Isa 27 | XteSC | STEP | Allahdi teneamu taru konum yaryopda, Allah Yahwehdi, er pona tep ila puto weik takke parang ya doupredi, Lewiatan penung ila yu gam keca tep popkamre. Ada, cakra embaredi, bena koudarur ila bal peda, yaredi wenepra popkamre. Tonda, er si, Naga Bal penge balda, tonda laut mokon neitamai kurur bal peda, wenepra popkamre.

Isaiah 27

Israel nesala tep melipra lyepropkamra tep, pepu upu

1 Allahdi teneamu taru konum yaryopda, Allah Yahwehdi, er pona tep ila puto weik takke parang ya doupredi, Lewiatan ^{▼▼Lewiatan – Akeca Lewiatan cap, tonda laut mokon pumbon kuredi koudarur yu bal cap peraminge yumada, pumun taru kurami nesaladi, sun nenong cap, ukupmanto upu cap deiki di, akeca tep nungami. Akeca peramidi teneraminge er nong neitamai deiyo ngeda ake. Ada, ila kware kuserurnge cap, kunungrurai kure keca cap, men tenipmanto mali kuna deiyo keca tep perami.} penung ila yu gam keca tep popkamre. Ada, cakra embaredi, bena koudarur ila bal peda, yaredi wenepra popkamre. Tonda, er si, Naga Bal penge balda, tonda laut mokon neitamai kurur bal peda, wenepra popkamre. 2 Atarupuda, Allah erdi upepkamre. Ne anggur tapu du wa pepra deiamsi ngeda, pio telepnge tep, sundi gispal don mut penkamrume.

3 Ne Allahdi ne anggur wa ^{▼▼anggur wa – Aupuda, domona upu deiki di pepu dinin, er nong deiyoda, Israel yala nesala tenena tep, ‘anggur wa’ pepu. Ayat 2-5 neitamai yumada, Israel yala nesala tep aupu yuma pepu.} pio tep kalengkamne. Ataru-ataru yuma, me dingkamne. Nedi ne anggur wa tep, komuni pe, lukunda pe kalengnapu kunune. Kalengnepa, yuk nengdi awa tep yana mali men kweipkamenge. 4 Nedi awa neitamai mutmuta do, takke-takke keca ^{▼▼takke keca – Adomona upu deiyoda, Israel nesala, sun podan neng tep, ‘takke keca’ pepu. Deiyoda, Allahdi Israel nesala sun podan dam neng popkamra tep, pepu.} do, ton beleptuopda, nedi, akeca yapra gum kupra derinkamne. Ada, nimi porbana utopu kupra, akecada nedi akeca sektapnedi, wepra uku dongopnepa, jepra gum kupkamre.

5 Dinino, nedi Israel yala nesala, sun podana nesala men popnyopda, agum dingeda, sundi ne tep, ‘Erda erepra kuptupa, nunda er amutarapu kutepe’ tenen, peptengopda, ange ton gekeptene. Sunda, ne amutara kutengepa, ne cap, sun cap tonpa antapra teleppu kunkamepe. Tek sisi, ne amu tara telep dipapu ne cap, tonpa nun kikiman pio kunkamepe. 6 Doryankamre taru neitamai yumada, sun Israel ^{▼▼Israel – Israel sekmupkada, yuk Allah upu buku neitamai di, Yakub sengnunge. Allah upu neitamaida, anesala si tep, Israel sengnunge, tonda Yakub sengnunge. Dinin, ayala nesalada, tek sisi Israel nesala tenena tep sengnunge.} nesaladi, ukupmanto, co yaten tuai beredi aco ila di nepredi, atuai mutu neitamai yumada, du pio Weik ila di mouramredi, tuai mutu ban-ban yuma kunge nesaladi dopropkamenge. Ada, Allahdi Israel nesala tep telep kweipkamra deiki di, nimi tuai nesala ban-ban yuma ton, telep kweipkamre ja.

Allahdi er nyapu tep wenepkamre upu

7 Sun tenipetepso! Allah er nyapu sisa tep nengeda, pio ikin deiki dipu wenepu dinin, sun podan nesala tep, yambula dipu wenepu tenepmarum do? Gume, ange men kupu. Tonda, Allahdi Israel nesala, sun podan dam nesala poptapra gawal dakutopu, erdi er nyapu sisa Israel nesala tep, weika di poptapra gawal daku tenepmarum do? Gume ange ton men kupu. Er tep, ‘Nun songe,’ tenenung nengda, ila ikin deiki di Wenepu, tonda wenepkamre ja. Allah er nyapuda wenemrur dinin, pio men popra gawal dangkamre. 8 Allahdi er nyapu Israel nesalada, sun mali kuraminge tep, upu bokra karepudi, sun wenemna tep nengeda, sun pe mutu neitamai di enepra donokupa, yuk karen mutu nesaladi yana popbisipidi, tupa gam kurami Israel nengda, sun pe kungai karen mutu tamupra bena, ateng koupdongopipa, ikin weik dakurami. Er nyapu, Israel nesala enepra yuk mutu nesala kungai donongna tep nengeda, ukupmanto keteng yakan tara Kurur kumanya, pio ila bupu kum nun mutu neitamai yakaramretopu, Allahdi karen mutu yu nesala doproipupa, yaidi doupdaro benami.

