Isa 34 | XteSC | STEP | Nesala ban-ban yuma, aca yamumdi, yana bupra weka gekeso! Tuai mutu kurum nesala yuma moupra gekepso! Tuai mutu ban-ban yuma neitamai kunge nesala cap, atuai mutu neitamai kure keca yuma capda, yana weka gekeso.

Isaiah 34

Mutu ban-ban yuma kunge nesaladi, ‘Allahda nun songe,’ tenenung neng yuma tep, Allahdi wenepkamrenge tep, pepu upu

1 Nesala ban-ban yuma, aca yamumdi, yana bupra weka gekeso! Tuai mutu kurum nesala yuma moupra gekepso! Tuai mutu ban-ban yuma neitamai kunge nesala cap, atuai mutu neitamai kure keca yuma capda, yana weka gekeso. 2 Ada tali tep men pepsene. Deiyoda, Allah Yahwehdi, ban-ban yuma kunung nesala cap, sun nyapsilip yuma cap, sun jen talena neng denge weik dakununge cap, sun yuma tep Allahdi yu teneserure. Allah erdi sun anesala yumada, popredi gum kupra deipkamre. Ada, go kareprepa, yu podan nengdi yana, sun yuma yawa popra tapkamenge.

3 Popmengopda, sun nong yumada men peipkameng dinino, acapu tapmengepa, dakuamyanen, lyupredi tongpu belepkamre. Tonda, sun aneng popmenge taruda, sun yapi yumada, ila me opra embaramretopu, sun yapi opdoua emberedi, amutu-mutu yuma neitamaida embankamre. 4 Tonda, im neitamai kuramre keca yuma, keteng cap, war cap, kuru cap yumada, Allahdi yawa poptaprepa, sikke buktapkamre. Imda ason getepra koudoramengtopu kupra, getepra koupropkamre. Keteng cap, war cap kuru cap yumada, co bo kolupra tuai sangamretopu kupredi tuai sakamenge. Co du mouramre co, gelal seprepa, er du kolupredi, tuai sangamretopu, im neitamai kure keca yuma peda, tuai sakamre.

5 Ukupmantoda, nimidi me weika di jepmengepa, metekanun ton men jepmanto kuprepa tamamengtopu, Allah peda, er nimi pon yada, im neitamai cap, im deiki cap kure keca konum pora gawal dakyopda, amenda taru Edom mutu ^{▼▼Edom – Edom mutu pepka deiyoda, ada tuai nesala ban-ban yuma, malipu kunge nesala tenena tep pepu.} ton yana amutu kunge nesala ton popra gawal dakamre. Edom mutu nesala wenepra popnedi, gum kupra deipkamne’ tenen, Allah menop taru konum keteneiamu ngeda, ataru sun deikipu yarepa doropkamenge. 6 Allah er nimi pona parang ya di, nimi weik konum popyopda, aya deikida, Edom mutu nesala sun yapi cap, meta cappu, weik palepkamre. Ukupmantoda, Allah karena tep, nimidi gam kuramre keca, domba mi cap, kambing bisam cap, jem domba dipru cap, popra sengmangepa, akeca yapi cap, meta cap, sun ya deiki paleramretopu, Allah er ya peda utopu kupra konum kupmare. Deiyoda, Allahdi sun Edom tara kunge nesala popudi, sun ila deiyoi mutu, Bozra mutu nesala peda, konum poptapra gawal daku. Tek sisi Edom tara mutu kunung nesala peda, pio weika di konum poptapu.

7 Allahdi sun Edom mutu nesala yawa poptapkamre taruda, domba cap, kambing cap, sapi bisam cap, tonda tali bura kuramre sapi bisam cap, tonda sapi mi cap, konum nemu jem sapi bisam cap, yuma kikiman poptapkamre. Edom mutu tara kuramu gelal semu tu yuma, atu deiki ayapi weik cap, galemna meta cap sakupa, yapi utopu konum kupmare. Tonda galemna metapu weik dinipkamre. 8 Ange yumada, tali tep men kupkamre. Deiyoda ake. Ataruda, Allah erdi Sion ^{▼▼Sion – Mutu si Sion pepkada, ada Yerusalem mutu tep pepu. Pumun taru amutu tep, Sion perami dinin, amutuda tenpupu kurure.} mutu kunung nesala, sun tara kepredi, sun podan nesaladi ikin keca weik, Sion mutu nesala deiki deriraminge yuma tep, sun menenga karepredi, sun anesala tep kwangdakamre.

