Isaiah 33

Allahdi, Asyur mutu nesala wenepra popkamra tep, pepu upu

1Allahdi peipupa, nabi Yesayadi sekeipu.

Uo, nun podan neng, sun Asyur mutu nesaladi, sun yuk mutu kunge nesala tep, sun mutu urupra sikke bungtamrum dinin, yuk mutu nesaladi, sun talemum keca yuma peda, urupra men sikke bungtamserume. Sundi, yuk mutu nesala sun nong deiki, pirin keca derirum dinin, yuk mutu nesaladi, sun Asyru mutu nesala nong deiki pirin keca men derinunge. Atep nengeda, ukutaru sundi ne mawa nesala tep, sun mutu urupra sikke bungtamrum dinin, ange ukupra konum sengpepmumnyopda, amenda taru, yuk mutu nesaladi, sun talemum keca yuma peda utopu, urupra sikke buktapkamsenge. Tonda, sundi, yuk mutu nesala, sun nong deiki, pirin keca derirum dinin, ange ukupra konum sengpepmumnyopda, amenda taru yuk mutu nesaladi, sun Asyur mutu nesala tep, sun nong deiki pirin keca derinkamsenge.

2Nun nai bo Allah Yahweh, kandi bicau tenesememdi, melimkamsereme. Kanda tumi-tumi yuma, pio talepra kusememdi melipra kalengkamsereme. Ipna pe, sintara pe, yuma taru yuma, ‘Nun kange mun kusere taru, kan dipapu melipra lelimdongonkamserem’ tenen, moropkepe. ‘Kan dipapu, dan taru di lyepkamserem do?’ tenen, dinapu kunkamepe. 3Pumun taruda, kan upu ila di peramumpa, ataru kurami nesala gekeramidi, kware kupupa, sepdara badorami. Kan puto weik cap, mambul weik cap, kuramuma deiki di, yakaramumpa, sun yuk-yuk dakurami nesala diramidi, kware kupupa, sepdaro badorami. 4Ukupmantoda, meirgoumadi, co bo yuma jepra gawal dangamretopu, kandi meliamsemumpa, yuk mutu nesala porbisiramepudi, sun talerami keca yuma dororamepu. Tonda, sul po gala deiki di, lakra menmena bungbaramretopu, kandi meliamsemuma deiki di, yuk mutu nesala weik, sun talerami keca yuma dalupra dororamepu.

5Allah Yahweh, erda pio erepra teleppu kurur ngebodi, im deiki kurur dinin, erdi sun kori, Sion mutu yana melimserya deiki di, pio telep kun keca cap, tek sisi upu bongdina deiyo keca cap, pio dumsisi kuna deiyo keca cap, karenkamsere. Karepserepa teleppu kunkamrume. 6Allahdi sun Israel mutu nesala tep melimserya deiki di, pio telep kupra kunkamrume. Kware dangna pio gum dipapu, pio puto di, dim peprappu kunkamrume. Erdi karenkamsera deiyo kecada, yambula di gum dinin, pio weika di karenkamsere. Ada, nimi lyemna deiyo keca cap, akeca yuma kael kemna deiyo keca cap, ‘Ukunkamepe,’ tenepmengedi, tek sisi kuna deiyo keca cap karenkamsere. ‘Akeca yuma doproptepe,’ tenepmumnyopda, sun nai bo Allah Yahweh tepapu, kware kupserepa, er sipu erepra gispal donkamrume. Ukupra kumumnyopda, akeca yuma karenkamsere. Gum dingeda, gume.

7Dinino, ukutaruda, mambul kange doupra kunmarume. Deiyoda, ‘Nun moroptepepa, nun tep men poryankamseng’ tenen, upu kai lap perbana neng dopra, sun Asyur mutu deiyo neng kori dokotepmumpane, ‘Aupu gekepkameng’ tenen, kai upu lap perbeipane, apenmai upu men gekepi. Atep nengeda, sun kai upu lap perbenmai nengda, embandanmaidi, engenmai.

