Isa 30 | XteSC | STEP | Allah Yahwehdi pepu. “Yehuda yala nesaladi, balila deipra kununga tep nengeda, sun bicaue, pepu. Anengda, ‘Ware kupkamep do?’ tenen, sun pe kange dipapu upu sisingnung ngeda, deiyo ton men kupkamre. Ada nedi, ‘Ukupkamrume,’ men peipsipapu, sun pedipapu upu sisikya tep, pepsene. Sundi tenenung ngeda, ‘Telep kununga,’ men tenenune. Angeda, sun pedipapu, ‘Mesir mutu nengdi makupsetenge,’ tenepidi, upu talerbei ngeda, ne Lek Sambaladi, ‘Ukupkurume,’ men peipupapu, sun dipu upu talerbei. Ukupya deiki di, sun mali keca weika di tapakra kupbanunge. Men di mali kurami ngeda, konum akapu dinin, ukutaruda, ton cap weika di tapakra mali kununge.”

Isaiah 30

Yehuda yala nesaladi, Mesir mutu nesala cap pepdanaminge tep, pepu upu

1 Allah Yahwehdi pepu. “Yehuda yala nesaladi, balila deipra kununga tep nengeda, sun bicaue, pepu. Anengda, ‘Ware kupkamep do?’ tenen, sun pe kange dipapu upu sisingnung ngeda, deiyo ton men kupkamre. Ada nedi, ‘Ukupkamrume,’ men peipsipapu, sun pedipapu upu sisikya tep, pepsene. Sundi tenenung ngeda, ‘Telep kununga,’ men tenenune. Angeda, sun pedipapu, ‘Mesir mutu nengdi makupsetenge,’ tenepidi, upu talerbei ngeda, ne Lek Sambaladi, ‘Ukupkurume,’ men peipupapu, sun dipu upu talerbei. Ukupya deiki di, sun mali keca weika di tapakra kupbanunge. Men di mali kurami ngeda, konum akapu dinin, ukutaruda, ton cap weika di tapakra mali kununge.”

2 Ada, sundi ne tep, “Naio, ‘Mesir mutu nesaladi makupsetenge’ tenen, mororbetepe do?’ men pemnerum dinin, sun pedipapu moroberume. Tonda, Mesir mutu ila nimi deiyo ngebo Firaundi, ‘Melipra kalengkamser’ tenen, er kori mororberume. Sundi, ‘Uo, Asyur mutu nesaladi poryankamsenga tep, ware kuptepe do?’ teneprumdi, ‘Mesir mutu neitamai inimbepepa, yu nengdi men epkamsenge’ tenen, inimberume. Sunda, ‘Allahdi melipra lyepkamsere,’ tenepmatum dinin, ne tapra sundi, Firaun damai perberuma deiki di, sun mali kuprume.

3 Sunda, ‘Mesir mutu ila nimi deiyo ngebo Firaundi melipra kalengkamser’ tenen, er kori mororberum dinin, erdi melipetepsetua peda, amenda poryankamseng nengdi popsenge pangeda, ali dangkamrume. ‘Mesir mutu neitamai inimbenkamepe,’ teneprum ngeda, ali dangkamrume. Anesaladi, melipetepsetenga peda, ikin kupkamsera tep, ali dangkamrume.” Allahdi sun Israel nesala tep pepu.

4 Upepudi aupu ton pepu. “Firaun er amutu tara ila deiyo nengda, Zoan mutu cap, Hanes mutu cap, neitamai dakunung dinin, aneng peda sundi makupra men lyepsetenge. 5 ‘Yuk mutu nesaladi makupsetenge’ tenen, mororberum dinin, anesaladi, sun tep men makupmanto neng kununga cadi, amoropmumnge tep, ali dangkamrume. Mesir mutu nesala pe, yuk mutu nesala peda, ikin kupkamserenge tep, yambula peda men makupsetenga tep, ali dangkamrume. Tonda, yuk mutu nesaladi, sun Yahudi yala neng tep, ‘Sunda walwal nengpu kununge,’ pepra malya pedongonkamsenge.” Allahdi pepu.

