Isa 22 | XteSC | STEP | Ne kunmasi mutuda, Allahdi, “Dortaruda, ange-ange yumada kupkamre,” pepra, lap peryakaramu banai mutu kunmasi taru di, aupu yana pepra deipneu. “Uo, sun Yerusalem mutu kurum nesalao! Sunda mali kurume. Ada, ware keca deiyo tep lukdana adipapu, ‘Ping-ping kange douprapmepedi, lelim weik penkamep’ tenen, sun kurumu ati gat amnya bo deikipu welepbarum do?

Isaiah 22

Doryankamre taru Yerusalem mutu wenepkamra tep, pepu upu

1 Ne kunmasi mutuda, Allahdi, “Dortaruda, ange-ange yumada kupkamre,” pepra, lap peryakaramu banai mutu ^{▼▼banai mutu – Banai mutu pepkada, ada Yerusalem mutu ila ati arum damai dinin, keteng yakan tarada, Kidron mutu banai cap, tonda, iknapi tara (arah selatan) Hinnon mutu banai cap tep pepu.} kunmasi taru di, aupu yana pepra deipneu.

“Uo, sun Yerusalem mutu kurum nesalao! Sunda mali kurume. Ada, ware keca deiyo tep lukdana adipapu, ‘Ping-ping kange douprapmepedi, lelim weik penkamep’ tenen, sun kurumu ati gat amnya bo ^{▼▼gat amnya bo – Pumun taruda, sun Israel nesalada, mo gum mutu kuramya cadi, sundi domi atida, gel di doramya cadi, sun ati deiki tarada, amnya bo sisa men derirami. Ati deiki tarada, ban kupra gat keca dipapu doramya cadi, akati deiki tara weleramidi, tali kange deipra beipye peingami.} deikipu welepbarum do? 2 Ware keca deiyo tep, sun Yerusalem mutu kurum nesalada, kange deipmarumdi, ataru ila upu di penmarum do? Sun mutu neitamai konum portamami nesala yumada, nimi podan taru parang ya di, ponmaipa men derami. Gume, mar podanai di, podanmankap, parang ya di popmangpa, men depmange.

3 Sun Yehuda tara kurum nesalada, sun mutu talepra deiyo-deiyo neng yumada, ‘Yu nengdi popsenung’ tenen, kware kupupa, sundi sepdaro bura saka bendopmange. Adeiki di, sun jen deiyo nengda, mar ton men dopmangepapu, adipapu yana tomopmange. Sun mutu deiyo neng, ila puto kunung neng peda, bura saka konum karenai benmangupane, sun podan nengdi dombena, tamopnapu kupmange. 4 Ange tep nengeda, nedi konum pemsisi. Sundi ne Yesaya tep, dina gume. Neda, kange mun kange doupnedi, ila puto di engenkamne. Sundi ne tep, ‘Uo, nun kapda, ikin kange dounmara cadi, nundi er kange tamupra telep kupra deipkupe,’ tenena gume. Ada, ne mutu nesala sisa yumada, ila di bicau tenenun dinin, yu nengdi anesala konum popra gum kweipmanga tep, mambul kange doupra kunmane. Dinino, sundi ne tep, ‘Uo, nun kap er dipru kwa dipkupe,’ tenena gume.

5 ‘Nun kabo er dipru kwadipkupe,’ men tenepkamruma deiyoda pepkusene. Ada, Allah ^{▼▼Allah – Ayat lima neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, jenek kupra sekmupu.} Yahweh, akeca-keca yuma talepra, deiki tara erepra, ila puto weik ngebo, erdi im deiki jen talena malaikat yuma talerure. Tek sisi pepsene. Erdi konum teneamu tumi tenpu ton kepkamre. Atumi konum damai kupyopda, Yehuda yala nesala yumada wang-wang peprepa, upu weika di pepkamenge. Ada, sun podana tep jen nengda, denge pio weika di, Yerusalem mutu wekra yangedi, amutu nesala yuma popra yanipdongopkamenge. Tonda, amutu ban mutu yumada, pio mali kupdongopkamenge. “Angeda dortaru kupkamra tep, peryakarur mutu banai di kupkamenge. Sun podan neng yangedi, amutu ongopgenepra, dana-dana tara ila lyom gel beilya wipdongopinge yumada, urupra dakra tapkamenge. Ataruda, Yerusalem mutu kunung nesaladi, “Uo, nun melimyaseso!” pepra, ngolokameng ngeda, mutu deiki kunmange nesala peda, gekepkameng dinin, men yana melipkamenge.

