Isa 23 | XteSC | STEP | Tirus mutu wenepra mali kweipkamrenge tep, Allahdi ne Yesaya damai yana pepra deipneu. Aupuda ake. Ada, ila laut mokon deiki embaramre umpena, Tarsis mutu bena kurami taruda, pio mambul kange doupra engerami. Deiyoda, Tirus mutu ila ati arum domi ngeda, konum urupra daktapidi, sikke buktapi. Sun laut mokon deiki umpena talen nengda, ortara laut mokon dana-dana tara sekdongomu mutu, er si pulau Siprus di benap, Siprus mutu damai mokon deiki yana deipmai taruda, Siprus mutu nengdi sun tep, “Uo, ortara ketengban tara, ila ati arum Tirus mutuda, konum popra yawaraptapmange,” pepmaipa gekepmai. Tonda, “Tirus mutu laut mokon deiki embana tep kapal derirbanai cap, amutu nimi ati-ati yuma capda, dakra sikke buktapmange,” pepmaipa, sun Tarsis mutu kapal laut talen nengdi, aupu gekepra kael kepi.

Isaiah 23

Doryankamre taruda, Allahdi Tirus mutu cap, Sidon mutu cap, wenepkamrenge tep, pepu upu

1 Tirus ^{▼▼Tirus – Tirus mutuda, Israel tara dinin, pio dapu tara, arah utara kwamu. Aila ati arumda Laut Mediterania pirman kwamupa, sun Fonesia yala nesala amutu neitamai kurami. Anesalada laut mokon deiki embana tep keca yumada, ila kael neng kurami.} mutu wenepra mali kweipkamrenge tep, Allahdi ne Yesaya damai yana pepra deipneu. Aupuda ake.

Ada, ila laut mokon deiki embaramre umpena, Tarsis ^{▼▼Tarsis – Tarsis mutuda, pio karen mutu, keteng yakan tara, mutu si Spanyol mutu kwamu. Amutuda, ila laut mokon pirman mutu cadi, laut mokon deiki embaramu kapal weika di amutu di tapra Tirus mutu damai yakarami.} mutu bena kurami taruda, pio mambul kange doupra engerami. Deiyoda, Tirus mutu ila ati arum domi ngeda, konum urupra daktapidi, sikke buktapi. Sun laut mokon deiki umpena talen nengda, ortara laut mokon dana-dana tara sekdongomu mutu, er si pulau Siprus ^{▼▼Siprus – Siprus mutuda, ila laut mokon, Laut Mediterania neitamai buku. Ada pulau mutu tep, dana-dana tara yumada, laut mokon di atu sekdongomu.} di benap, Siprus mutu damai mokon deiki yana deipmai taruda, Siprus mutu nengdi sun tep, “Uo, ortara ketengban tara, ila ati arum Tirus mutuda, konum popra yawaraptapmange,” pepmaipa gekepmai. Tonda, “Tirus mutu laut mokon deiki embana tep kapal derirbanai cap, amutu nimi ati-ati yuma capda, dakra sikke buktapmange,” pepmaipa, sun Tarsis mutu kapal laut talen nengdi, aupu gekepra kael kepi.

2 – 3 Ange tep nengeda, sun laut mokon pirman kurum nesala, ila ati arum sida, Sidon mutu kurum nesala peda, Tirus mutu konum popra yawaraptapmangada, teneprumudi sun kange neitamai di dim pepra engepkamrume. Tonda, sun Sidon mutu ^{▼▼Sidon mutu – Sidon mutuda, Laut Mediterania pirman kwamu. Aila ati arum Sidon mutuda, Tirus mutu damai dinin, dapu tara, arah utara ton cap 25 kilometer utara bena dakuamu.} kurum nesaladi, sun kapal deiki bukra, laut mokon deiki embaramrumdi, yuk karen mutu bung keca kunumbaramrumdi, atarapu tamupra duyakaramrume. Tonda akeca yuma kunupra, sun pe mutu tamupra duyakaramrume. Ukupra pel doramrum nesalada, sundi ton upu men pepkamrume. Dinino, upu pena gum di, sun kange lukdanaprumudi, engenkamrume. Sun mokon deiki embarur umpena, kapal deiki di, dan mutu do yumada, orkaren tara laut deiki konum embanapu kuramrume. Sundi bung keca weik kunuamrumdi, ange dopra yakaramrume.