8Ukutaruda, ila bisi embaramengai yumada, tali gopu kupmare. Ukutaruda, sun mutu neitamai yuma, ‘Asyur mutu nengdi popsenung’ tenen, abisi yuma tali lupra men embarume. Bisi yuma men embanungada, mesum tep gume. Ada, Asyur mutu deiyo nengdi, ‘Gume men popbisipkamsepe,’ pepra, minina upu deiki di peami dinin, aupu konum tapmengedi, ‘Dakwapye, anengda porbenkupe,’ tenenunge. Sundi perdirami taruda, yuk neng ton gekerami dinin, ‘Angeda mambule,’ tenena gum dipapu, tamnunge.

9Ange tep nengeda, Israel yala nesala kurum mutu neitamai yumada, nimi yumadi, kange mun kange doupra, ikin deikipu kurume. Tonda, Libanon mutu neitamai kunge nesala yumada, konum popbisipmasengpa, amutu yuma malipu kurure. Ange utopu, Saron mutu ila ban pala mutuda, pio telep wa peiami dinin, Asyur mutu nengdi, kerye jepra sikke buktapipa, ukutaruda, amutu yuma banangapu kurure. Tonda, ila bapin co tekamya kouluprepa, kumanya di, aco bo yuma doupdara baramretopu, Basan mutu cap, Karmel mutu cap neitamai kuramu telep keca yuma, konum dalupra doupdara dubei. Amutu-amutu yumada, tali katuai mutu banang kuramretopu kurure.

10Sun Asyur mutu nengdi, Israel yala nesala kurum mutu neitamai yumada, konum mali kupra deipmaseng dinin, amenda taruda, ne Allah Yahwehdi anesala tep wenepra poptapkamne ja. Ukutaruda, ne ereipdanedi, tekamne. Ukupnedi, mambul pel ton dopnyopda, sun dinkameng nesala yumadi, ne sipu eremkamnenge. 11Tonda sundi, ‘Ukunkamepe,’ tenemum keca yumada, tali-talipu kurume. Sundi kumum keca yumada, nong men kupkamre. ‘Ukunkamepe,’ teneramrumu keca yumada, nimidi betei touptapmengepa, kalkal peramretopu, kupkamre. Betei kalkal peramrenge uku dongopmengepa, ukudi jepra sikke bukamretopu, sun peda utopu kupkamsere. Sun pe isin puto dipu, uku dasetudi, jepra gawal daksetua utopu, sun pe kunkamrum keca deiki di, sun pe nongpu gum kupra deipdankamrume.

12Sun deiki kunkamser kecada pepkusene. Tenpu ngeda, boun co uku dongopmengepa, jepropredi, sikke bungtamamretopu, kupkamsere. Tonda, nimidi gel lyeipmengepa, uku jenmaredi, gel lyeipra mereng-mereng peramretopu kupkamsere. Tonda, takke keca yuma kwepra uku dongopmengepa uku jepropredi, gum kuramretopu kupkamsere. Allahdi sun Asyur nesala, popra gawal dakamrenge tep pepu.

Amenda taru, Allahdi Israel nesala, sun mutu telep kupra deipkamrenge tep, pepu upu

13Allahdi pepu. Sun pio karenai kurum nesala pe, sun damai kurum nesala peda, ne Allahdi kupkamne kecada, pepkusena cadi, aupu moupra gekepmumdi, “Uo, Allahda, tek sisi ila mambul weik puto ngebo kurure,” pepra, ne si eremkamnerume. 14Angeda mesum tep men pepsene. Deiyoda, sun Sion mutu neitamai kunge nesala, pio mali kunge nesala yumada, kwar dakmengedi lukdana moropsepmange. Tonda, ne Allahdi, “Ukunkamrume, angeda men kunkamrume,” pepra derisenung upu tep, “Aupuda dakwapye,” pepra, tamenge nesala yuma peda, kware tep moropsemange. Kware weik kupre pangeda, sundi upenmange. Allahdi sun mali kunge nesala tep, ‘Ila di wenepkamne’ tenen, ila uku jeramretopu, kange mun keca karepkamsere ngeda, ‘Ukupra karepserepa, ware kupra tupa gam kutepe do?’ tenen, malye penmange. Ange utopu, “Uku pio jenkamre keca utopu karepseryopda, ware ngebodi gam tupa kutu do? Gume, ukupra karepserepa, ware kupra gam kutepe do?” pepra, mali penmangedi, moropsemnunge.