6 Sun Siria ^{▼▼Siria – Amutu si tep nengeda, ton Allah upu buku neitamaida, Iran mutu sengnunge, ton nengdi Elam sengnunge, dinino, amutu tenpu kwamu.} mutu jen talena nengda, nimi porbana tep kuda bali deiki bukmengedi yankamenge. Ton jen nengda, kuda bisamdi giproprepa, tu deiki banung keca, er si kereta perang, deiki bukrapmengedi yankamenge. Atarupu, sun Elam mutu neng peda, mar cap, jen cap ketenepra duyankamenge. Tonda sun Kir mutu jen neng peda, ‘Nun podan nengdi marapsenung’ tenen, sun nong lelimna keca, er si perisai, ketenepra doupmengedi, yankamenge.

7 Uo, Yehuda mutu nesalao, Yerusalem mutu damai dinin, sun tu telep mutu banai yumada, urasin pio telep kwamu dinin, ukutaruda, mar podana taru tep, kuda bisamdi giproprepa, tu deiki banung keca, er si kereta kuda dipapu bena deipmangpa, amutu yumada dinikmare. Tonda, yuk jen nengdi, kuda bali deikipu bukra benkameng neng weika di, Yerusalem mutu ila ati arum wengna tep bisi buplan damaipu bena kalekmange. 8 Yehuda yala nesaladi, ‘Nun mutu neitamai mar podana tep, yuk mutu nengdi yana popsenung’ tenen, ketenepra deiaminge yumada, Allah Yahweh, er dipapu akeca konum gum kupra deipmare.

Uda, yuk mutu yu nengdi poryanmai taruda, sun Yerusalem mutu kurum nesala yumadi, ‘Akeca doupmepedi, melipdatepe’ tenen, sun mutu nimi deiyo ngebo Rajadi er ati dopudi, podan taru kuna tep deiamu nimi pon kecapu teneprume. Ada, Raja er kuna ati neitamai wilipra domu ati, er sida, ‘Gedung Hutan’ pumbon, nimi pon keca weika di mawa deiamunge tep, ‘Ange melipra lyepropsetue,’ teneramrume. 9 Tonda ataruda, sundi Yerusalem mutu neitamai dinin, pumun taru Raja Dauddi domu ati arum dana-dana tara, ila lyom gel beilya deipra wipdongopkai yumada, dipeteprumudi, bon weikanun kwamunge epmumdi, ‘Uo, nun poryankamseng nengda, abon di nun mutu wekra popsenunga cadi, akupu bonda, lepsikra dopkamepe,’ teneprume. Tonda, ‘Nun jen cap, me cap, gum kupserur’ tenen, sun dipapu, Yerusalem ati arum neitamai embaramre me yuma bulupra tenpuai dutara mokon (kolam) neitamaipu, pumbonpu deipmarume.

10 Tonda, Yerusalem ila ati arum dana-dana tara ongopgenepra wiamrum gel beilya kwamu bon dipetepmumdi, ‘Akwamu bon yuma dukdongopra lepsisikra dopkamep’ tenen, Yerusalem mutu neitamai domrum nimi ati-ati yuma, dipetep embanmarume. Ada, dan gel ati uruptapmepedi, akati gel dopmepe dingeda, nun gel beilya kwamu bon yuma lepsikra doptepe do?’ tenen, dipetep embenmarumdi, uruptapmanto ati yuma nukmarume. 11 Tonda ataruda, sundi amutu ati arum dororuma neitamaida, ‘Nun jen me gum kupserur’ tenen, sundi ukupu me mokon ton palipra deipmarume. Ada, sun pumun taru paliamrum me mokon di, me doupra yamumdi, apalipmarum ukupu mokonpu yana dongopmarume. Amokonda, pumun taru wiami gel beilya ortara, utopu atara ukupu wiamum gel beilyada, aneitamai di ukupu mokon palipmarume.

Apel yuma konum dopmarum dinino, sundi Allah tep moupra men tenipmarume. Aikin keca sun damai yanmau keca yumada, nun nai bo Allah, er dipapu ketekepra deipu ngeboda, sundi er tep men enkamrume. Tonda, sun podana tep neng yanmangu ngeda, Allah dipapu go karepu di, ‘Ukupkameng’ tenen, konum teneamudi, go kareamupa, sun podan nengda yakanmai. Sundi, ‘Ware kuptepya deiki di lyepdatepe do?’ teneamrum dinino, menop taru di, ‘Angeda ukupkamenge, ukupkamenge, ne ton ukupkamne,’ konum teneamu deiyo ngebo Allah tep, sundi ton, er tep moupra men teneamrume.

