Isa 25 | XteSC | STEP | Uo, ne nai bo Allah, Yahweh nedi kan tepapu kan si eremkenedi, kan tep gispal dokenune. Tonda, kan tepapu, ‘Telepe,’ pepra, kan sipu eremkenune. Deiyoda, Allah kandi men taru di, ‘Apel dopkamne,’ tenemumtopu, angepu kunupsek pen pel, kandi konum dorume. Allah kandi, ‘Angeda, ukupkamne. Ange ton ukupkamne,’ tenemumtopu, tamna gum dipapu, pio tupa-tupa tek sisi kurume. Kandi pel dorum ngeda, pio mambul weik keca pel doruma cadi, ange yumada pio tep kunkamre. Tenpunge peda, men gum kuptue. Ange epra kael kepkesidi, pio ila di gispal donkamkene.

Isaiah 25

Allah Yahweh tep, gispal dona tep, mut pepu upu

1 Uo, ne nai bo Allah, Yahweh nedi kan tepapu kan si eremkenedi, kan tep gispal dokenune. Tonda, kan tepapu, ‘Telepe,’ pepra, kan sipu eremkenune. Deiyoda, Allah kandi men taru di, ‘Apel dopkamne,’ tenemumtopu, angepu kunupsek pen pel, kandi konum dorume. Allah kandi, ‘Angeda, ukupkamne. Ange ton ukupkamne,’ tenemumtopu, tamna gum dipapu, pio tupa-tupa tek sisi kurume. Kandi pel dorum ngeda, pio mambul weik keca pel doruma cadi, ange yumada pio tep kunkamre. Tenpunge peda, men gum kuptue. Ange epra kael kepkesidi, pio ila di gispal donkamkene. 2 Tonda, nun podan nengdi dorami ila ati arumda, kandi konum yawa popra, sikke buktapmume. Amutu neitamaida, sundi gel dopra taplakra dorami ati-ati yuma urupra tapmumpa, agel yumada tali tuai deiptapmumpa, akurure. Atep, akati arum doramyai yumada, walangpu kupu. ‘Yu nengdi poryasenung’ tenen, puto weika di dorami ati-atida, konum urupra daktaprume. Tonda, sun yuk karen mutu yala nesaladi, sun talepra kuramu nimi deiyo ngebo Rajadi maramu atida, urupra daktapmumdi, sikke buktapra gum kupra deipmuma cadi, akatida kange di ton cap lepsikra pio men dopkamenge.

3 Ukupmuma tep nengeda, ila puto nesala, yuk-yuk mutu dakunung neng yumadi, Allah kan tep si eremkengedi, “Uo, erda ila mambul ngebo kurure,’ pepra gispal donkamkenge. Tonda ila yu cap, balila cap kunge nesalada, sun podan neng tali lupra porbanung dinino, kan tenpu tep nengeda, ila di kwar dangmengedi, kunkamenge. 4 Ange peda tali tep gume. Deiyoda, kandi sun puto boun nesala cap, akeca-keca men talengedi, pio kan-kan nesala capda, kan dipapu sun tep kalekra melimnapu kurume. Atep, ‘Er dipapu melipra kalengkamser’ tenen, kan damaipu wengyakanunge.

Akeca-keca putanapu kunge nesala, sun kan-kan nesalada, sun kange mun kurenge utopu kupyopda, sundi kan damaipu wengyangedi, dim pepra teleppu kununge. Ila mungna cap, mo cap, yakanmarya peda, kan dipapu sun lelimdongona ngeboda kanpu kurume. Tonda, keteng bupu ila yunge kunmarya peda, kan dipapu sun tep lelimdongona ngebo kurume.

Tonda, pio mali yu nengdi poryakankameng taruda, ila mungna cap, mo cap yakaramretopu kupra, poryakankameng taruda, kan dipapu sun puto boun nesala tep kalengkamsereme. 5 Ukupmantoda, me pio gumai, katawai mutu neitamai, ila bupu kumanya puto di embaramretopu, Allah kan ila puto deiki di, nun podan nesala yuma, puto di poptapmemdi gawal dakamreme. Ila yu keteng jenmarepa, dua di lelimdongomamretopu, kandi angetopu kupra kuserume.

Ada, sun ila mali cap, balila cap, nimi podan nengdi, ‘Anesala popkupe’ tenen, mali pepra, ila upu di pepra ngolongmengpa, gekepmepedi kware weik kuserur dinin, kan dipapu, lelipdongopsememdi, aneng gum kupra deipmemdi, nun tep kange tamupra telep kupra deriserume. Sun yu neng dopra, kan amutara Kepra derinkamreme.