15Ne Allahdi pesenune. Ware nesala do yuma, sunda telep kupra kungedi, mok upu pena gum dipapu, tek sisi upupu pepra, dumsisipu kunkameng nesalada, amutu neitamai kunkamtenge. Tonda sundi, ‘Akeca-keca yuma men talengedi, tali kan-kan kunge nesala tep dakwapye, tenen, yaniptapmenga deiki di, nun pedipapu amutu keca yuma dopra taleptepe,’ men tenenge nesalada, amutu neitamai kunkamtenge. Tonda, nimi upu bongdina taruda, ‘Mali kupmangepapu, co bo weik karepsetengepa, anesala men wenepkupe,’ men tenenge nesalada, amutu kunkamtenge. Tonda, yuk nengdi, ‘Nimi poptepe,’ tenena cap, ‘Yuk mali keca kuptepe,’ tenenange cap, yuk mali nengdi mali-mali kunge keca tep, ‘Men epkupe,’ tenepmengedi, sun pedipapu asuru pu dongonge nesalada, amutu neitamai kunkamtenge.

16Apenmasentopu kunkameng nesalada, amutu telep kupra deipnepa, kunkamenge. Ukupmantoda, ‘Yuk yu nengdi men poryasetenge’ tenen, mutu deiki kunge nesala utopu kunkamenge. Ukupmantoda, ‘Mutu yange gel dan-dana bungamre gel deiki kutepe teptoda, yuk nengdi men popsetenge’ tenen, kuramenge neng utopu kunkamenge. Ne Allahdi sun mutu telep kupra deipsenyopda, pio telepai kumumnyopda, sun kwaneng cap, me cap men di konum keteneipsisingepu, ne dipapu karenkamsene. Ukupra kusenepa, teleppu kunkamrume.

Yuk dortaru pio telep kupbankamunge tep, pepu upu

17Allahdi peipupa, nabi Yesayadi pepu. Yuk dortaru yankamre ngeboda, erdi ila nimi deiyo ngebo kurepa, er ila dirin cap, urasin pio telep kunkamrenge cap, jenek kupra deipserepa, epkamrume. Tonda, amutu yuma telep kupra deiprepa, pio karen mutu dan-dana yuma dinkamrume. 18Amenda taruda, dorkupyakaramrumdi, kange mun kange doupra kuramrumnge tep, ka di ton cap tamupra tenimkamrume. Ada, Asyur mutu deiyo ngebodi, ‘Yerusalem mutu nesala lyom weik gel beilya wiraminge, uruptapnedi amutu wekra, akeca-keca yuma ukupra-ukupra keca upula dopropkamne’ tenen, nukpetepseu ngeboda, ‘Ukutaru dan cei kunmar do?’ tenen, tenimkamrume. Tonda, Yerusalem mutu sun lyom ati dopra kuramrumai neitamaida, ‘Ware kupra neng kunung do?’ tenepudi, ‘Pajak co bo denge ukupra karepkamnenge,’ tenepseu ngeboda, ‘Ukutaru dan cei kunmar do?’ tenen, tenimkamrume. Asyur mutu deiyo ngeboda, ne Allahdi wenepra, gum kupra deipkamna tep, ange yuma tenimkamrume.

