Isa 32 | XteSC | STEP | Allahdi peipupa, nabi Yesayadi sekeipseu. Pio tek sisi amenda yankamre nimi deiyo ngeboda, er mali keca tenpunge peda men kuredi, erdi penkamser upu yumada, tek sisingepu penkamsere. Nimi deiyo ngebo kuredi, nesala ban-ban yuma talenkamserada, dumsisipu kunkamre. Tonda er amutara kungedi, nimi upu bongdina tep, penkameng neng yuma peda, tek sisingepu penkamenge. Nimi kungetopu, tek sisi upu deiki dipu bongdinkamenge.

Isaiah 32

‘Pio Dumsisi kuna tep, nimi deiyo ngebo yan kunkamare,’ pepu upu

1 Allahdi peipupa, nabi Yesayadi sekeipseu.

Pio tek sisi amenda yankamre nimi deiyo ngeboda, er mali keca tenpunge peda men kuredi, erdi penkamser upu yumada, tek sisingepu penkamsere. Nimi deiyo ngebo kuredi, nesala ban-ban yuma talenkamserada, dumsisipu kunkamre. Tonda er amutara kungedi, nimi upu bongdina tep, penkameng neng yuma peda, tek sisingepu penkamenge. Nimi kungetopu, tek sisi upu deiki dipu bongdinkamenge. 2 Sun adeiyo nengdi, yuk nesala yuma tep, telep kupra makudanapu kunkamenga cadi, ukupmanto ngeda pepkusene. Ada, ila puto weik kumanya yakarepa, lelim dongon tara tengbaramengtopu, kunkamenge. Tonda, mo cemna gum, katuai mutu neitamai di, me bungna bukra embatupa, nimi yumadi kange deiptengetopu, kunkamenge. Tonda, katuai mutu neitamaida, co pio gum cadi, keteng bupu weik kuprepa, ila gel deiyo keteng kawai bungbaramengtopu, kunkamenge. Ada, sun dumsisi kunkameng deiyo nengdi, yuk tali nesala yuma telep kupra makunkamenga tep pepsene.

3 Ange yuma ukupre pangeda, asuru akuamre nesalada, akeca yuma telep kupra dinkamenge. Asuru men pupkamre. Ange utopu, amul akuamre nesalada, moupra gekepmengedi, telep kupra gekenkamenge. Amul men kinipkamre. Ada, ne Allahdi penkamne upu cap, mambul pel donkamnenge capda, betapra kael kemkamenga tep pepne. 4 Ataru peda ukupkamre. Nimi ton upu pepkunge taruda, dipruai di tenena gum upu, tali welepropnen yakarepa, tali pertamenge neng peda, ange tapmengedi, moupra tenipetepmengedi, telep upupu penkamenge. Tonda, ataruda, upu telep kupra pena gum di, golgoli upu penge nengda, telep kupra dumsisi upupu penkamenge. Upu penge taruda, nesala yumadi, telep kupra gekepmanto upupu penkamenge.

5 Akeca-keca yuma telep kupra deipne taruda, pumun taru tenepra mali kuramrum ngeda, gum kupkamre. Ada, dipruai di tenena gum upu, tali welepropnen yakarepa, tali pertamenge neng tep nengeda, sundi, ‘Anengda telepe pua,’ peramrum ngeda, tapkamrume. Tonda, pio mali-mali kuna cap, mok upu pena cap, kunge neng tep nengeda, sundi, ‘Anengda, ereipkamepe,’ peramrum dinin, angeda ka di eremdina gum, tamkamrume. Tek sisi kun nengpu gispal donkamrume. 6 Ange yuma tapkamrumada, mesum tep gume. Deiyoda, pepkusene. Ada, mali upupu pere ngeboda, er dipru neitamaida, mali kecapu kurura tep, kange douna gum di tali upupu pertamrure. Angepu gum dinin, tonda, ware keca do yuma, er kurenge cap, perenge cap yumada, Allah er si Yahweh tep, mok upupu perepa, walwal neng gekepmengedi, ‘Angeda teka,’ tenenunge. Tonda, dina di tali mok upupu perura deiki di, jen putanmarepa kange mun kange doupra kunge nesala tep, jen men karerure. Ange utopu, me putarepa kange mun kange doupra kunge nesala tep, me men kareredi, kaukemdongonapu kurure. Aneng yuma yamdongonapu kurure.