Ukupmantoda, Mesir mutu neitamai kure mutu, Sihor mutu di, gandum du bena kunupra, sun pe mutu tamupra duyakaramrume. Angeda, Mesir mutu neitamai embaramre ila me, er si Nil me pirmanai kounung gandum du bena kunuamruma tepa. Ange pel doramruma deiki di, sun yuk-yuk mutu yuma kurami nesalada, akeca kunuamipa, sun bung keca yala-yala yuma peda, pio weik kunumami.

4 Uo, sun Sidon mutu kurum nesalada, kwar dakra, ali kunkamrume. Ada, ila laut mokon di sun tep upepsere. “Uo, ukutaruda sun ali kupkamserada, ake. Nedi sun tep konum tapsene. Menop taruda, sunda ne nyapsilip utopu kuramrum dinin, ukutaruda, sal nyapu pe, ner nyapu pe, kaber neng pe, kaber nerapu peda, ton cap pio men kunenunge. Nyapu ^{▼▼nyapu – Aupu yumada, domon upu tep pepu. Lautdi, “Nyapu ton men derinune,” pepka deiyoda, ada Tirus mutu cap, Sidon mutu cap kurami nesalada, yu nengdi sun mutu yawaraptapya cadi, anesalada pio ikin weik kupya cadi, laut mokon deiki tupa men embarami.} ton men derinune, tonda men deipnepa, men nenunge. 5 Ange tep, amenda taruda, yuk nengdi, sun Mesir mutu kunung nesala tep, “Uo, Allahdi konum Tirus mutu nesalada poprapudi, sun mutu yuma yawa poptapudi, sikke buktapu,’ pepmengepa, Mesir mutu kunung nesala yuma, abamur upu gekepkamenge. Gekepmengopda, Mesir mutu kunge nesala yumadi, Tirus mutu tep, pio bicau tenepmengedi, kange mun kange doupra, engenapu kunkamenge.

6 Uo, Sidon mutu neitamai laut mokon pirmanai kurum nesalada, laut mokon embana tep keca, kapal laut wekrumudi, sepdaro ortara karen mutuda, Spanyol mutu laut pirman, ila ati arum donungaida, Tarsis mutu damai benkamrume. Amutu neitamai bemum dingeda, sun ton pio engenapu kunkamrume. 7 Uo, sun Sidon mutu kurum nesalao! Sun men di pio telep ila ati arum konum dopra deiamrumdi, kange deipra kuramrume. Tonda, sun mutu di, kunumna deiyo neng ton dokotemamrumpa, anengdi yuk karen mutu bena, bung keca pio weika di kunupra, tamupra dekarami. Tonda, sun mutu sisa neng dopra deiprumpa, laut me goupra, ortara karen mutu bena, keana taru tep, dakuramidi, kunumna pel weik dorami. Dinino, ukutaruda sundi sun mutu dipetepso! Ange yuma konum popra yawaraptapidi, sikke buktapi!

8 Menop taru, sun yuk-yuk mutu nesala yumadi, sun Tirus mutu kunumna deiyo kepra taleamrum neng tep, ‘Uo, sunda tek sisi pio mambule’ tenen, sun tep gispal dorami. Tonda, sun Tirus mutu neng kunumna deiyo talepra kunumnung nengda, ban-ban yuma kunung nesaladi sun tep, ‘Uo, sunda Raja utopu neng kununge,’ tenerami. Tonda, sunda pio puto weik nesala kuramruma cadi, yuk mutu neitamai di, ‘Nimi deiyo neng kunkameng’ tenen, nimi wepra erepra deiamrumpa, Raja neng ton, deiyo neng keprapidi, kurami. Ukupra pio telep kuramrum dinino, ukutaruda, ware ngebodi, ‘Tirus mutu nesalada, wenepra popkamne,’ teneamtudi, ange yumada, konum kuptu do? Sun moupra tenipetepkamrume!