‘Mesir mutu nesala melipkamseng’ tenen, kunumna weik keca, unta bisam deiki di kipra dubeiya tep, pepu upu

6 Allahdi pepu. “Ne Allahdi sun Yehuda yala nesaladi, kunumna weik keca, unta bisam deiki di kipra duberumnge tep pepkusene. Sun kunumna weik keca kipra, unta bisam deiki deirumdi, me pio gumai, Negeb mutu neitamai embarumu taruda, ikin keca cap, kange mun kange doun keca cap, yala-yala yuma kuserure. Ada, amutu neitamaida bura singa pus gemnge cap, nernge cap weik kununge. Tonda, nimi pon bal, er sida kobom bal cap, yuk yu bal ton, nimi pona tep sepdara kapbaramre bal cap kununge. Amali keca weik akuapmarepapu, ‘Mesir mutu nesala kunumbenkamep’ tenen, sundi sun kunumna weik keca yuma dopra, keledai bisam cap, unta bisam ^{▼▼unta bisam – Akeca gambar dina tep, Kejadian 12:16 dinkurume.} cap, bali deiki deipra dubarume. Ange ukurum dinin, anesalada sun tep, men melipmanto nesala kununge. 7 Akeca yumada, Mesir nesala tep tali bena kareprum dinin, Mesir mutu nesaladi, melipsetenga peda, ikin keca sun deiki pio weik kupkamsere. Ange tep nengeda, nedi Mesir mutu ukupmanto si tep, ‘Rahab,’ penune. Asi deiyoda, ‘Anerda akeca yuma men kupmanto ner kurure,’ tenena tep penune.” Allahdi Yehuda tara nesala cap, Israel tara nesala cap tep pepu.

Tali kange doupra kunge nesala tep, pepu upu

8 Allahdi Yesaya tep peipupa sekeipseu. “Allahdi ne tep pepneu. Ukutaruda, bememdi mali kunge keca yuma tep, tenpu gel pala deiki sekurume. Tonda, domba bol gelal sepunge deiki di, bena sekra deipkurume. Asengna keca sekrap katuaipu deipmempa, sun pe asuru di dinkamenge. Tonda, doryankamre taru yuma peda, pio tep kunkamre. Apio kunkamra cadi, sundi deipmengepa, dadeipdanen bankameng nesala yuma peda, epmengedi kael kemkamenge.”

9 Ukupra sengkamrume.

Amutu nesalada gekena gum di, Allah tep balilapu kunung nesala cadi, sunda tali kange doupra, Allahdi, ‘Ukupkurume,’ pepra, peteremsere upu gekepra men kununge. Anesalada, mok upupu pedanunge. Tonda, ne Allah Yahwehdi, ‘Ukupkurume,’ pepteneya peda, ne upu pio men gekenenunge. 10 Tonda sun anengdi, ne upu lap pena deiyo neng, nabi neng cap, tonda nedi karepnepa, ken mana deiki di epmengedi, lap penung neng cap tep, upenunge. “Sun sipyal kepdongopra kodongona utopu kunkamrume. Allahdi karerepa, ken mana deiki epmumdi, lap peserum upuda, ware keca deiyo tep, aupu nun tep tupa peserum do?

Tek sisi ikin keca weik kupkamserenge, peserumu ngeda, nun dabale cadi, ton cap aupu men penkamserume. Ikin upu gum dinin, ‘Kange telep kusetu’ tenen, aupupu penkamserume. Amenda men kupkamrengepu pepsetumpa, gekeptepedi, ‘Tali kange doupra kutepe’ tenen, pepsepe. Nunda pio dabal tep, tali kange doupra kunkamepe.” 11 Tonda uperume. “Apeserum upuda, nun dabal cadi, yuk tara upu ton penkamserume. Nun Israel nesala cap, Yehuda nesala cap, talepra kusere ngebo Allahda, Pio Lekpu Kurur Ngebodi wenepkamser upuda, ton cap men penkamserume.” Sun Yehuda yala nesala cap, Israel yala nesala capdi, Allah ne upu lap pena neng tep perume. Allahdi pepu.

12 Allahdi pepu. “Ange tep nengeda, ne Allah Pio Lek Ngebo, sun yuma talesene ngebodi, pepsene. Sundi ne pesene upu tep, ‘Nun songe,’ pepra taprumudi, sun pe kun keca tepapu tenepra kurume. Tonda, sundi tali kankan kunge nesala tep, yanitamumdi, ikin keca sun nong deiki derirumudi, mok upupu perume. 13 Sun mali kumum keca tep, ukupmantonge pepkusene. Nimidi lyom gel beilya wipra welemengepane, bongopredi gongopra dato-dato di saka tuai dourbaramretopu, sun mali kumum nesalada, sun wenemna keca, dato-dato di sun damai yankamsere.

14 Ukupmanto upu ton pepkusene. Me gwen mau ketenemna tep, nimidi kerah tu dopra, gekepra deipmengepane, sakredi, olokra sikke bukredi, yambulanunpu kurure. Ukurura cadi, sikke neitamai di dopropmanto ngeda, pio men kuptue. Tonda, ame mau oloktapiopda, me peda men gwepmanto. Me gwen mau sikke buktaprepa, metek kuramretopu, sun wenemna keca di sun mali kurumu nesala tep, popra gawal dakamsere.” Allahdi pepu.

