Isa 31 | XteSC | STEP | Allahdi peipupa, nabi Yesayadi sekeipseu. ‘Yuk mutu nengdi poryankamseng taru, nun melipra lyepkamseng’ tenen, Mesir mutu neng kori mororbanung nengda, pio bicaue. Sundi utenenunge. ‘Uo, Mesir mutu jen talen nengda, yuk nesala podana tep, kuda bisam deiki bukmengedi, menmena sepdara bana tep, puto deipra banunga cadi, sunda ila mambule. Tonda uo, Mesir mutu jen talen neng pio weika di kununge. Sun kuda tu deiki gipra banung kecada, ila mambule,’ tenenunge. Dinino, ukupra tenenunge nengda, Allah Yahweh akeca-keca yuma talepra deiki tara kuredi, Pio Lengnapu kuredi, Israel nesala melipra kalengrur ngebo tep, “Nun ton melipseo,” pepra men moronenunge. Ukupra kunungada, walwal di kununge, pepsene. Allahdi pepu.

Isaiah 31

Allahdi, “‘Mesir mutu nengdi melipra lyepsetenge’ tenerum nesalada, sun bicaue,” pepu upu

1 Allahdi peipupa, nabi Yesayadi sekeipseu.

‘Yuk mutu nengdi poryankamseng taru, nun melipra lyepkamseng’ tenen, Mesir mutu neng kori mororbanung nengda, pio bicaue. Sundi utenenunge. ‘Uo, Mesir mutu jen talen nengda, yuk nesala podana tep, kuda bisam deiki bukmengedi, menmena sepdara bana tep, puto deipra banunga cadi, sunda ila mambule. Tonda uo, Mesir mutu jen talen neng pio weika di kununge. Sun kuda tu deiki gipra banung kecada, ila mambule,’ tenenunge. Dinino, ukupra tenenunge nengda, Allah Yahweh akeca-keca yuma talepra deiki tara kuredi, Pio Lengnapu kuredi, Israel nesala melipra kalengrur ngebo tep, “Nun ton melipseo,” pepra men moronenunge. Ukupra kunungada, walwal di kununge, pepsene. Allahdi pepu.

2 Ne Allah tep, ‘Melipseo,’ pepra, men moronenung dinin, sun moupra tenipetepso. Neda pio puto cap, ila kaele cap kune ngebodi, pio kange mun pirin keca sun deiki deipkamsene. Nedi teneramsi keca yuma tek sisi kunune. Tenpu peda, men tamnuna cadi, ne Allahdi, ‘Ukupkamsene,’ pene upu, tek sisi nong kupkamsere. Aupu konum pepnyopda, ka di tamupra men doronune. Ukununa tep nengeda, ne yuda mali kupra bange nesala, sun nong deiki derinune. Pio malipu kunge nesala tep melimdanung nesalada, nedi popra gawal dangkamne.

3 Sundi, ‘Uo, sun Mesir mutu nengeda, ila mambul puto neng kununge,’ tenerum dinin, ne tek sisi pepsene. Sun Mesir mutu nengda, tali tuai nimi sisa pua. Sunda, ne Allah kununa utopu neng men kununge. Sun talepra kunge gam keca kuda yumada, tali kecapu kurure. Sun kuda bisamda, tali gam kecapu, ne sambala puto kuretopu men kununge. Puto boun kecapu kununge. Ange tep nengeda, ne Allah buru deiki di, mambul pel dopra, sun mali kurum nesala nong deiki ikin keca deipsene taruda, ne wenepsenedi sun yuma popra, gawal dangkamsene.

Ada, pio mali kurum nesala cap, sun tep melimsenung nesala cap, sun yuma wenepra popkamsene. Ukupmantoda, nimi embangedi, yan giso gel dukrepa sangamengtopu, nedi poptapra gawal dangkamsene. Sun yuma adipapu depkamrume. Allahdi sun Israel yala nesala cap, Yehuda yala nesala cap tep pepu.