19Ne Allahdi, sun Asyur mutu nesala tep, wenepra gum kupra deipne pangeda, sun Israel yala nesaladi, sun anesalada ka di ton cap men dinkamrume. Sun Asyur nesalada, yu weik kuramidi, dipru eremna deiki di gemerami dinin, amenda taruda, anesala gum kupra deipkamne. Ukupnepa, sundi sun pe mutu upu perami upuda, men gekepmanto upu perami ngeda, kange di ton cap men gekenkamrume.

20Asyur mutu nesala, kange di ton cap men dinkamrum dinin, Sion mutupu, telep kupra deipne pangeda, amutupu dinkamrume. Ne tep teka tenenge nesala yumada, Sion mutu yakangedi, ne si eremna tep, ila kailya kalepmengedi, pingping kange doupra, ne tep gispal donkamnenge. Ukungepa, dinkamrume. Ada, Yerusalem mutu telep kupra deipnepa, amutu kunkameng nesala yumada, telep kange doupra dimpeprappu kunkamenge. Yuk mutu nengdi, men dumyakankamenge. Ukupmantoda, nimidi opkal bol ati dopkamanga tep, tapu gerengna co gatnge moupra ikmengepa, men gupropmanto kuramretopu kupkamre. Tonda, tapu men bulukmanto gat tapu gerekmengepa, longa gum di dimperamretopu, Sion mutu peda utopu kupra deipkamne. Ukupnepa, sundi dinkamrume. Allahdi peipupa Yesayadi sekeipu.

21Yesayadi aupu sekudi, aupu ton dukdongopra pepu.

Nun nai Allah Yahweh, ila puto weik kuredi, nun tep melipra kalengkamsere. Erda, ila deiyo ngebo kurepa, er sipu eremkamepe. Ukupmantoda, nimi ati dopra kuramenga neitamaida, ila pala me dana-dana embaramrepa, nimidi ame goupra yatengedi, men poptengetopu, Sion mutu peda, men poryatenge mutu utopu kunkamsere. Tonda, ila laut mokon deiki di embaramre gapung co, ila kapal deiki di bukra yatengedi, men poryasetenge mutu kunkamsere. 22Apepmana upuda, mesum tep men pepne. Deiyoda, nun nai Allah Yahweh, erda nun ila nimi deiyo ngebo kunkamsere. Allah er ila puto deiki di melipra kalengkamsere. Allah Yahweh erda, nun ila deiyo ngebo kunkamsera cadi, er dipapu lyepra telep kudinkamsere.

23Kumanya puto deiki embaramre gapung co neitamaida, lyom co ikamrumdi, ‘Long-long pepserur’ tenen, aco dup tapu gerekamrumdi, gapung co sirik dana-dana tapu gerengkamrum ngeda, konum surukmasere. Atapu konum surukmasera tep, alyom co men dimpepra tekamsere. Longnapu kunkamsere. Tonda, agapung co deiki gerengrum opkal bol peda, surukmasera tep, kumanya puto di doupdara men besetue. Atep, ka di ton cap, sun Asyur mutu nengdi, nun tep men poryasetume. Allahdi sun yuma konum wenepra poptapseua tep, pepsene. Atep nengeda, sundi nun keca upula dalupra dororamserum keca yumada, kange di nun pe tamupra dopropmepedi, bokra karedankamepe. Yan kwaneamrepa, telep kupra men embenmanto kuramenge nesala peda, akeca bokra dopropkamenge.

24Tonda amenda taruda, Allahdi Yerusalem mutu konum telep kupra deipsere pangeda, dorkunkamre taru yumada, nun mutu neitamaida, tenpu ngebo peda ikin kuprepa, mali kange doun keca ton men kunkamre. Pu keca yala-yala yuma peda, gum kupkamra cadi, tenpu ngebo peda, ‘Ne pu jenmanere,’ pepra, mali men penkamepe. Yerusalem mutu neitamai kunkamep nesala yumada, Allahdi nun mali kunup keca cap, mali tenenup keca yuma cap, gum kupra deipseredi, kaukemkamsera tep, pio dumsisipu kunkamepe.