Isa 29 | XteSC | STEP | Uo, sun Yerusalem ila ati arum dopra, amutu neitamai kurum nesalada, sunda bicaue. Ne Allahdi sun wenemna tep, kange mun keca karepkamsen ja! Nimidi, Allah er si eremna tep, er karen keca derirbanai tep, ‘Ariel’ (mesba) pekenung dinino, sunda ikin kupkamsere. Tonda, menop taru kuramu nimi deiyo ngebo Raja Dauddi, keana taru tep, erdi amutupu dodina ati domngai pekenung dinin, sun mutuda ikin kupkamsere. Keteng tamun, keteng tamun neitamai yumada, ne Allahdi, ‘Ne gispal dona tep, ila tumi ace, ace’ tenepra, ila kailya kalepra kunkamrume,’ pepra deipsisi ngeda, tupa kupbankamrume. Dinino, ukupmamumnya peda, nedi sun tep wenepra popkamsen ngeda, tek sisi kupkamre ja! Angeda men kaukepkamne.

Isaiah 29

Yerusalem mutu kupkamrenge tep, pepu upu

1 Uo, sun Yerusalem ^{▼▼Yerusalem – Ibrani upu deiki di akota si tep, ‘Ariel’ seki. Dinino, ada domona upu utopunge tep, er nong neitamai ngeda, gam keca popnedi, uku dongoraminge tep, ‘mesba’ tep tenepra seki. Tonda, akayat neitamaida, ‘mesba’ er nong deiyoda, kota Yerusalem tep seki. Atep nengeda, nundi aupu ‘Ariel’ er nong neitamai ngeda, ‘Yerusalem mutu’ cap, tonda ‘mesba’ cap sekmepu.} ila ati arum dopra, amutu neitamai kurum nesalada, sunda bicaue. Ne Allahdi sun wenemna tep, kange mun keca karepkamsen ja! Nimidi, Allah er si eremna tep, er karen keca derirbanai tep, ‘Ariel’ (mesba) pekenung dinino, sunda ikin kupkamsere. Tonda, menop taru kuramu nimi deiyo ngebo Raja Dauddi, keana taru tep, erdi amutupu dodina ati domngai pekenung dinin, sun mutuda ikin kupkamsere. Keteng tamun, keteng tamun neitamai yumada, ne Allahdi, ‘Ne gispal dona tep, ila tumi ace, ace’ tenepra, ila kailya kalepra kunkamrume,’ pepra deipsisi ngeda, tupa kupbankamrume. Dinino, ukupmamumnya peda, nedi sun tep wenepra popkamsen ngeda, tek sisi kupkamre ja! Angeda men kaukepkamne.

2 Tek sisi, sundi ne si eremna tep pel dopbanapu kumumnya peda, ne Allahdi sun wenemna tep, kange mun keca doproipnepa, sun mutu ati arum dopra kumumnya neitamaida, ikin keca yankamsere. Ukupne pangeda, sun amutu neitamai kurum nesala yumadi, kange mun kange doupra, ‘Uo’ tenen, mali pepra engenkamrume. Tonda, sun mutu ila ati arumda, mesba deiki yapi bamdiramengtopu, sun wenemna keca karepsenyopda, sun akati arum neitamai yumada, yapi weik akapkamre. 3 Tonda, Ne Allahdi sun wenemna tep, ila ati arum dopra kurum mutu dana-dana tara yumada, sun mar podan neng dopra deipnepa, itara cap, utara cap, tonda dana-dana tara yuma capdi, yana warekra ongopdongopmengedi popkamsenge. Angeda, menop taru Raja Daud ^{▼▼Daud – Ada, menop taru ila nimi deiyo ngebo Daudda, sun Yebus tara nengdi, kota Yerusalem nesala popidi, amutu yuma talerami taruda, Dauddi amutu yana warekamudi, sun Yebus tara neng popra gawal daku.} erdi kuramutopu, ne peda utopu kupkamsene.

4 Nedi go karepnepa, sun podan nengdi yana popsengopda, sun Yerusalem mutu nesaladi, ukupmantoda, nimi depmengepa, tu palipmengedi, tu amu neitamai di, upu peramengtopu, sun upuda metekanunpu pepkamrume. Ukupmantoda, nimi sakmengepa, tu deiki mapmengopda, sun upu peptenga peda, yuk nengdi men gekeramengtopu, sun peda utopu kupkamrume. Tonda, ukupmantoda, konum deiami neng, sun sambaladi upu metekanun peramengtopu, tonda kout ma upu peramretopu, upu pepetepkamrum dinin, yuk nengdi men gekepmanto kupkamenge. Sun anesaladi upu pepetepkamrumada, moupra men gekepkamsenge. Lukunda neitamai di, mur-mur upu peramengtopu penkamruma tepa.