9 Tek sisi angeda, yuk ngebodi gume. Allah Yahweh, er dipapu, akeca-keca talepra, deiki tara erepra, ila puto kuredi, im deiki jen talena malaikat yuma talepra, ila deiyo kepra ngebo kurur ngebodi, ‘Angeda tek sisi kupkamne,’ teneamudi peipu. Ange kupka deiyoda, tali tep gume. Deiyoda, erdi, ‘Sun dipru eremdangedi, salnong-nong kunung neng yumada, ne Allahdi amu kepra deipkamne,’ teneamu. Tonda sun tuai mutu nesaladi, ‘Uo, anengda tek sisi mambul weik neng kununge,’ tenepmengedi, nimi si eremnung nesala yumada, ne Allahdi amu tara kepra deipnepa, tali nengpu kunkamenge,’ teneamunge yumada, konum kupseu.

10 Atep, uo, sun Tarsis mutu kurum nesalada, sun pe Tarsis mutupu, ortara bemumdi sun pe mutu dipetepkamrume. Ukutarada, laut mokon deiki embaramre keca, kapal laut derinaida, konum gum kupka cadi, ukutaruda, sun pe mutu dana-dana tara yuma neitamai di bemumdi, tu palipra wa pepdongonkamrume. Ukupmantoda, Mesir mutu neitamai di, ila embaramre me, Nil me oudoupra, dana-dana tara yuma embaramretopu, sun peda, sun mutu neitamai dana-dana tara yuma embankamrume. Deiyoda, sun laut mokon deiki embarum umpena, er si kapal laut derinaida, konum gum kupra deipya tep, ukutaruda yuk pel talepra donkamrume. ^{▼▼Ayat 10 – Ayat 10 di dukdongopra ayat 12 neitamai yumada, Ibrani upu seki ngeda, ikin kurura cadi, aupu deiyoda, yambulanun walwalpu kuserure.}

11 Allah Yahwehdi, er buruda erepra, laut mokon deiki tara deipudi, ila kange mun pel konum dopseu. Tonda, Allahdi laut mokon pirmanai, nimi deiyo kepra, ila mutu talenung Raja neng cap, sundi talenung mutu yuma capda, kange mun keca kareamupa, sun amutu-amutu kunge nesala yumada, kwar kuprepa, yo moropsemnunge. Allah Yahwehdi, yu jen talena neng tep go karepudi pepu. “Angeda adipapu kupkamrume. Fonesia tara neitamai kure mutu-mutu cap, ila ati arum dominge yuma capda, popra yawa potapkamrume,” pepra deipu cadi, Fonesia mutu neitamai kunung mutu, puto weik kwamu mutu-mutu yumada, popra sikke buktapkamenge.

12 Allahdi aupu pepu. “Uo, sun Sidon mutu nesalao! Sun ton kange deipra, pingpinga di men kunkamrume. Sunda konum yawa popra tapsisi. Sun Sidon mutu kurum nesala yumada, ikin keca weik, sun nong deiki konum deiamsipa, ila kange mun kange doupra kurume. Sunda, ‘Yuk karen mutu bepedi, ortarapu telep kuptepe,’ tenen, sun pe mutu tapra, orkaren mutu, laut mokon sekdongopu mutu, pulau Siprus mutu ^{▼▼Siprus mutu – Amutu si tep nengeda, ton buku neitamaida, “Kitim mutu,” pepra sengnung dinin, amutuda tenpua.} bena kunkamtuma peda, amutu neitamai ton, beipe peikra teleppu pio men kunkamrume. Ikinpu kunkamrume.