15 Upepudi aupu ton pepu. “Ange tep nengeda, ne Allah Yahweh, akeca-keca yuma talepra, ila eremna cap, puto weik cap, ngebo kunune. Nedi, ‘Ukupkamne,’ tenenetopu kunune. Nedi pepkusene. Neda, Pio Lengnapu ^{▼▼Lengnapu pepkada, ada bol kurun ngebo kuna tep men pepu. Deiyoda, ‘Mali keca tenpunge peda men kurnerur ngebo’ tenen, pepu. Indonesia upu deiki di, ‘Suci’ penunge.} kunedi, Israel nesala kalekra talenune ngebodi pepsene. Ada, ‘Allahdi wenepra, popra gawal dakserur’ tenen, kunkamrum ngeda, pepkusene.

Sun mali kumum keca yuma tapmumdi, ka tamupra ne damai kepronkamrume. Ukupmumdi, ne tep teka teneprumudi, bouna di kunkamrume. Dipru bouna di dakra kumumdi, ‘Nun nai Allah dipu lyepkamsere’ tenen, ne tep teka tenepra kumumnyopda, nedi puto kemdinkamsene. Nedi, ‘Ukupra ukunkamrume,’ pepsisi dinin, sun balila kumumdi, ange tapmarume.

16 Sundi uperume. ‘Nunda kuda bisam bali deiki welepra bukmepepa, menmena sepdara benkamepe,’ pepruma tep, tek sisi poryankamseng taruda, adipapu sepdara bendopkamrume. Tonda sundi, ‘Kuda bisam sepdara baramrenge deiki bukmepedi, sepdara benkamepe,’ pepruma tep, tek sisi sun tep poryankamseng nengda, sun amnyo tara di sepdara domyankamsenge. Atep, sundi tenepmamumtopu kunkamrume. ‘Sepra benkup’ tenen, banmamumpane, sun podan neng amenda domyasengedi, popkamsenge.

17 Amenda taru, sun podan neng yangopra ukupkamrume. Sun podan neng kan-kan, tenpu ngebo ton epmumnyopda, ‘Uo, angebodi popkusere,’ tenen, kware kuprepa, sunda denge weik, seribu (1.000) neng, sepdara bendopkamrume. Ange utopu, sun podan neng kan-kan, pamu bari neng epmumnyopda, ‘Uo, anengdi popkusenge,’ tenen, kware kupserepa, sun yuma sepdara bendopkamrume. Sun podan nengdi amenda dombanmanganen tapmengepa, sunda gung weik men kunkamrum dinin, tenpu-tenpupu gam kunkamrume. Ukupmantoda, mutu deiki tenpu bendera ikra deipmengepa, er yuk tengamretopu kunkamrume. Ada, sunda nimi pio weik kuramrum dinin, konum popropsenge pangeda, yambulanun kunkamruma tep pepsene.” Allahdi sun Israel yala nesala yuma tep pepu.

18 Upepudi, aupu ton dukdongopra pepu. “Sun mali kumum keca tep, ila kange mun keca weik yankamser dinin, ne Allah Yahwehdi sun tep tupa tenesenunada, ‘Anesalada bicaue, ne kange dipapu melipra lyepsetene,’ tupa tenesenune. Ne Allahdi teneramsenyane, ‘Ataru ukupkamne,’ tenemsi taru konum kupyopda, bicau tenepsenedi melipra lyepkamsene. Ukupkamsen ngeda, mesum tep gume. Deiyoda, Ne Allah Yahweh, pio dumsisipu kune ngebodi pepsene. Atep, ware nesala do yuma, ‘Allah er dipapu melipra lyepkamsere’ tenen, teka tenepra dinapu kunge nesalada, nedi, telep kupra deipkamsene. Ukupsenyopda, teleppu kunkamrume.” Allahdi peipupa, nabi Yesayadi sekeipseu.

Allahdi sun Yerusalem mutu kunge nesala tep, “Lyepropkamsene,” pepu upu

19 Sun Yerusalem mutu ila ati arum neitamai kurum nesalao, sunda tupa-tupa men engenkamrume. Sundi Allah tep, “Uo naie, kanda melipseo,” pepra moropmumnyopda, erdi sun moropmum ngeda, gekepseredi, amoropmumtopu kupra, melipkamsere. Deiyoda, Allahdi sun mali kuramrumnge tep, tali lupra poptapsetu dinin, sun tep ila di bicaue, teneserura cadi, dipru bouna dipu, gekepseredi, lyepkamsere.