12 Allah ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, jenek kupra sekmupu.} Yahweh, akeca-keca yuma talepra, deiki tara erepra, ila puto deiyo ngebo, erdi im deiki jen talena malaikat yuma talerure. Ataruda, Allahdi sun tep upepseue. Ada, “Engepkurume, tonda ila di ngolokmumdi, engepkamrume. Tonda, engepkuruma cadi, sun giso potong toupso! ^{▼▼toupso – Pumun taruda, Israel yala nesaladi, kange mun kange douami taruda, ‘Yuk neng ton epmengedi kael kepkameng’ tenen, sun giso potong yuma toumami.} Ukupra toupmum dingeda, sundi ikin kange doupmumdi, mali opkal, er si karong goni kenekamrume. Ange yumada, ‘Uo, nun pedi mali kuramepu’ tenen, peten kemna tep, ange kupkamrume,” Allahdi peipseu. 13 Upeipseu dinino, sun Yerusalem mutu kurum nesalada, telep kange doupra, pining kupserepa kange deipmumdi, ila kailya kalemrume. Sundi sapi bisam cap, domba bisam cap, weikanun popmumdi, tu dopra jeprume. Tonda anggur me dopra jemumdi, aupu perume. Sundi, “Gume, sun yuma yakaso! Nun yumada, anggur me cap, telep tu keca cap jepedi, tali kange deipra kunkamape. Ukupra jenmapedi, mapmapya berekre tumida, nun yuma depkamap ja. Atep ikin kange douna gume,” pepra, kange deipra kunmarume.”

14 Allah Yahweh, akeca-keca yuma talepra, deiki tara erepra, ila puto kurur deiyo ngebo, erdi im deiki jen talena malaikat yuma talerure. Er dipapu, ne Yesaya damai yana jenek kupra yaudi, yana upepneu. “Tek sisi pepne, Yehuda mutu nesala, sun mali kupmarum ngeda, men daepropkamsene. Tapnepa, sunda adipapu depropkamrume. Aupuda, ne Allah Yahweh akeca-keca yuma talepra, deiki tara erepra, ila puto kunun ngebodi, im deiki jen talena malaikat yuma talenune. Ne dipapu aupu pepsene,” Allahdi pepupa, ne Yesayadi gekepsi.

Raja kuna ati kalekra melimna ngebo, er si Sebna, wenepkamrenge tep, pepu upu

15 Allah Yahweh akeca-keca yuma talepra, deiki tara erepra, ila puto kure ngebodi, im deiki jen talena malaikat yuma talerure. Er dipapu ne Yesaya damai yana pepra deipneu.

Ada kandi Sebna damai bemempa antapkurerume. Sebnada nimi deiyo ngebo Raja, er kuna ati pel dona neng yuma, sun deiyo ngebo kurure. Akati keca yuma kalekra melimrure. Ange bo tep nengeda, kandi ne Allah peipman upuda, er damai bena pepkurume.

16 Seba tep upepkurume. “Allahdi upepkere. Sebna, kanda ware deiyo ngebodi kan tep, ‘Ukupkurume,’ peipkeupa, akeca kurum do? Kanda wareto yala deiyo ngebo kumemnya tep, akeca pel donmarem do? Kan pe kange dipapu, ‘Neda ila ngebo cadi, ila mambul deiyo neng depmengepa, agel mutu deikipu peinunga cadi, ne depnyopda, ne peda acapu peipkamnenge,’ tenepmamumdi, kan gel imir peinai tep, kan pedi agel imir pumbon palipra ketenepdidanmarum do? Ukupmaremada, mali kupmareme. 17 Moupra gekepnerume, neda Allah Yahwehdi, kan tep, mali kange doununa cadi, moupra tenepmemdi gekepkunerume! Ne Allah Yahwehdi kan nong puto di talepkenedi, kanda nimi deiyo ngebo pel dona tep, deiyo keca karepkei ngeda, adipapu puto di dalupra dopropnedi, gum kupra deipkamne. Ange yumada, nedi gum kupra deipkamken ja.

