Isaiah 24

Allahdi tuai mutu yuma tep wenepra, yawa poptapkamra tep, pepu upu

1Ukutaruda, Allah Yahwehdi tuai mutu ban-ban yuma tep, popra yawa poptapredi, sikke butapkamre. Tuai mutu yuma malipu kupra deipkamre. Ukuprepa, tuai mutu yumada walangyopu kupkamre. Tonda, Allah er dipapu, tuai mutu longna karepkamra deiki di, tuai mutu urasin yumada, tamupredi, mali-mali kweipkamre. Ukuprepa, tuai ban-ban yuma kunge nesala yumada, enepra doprorepa, yuk-yuk dabendopkamenge. Tenpu mutu neitamaida, telep kupra tenpu mutu neitamai kikiman men kunkamenge. 2Tuai nesala yumada, mambul weik keca pe, tali nesala peda, ikin weik kunkamenge. Ada, imam neng pe, tali dakunge neng peda, utopu ikin kange doupra kunkamenge. Tonda, pel tali dona tep, co bo di kunumnung neng pe, sun deiyo neng peda, utopu ikin kange doupra kunkamenge. Pel tali dopmengedi, co bo men doronung nerapu pe, sun deiyo kepra kunge nerapu peda, utopu ikin kunkamenge.

Bung keca putana neng pe, abung keca kunumyakanung neng peda, utopu ikin kunkamenge. Co bo keana tep karenung neng pe, co bo putaprepa keana tep co bo doronung neng peda, utopu ikin kange doupra kunkamenge. Tonda, isomka neng pe, kankan neng yuma peda, utopu ikin deikipu kunkamenge. Allah erdi tenepu utopu, wenepyopda, sun yuma utopu ikin keca yarepa, dopropmengedi, kange mun kunkamre.

3Allah er dipapu mutu ban-ban yuma tu urasin tamupra deipredi, malipu kweipkamre. Tonda, yawa popra nyektapkamre. Allah Yahweh erdi, ‘Angeda konum ukupkamne,’ pepra, lap peiamnga cadi, ange yumada tek sisi nong kupkamre. 4Tuai mutu yumada, gelal sepropredi, nunupropkamre. Ban-ban yuma cap, mutu-mutu yuma kunge nesala capda, kange mun kupkamre. Tonda, tuai cap, im deiki capda, sun kikiman yumada, mali weik kuprepa, kange mun kupkamre. 5Tuai mutu yumada, mali kupra deipkamre. Konum ukupyopda, tuai mutu kunung nesala yuma, amali kupra deipre mutu tu deikipu kunkamenge. Ikin weik kunkameng ngeda, tali tep gume. Deiyoda, Allahdi, “Sunda ne pepra deipsisi ngeda, ‘Angepu pio talepra kupbankamrume. Angeda, pio men kunkamrume. Tonda, telep kuna ngeda ake, mali kuna ngeda ake,’ pepra deiamsi upuda, tuai mutu nesala yumadi, ange tapra kununge. Nedi, ‘Angeda pio tep talepra kunkamruma cadi, tenpunge peda men tapkamrume. Tupa talepra kupbankamrume,’ pepra deiamsi upuda, tuai mutu nesala yumadi, ange tapra kununge. Ukununga deiki di sun kunung mutu yumada, meneng damai di, mali kupra deipkamne.” Allahdi pepu.

6Tuai nesaladi, pio malipu kununga tep, Allahdi atuai mutu ban-ban yumada, konum wipdongopudi, mali kweipu. Ukupka tep, amutu kunge nesala, sun mali kuramya tep, konum wenepupa, ikin weik kununge. Sun tuai nesala yumada, konum depbanunga cadi, tuai mutu nesala gawal dangrura cadi, ukutaruda, nimi yambulanunpu tupa gam kununge. 7Ange utopu, anggur du mouramre tapuda, gelal serure. Ukurura cadi, anggur du peda gum kupbaramrepa, anggur du taikmengedi, kange yawaramre me ton, men keteneiptenga cadi, akeca peda gum kupbarure. Tonda anggur meda adipapu men doropmanto kurura tep, akeca jengedi kange derinung neng yumada, mali kange doupra ikinpu kununge. Ataruda, sun kange sukun-sukuna deikipu kungedi, pio ‘Uo,’ tenenapu kunkamenge.