5 Tek sisi, sun podan nengdi, yana popra gawal dangkamseng dinino, sun damai yana popkamseng ila yu neng, sun nimi bo jen talena neng yumada, nedi tamupra popra gawal dakamne. Ada, sundi men tenepmangepapu, nedi popra gawal dakamne. Ada, ukupmantoda, dato-dato di ila kumanya yaredi, bute cap, tonda sepmenga keca cap, pung pepra doua baramretopu kuprepa, aneng yumada gum kupra deipkamne. Ange kupkamrada, men kael kepmangepapu, dato-dato di ange yuma kupkamre. 6 Sundi epkamrume. Neda Allah Yahweh, ila puto ngebodi, im deiki jen talena malaikat yuma, sun deiyo ngebo kununa cadi, ne dato-dato di, ila kulman cap, ila mutu longna cap, ila puto kumanya cap, ila lelim cap, yanedi, sun podan neng yuma popra gawal dakamne. Ada, ila uku bu di, akeca-keca yuma jepropredi, sikke bungtamamretopu, ne yanedi sun Yerusalem mutu nesala yuma tep, lyepra telep kweipkamsene.

7 Sun Yerusalem mutu kurum nesala tep, poryakanung neng cap, sun podan mutu neng yala-yala yuma cap, kange mun keca dopra, sun nong deiki derinung nesala cap, yuk-yuk mutu yu nengdi, ‘Yerusalem mutu ila ati arum uruptapkamep’ tenen, yana posenung neng yuma capda, ne Allahdi popra tapnedi, gawal dakamne ja! Ukupne pangeda, sun Yerusalem mutu nesala tep yana poryasenge nimi bo jen talena neng yumada, pio gum kupra deipkamne. Ukupnepa, sun adipapu gum kupropkamenge. Ukupmantoda, ange konum kupnyopda, lukunda neitamaida, nimidi ken mapmange dinin, konum berekyopda bukmenge taruda, ange yuma pio gum kuramretopu, sun podan nesala yuma peda, nedi gum kupra deipkamne ja!

8 Ange utopu, sun Yerusalem mutu nesala tep, ‘Popkupe’ tenen, bulupra yanmange nesala yumada, sun tenepmanga utopu men kupkamre. Ada, ukupmantoda, ken mapmanka, jena putaprepa, jena dopra jendenka, lukdana bukrondi, jena tupa putaramretopu, kupkamenge. Tonda, ukupmanto ken mapmanka, me putaprepa, me dopra jendenka, lukdana bukrondi sima kalaramretopu kupkamenge. Ada, ‘Sun Sion mutu deiki kunge nesala tep, poptapkamep’ tenen, sun Yerusalem mutu nesala damai poryakanung neng yumada, ne Allah dipapu anesala yuma gum kupra deipkamna tep pepsene.

Asuru puna nesala utopu kunkamenga tep, pepu upu

9 Uda, sunda tupa mali pepra, lolomnapu kunkamrume. Sunda, ‘Uo ware kuptepe do?’ tenen, tupa kange tenimtonapu kunkamrume. Tonda, ange utopu, sunda, asuru puna neng utopu kunkamrume. Sunda, yu me anggur jerameng neng kange yawaramretopu kunkamrum dinin, ada kange yawaramne me jena gum dipapu, sun kangeda yawarapkamsere. Tonda, yu me jena gum dipapu, sun kange yawarapserepa, nong walwal pepdanen embankamrume. 10 Ange yuma ukupkamrum dinino, deiyoda ake. Ada, Allah Yahwehdi, sun tep udungna deiyo keca kareprepa mapluk pepkamrume. Tonda, sun asuru puna neng utopu kunge neng, sun nabi-nabi neng yumada, Allahdi sun asuru konum lelipdongopseu. Tonda, amenda kupkamre keca epra, lap pena deiyo neng peda, Allahdi sun aso deiki konum kepdongopseua cadi, sun aneng yumadi men melipra lap pepkamsenge.