7 Mok upu penge nengda, sun kunge keca cap, tenenge keca cap yumada, malipu kununge. Sundi, ‘Ukuptepe,’ tenenga deiki di, nimi tep mali kudingedi, kankan kunge nesala tep wilipra bongdinunge. Sun tali kankan kunge nesaladi, ‘Nun ton makunkamserume,’ pepra, moropmenge keca telepnge kuptua peda, men makununge. 8 Sun mali-malipu kunge nengda, yuk neng tep yanitamnapu kunung dinin, telep kangepu doupra kungedi, tenenung nengda, sun kunge keca cap, penge upu cap yumada, teleppu kununge. Allahdi pepu.

Yerusalem mutu kurami nerapu tep, pepu upu

9 Allahdi aupu peipneupa, ne Yesayadi pepsene.

Uo gekepneso. Sun Yerusalem mutu neitamai kurumu nerapuda, tali kange doupra kurum dinin, ukutaruda, ne pepkusen upu moupra gekenkurume. Sun nerapudi, ‘Gume amutu neitamai kunup nerapuda, mali nengdi yana, men wekmantoai kunupa cadi, yuk mutu nengdi, amutu wekra men poryasetenge,’ tenerum dinin, ne pepkusen upuda, moupra gekenkurume.

10 Ukutaruda, telep kange doupra kurum dinin, tenpu keteng tamun ton konum kupyopda, kware kupseredi moropsepkamsere. Ada, ‘Nunda, telep mutupu kunupa tep, men popsetenge,’ tenerum nerapu tep pepsene. Kware weik kupkamsera deiyoda, anggur tapu du mouramrenge yuma gum kupkamre. Nimidi wa pepra kourameng keca, co du yala-yala yuma peda, du men moupredi, gum kupkamre. 11 Uo, Sun Yerusalem mutu neitamai, tali kange doupra kurum nerapu cap, tonda, sundi, ‘Gume amutu neitamai kunup nerapuda, mali nengdi, yana men wekmantoai kunupa cadi, yuk mutu nengdi, amutu wekra men poryasetenge,’ tenerum nerapu cap, kange mun kun keca konum kupseryopda, kware kupseredi moropsepkamsere.

Anerapuo, yuk taruda ila ikin keca yankamsera tep nengeda, sun urasin telep opkal kwiriptapmumdi, mali tep tamameng opkal dopra, sun deiyoteng derinai koupdongopkamrume. Ada mesum tep gume. Ukupra koupdongopmumdi, pio engenkamruma tep pepsene. 12 Ukupra kuramumdi, engepra orlepra kuramumpane, sun kouamum anggur tapu yuma, telep kupra du men moupkamre. Tonda, sun wa pepra kouamrumu keca yuma nong pio men kupkamre. Ukupkamsera tep nengeda, sun pedi sun pe nong tarampu bongodamumdi engenkamrume.

13 Tonda, nedi ne mawa nesala tep, ‘Pio telep mutu karenkamsene,’ pepra deiamsidi, kareramsisi mutuda, amenda taruda, pio mali kuprepa, dana-dana tara yumada, girikna tapu cap, takke keca yala-yala yuma bongopra papkamre. Tonda, ‘Akati neitamai esu pena cap, mali-mali kun keca yala-yala yuma cap, akati pumbonpu kunkamep’ tenen, domi ati yumada, urupra sikke buktapnedi, gum kupra deipkamne. Ukupkamna tep, akati cap, akati wengna nesala cap tep, engenkamrume. Akati arum, Yerusalem mutu neitamai, akati weik akurura tep, kange mun kange dounkamrume.