8Angetopu, mut pena tep bung-bung pena, er sida kecapi cap, tabunan cap, rebana cap, doupmengedi, lelim pengepa, akange lon mut gekeramitopu, ton cap pio men gekenkamenge. Alelim gekeramengedi, ping-ping kupnepa, kange deipnedi, kari porami ngeda, konum dim pepu. Ikin weik kurura cadi, nimidi tupa kange deipra men kunkamenge. 9Kange men derinunga cadi, anggur me jepnedi, mut peramitopu, ton cap pio men penkamenge. Tonda, yu peramre anggur me jepmengepa, tau peramrepa, kange deriramitopu, tupa men kurure. Ataruda, akeca jepmenga peda, tau peramretopu, ton cap pio men penkamre. 10Ila ati arum dopra kunge mutu neitamai yumada, akeca-keca yuma pio malipu kupre pangeda, amutu nesala yumada, ‘Uo, ware kuptepe do?’ tenen, embandangedi, mali pepra, ngolokra embanunge. Atep, akati-akati arum dopra daneitamai kunge nesalada, kware weik kuprepa, ‘Yuk nengdi nun ati weksenung’ tenen, sun pe maramenge ati buplan yuma konum dekdongopmengedi, selok kepdongopmengepa, yuk nesala yumada, men wekmanto kununge.

11Anggur me metekanun akapunge yuma metek kupbarepa, akapunge jepropmengopda, konum gum kupbarura tep, amutu kunge nesala yumada, bisi-bisipu kapra embandangedi, mali pepra ngolokra embanunge. Tonda, menop taru kange deipra kuramitopu, tupa men kununge. Amutu-mutu yuma neitamaida, kange deipmengedi, telep kange doupra, pio men kununge. 12Nimi ati arum dopra kurami mutu yumada, konum urupra tapya tep, walangyopu kurure. Tonda, akati arum dopra kuramyai bana tep bisi buplan yumada, konum dakra sikke buktapu.

13Aikin kupkamre keca yumada, tek sisi kupkamre. Arup pepmanutopu, yuk mutu ban-ban yuma kunung nesalada, sun anesala kunkamenga utopu, yuk mutu ban-ban yuma kunge nesala peda utopu kupkamenge. Kiklimpetena tep nengeda, ukupmantoda, saitun co du mouprepa, dakra kirameng li taru kuprepa, ‘Aco du saktue’ tenen, aco teru bongopmengepa, saitun co du tuai sakredi, asaitun co du tenpunge peda, co dup tupa men kurure. Tonda, anggur tapu du dangna li taru konum kuprepa, amouamrenge yuma dakra kipmengedi, gawal dangnunge. Pio tenpu du ton men tamnunge. Ange utopu amenda taruda, tuai nesala ban-ban yumada, ange utopu, weik tarada depkamenge. Nimi pio metekanunpu tupa gam kupkamenge.

14Amenda taruda, kange mun keca neitamai di gam tupa kunkameng nesalada, sun kange deipmengedi, ila upu deiki di, kange lon mut pepkamenge. Ataruda, keteng dangban tara kuramenge nesaladi, Allah Yahweh er ila eremna ngebodi, puto pel dorenge cap, pio teleppu kurenge cap tepapu, lap pengepa, gekepmengedi, Allah tep gispal donkamenge. 15Atep nengeda, sun keteng yakan tara kurum nesala yuma peda, Allah Yahweh tep, gispal doprumudi, ‘Naio, kanda pio telepe,’ pepra, Allah er sipu eremkamrume. Ange utopu, ila laut mokon pirman tara kurum nesala peda, Israel nesala kalekra melimrur ngebo, sun nai Allah er si Yahweh tepapu, ‘Kanda pio telepe, pio puto weik mambul pel dorume,’ pepra, er sipu eremkamrume.