11 Ne Allahdi kan Yesaya tep pepkene. Arup konum lap pepmaken keca yumada, amenda taru kupkamrenge tep, kan cap, sun Israel nesala capdi, eprumudi, ‘E, akeca nong neitamai deiyo ngeda, atepa,’ pepra jenek kupra men lap pepra kael keptume. Sun damai di tupa inipkamsere. Ukupmantoda, nimidi buku sekra ketenepmenge dinin, buku pepmanto ngebo karepmengedi, ‘Angeda katuai di pepseso,’ peptenga peda, anengdi, ‘Gume, aupuda men epra peptepe. Abukuda, co pedi konum denepdongomya tep, men pakra eptepe,’ pepkamenge. 12 Tonda, ange utopu, abuku doupra sengna men nukmanto ngebo, er kori dubepepa, ‘Nukeipkamsere’ tenen, abuku dubena kareptepe dinin, angebodi nun tep, ‘Gume nedi buku sengameng keca nungnada, pio men kael keamsa tep, aseki upuda, ne walwale. Nedi men nukmanto kunune,’ peptue.

13 Akeca-keca yuma talepra, ila puto kure deiyo ngebo Allahdi, ne Yesaya tep pepneu. Sun Israel nesalada, upu deiki dipapu ne si eremnenunge. Dinino, tek sisi ngeda, sun kange dipru neitamai di, ne tep pio moupra men tenenenunge. Ne tep walwal nengpu kununga cadi, sunda pio karen nimi bo neng utopu kununge. Tonda, sundi talepra si eremnung ngeda, tali nimi sun pe kange dipapu, ‘Ange-angepu talepra, si eremkamrume penge ngepu, sun aso deiki derinung dinin, sun dipru neitamaida, ne tep moupra tenepnengedi, ne si tek sisi men eremnenunge.

14 Ange tep nengeda, sun moupra gekepneso! Tek sisi ne Allahdi, ‘Anesalada lukdana, kware weik kupkameng’ tenen, sun aneng damaida, nimidi men kupmanto keca kupkamne. Nimidi men kupmanto keca cap, ila kael kemna keca cap kupne pangeda, sun anesala yumadi, ‘Uo’ tenen, lolopmengedi, kware kunkamenge. Tonda, sun kan-kanda, pio kael kemna nengdi, sun konum kael keami deiyo keca peda, yawarapra deipnepa, gum kupkamre. Tonda, ‘E, tek sisi telep kuna ngeda, ake’ tenen, ila di kael keami nesala, sun kael keami ngeda, sun damaida iniptapnepa, kange di ton cap men tenenkamenge. Walwalapnapu kupkamenge.

Amenda doryankamre taruda, ‘Ange kupkamsere,’ tenepkamenga tep, pepu upu

15 Uda, Allahdi sun yuma tep wenepkamsera cadi, sunda bicaue. Ada, sundi, ‘Gume, nundi sisingnup upuda, Allahdi, gekepra men kael keptue. Sundi, ‘Angeda ukupkamepe’ tenen, inipra upu penup keca peda, Allahdi, nun peipmepu ngeda, men kael keptue. Erdi nun epra men gekepkamsera tepa,’ tenepmum di, ange yumada inimtamnapu kurume. Tonda, sundi, ‘Gume ware neng do yumada, nimi yuk neng ton men disenunga cadi, nun penup upuda, men kael kemsenunge. Sun aneng dipapu tenepmengedi inimtamnunge. Utenepra kurum dinino, sun damai ikin keca yarepa doropkamruma cadi, sunda bicaue.

16 Akeca yumada, sundi tamutonapu kurume! Moupra tenipetepso! Mambul ngeda dan nge do? Ukupmantoda, kerah tu di dopra betamdirur ngeboda, mambul kurur do? Agum dingeda, kerah tu sisapu mambul kurur do? Ange utopu, kael ngebodi betapra deiptu kerah tu mau di, betamna deiyo ngebo tep, “Neda kandi betaipmanerema guma,” peptu do?” Tonda, agam kun gum kecadi, betapra gam keca ketekepra deiptua deiyo ngebo tep, “Kanda akeca-keca yuma men kupmanto ngebo kurume. Kanda ila kael kemna keca pio men kael keamrume,’ pepra, mali peptu do?” Gume, ada men kupmanto.

17 Sun ton tenipetepso! Ila kael upu deiki di, ukupmanto upu ton pepu. Aupuda ake. “Pio weik taru ton men kunkamrum dinin, Libanon tara neitamai bura co palpal mutu yumada, tamupra wa pen dam kepkamre. Wa konum perum mutu yumada, tamupra co palpal tekamre. 18 Ange yuma ukupkamre taruda, amul kinipupa, abuku neitamai sekra deipsi upu, inimna gum di, katuai dipapu nungmengepa, menmena taru men gekepmanto kunung nesala peda, tamupra telep kupra gekepkamenge. Tonda asuru kupupa, kunungnaipu kunung nesala peda, asuru lapra deiprepa, tamupra telep kupra epkamenge.