20 Tek sisi, Allahdi sun kurpetena cap, sun kael kemna cap tep, wenemna keca ila di ikin ton, sun tep, keana taru neitamai di karepkamser dinino, amenda taruda, er pedipapu, sun tep melipra lyepropkamsere.

Ukupmantoda, roti kwaneng jenkamrumnge utopu, ila ikin keca sun nong deiki deipkamsere. Tonda, yu me jena utopu ton, kange mun keca sun damai deipkamsere. Ukupkamsera peda, amenda taruda sun Peteremna Deiyo Ngeboda tupa men inipkamrure. Jenek kupra yana melipseryopda, sun yumadi er pel dorurnge epmumdi, er tep, ‘Uo, Allahda nun damai ukuserure’ tenen, sun pedi kael kepkamrume.

21 Ataru neitamaida, sun yumada, bisi banmankap, walwalapdamum taruda, sun tebalal tara di do, sun dumsisi tara di do, dipra gekepmumnyopda, Allahdi sun tep, “Telep bankamrum bisida adano, abisipu melipra bankamrume,” pepra lap penkamsere. Atep er upu peprepa, gekenkamrume. 22 Sundi, ‘Nun nai bo ake,’ tenen, gam men kurur keca, isok si eremna tep, isok urasin utopu petupra deiprumudi, si eremrum keca yumada, mali kweipmumdi, donokamrume. Ada, aisok si eremna keca patung-patungda, sun bol deikida, urasin pio telep kunumna weik keca, er si emas cap, tonda perak cap di, palepra deiprumudi, si eremrumu kecada, pio mali kupra deipkamrume. Atep, sundi, ‘Akecada pio mali keca,’ teneprumudi, akeca dopra donokrumudi, “Sun isok cap, patung capda, nun damai di pio men deipkamepe. Sun isok-isok yumada, nun damai tapra yukai beso!” pepra, donongkamrume. Kwali bo doupra, pio mali keca kiliprumudi, bura tara donongrumtopu, aisok si eremna keca peda, dopra yukai donongkamrume.

23 Allahdi sun tep, melipra lyepseredi, kange di ton cap tamupra telep kweipkamser taruda, sundi yal Keca bolongrumu taru do, wa pepmumdi, koun keca koupkamrum taruda, Allahdi mo dokoteprepa, ayal keca cap, koun keca capda, pio telep kupra bongopredi, du mouprepa, du weik dangkamrume. Tonda sundi gam keca peinkamrum keca, yala-yala yumada, sun jena tep, mutmutada pio weik kwamyai pala ban mutu ketenepra deipserepa, derirbankamrume. Deipmumnyopda, sun sapi cap, domba cap, kambing capda, amutmuta jenkamenge.

24 Tonda, sun peirum jem sapi cap, keledai bisam capdi, wa tu palin keca gipra embangepa, sun wada pepra derirbankamserenge. Atep, sundi agam keca, sun jena tep nengeda, mutmuta cap, manmaning cap, pio telepngepu wepra, yuk ketenepra deipmumnyopda, jenkamenge. 25 Sun podan neng, sundi lyom gat gel beilya wipra ongopdongopidi, ‘Nun podan neng yankameng taru epkamep’ tenen, abeilya deiki di lyom gel ati ton dopra deipinge, uruptaprumu taruda, nimi weika di popra gawal dakamrume. Dinin, ataruda, ila-ila mutu dupai cap, mutu buma cap yuma deiki tara di, pio telep me bungna bukra yankamre.

26 Angepu gum dinin, ataru peda, war er dirinda, keteng dirin kuramretopu kupkamre. Keteng er dirinda, menop taru di dirin kuramutopu tupa men kupkamre. Ataruda er dirinda, pio weik kupkamre. Aketeng dirine pio weik kupkamre ngeda, tenpu tumi keteng komuni neitamaida, keteng dirine utopu dinin, yoneitam bari tapakya deiki di, dirin pio-pio weik kupkamre. Ada, Allah Yahweh, er nyapu sisa tep, poramengepa susu dila kuramrenge tep, getepdongopredi, kweteipkamre. Allahdi sun wenemna tep, ikin keca kareamupa, sun susu kwamunge yuma kweteprepa, kaekamre.

