Isa 3 | XteSC | STEP | Tek sisa, Allah Yahweh, erda akeca-keca yuma deiki tara erepra, ila puto kurur deiyo ngebodi, im deiki jen talena malaikat yuma taleredi, ila puto weik ngebo kurure. Er dipapu, Yerusalem mutu ila ati arum cap, Yehuda tara neitamai cap, sun amutu butene neitamai kunge nesaladi, sun jen keca cap, me cap, bulupra ketenemderiramenge ngeda, dopropredi gum kupra deipkamre. Jen keca putana weik kupkamsere.

Isaiah 3

Allahdi, “Yerusalem mutu deiyo-deiyo nengda, konum tapnyopda, amutu nesala ikin weik kunkamenge,” pepu upu

1 Tek sisa, Allah Yahweh, erda akeca-keca yuma deiki tara erepra, ila puto kurur deiyo ngebodi, im deiki jen talena malaikat yuma taleredi, ila puto weik ngebo kurure. Er dipapu, Yerusalem mutu ila ati arum cap, Yehuda tara neitamai cap, sun amutu butene neitamai kunge nesaladi, sun jen keca cap, me cap, bulupra ketenemderiramenge ngeda, dopropredi gum kupra deipkamre. Jen keca putana weik kupkamsere.

2 – 3 Tonda, amutu tep puto di talepra, pel dona neng cap, jen talen neng cap, nimi upu bongderina deiyo neng cap, Allah upu lap pena deiyo neng cap, wisi nengdi, ‘Ange-ange kupkamrume, angeda telepe, angeda gume,’ pepra, lap pena deiyo neng cap, amenda kupkamre keca tep, epmengedi lap pena deiyo neng cap, tonda jen talena neng denge weik lima puluh (50) neng talepra, kunge deiyo neng cap, aila si eremna mutu, anegara talepra kungepa, nimidi si eremnung mambul neng cap, asuru kwa neng cap, “Ange kupkupe, angeda epmane, angeda kupkamre ja,” pepra, meri penga deiyo neng cap yumada, Allahdi gum kupra deipkamre.

4 Ne Allahdi, sun amutu kaber nengpu wepra deipnepa, sundi deiyo kepra amutu kunung nesala talepra kunkamenge. Sun derinkamrum nyapudi, akeca-keca men kael kepidi, kabul men kupmai dinin, sun anyapu dipapu, nimi deiyo kepra, Raja utopu kupmengedi, sun mutu talepra kunkameng taruda, sun pe kange di, ‘Ange kupkupe,’ tenepmenge ngepu kunkamenge. 5 Ukunkameng taruda, amutu neitamai kunkamrum nesalada, yanipmengepa, ikin weik kunkamrume. Nimi deiyo nengdi, yuk neng tep upu pepmengopda, ange yuma ton men gekedangedi, sun upuda yanidanapu kunkamenge. Ange utopu, ton tara nengdi, sun damai kunge nesala tep, yanidanapu kunkamenge. Sun mutu nyapudi, sun mutu wisi neng tep, ‘Sun wisi nengdi, peserum upuda men gekepkupe. Sunda tali nengpu kurume,’ pepra, mali upu penkamenge. Tonda, pio amutara kungedi, mali-malipu kunge nesaladi, sun pio telep, dumsisipu kunge deiyo neng tep, mali upu pepmengedi, ‘Sunda mambule neng men kurume, sun dakwapye,’ pepra nalemkamenge.

6 Ataruda, ton ngebodi, sun nai bo ati beredi, er kabo, er pe yala ngebo tep dopropredi, aupu pepkamre. ‘Ne kao, kanpuda opkal telepnge kepmarema cadi, kan tep nun pio kange mun kupser taruda, kandipu nun deiyo ngebo kepseo,” pepkamre. “Akati arumda, yu neng konum urupra sikke buktapsei dinino, kan dipapu amutu talepra nun deiyo ngebo kunkamserume,” pepkamre. 7 Upepkamre dinino, ataruda er kabodi tamupra pepkamre. “Nedi aikin kupsere ngeda, tek sisi men lepsikra pel doptene. Neda, nimi deiyo ngebo guma! Tonda, neda jen keca pe, kenekmanto opkal peda, ton ngeda men talenune. Akeca-keca yuma gum kuna ngebo kununa cadi, kandi, ‘Kanda nun deiyo ngebo kupsetume,’ pepra men wepra deipnetume,” pepkamre.