19 Puto nengdi yanipmengepa, ikin kange doupra tali kankan kunung nesala cap, tonda bung keca pio men talengepa, yuk nengdi, ‘Sunda tali nesala kununga,’ pepra, malye demenge nesala capda, Allah Yahwehdi, kange di tamupra telep kweiprepa, sun kange derinkamenge. Ada, Pio Lengna Deiyo Ngebo, Israel nesala sun nai bo Allahdi, sun pio kankan Israel nesala tep, tamupra telep kupra deiprepa, kange telep deiki di kunkamenge. Sundi er tep, ‘Allahda pio telepe,’ pepmengedi, pingpinga di er sipu eremkamenge.

20 Pio kange deipra teleppu kunkamengada, deiyo ake. Ada, nimi yuk nesala cap tep, ikin keca dopra, sun deiki derinung neng cap, anesala tep, ‘Sunda tali nesalapu kurume,’ pepra, yap-yap penung nesala capda, Allahdi gum kupra deipkamre. Ware neng do yuma, ‘E, adipapu mali kun kecapu talepra kupkupe’ tenen, kunge nesala peda, Allahdi gum kupra deiprepa, men gam kunkamenge. Allahdi anesala yumada, sirya gawal dakra deipkamre.

21 Tonda, nimi upu bongdina tep bulupmenge taruda, deiyo men kupmarepapu, sundi yuk nesala tep, ‘Sunda mali kupmane,’ pepra, luludinung neng cap, tonda, mali kupmange neng tep, ‘Sunda telep kupmange,’ pertamnung neng capda, Allahdi wenepkamre. Tonda, sun mutu wengbana tep bisi buplan damai bulupmengedi, nimi upu bongdina tep, pel telep kupra donge deiyo neng tep, ‘Aneng popkupe’ tenen, mali upu sisingmenga deiyo neng cap, Allahdi gum kupra deipkamre ja. Tonda, mali men kupmangepapu, ‘Sun anengdi moropmenge upuda, pio men gekepkamepe,’ pepra, yaniptapmengedi, luludinung neng peda, Allahdi wenepra popra, gum kupra deipkamre. Amenda taruda, Allahdi amali kunung nesala yumada, popra gawal dakra deiprepa, gum kupkamenge.

22 Atep, Israel nesala, sun nai bo Allah Yahwehdi, sun apu bo Abraham ikin kuramupa lyepromu. Er dipapu, Israel nesala, sun apu bo Yakubdi deiamupa, dadeidanen yakaramidi, deiami neng, sun Israel nesala yuma tep upepsere. “Ne mawa nesala, sun Israel nesala yumada, melipra lyepropkamna cadi, ataru di dipra dorkunkamre taru neitamai yumada, sun Israel nesala, ton cap ali men dangkamenge. Sun peda ton cap, malya demsengepa, kwar kupserepa, sun aso deiki genepdongopra, ali dangamitopu, tupa men kunkamenge. Kange deipra teleppu kunkamenge.

23 Ukupkamenga deiyoda ake. Ada, ne Allahdi, Israel nesala, sun nyapu weik ton tapakra karepkamsen nge, sundi epmumnyopda, ange deiki di kael kepkamrume. Kael keprumu dingeda, sun Israel nesala yumadi, ne Allah Yahweh tep, ne sipu eremkamnerume. Sun apu bo Yakubdi deiamupa, dadeipdanen yakaramidi, deiami nesala, sun kankan neitamai kunun Pio Lengna Deiyo Ngebo, ne Allah tep epnengedi, kael kepnengopda, ne tepapu ne si pio eremkamnenge. Ne Allahdi, sun Israel yala nesala yuma melipra lyemdoramsisi deiyo ngebo tep, epnengedi kael kepnengopda, ne tepapu ne si pio eremkamnenge. Atep ataruda, sundi, ne tepapu kwar kuna cap, gispal dona cappu kunkamnerume.

24 Tonda, ataruda, sun walwal deikipu kurum nesalada, nukmumdi, ‘E, deiyoda, ange tep pepka’ tenen, moupra kael kepkamrume. Tonda, ware nengdi do, sundi, ‘Gume angeda nun songe, angeda gume, uo ange kupsetua,’ pepra, mali weik perum nesalada, telep kweipsenepa, amenda taruda, peteremna nengdi peterepsengepa, kange di tamupra, ‘Angepu betapra peterepsetue’ tenen, kange deipra kupmengedi, sun peda moupra kael kepkamenge.