Allahdi sun Asyur mutu tara kunge neng wenepkamrenge tep, pepu upu

27 Uda, sun yuma diso! Allah Yahweh er ila puto cap, er ila yu kurenge capda, pio karenai di jenek kupra yakanmare. Allah er ila yuda, ila uku bu jeramretopu kurepa, imna ket jeredi, ila di weleramretopu kuprepa dinupe. Tonda, Allah erdi pepkamre upu deiki di, mali kunge nesala yuma popra jepropkamra tep, ukupmantoda, ila uku di akeca-keca yuma jeramretopu kupkamre. 28 Allah yakarepa, er yu di pepkamre upu cap, er puto capda, ila kumanya di puramrepa, akeca-keca yuma dakra sikke bungtamamretopu kupkamre. Tonda, ila embaramre me opyakanmaredi, nimi kum damai sengdoramredi, dubaramretopu kupra, Allahdi nimi ban-ban yuma wenepkamre. Ada, ukupmanto, me opyakanmaredi, nimi cap, akeca-keca cap, yala yuma peda, jepropredi dubaramretopu, Allah er yakanada, ukupra yaredi, nesala ban-ban yumada, wenepredi popra gum kweipkamre.

Nimidi, gandum du cap, katbala tali cap, wepropmengedi, malinge donokmengedi, telepngepu wepra mawa deriramengtopu, Allahdi tuai nesala yuma tep kupetepredi, telepngepu dopropkamre.

Tonda, nimidi, sun kuda bisam men dubenmanto kupmengopda, kuda sipyal pumbon besi keca dongopmengedi, tapu di gipra dubaramengtopu, Allahdi sun mali kunge nesala yuma tep, puto di dubenkamre. Sundi, ‘Nun songe,’ tenepkamenga peda, er puto di, wenepredi malyaipu dubenkamre.

29 Dinino, sun Allah er nyapu sisa, Yudea tara kurum nesalada, kange deiprumudi, kange lon mutpu penkamrume. Ada, ukupmanto ngeda, ‘Allah er si erepmepedi, er si eremnai, mutu buma deiki benkamep’ tenen, telep kange deipmengedi, kalya lukunda taru kalepmengedi, kange lon mut pepra baramengtopu, sun Yudea tara nesala peda, ataruda kange deipmumdi, kange lon mut penkamrume. Tonda ukupmantoda, sun Israel nesaladi, Allah er si eremna ati benkunga tep, bung-bung pena, er si seruling doupra pepbaramengtopu, sun Yudea tara nesala peda, atarupu angetopu kupra kange lon mut pepbenkamrume.

30 Kange deipra mut penkamrum dinino, Allah er ila puto upu lelimda, pio mambul weik kurenge, ‘Sun yuma gekepkamnenge’ tenen, er upu ila di pepkamre. Tonda, Allah er puto weik buru di, mali kunge nesala bongopkamrenge peda, sun yuma epkamenge. Er ila yu weik kupu ngeda, nesala ban-ban yumadi, epmengedi er ila puto kael kepkamenge. Ukupmantoda, Allah er ila puto cap, er ila yu capda, uku bu di akeca yuma jeramretopu kupra jepredi pumkol buktapkamre. Tonda, ila mo puto di cemamretopu kupkamre. Tonda, kulman cap, ila gel duduya bul moda, es cap, mongna cap, yakaramretopu Kupra yankamre. 31 Ukupra yakarepa, sun Asyur mutu kunge nesalada, Allah er ila upu peprepa gekepmengopda, Kwar weik kuprepa sun yo moropsepkamre. Sun amutu nesalada, Allah Yahwehdi, er maca doupredi, sun tep ila di wenepra bongopkamre taruda, sun kware kuprepa, dipru buluksakamre. Ukupkamrenge yumada, sun kael Kepkamenge.

32 Allah Yahwehdi er wenemna tep keteneipu maca dopra, sun Asyur mutu nesala tep, bongopkamre taruda, Allah er mawa nesala Israel nesala gekepmengedi, bung-bung pena keca, er sida kecapi, lelim pena keca, er si gendang cap, doupmengedi, kange lon mut ton penkamenge. Ataruda, Allah er pe buru dipapu erepredi, sun Asyur nesala bongopredi, wenepra poptapkamre.

33 Tek sisi pumun taruda, Allahdi Asyur mutu nimi deiyo ngebo, Raja Asyur tep, ‘Angebo poptapnedi, er nong dopra uku dongona tepaida, konum ketenepra deiamu. Tek sisi animi deiyo ngebo Raja Asyur mutu ngebo tep, auku jenkamrai konum ketenepra deiamu. Acada, tu bon palipunge cap, uku jenkamrai pala cap, er uku dongon co toupra deipunge cap, konum weika di keteneipu. Akeca yuma konum keteneipka cadi, ataruda, Allah Yahweh er yu deiki di, er si puto di pung peprepa, sikin tong weika di belepkamra deiki di, auku sekyopda, uku bu ila di jenkamre.