9 Ukupka deiki di, Israel nesaladi mali weik kurami ngeda, kaukepudi, gum kupra depu. Yakub er yala nesala mali weik kuraminge yumada, Allahdi karen mutu enepra donokunge deiki di, sun mali-mali weik kuraminge yumada, konum gum kupra deipke. Tonda, Allahdi sun pumun taru isok-isok si eremna tep, gel pala taplakra deiamidi, mesba betapra keteneipidi, isok si eremamingaida, sikke buktapupa, tali tu deiki butbuta utopu keipu. Tonda, sundi isok ner er si Dewi ^{▼▼Dewi – Aupu deiyoda, ake. Dewi peramengada, isok ner, er si eremna keca tep penunge. Amutu nesala si eremami isok nerda, er si Dewi Asyera tepa.} Asyera, er urasin atonun petupra deipinge cap, tonda ‘Isokdi nun moronup keca moupra gekepkamseng’ tenen, isok si eremnai dinin, siltong telep Keca uku dongonungai, er si mesba dupa cap, ange yuma dakra tapyopda, ange yuma gum kupra deipkamre ja.

10 Tonda, ‘Podan neng yanung’ tenen, lyom gel beilya wipra ongopdongopra dorami ila ati arum neitamai yumada, nimi yuma konum bendopya cadi, walangaipu kurure. Tonda akati arumda, nimi cap, nerapu cap yuma, pio konum dimbulung pepka cadi, ukuprepa nimi kuna gumai, pio walang mutu utopu Kupke. Nimi yuma gum kupya cadi, bura tara gam kure keca, sapi do, kambing do, akeca yumada amutu kungedi metek co teru beleka beredi, bo dounkamrenge cap, mutmuta cap yumada, jedonapu kununge. Tonda, acapu mangedi beipye peingnunge. 11 Awalangai neitamaida, metek co teru yuma jepropmengepa akeca gelal konum sepyopda, konum Kolupredi, aco teruda dakra sakamre. Dakra sakre pangeda, yuk mutu kunge nerapu yangedi, sun ati co tep, doupra dongorbanunge. Uo, sun Israel tara kurami nesalada ‘Akeca-keca, mambulnge yuma ton kael keptepe,’ tenena gum nesala cadi, Allah sun ketekeiamu deiyo ngebodi, sun tep bicau pio men tenepkamre. Tonda, sun tep tupa teleppu kweiprepa, teleppu men kunkamenge. Sun tep kaukemnapu kunkamre.

Allah er nyapu Israel nesala tamupra telep kweipkamra tep, pepu upu

12 Allahdi teneamu taru konum kupyopda, Allahdi, ‘Ne nyapu sisa, Israel yala nesalada wepra dopropkamne’ tenen, keteng dangbaramre tara, Efrat mekin di dipra, keteng yakan tara banmauanen, orsirikai Mesir mutu wilimdonai kunung nesala yuma dipetepredi, malinge tapra, er nyapu sisa Israel yala nesalada, tenpu-tenpu bupra bei nesala tep, sun dopra amutu tamupra deriryakankamre. Sun anesala tep kupkamre ngeda, ada ukupmanto tepa, gandum du telepnge wepropmengedi, er katbala bol wepra kortamamengtopu, katbala bol koptara Wepropkamre.

13 Ataruda, ila lelim peramre keca, er si terompet, lelim ila di pung pepredi, upuprepa, sun Israel nesala, pumun taru Asyur mutu neitamai dubenamipa, dakuramipanen, sun bisi wangamu nesala cap, tonda Israel mutu neitamai, Allahdi sun apu yapu mali kuraminge tep, enepra donokamopa, bendopidi Mesir mutu neitamai dabena kurami nesala cap, sun anesala yumada, terompet lelim gekepkamenge. Gekepmengedi adipapu kange di tamupra, Yerusalem mutu ila ati arumpu yangedi, pio telep lengnaipu, Yerusalem mutu deiki tamupra yangedi, sun nai bo Allah Yahweh, er sipu yana eremkamenge.