneng damai yanmankap, me putankamre nengda, sundi me gwepra karerbenkamrume. Tonda, sundi, ‘Yuk mutu nengdi yana popsenung’ tenen, sun mutu di tapra, amutu tengyaidi, katawai mutu neitamai inipra kunung nesala tep, jen depmange pangeda, sun Tema mutu nengdi, jen keca doupra bena karenkamrume. 15 Akeca yana karenkamruma deiyoda, ake. Sun anesalada, yuk mutu jen nengdi, ‘Parang ya cap, mar capdi adipapu popkup’ tenen, domyaipa, bura saka yai nesala kununga tepa. Sun anesalada, ila mar podanmaiai di, kange mun kange dopura, bura saka sepdaro yaidi, amutu neitamai yana inipra, kunung neng tepa.

16 Uda, Allahdi akeca-keca talepra, ila puto deiyo ngebodi, ne Yesaya damai yana upepneu. “Ukupmantofa, tali pel domenge nengdi, tenpu keteng tamun deiki di pel dorameng taru utopu, ukutaru peda, tenpu keteng tamun go neitamai dipapu, Arab tara akunge neng, Kedar mutu kunung nesala, sundi talengedi, kange derinung keca yumada, adipapu gum kupropkamre. Yuk nesaladi, sun Arab tara talerami keca diramidi, ‘Uo, sunda ila mambul nesala kununge’ tenen, peraminge yumada, gum kupkamre ja, pepsene.

17 Tonda, ataru peda, sun Arab tara neitamai kunge neng, Kedar yala neng, sun kunung mutuda, mar podana tep, ila kael neng ton akununge, dinino ataru neitamaida, sun jen talena nengda, tenpu-tenpu nengpu gam tupa kunkamenge.” Aupuda Allah Yahweh, Israel yala nesala pio kalekra melipra lyemdorur ngebodi, aupu konum pepra deipka tep, nedi sun tep aupu pepsene,” nabi Yesayadi pepu.