13 Diprepso! ^{▼▼Ayat 13 – Ayat 10 di dukdongopra ayat 18 neitamai yumada, Ibrani upu seki ngeda, ikin kurura cadi, aupu deiyoda, yambulanun walwalpu kuserure. Yuk Allah upu buku neitamaida, yambulanun yuknge sengnunge.} Babel mutu cap, Babel neitamai kunge nesala cap tep moupra teneprumudi, dinkamrume! ‘Asyur mutu nesalada, mambul neng kununge,’ tenena gume. Deiyoda, Babel mutu neng dipapu, ‘Gume, sun Tirus mutu nesala cap, sun mutu capda, popra yawarapmepedi, sikke buktapkamepe,’ tenepidi, Babel mutu nesaladi, Tirus mutu nesala, sun ila ati arum dopra, ila gel beilya wipra ongopdongominge yumada, urupra gawal daki. Tonda, Babel mutu nengdi, ‘Tirus mutu wekra popkamep’ tenen, ila lyom gel ati dopra deipnen embenamidi, warekra kalengamyanen, sun Babel jen nengdi, Tirus mutu nimi deiyo neng kurami ati yumada, dakra tapidi, sun bung keca deiaminge yumada, dalupra dopropi. Sundi Tirus mutuda, konum dakra uruptapipa, amutuda tali walangyopu kwamu.

14 Sun laut mokon deiki embana tep umpena, er si kapal laut deiki bukra embarum neng, sun Tarsis mutu di tamupra yakanmarum nengda, engenkamrume. Deiyoda, sun ila puto kepra kuramu mutu, Tirus mutuda, konum urupra daktapseipa, walangaipu kurura tepa. 15 Tirus mutu popra, gawal dakmenge taru di dipra, oryankamre keteng tamun 70 tahun neitamai yumada, nimidi ton cap, Tirus mutu pio lupronkamenge. Ataru keteng tamun tujuh puluh tahun mapkameng taruda, ukupmanto, tenpu nimi deiyo ngebo Rajadi, er mutu talepra kuramyanen, depkamre taru utopu deiki di, Tirus mutu tupa men tenenkamenge. Aketeng tamun 70 konum kupropyopda, kange di ton cap teleppu kupkamre ja. Ada Tirus mutu kanda ukupmantoda, ner tenpu kuramrepa, nimi yumadi anerpu upula nyangameng ner tep, mut sekra perameng nge utopu kupkamrume. Ada, amut penung upu utopu kupkamkere. Ada ake.

16 “Kanda nimidi tali-tali nyangamkeianen, konum tapkeidi, kan si konum luprokei dinino, ukutaruda kan kecapi bung-bung pena dopra, amutu neitamai doupra embamemdi, telep-telep kupra bung-bung pena doupmemdi, mut telepnge weikanun pemempa, amut gekenkameng nengdi, kan tep ton cap tamupra tenenkamkenge.”

17 Atep, keteng tamun tujuh puluh (70) tahun konum kupyopda, Allah Yahwehdi tamupra, Tirus mutu tep ton tenepredi, kange di tamupra telep kweipkamre. Tirus mutu kunkameng nesalada, menop taru pel doraminge, kange di ton cap talepra apelpu dopbankamenge. Ada, sundi kapal laut dopra keteiprumudi, sun yuk karen mutu ban-ban yuma bena, bung keca weika di kunupra doronkamrume. Ukuprumudi, akeca doupra yuk mutu yuma bena, bung keca kunumkamrume. Ukupmantoda, sun tali nyangdarameng nerapudi, nimi yuma cap, tali lupra kikiman maramengtopu, sun peda bung keca dubemumdi, ban-ban yuma bena kunumbankamrume. 18 Dinino, ataru di dipra, dorkunkamre taru yumada, Tirus mutu nesaladi co bo weik kunupra doronkameng nge yumada, sun pedi, sun pe tepapu ton men moupra derinkamenge. Aco bo wengkamrenge yumada, Allah Yahweh erngepu kupkamra cadi, Allah er tepapu dopra kareryakankamenge. Tonda, Tirus mutu nesaladi co bo doronkameng ngeda, adipapu dopra, Allah Yahweh er mawa nesala, er damai tupa kunkameng nesala tep nengeda, sunpu karenkamenge. Ukupmenge pangeda, Allah er nyapu sisa, sunda telep jena telep keca, pio weikanun cap, telep kemna opkal cap, tupa doronapu kunkamenge.

Allahdi ne nabi Yesaya tep lap peipneupa, acei sekra deipsene.