Isa 26 | XteSC | STEP | Allahdi teneamu taru konum kupyopda, Yehuda mutu neitamai kunung nesaladi amut pepkamenge. Nun ila ati arum dopra kunup mutuda, Allah er puto dipapu nun tep, melipra kalengserure. Nun lyemnaipu ketenepra kareserure. Ada, nimidi ati arum dopmengedi, dana-dana tara yuma ila lyom gel beilya ongopgenepra wiramengtopu, Allah dipapu, nun tep kalengseredi, lyemdoserure.

Isaiah 26

Amenda taru, Allahdi, er nyapu sisa tep, melipra lyeopropkamra cadi, Yudea tara nesaladi, mut pepkameng nge tep, pepu upu

1 Allahdi teneamu taru konum kupyopda, Yehuda mutu neitamai kunung nesaladi amut pepkamenge.
Nun ila ati arum dopra kunup mutuda, ^{▼▼mutuda – Amutu pepkada, ada Yerusalem ila ati arum dominge tep seku.} Allah er puto dipapu nun tep, melipra kalengserure. Nun lyemnaipu ketenepra kareserure.
Ada, nimidi ati arum dopmengedi, dana-dana tara yuma ila lyom gel beilya ongopgenepra wiramengtopu, Allah dipapu, nun tep kalengseredi, lyemdoserure.
2 Amutu wengna tep bisi buplanda, pakso! Pakmumnyopda, Allah er peipu upupu moupra talengedi, tek sisi kunung nesalada, abisi buplanpu wengyankamenge.
Ada Allah er upu tamna gum dipapu, sundi, “Nun nai Allah tep, ukupkamepe,” pepra, tek sisi angepu kunung nesalada, akati arum neitamai wektenge.
3 Allah kandi peiamumngepu, ‘Angepu talepra kunkamne,’ tenepredi, dipruai deipnedi, moupra talepra teleppu kure ngeboda, kandi angebo er dipru neitamaida, kwar-kwar kuna gum di, teleppu kange deipnedi, dim pepra kuna deiyonge karemempa, teleppu kununge.
Ukumemnya deiyoda, sun anesaladi, kan teppu, tenimtona gum dipapu, teka tenekenunga tep, kandi sun tep telep kupra derirume.
4 Pio tep Allah Yahweh, er tepapu teka tenepmepedi, er tepapu talepmepedi, er deikipu nun kange derinkamepe.
Ada tali tep guma. Deiyoda, nun nai bo Allah Yahweh, akeca-keca deiki tara erepra ila puto ngebo kurura cadi, pio melipra kalengserepa, er amutarapu kunkamepe!
Ukupmantoda, ila mutu bungne gel damai inipra betepedi, pio telep kupra kutepetopu, Allah dipapu nun tep, melipra kalengserure. Allahda pio men tapkamsere!
5 Tonda, Allahdi sun dipru erepdangedi, salnong-nong kamnung nesalada, sun ila ati arum mutu dup doptenga peda, Allahdi sun domi ati arum urupra daktamredi, anesalada amu tara kepra derirure.
Ada, sun anesaladi ila telep ati arum dopra kunung mutu-mutu yumada, Allah erdi urupra yawa poptaprepa, tu deiki sikke but neitamaipu derirtamrure.
6 Akati-akati yuma konum urupra yawa poptapyopda, sun tali Kan-kan kunung nesala cap, ikin kurepa, kange mun kange doupra kunung nesala capdi, amutu kwamu keca yumada, adeiki yanipdongopra embankamenge.
7 Allah kandi pesemem upu talepra, dumsisipu kunung nesalada, sunda telep kwiri bisipu banunge. Welepna, kwerepna kemne bisi ton men banunge.
Tek sisi, kanda, pio teleppu, dumsisi kurum ngeboda, kan upu talepra teleppu kunung nesala tep nengeda, Allah kandi sun anesala bisi bana tep, konum teleppu yapra derirume.
8 Nun nai bo Allah, kandi nun tep, “Sunda angepu kunkamrume, angeda pio men kunkamrume,” pepra, pedisememngepu talepra dombanupe.
Tonda nundi, ‘Uo, nun nai Allah, er cap, erdi ila mambul keca pel dorurnge cap, nimi ban-ban yuma kael keptenge,’ tenepedi, nun kange dipru cap, nun tenenange cap yuma deiki di, kan tepapu putaserepa, tupa-tupa tenekenupe.
9 Lukunda taru neitamai yumada, ne kange dopra, kan deikipu deipnedi, kan tepapu tupa Tenekenune. Ukunmanyanen, ataru-ataru yumada, ne nong cap, ne kange dipru cap yuma dopra, kan deikipu deipkenedi, ‘Allah dan taru yana melimyankamner’ tenen, ekenune.
Deiyoda, kan tamupra yamemdi, tuai mutu ban-ban yuma neitamai di, kandi, “Angeda kunkamrume, angeda pio men kunkamrume,” pepra peipsemum upu gekepmengedi, kael kepmengopda, nesala yala-yala yuma di, ‘E, dumsisi kunada, ake,’ tenepmengedi, moupra kael kepkamenge.
10 Mali Kuramre ngebo tep, bicau tenepra, er mali kuramrenge tep, men wenepmengedi, kaukepmengedi, er tep teleppu kweipmengopda, amali kuramre ngebodi, ‘Telep kuna ngeda ake,’ tenepra, men nukra kael kepkamre.
Dumsisi telep kupra kuramenge mutu neitamai, yuk nengdi telep kuramenga peda, pio malingepu kunkamre.