8 Ange yumada, tali tep men pepsene. Deiyoda, tek sisi Yerusalem mutuda, konum dakra tuai saku! Utopu Yehuda mutu peda, konum yawa popra tapu! Akupunge deiyoda, Yerusalem mutu kunge nesala cap, Yehuda mutu kunge nesala cap, sundi Allah Yahweh er upu yaniptapra bisbisa kamna cap, er tep mali upu pena cap, kuramya tepa. Tonda, Allah Yahweh er puto cap, pio telep kurya cap tep, peten kemnange, er ila dirine weik kuryada, sundi, ‘Angeda mambul gume, dakwapye,’ pepmengedi, yanitamnunge. 9 Sun amutu kunge nesaladi, dipru erepra salnong-nong kamamya deiki di, katuai dipu mali kununge. Sun anesala yumada, tek sisi jenek kupra, pio mali kunge taruda, yuk neng ton sun urasin epmengopda, sun mali kunge keca kael kemnunge.

Ada, ‘Nun mali kunup keca inipkupe,’ tenena gum dipapu, menop taru Sodom mutu kurami nesalada, jenek kupra mali kuramitopu, kununge. Atep nengeda, sunda bicaue! Ila ikin keca sun nong deiki yankamre ja! Ada, sun Yerusalem mutu kunge nesala cap, Yehuda mutu kunge nesala capda, sun pe deikipu ila kange mun keca dopra deipdaiya tep, ikin weik kununge. 10 Atep, Sun dumsisipu kunung nesala tep, pepkurume.

“Sunda kange deipkurume. Allahdi sun tep lyepropkamre. Ada, sun anesala telep kupra pel donunga deiki di, apel donung ngeda, nong keca ton doropkamenga tepa. Pel telep kupra doronungtopu, menenga keca pio telep ngepu dopropkamenge.

11 Dinino, sundi mali kecapu talepra kuramenge nesala tep nengeda, upepkamrume! “Sunda bicaue, sun wenemna tep, pio ikin keca ton dopropkamrume. Sundi yuk nesala tep ikin keca deriramrumtopu, sun peda ikin keca sun damai yaryopda, dopropkamrume. Tonda, sundi mali-mali pel doramrumtopu, sun damaida, pio ikin keca yana, sun nong deiki deiprepa doropkamrume,” pepra wenepkamrume. 12 Mali kun keca talepra kununga cadi, ukutaruda, yambul-yambul nyapudi ne mutu nesala yuma tep daramdongonunge. Tonda, neda Allah, ne mawa mutu nesalada, tali dakunge nerapu di, deiyo kepmengedi, sun mutu talepsengedi, ikin kemdisenunge. Tonda, ne mutu nesala tep, deiyo kepra talenung deiyo nengdi, sun benmanto bisi peda wangapra deringepa, kange wang-wang peprepa, ‘Telep kuna tep benkamep bisida ake’ tenen, men kael kemnunge.

Allah Yahwehdi er nyapu wenepkamre upu

13 Nimi upu bongdina taru di, upu pena deiyo neng tekmengedi, lepsisikra pena upu peramengtopu, Allah Yahweh er bungna keca deiki bungamrai di, er mawa nesala dinin, sun mali kunung nesala yuma tep, “Telep kunmarum ngeda ake. Mali weik kunmarum ngeda ake,” pepra, wenemna upu pepkamre. Tonda konum tekre dingeda, sun ban-ban yuma kunge nesala, sun mali kunung keca tep, wenepredi, menenga keca tep, ila ikin keca sun nong deiki deipkamre ja! 14 Angetopu, sun nimi deiyo kepra, Allah er nyapu sisa tep talengedi, Raja kunung neng cap, tonda sun wisi-wisi neng cap tep nengeda, Allah Yahwehdi sun aneng tep upu bokeipredi, ila di wenepkamre. Allahdi sun aneng tep, “Telep kunmarum ngeda ake. Mali weik kunmarum ngeda ake,” pepra, wenemna upu pepkurure. Upu bokeipkamre taruda, aupu ton pepkamre. “Nimidi anggur wa pepra kouramengenge du weika di moupyopda, yuk nengdi yana, anggur du yuma dalupra dororamengtopu, sun deiyo neng peda, ne nyapu sisa sun Israel nesala tep nengeda, konum mali kweiprume. Tonda, sundi tali kan-kan nesala, sun bung keca yuma dalupra dororamrum ngepu, sun pe ati pumbon deiprumpa, sun pe atida dinipseue,” pepkamre.