Allahdi ila kalya kalepra keteneipkamrenge tep, pepu upu

6 Aceipu, Sion mutu deiki, Allahdi, ila kalya kalepra keteneipkamsere. Allah Yahwehda, akeca-keca deiki tara erepra, ila puto kure ngebodi, im deiki jen talena malaikat talerure. Erda, ila puto ngebodi, ban-ban yuma kunung nesala, sun jena tep, ila kalya kalepra keteneipkamsere. Erdi pio telep-telep jen keca, cap, tu keca galemna cap, meta cap, yo neitamai kwamrenge cap, tonda anggur tapu du yu me, pio taunge cap, wepra telep ngepu Keteneipredi, kalepra karepkamsere.

7 Tonda, amutu dupaida, erdi keteneipkamre kecada dua bum utopu keca deipkamre ukuprepa, Allah erdi, tuai mutu ban-ban yuma kunge nesala depmengepa, opkal dopra, sun nong deiki geterameng keca dopropredi gum kweipkamre. Ada, nimi yala-yala yuma depmengopda, sun nong geterameng lyom opkal dopropredi gum kupra deipkamre. Deiyoda, nimi ban-ban yuma kunge nesaladi, dena deiyonge tep, kware weik dangnung kecada, Allahdi gum kupra deipkamre ja! Amenda taruda, nimi ton men depkamenge! Dena deiyonge yumada, tamupra men yanmanto kupkamre.

8 Dena deiyonge konum gum kupra deipyopda, Allah ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda, ‘Adonay’ cap, tonda ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, jenek kupra sekmupu.} Yahwehda, akeca-keca yuma talepra, pio deiki tara erepra, ila puto weik deiyo ngebodi, im deiki jen talena malaikat yuma talerure. Atep, er puto deiki di nimi ban-ban yumadi engenung keca deiyo yumada, gum kupra deipredi gawal dakamre. Tonda Allahdi, ‘Ne mawa nesala kunkameng’ tenen, menop taru wepra anuamseu nesalada, kange di telep kweipkamre. Ada, yuk-yuk mutu nesaladi, er mawa neng tep, sun nong deiki ikin keca weik deriramipa, ali dakra kuraminge deiyo yumada, Allahdi ange dopra pio karenai donokamre. Uda, ange yumada, Allah Yahweh akeca-keca deiki tara puto weik kure ngebo, er pedi konum peipseua tep, ange yumada, tek sisi nong kupkamre.

9 Ataruda, nunda er mawa nengdi, “Sun yuma diso! Tek sisi Allah Yahweh, erda nun nai bo Allah Kurure. Er sipu eremnupe. Pumun taru di, dipdongopra ataru neitamai peda, nundi, ‘Uo, Allah tepapu, dan taru yaredi, nunda lyepropkamser do?’ tenen, pio dinapu kuramepu dinin, ukutaruda, akonum yare! Tek Sisi er tepapu, ‘Dan taru melimyankamser do?’ tenen, diramepu. Dinino, ukutaruda, er akonum yanmasere. Erda, nun Lyemna Deiyo Ngebo kuserura cadi, adipapu pingping kange deipra kupmepedi, er tepapu gispal dopedi, karye popra Kunkamepe. Ada, erdi nun Konum lyepseua tepa.” Ange penkamepe. Kange deipra kunkamepada, tali tep gum dinin, Allah Yahweh, er puto buru di, amutu, Sion mutu dup deipredi, nun lyepropkamsera tep pepsene!

Allahdi Moab tara kunge nesala wenepkamrenge tep, pepu upu

10 Amenda taruda, Allah erdi er nyapu yuma tep melipkamre dinino, Moab tara kunge nesala tep nengeda, sun kunmangaipu, yaniptapredi, amutarapu kepdongopkamre. Ukupmantoda, ila pala bentalai, bisam dei akapyopda, ‘Bental cap, dei cap bepserur’ tenen, manmaning cap, mutmuta cap dopra, bental deiki deipmengedi, yaniramengtopu, Allahdi sun Moab nesala tep, wenepra yaniptapkamre.

11 Ataru neitamaida, sun Moab nengdi, ‘Uo, lyepsetu do?’ tenen, sun buru erepra moronkamenga peda, Allahdi anesala pio men melipkamre. Ukupmantoda, nimidi, ‘Danau me mokon danau deiki me gekra bankup’ tenen, sun buru bepekra ketenemamengtopu, sun Moab nesaladi, ‘Allah melipsetue’ tenen, buru erepra moropkamenge. Dinino, mali pepra moropmenga peda, Allahdi men melipkamre. Sun dipru erepra, salnong-nong kamamya tep, Allah wenepredi, sun dipru amu Kepra deipkamre. Ukuprepa sun anesalada, ali dangkamenge.

12 Tonda, Moab mutu nesalada, ‘Yuk mutu nengdi poryasenung’ tenen, ila gel dopra taplakra deiamidi, ila lyom ati cap, gel beilya cap deipra doraminge yumada, Allah erdi Urupra, tu deiki siptaprepa, yawa popredi, sikke utopu buktapkamre. Ange yuma pio gum kupra deipkamre!