Allah er ila telep kurenge cap, er puto weik kurenge capda, moupra men kael kepredi, Allah er si men eremkamre.
11 Uo, ne nai Allah Yahweh, kandi sun mali weik kunge nesala tep, yu tenepmemdi, ‘Anesala wenepkamne’ tenen, keteneipmarem ngeda, pio men tenepmengedi, men kael kepra dinunge.
Kandi kan nyapu tep, ‘Bicaue, sunda tek sisi melipra kalengkamne,’ tenepmemdi, melimkamrem ngeda, sun amali kunge neng men dinunga cadi, kandi ange katuai kweipmempa, eptengopda, amenda sundi, ‘Uo, nun mali kunupe,’ tenen, kware kuprepa, alipu kunkamenge.
Kandi sun malipu kunge nesala tep, yu weik kupkerepa, kandi wenepra popkamremnge konum keteneipmarem ngeda, sun tep wenepra popmemdi, uku bu jeramretopu, aneng gum kupra deipkamrume.
12 Nun nai bo Allah Yahweh, kandi nun kan nyapu sisa yuma tep, pio telep kupra derinkamserume.
Deiyoda, nun pel doramepunge yumada, tek sisi kan dipapu nun tep apel telep kupra melipsemumdi doramsemume.
13 Uo, nun nai Allah Yahweh, yuk mutu nengdi, nun damai yana, poramseipa, sun nimi deiyo kemami Raja nengdi taleamsei.
Dinino, nun nai Allah, nunda kan sipu pio eremkenupe.
14 Sun konum deami nengda, Konum depya cadi, tamupra men gam bukamenge.
Sun konum depmang nesalada, sun sambalada, ton cap men gam kunkamenge. Ange deiyoda, sun aneng tep, Allah kandi wenepmumdi, konum popra gum kupra deipmume.
Angepu gum dinin, yuk-yuk nesaladi, amali kunge nesala tupa tenenungada, kandi sun tenenge ngeda, kandi gum kupra deipmarema cadi, anesala ton cap tupa men tenenkamenge.
15 Dinino, nun nai Allah Yahweh, kandi nun tep, kan nyapu sisada, konum meliamsemumpa, nunda tapakra ton cap konum telep kupra deipsemempa, weik kupbanmape.
Nunda, Yudea tara kunup nesalada, konum meliamsemuma deiki di, nunda ton cap tapakra deipsemempa, nun yala neng weika di kupbapepa, nimi yumadi, ‘Uo, Allahda pio teleppu kurure.
Erdi pel dorur ngeda, ila mambule,’ tenengedi, kan si eremkenunge. Tonda, nun talenup mutu tuda, kandi weikanun ton, tapakra karepsemumpa, nun tara weik ton kurepa, talenupe.
Atep, nun peda, kan sipu eremkenupe.
16 Uo nun nai Allah Yahweh, nunda ikin weik kuramepu taruda, ‘Allah dipapu melipkamser’ tenen, kan tep mororamkepu.
Kandi nun tep konum wenemsemumpa, kange mun kuramseupane, nundi, ‘Nun nai Allah kan tepapu, melipseo!’ pepra, mororamkepu.
17 Ukupmantoda, mundu douamenge nerapu, mi deipkunge taru kuprepa, mi deiyo jeredi, sek-sek perepa, ngolokra doramengtopu, ikin weik kupseu taru neitamaida, nundi Allah kan damai tep ngolokra moropkepu.
18 Ukupmantoda, nunda mundu douamupkanen, mi derina taru kepupa, mi deiyo sek-sek pepra, pu jeramretopu kupseu.
Dinino, nyapuda men deipmepu. Tali dei punangepu kepmepu. Atep, nundi yuk tuai mutu kunung nesala, nun podan dam neng ton men popra bisipmepu.
Tonda, nyapu weik ton men deipmupupa, yuk mutu ban-ban yuma ton bena men kurami. Tonda, pio men kununge.
19 Nun nai Allah kan nyapu sisa dinin, konum men di deami nesalada, amenda kandi gam bukeipmempa, gam kunkamenge.
Sun deamrum nesalada, konum tu palipra peiamsi dinin, sun nongda tamupra gam bukamrume! Tamupra gam bukmumnyopda, ila di kange deipmumdi, ila upu weika di pepra, mut pepkamrume!
Ukupmantoda, kuru gawal tu deiki sakredi, dua puto welepredi, dirin di telep kudiramretopu kupkamre.
Ange deiyoda, Allah kandi kan nyapu Konum deami ngeda, ka di tamupra, gam bukeipkamreme.

Allahdi Israel nesala lepsisikra upu bokeipkamra tep, pepu upu

20 Uo, ne kayapu sun Yudea tara kurum nesalada, sun pe ati neitamai wilipra dorumu yambul ati pumbon ton wekra bemumdi, adipapu, akati buplan dekdongopkurume. Keana taru tep sunda aceipu inipra ati bopu kunmarumupanen, Allah er yu kupu ngeda, gum Kupkamre. 21 Angeda tali tep guma. Deiyoda, Allah Yahweh, er kunai im deiki di tuai mutu yaredi, amutu kunung nesaladi, mali weik kunung nge tep, yana wenepra poptapkamre. Tonda, sun atuai mutu kunung nesaladi yuk neng tep, ‘Inipra potamnungnge cap, deiyo tepa,’ tenepra enena di potamnungnge capda, yana jenek kupra deipkamre. Tonda, sundi popra tu pumbon peinung neng peda, tu pumbon dapu men kunkamenge. Ton nengdi, yuk neng tep inipra porami nesala yumada, katawaipu kupra deiprepa, nimi yumadi kael kepkamenge. Nimi poptamyai di lakepra deipkamre.