16Mutu sirik, im sirik tara di, Allah er pio telep kurenge cap, puto pel dorenge cap tep, yuk-yuk mutu nesaladi, er si erepmengedi, gispal dopmengopda, nun Yudea mutu neitamai kupepa, Allah erdi talepra kuserur Israel nesaladi gekenkamepe. Allahda, mali kun keca tenpunge peda men kuredi, pio Telep Dumsisi Kure Ngebo kurura tep, dorkaren mutu nesaladi, er si eremkamenge. Ukupkameng dinino, ne Yesayada, ila kange mun kange doupnedi, ngolokra tupa engenkamne. Mali kange doupra engenmanyanen, bol mali doupkamne ja! Ada tali tep gume. Deiyoda, sun mawa di mok upu pengedi, yuk neng tep mali weik-weik pepra weinunge. Tek sisi, sun mali kunge nengdi, tupa-tupa mok upu pepmenga deiki di, naprapmengedi, yuk neng tep malipu kemdinunge.

17Tuai nesala yuma gekepso! Mutu ban-ban yuma kurum nesalao, sun youna tep pena konum keteipupa, sun tep kaleka diserure pepsene. Amenda taruda, ila ikin keca yankamsera tep pepsene. 18Ware nesala do yuma, ‘Uo, angeda, ukupkamsere,’ pepmengepa, ila lelim gekepmengedi, bura saka benkamre ngebo peda, youn keca, er sida pena pum bon wekrepa youpkamre. Akeca pum bon wekmare dinin, lyepdaredi banapra bere ngeboda, tu deiki deipra penung pena pum bon Wekrepa, amenda peda youpnapu kupkamre. Tonda, im neitamai pakredi, ila puto mo sakrepa, tuai mutu yumada lokapredi, ila di darapra buku mutu yumada lokamre. 19Ange yuma konum kupyopda, tuai mutu yumada ila di longnapu kuredi, pio yawa popra nyektapkamre. Tonda, tapakra, tuai yuma amenda taruda bongopra yamuptapkamre.

20Tuai mutu yuma lokredi embandanapu kupkamre. Ukupmantoda, yu me jepmange nengda, kange douna gum di, Walwal pepdanen embaramengtopu, mutu yumada lokredi embadanapu kunkamre. Tonda co di, yambul dodina ati domengepa, ila mungna yaredi yana kweiprepa, ortara, atara kemredi, lokra dourbaramretopu kupkamre. Tuai mutu uruptapkamra deiyoda, nesaladi mali kununga menenga di Kupkamre. Tuai mutu dakra tapyopda, ton cap tamupra ereiprepa, telep kupra yana men kupkamre. 21Ataru dipapu Allah erdi, im neitamai embaramre isok do, yuk mali weik kure keca yuma do, ange yuma wenepra popkamre. Tonda, mutu ban-ban yuma nimi deiyo kepra talenung dinin, mali weik kunge deiyo-deiyo neng yuma peda, wenepra poptapkamre.

22Sun akeca cap, aneng cap yumada, tu pum bonai di bupra tenpaipu deipkamre. Ada, nimidi mali kupmengepa, deiyo nengdi aneng bupra, wenemna ati dongoramengtopu, Allahdi amali kun keca yuma bupra tenpai pumbonpu deipkamre. Sun anengda, acapu deipra buplan dekdongomrepa, weikanun ton aceipu dakuramengepanen, amenda taru erdi tenemre taru konum kepyopda, ataru dipapu amali kun keca yuma cap, mali kunge deiyo neng cap wenepra popredi, gum kupra deipkamre.

23Ange konum kupyopda, ataruda war dirineda, yambulanun kunukamre. Angetopu, keteng bupu weik kure ngeda, yambula di bul kupkamre. Ada, tali tep guma. Deiyoda, Allah Yahweh, akeca-keca yuma talepra, deiki tara erepra, ila puto ngebodi, im deiki jen talena malaikat yuma talerure. Er dipapu akeca-keca yuma deiki tara kuredi, ange yuma talepra Raja kepkamre. Erdi Raja kepra, Yerusalem mutu neitamai dinin, Sion mutu dup kunkamre. Tonda, Allah Yahwehdi, er pio telep kurenge cap, ila puto pel dorenge cap, er dirine capda, ‘Nimi yuma epkameng’ tenen, jenek kupra deipyopda, sun Yerusalem mutu neitamai kunge deiyo-deiyo neng yumadi epkamenge.