18 Tonda, nedi kan ila nimi deiyo neng bungamengai deiki di dopropkenedi, bura dokotepkamken ja. Ne buru puto di, kan taleprapkenedi, bola dopra gamutamamengtopu kupkamkene. Nedi kan dopra, pio karenai, pala mutu neitamaipu donokamkene. Nedi kan dopra, bura tara mutu donokenyopda, kanda amutu dipapu bena, dadepkamreme. Depmempa, nimi porbana tep dopra derirum keca, kan kuda bisamdi gipra tu deiki embaramre keca, er si kereta perang keteneipmumnge yumada, aceipu pio dakupkamrure. Sebnao, kan tara neng cap, kan nyapu silip cap dipapu, kan tep tenepmengedi, ‘Uo, ukutaruda, nun deiyo ngeboda, konuma, Pio amu tarapu kupmare’ tenen, kan tep ali weik kunkameng. 19 Atep nengeda, ne Allahdi kan pel dona tep deiyo keca karepkei ngeda, gum kupra deipkamkene. Tonda, nedi kan ila bungna keca deiki bungmem ngeda dopra, dokotepkamkene. 20 Ukupkene taruda, nedi ne amutara pel dona ngebo Elyakim tep kongpepkamne. Elyakim er nai boda, Hilki kuramu.

21 Nedi Sebna kan nimi deiyo ngebo petenkemna tep kenengrum opkal, bura tarange cap, deiyo teng capda, dopropkenedi, Elyakim er deiki deipkamne. Ada Raja kuna tep, peten kemdina tep opkal cap, deiyo teng capda, kan pel talepra domem ngeda dopra, erpu karepkamna tepa. Ne Allahdi kan Sebna tep, ‘Nimi deiyo pel donkamre’ tenen, pel dona deiyo keca kareamkesi ngeda, dopra angebo Elyakim tep karepkamna cadi, Elyakimda, Yerusalem mutu ila ati arum neitamai kunkameng nesala cap, Yehuda tara mutu kunkameng nesala cap yumada, sun nai bo utopu, sun deiyo ngebo kunkamre.

22 Ne Allahdi, sunda Dauddi deipseupa, dadeipdanen yakarum nesala, sun nyapsilip kurumu ati buplan pangna kunci dopra, Elyakim tep karepkamne. ‘Erdi, ila puto di akati talepkamre’ tenen, peten kemdina tep, akunci karepnepa, ange dopra, er morokyo deiki deripkotepkamre. Ukupnepa, Elyakim erdi akunci dopra, akati buplan paktapre pangeda, yuk nimidi ton, men yana abuplan dekdongopkamenge. Tonda, Elyakimdi akati buplan kunci kepredi dekdongopre pangeda, yuk nimidi ton men yana buplan pakaipkamenge.

23 Ne Allahdi, Elyakim erdi amutu nesala deiyo kepra talepkamrenge putoda, ukupmanto nimidi dela deiki gereng koteramengtopu kupra tep, derin keca kuna deipnedi er tep puto keipkamne. Ukupnepa, Elyakim erdi amutu nesala puto di, telep kupra talenkamre ja. Tonda, amutu yuma pio telep kupra talepre pangeda, er nai bo Hilkia cap, er nai bodi deiamupa, dadeipdanen yakanung nesala cap, er tara nyapsilip yuma cap tep nengeda, yuk mutu nimi yumadi, ange epmengedi, ‘Uo, erda pio telep pelpu dorura cadi, ila mambul ngebo kurure’ tenen, er tep gispal donkamenge.

24 Elyakimdi, pio telep kupra, amutu keca yuma taleamrepanen, er nyapsilip yuma kunkamenga neitamai di, sun putan keca cap, sun ikin kunkamre keca yuma capda dopra, er deikipu derinkamenge. Er dipapu ange yuma pel donkamre. Ada, Elyakim er gispal dona tep, sun anesala ila ikin kurenge pe, yambul ikin kurenge pe, putanange peda, er deiki dipapu dopra derinkamenge. Deiyoda, yambulnge pe kunkamre pepne ngeda, ukupmanto mangkok cap, panci me gamna mau cap tepa. Ada, wisi neng pe, kaber neng pe, mambul neng pe, tali neng peda, sun yuma er deiki dipapu kunkamenge.

25 Dinino, neda Allah Yahweh, akeca-keca yuma talepra, deiki tara erepra, ila puto kunun ngebodi, im deiki jen talena malaikat yuma talenune. Nedi pepsene. Doryankamre taruda, Elyakim er puto weik kunkamre ngeda, gum kupkamre. Ukupmantoda, nimidi derirkotemna tep keca utopu puto di dopra, dela deiki puto kepra deipmenge ngeda, amenda taru puto boun kuprepa, sakamretopu, Elyakim peda, er puto gum kupkamre. Ukuprepa, Elyakimda, gupda pepra tuai sakamre. Ukuprepa, nimi yuma cap, akeca-keca yuma cap, Elyakim er deikipu kuramenge nesalada, sikke buktapkamenge. Angeda tali tep men pepsene. Neda Allah Yahweh kununa cadi, nedi pepmasentopu, tek sisi nong kupkamre. Ne Allahdi konum pepra deipsene, Allahdi pepu.