15 Atep, sunda ware keca deiyo tep, sundi ne nyapu sisa tep nengeda, sun nong deiki kange mun keca deiprumudi, ikin kemdirum do? Tonda, sundi ne nyapu sisa dinin, tali kan-kan nesala, sun keca dalupra dororumudi, sun urasinda, tu deiki buta neitamaipu darapdongoprum do? Neda Allah Yahweh, akeca-keca yuma talenedi, ila deiki tara erepra, ila puto ngebo kunune. Tonda, neda sun im deiki jena talena malaikat ^{▼▼malaikat – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat 15 neitamaida, ‘Yahweh Sebaot’ pepra seki. Tonda, pasal ayat 10.23-24; 22.5, 12, 14-15; 28.22 neitamai peda, asi ‘Yahweh Sebaot’ utopu pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi ‘Sebaot’ pepra seki. Atep nengeda, sun kael kemna tep, aupu butene deiyongepu katuai di sekmepu. Indonesia upu deiki di, Allah upu buku seki neitamaida, ‘Yahweh’ tep, ‘TUHAN’ pepra sengunge; (ayat 16 dinkurume). Tonda, ‘Adonay Sebaot’ tep, ‘Allah yang Mahakuasa’ tonda, ‘Allah yang Mahatinggi’ pepra sengnunge. Ange peda telep dinin, asi butene tek sisi deiyo akapu ngeda, ‘Ketengban nesala yumadi, telep kupra kael kepkameng’ tenen, nundi aupu deiyonge konum katuai di sekmepu.} yumada, ne dipapu talenune. Atep nengeda, nedi sun tep aupu konum peipsena tep, sun yumada tek sisi wenepkamsen ja!”

“Yerusalem mutu kurami nerapuda salnong-nong kamnunge,” pepu upu

16 Allah Yahwehdi pepu.

Sun Yerusalem ^{▼▼Yerusalem – Yuk Allah upu buku neitamaida, akati ila arum si tep, ‘Sion’ mutu seki. Amutuda tenpu dinin, amutu sida butene. Menop taruda amutu tep, ‘Sion’ perami dinin, ukutaruda Yerusalem mutu penunge. Amutuda tenpua.} mutu kunung nerapuda, dipru eremna deiki di salnong-nong kamnung nerapu kununge! Sundi, ‘Nimi epsengedi kange deipsenga tep, mun penkamseng’ tenen, anerapuda giso erepra embangedi, nimi yuma dana-dana tara dingedi, asuru puna nerapu kununge. Sun anerapu embange taruda, ‘Nimidi sunda urasin pio telep nerapu tenepkamseng’ tenen, sal nong-nong kamnunge. Tonda, sun nongda dopra ortara, atara kepbangepa, sun yan deiki dongomenge kecada, nyeleng-nyeleng peredi, lelim perure. 17 Ukununga tep nengeda, Allah Yahweh, akeca-keca yuma taleredi, ila puto weik ngebo kurura cadi, er Allahdi sun Yerusalem mutu neitamai mali kunung nerapu yuma tep, wenepkamre. Tonda, ‘Ali weik kunkameng’ tenen, sun anerapu giso deikida, bol kona cap, suse cap talepredi, sun giso potong yuma embendoprepa, delaupu kupkamre. Tonda, sun opkal yuma dopropredi, tapyopda, nimidi men eptenge keca cap, sun nong yuma capda, katuaipu kuprepa, nimi yumadi epkamenge. Ukupyopda, ali weik dangkamenge.

18 Anerapuda, salnong-nong kungedi, dipru erepra, ‘Dakunge nimi epsengedi, ‘Uo, sunda pio urasin telep nerapu,’ tenepsengedi, kange derinkamseng’ tenen kununga tep nengeda, Allahda, akeca-keca yuma taleredi, ila puto weik ngebo kurura cadi, erdi sun Yerusalem mutu neitamai mali kunung nerapu yuma tep nengeda, wenepkamre. Wenepredi, sun anerapu giso deiki getedongon keca cap, kum damai gerengnung kweirya keca cap, amul deiki cap, buru deiki cap, yan asuru deiki gerengdongonung kunumna weik rantai tapu cap yumada, Allah dopropredi taprepa, tali nong yopu kunkamenge.