4 Allah Yahwehdi peipneupa, ne Yesayadi seksene. “Ukupmantoda, tenpu ila yu singa pus, bura tara kuredi, ‘Nimidi peinung domba bisam, popra jepkun’ tenen, ketenepmarepane, domba bisam peina deiyo neng, gung weika di, er kori yangedi, ila upu peptenga peda, ila yu singa pus erda, kware pio men dangrure. Ila bura tara singa pus, yu weik kuredi, kware men dangamretopu, ne Allah Yahweh peda, utopu kunune. Ne Allah akeca-keca yuma talepra, deiki tara kunedi, im deiki jen talen malaikat yuma, sun ila deiyo ngebo kununa cadi, nedi pepsene. Ne yanedi sun Sion mutu deiki kurumu nesala tep, popra gawal dakamsene.”

5 “Nedi peipnepa, yu nengdi poryankamseng dinino, amenda taru lyepropkamsen ja. Ukupmantoda, Mapon madi, er walup deiamyai kalengna tep, laka embaramretopu, ne Allahdi, sun Yahudi yala nesala yuma tep, kalekra disenune. Tonda, madi du deipra iriamredi, er pol di singidongoramretopu, ne Allahdi, sun Yerusalem mutu kurum nesala tep, pio melipra kalengkamsene. Ukupra melimkamsena cadi, sunda yuk karen mutu nengdi, sun yuma popra men gawal dangkamsenge. Gung yambulanun tupa gam kunkamrume. Ne Allah Yahweh, akeca-keca yuma talepra deiki tara kunedi, ila puto weik eremna deiyo ngebo kunune. Neda, im deiki jen talen malaikat yuma, sun ila deiyo ngebo kununa cadi, ‘Ne mawa nesala gum kupnenung’ tenen, sun Yerusalem mutu neitamai kurum nesala kan-kan di, nimi gung metekanun lyepropkamsene.” Allahdi peipupa, Yeremiadi seku.

6 Ne Allahdi pepsene. Uo sun Israel nesalada, ne mawa nesala tenesenun dinino, sunda ne upu bisipra mali weik kumumdi, ne tep yanitamnurume. Dinino, ukutaruda tamupra ne damaipu yankurume, pepsene. Nedi sun Israel nesala tep, pio bicau tenesenuna cadi, “Ne damai tamupra yankurume,” pepsene. 7 Tek sisi pepsene. Yu nengdi popbisipsengedi, sun pe mutu doupra dubesengepa, dakuramumpane, amenda taru nedi lyepropkamsen taruda, adipapu sun pe buru deiki di petupra keteneipmumdi, ‘Nun nai kunkamsere’ tenen, talepra isok si eremum keca yuma tapkamrume. Ada kunumna weik keca, er si perak cap, emas cap talepra, sun pio mali buru deiki petupra keteneipmumdi, si eremum keca tapkamruma tep pepsene.

8 Asyur mutu yu nengdi popbisipkamseng dinin, amenda taruda, nedi karepnepa, yuk mutu nengdi, amutu neng peda, popra gawal dakamenge. Dinin, Asyur mutu neng yuma poptapkamre ngeda, ada tali tuai nimidi, ya dopra porbaramengtopu gume. Parang ya dopra, Asyur mutu yu neng popra gawal dangkameng dinin, angeda, tali nimidi gume. Ada, ne Allah puto deiki di, anesala wenepra poptapkamne. Yu neng kunung dinin, ‘Uo, poryanmasenge,’ tenepmengedi, kware weik kuprepa, Asyur mutu neng yuma dipapu, ‘Lyepdatepe’ tenen, bura saka sepdara bendopkamenge. Ukupkameng dinin, sun yuk karen mutu nengdi, popbisipmengedi, ateng koupra sun mutu tamupra dubengedi, Asyur mutu kaber neng yumada, sun amutarapu deipmengepa, sun tali pel melimna nengpu kunkamenge.

9 Asyur mutu yu neng popbisipkamne taruda, jen talen neng, sun deiyo neng yuma, kware weik kuprepa, sepdara bendopkamenge. ‘Yuk mutu nengdi, men popsetenge’ tenen, domi gel ati yumada, tapra bendopkamenge. Tonda, sun jen talena deiyo neng yumadi, sun tep poryankunge neng bendera epmengopda, ila kware kuprepa, sun keca yuma tapra, sepdara bendopkamenge.

Ne Allah Yahwehdi aupu pepmasena tep, ange yuma pio tek sisi kupkamre ja. Ne Allahda, ne mambul uku Sion mutu neitamai tupa jerurue. Tonda, ne ila mambul ukuda, Yerusalem mutu neitamai tupa jerure.

Allahdi peipupa, nabi Yesayadi sekeipseu.