14 Sun kurum mutu poryankamseng taruda, ‘Yu nengdi men wekameng’ tenen, ila gel beilya wipra, gel ati doamrumnge cap, sun pe kun ati yuma cap, yuk karen mutu yu neng yangedi, urupra sikke buktapsengepa, gum kupkamre. ‘Nun deiyo mutu’ tenen, ila gel ati doamrumnge cap, ‘Mali nengdi nun mutu inipra weksenung’ tenen, doamrum lyom ati cap yumada, urupra sikke buktapkamenge. Ukupmengepa, sun mutu yumada, tali banangpu kupkamre. Nimida amutu neitamai tenpu ton men kunkamenge. Tapmengepa, dakuamyane, amutu buma yuma mutmutapu paprepa, pio tep bisam pein tupu keipkamenge. Ukupmengepa, bura keledai bisam cap, domba bisam cap, dopra deipmengepa, tali kange doupra mutmuta batu jenkamenge.

15 Sun kuramrum mutuda, malipu dakuramrepane, Allahdi er Lek Sambala, im deiki weika di karepkamsere. Karepserepa, me pio kuna gum mutu yuma, tu telep kupredi, wa tu pio telep kupkamre. Telep kuprepa, wa pepra koupmengepane, bongopredi, du moun keca yala-yala yuma bongopra du mouredi, pio weik kupkamra cadi, tali bura mutu paramretopu kunkamre. 16 Allahdi sun mutu ka di tamupra telep kupra deipseryopda, menop taru me pio gum mutu kuamngaida, nimidi upu dumsisi kupra bongdinkamenge. Tonda, tu telep kuprepa, wa pepra koupmengepane, bongopredi, du moun keca yala-yala yuma bongopkamre mutuda, nimi yumadi mali kun keca tapra, dumsisipu kunkamenge.

17 Dumsisipu kunkamenga tep, ton tara nesaladi, yuk tara nesala tep, yu kuprepa men podankamenge. Telep kange doupra kikimanpu kunkamenge. Nimi yuma dipru dukdongopra dumsisipu kunkamenga tep, amutu yuma teleppu kunkamre. Tonda, amutu neitamai kunkameng nesala yumada, kange bongtona gum di, tali dimpeprappu kunkamenge. 18 Ukupra kungedi, Allah er nyapu yuma, telep kange doupra dimpepra kunkamenge. Tonda telep ati dopra kungedi, yuk mutu nesala yumadi, yana men dumkamenge. Tali beipye peingamengtopu kunkamenge.

19 Daneitam taruda, tek sisi Allahdi peiprepa, sun wenemna tep, kange mun keca sun deiki yana kunkamsere. Allahdi mo duduya ilange dokoteprepa, ila co palpal yuma sakredi, amutu yuma co kirye jepredi banangpu kuptapkamre. Tonda, yuk karen mutu jen talen neng, yu nengdi, sun kumum mutu Yerusalem ati yuma uruptapra sikke buktapkamenge. Ukupkameng dinin, amenda taruda, Allah lyepseredi, telep kupra deipkamsere. 20 Allahdi sun cap, sun mutu cap ka di tamupra telep kupra deipyopda, pio teleppu kunkamrume. Ada, sun yal keca kounkamengai yumada, me akurepa telep kupra bongonkamre. Tonda dan mutu do yuma, sun peinkamrum keca yuma peda, manmaneng batu jepra kunkamenge. Tonda, sun peinkamrum keca yala-yala yumada, ‘Yukai berepa upula popsenung’ tenen, beilya men winkamrume. Tali tapmumpa, embankamnunge. Allahdi peipneupa, ne Yesayadi pepsene.