19 Tonda Allahdi anerapu wenepkamre taruda, Yerusalem mutu nerapudi, ‘Nimi yuma epsengedi, ‘Uo sunda urasin pio telep nerapu,’ tenepkamseng’ tenen, sun urasin telep kuna tep, kwerya keca yala-yala yuma kenekmengedi, salnong-nong kamnunge. Atep nengeda, Allahdi sun nong deiki kenengnung kweirya keca yumada, dalupra dopropkamre. Ada, sun yan deiki koupdongopmengepa, nyeleng-nyeleng peramre keca cap, sun giso kounung telep opkal cap, sun kum damai gekekra garangnung kwerya keca cap, ange yumada dalupra dopropkamre. 20 Ange utopu sundi, ‘Urasin pio telep kunkamep’ tenen, sundi kenengnung kwerya keca, sun urasin koudongon opkal, er si Cadar cap, sun kum damai gerengnung keca, er si gelang cap, amul dam koudongon keca, er si perihasan telinga cap, ‘Nun nongda nintong telep penkamser’ tenen, nintong telep me dingdongonung metek me mau, sun nong deiki koudongon keca cap, tonda, ‘Mali keca yana popserur’ tenen, mem dona tep, peten kepra derinung keca cap, dalupra dopropkamre.

21 – 22 Tonda, ‘Nunda ila mambul nerapu tenepkamseng’ tenen, sun buru du deiki dongomameng keca, er si cincin cap, sun u damai potokra derirameng keca, er sida anting-anting cap, sun giso deiki galuna kweirya keca cap, deiyoteng damai koudongonung kain cap, 23 urasin pio telep kunumna weik boun opkal cap, lyom opkal kenengnung nge, pio telepnge cap, opkal deiki kenengnung bupu lyom opkal cap, bul li taru kenengameng urasin telep lyom opkal, er sida mantel cap, co bo kina tep keca, urasin telep dompet cap, alen cap, opkal amu kemnange, pio boun opkal er si kain lenan cap, telep opkal di kum dam koudongon keca cap, dalupra dopropkamre.

Tonda, ‘Sunda deiyo nerapu tenepkamseng’ tenen, sun giso deiki derinung kunumna weik keca cap, ‘Nun urasin epdatepe’ tenen, dourameng kecada, er si kaca muka cap, cermin cap, Allahdi dalupra dopropkamre. Akeca-keca yumada, sun anerapudi, ‘Nimi epsengedi, uo sunda urasin pio telep nerapu tenepsengedi, nun tep mun penkamseng’ tenen, kweirya tep kenengnung keca yumada, dalupra dopropredi, gum kupra deipkamre.

24 Allahdi asalnong-nong kamnung nerapu wenepkamre taruda, sun kweirya telep keca pununa tep, urasin mali kecapu karepkamre. Atep, sun anerapuda, ukutaru nintong telep pen keca, sun nong deiki lingnung dinin, dortaruda sun anerapu deiki di, lyun tong belepkamre. Sun anerapu deiyoteng koudongonada, ataruda urasin telep boun nge di kounung dinin, dortaruda, pio mali gat tapu, bisam turye utopunge di punupra, adeiyoteng utopu ngeda, koupkamenge.

Ataruda, sun giso potong sisir di telep kupra ketenepra derinung dinin, ortaruda, delaupu bupkamre. Ataruda, sun kenengnung opkalda, kunumna weik, urasin pio telep-telepnge kemnung dinin, dortaruda ange kwiriptapra pio mali opkal, er si karung goni utopungepu kepkamenge.

Atep nengeda, ukutaruda, sun Yerusalem nerapuda, urasin pio telep-telep kemdanung dinin, dortaruda sun urasinda, pio malipu kunkamenga cadi, ali weik dangkamnunge.

25 Angepu gum dinin, Allahdi Yerusalem mutu kunge nesala tep wenepkamre taruda, Yerusalem mutu kalengna tep, ila puto kunge jen talena neng yuma cap, sun amutu kunge nimi yuma capda, yuk karen mutu di, yu weik neng mar poryangedi, sun parang ya di amutu nimi weika di popmengedi, pio gawal dakamenge. Sun podan taru di nimi weik depkamenge.

26 Ukupmengopda, sun Yerusalem mutu tupa gam kunkameng nesaladi, akati arum dominge dinin, ila gel beilya neitamai, bisi buplan wengbanai tep, bisi buplana bon potokeipiyaida, gat keca er si besi di buplan er sida, pintu gerbang deipya damai, bupra wekmengedi, ila upu di mali pengedi engenkamenge. Ukupmantoda, nerapu opkal kwiripropmengepa, banangapu kupmengedi, tu deiki bukra engeramengtopu kupra, sun Yerusalem mutu nesala peda ukunkamrume. Ada, Allahdi wenepseredi, ikin keca weik karepseryopda, sun peda ange utopu kupra, kange mun kange doupra engenkamrume.

Allahdi sun Israel yala nesala tep pepu.