9 Tonda, ataruda, Allahdi Edom mutu embaramre me yumada, tamupra mali weik kweiprepa, mali gat keca er sida ter kupkamre. Tonda, Edom mutu tu yumada, sikin tong peramretopu kupredi, mali kupkamre. Ukuprepa, Edom mutu neitamai yumada, tu kepdongopra uku deipmengepa jeramretopu kupra, Allahdi uku kareprepa, uku di sun tu yuma jepropkamre. 10 Aila uku jenkamre ngeda, pio men tapkamre. Komuni pe, lukunda peda, tupa jenapu Kunkamre. Amutu yuma uku jerepanen, aketda, pio tep tupa topdoua embaredi, welerbankamre. Amutu tuda mali weik kuprepa, tapmengopda, tali gopu kupkamre. Nimi kuna gum di, walangyopu kupkamre. Ukupredi, dadeipdanen bankameng nesala yuma peda, amutu neitamai pio men kunkamenge. Tonda, atuaida, amenda taru kunkameng nesala peda, amutu neitamaida, nimidi yan yanipra bisi men embankamenge.

11 Amutuda, pio walangyopu kupkamra cadi, nimi men kunkameng dinin, tali keca jeramre ma, Undan ma cap, Landak ma cap, amutu neitamai kunkamrenge. Tonda Gagak ma cap, Kout ma cappu amutu kunkamenge. Atara mutu yumada, Allah er tapu deiki di, ‘Telep kurur do, gum do?’ tenen, kunupetepredi, ‘Amutu yumada, tali-tali kepra yawaraptapredi, pio mali kweipkamre. Ukupre pangeda, amutu yumada, tali gopu kupkamre. Nimida telep kupra men kupmantoaipu kupkamre. 12 Amutuda, pio walang yopu kupkamra cadi, nimidi deiyo kepra Raja kepmengedi, ton cap amutu talepra men kunkamenge. Nimi deiyo-deiyo neng cap, sun amutara pel dona deiyo neng cap yumada, konum gum kupra deipkamra cadi, amutu pio men kunkamenge. Nimi gum cadi, tali go mutupu kunkamre.

13 ‘Nun podan neng yana popsenung’ tenen, ila lyom gel di deipra domi ati arum yumada, takke-takke keca di bongopredi, akati-akati yuma papdongopkamre. Tonda sundi gat ati arum dopra kuramyai yuma peda, tali takke keca cap, mutmuta cappu, aktai deiki papdongopkamre. Amutu neitamaida, bura tara kuramre yu kam cap, sanip ma cap, bura bisam cappu kunkamenge. 14 Tonda, bura tara tali gam kunung keca, bura yu kam cap, bura embaramre kambing cap, ton yuk yala-yala bura keca yumada, amutu neitamaipu kungedi, embandankamenge. Lukunda neitamaida, konum deamenge neng, sun sambala cap, aca yangedi ila upu pengedi, sun beipe peingnai tepapu, kupkamenge.

15 Amutu neitamaida, nimi peiramenge ayam ma poramre ma, er ati dopredi, du deipra, er nyapu tep iripredi, Kalengkamre. Tonda alap-alap perameng ma cap, kout ma capda, konum deamre keca jerameng ma cap, weika di bulupra, acapu yana kunkamenge.

16 Allah Yahweh, erdi er upu pepra deipupa, sekeipi buku neitamaipu enkamrume, tonda aupu nungkamrume. Asi sipepman gam keca yumada, ner cap, jem cap, bulupra dakunkamenge. Tenpu kepra kunkamnung ngeda, ton men yawarapkamre. Deiyoda, Allah Yahwehdi, ‘Angeda ukupkameng,’ pepra, konum deipka tep, er Lek Sambaladi, akeca yuma bupra deipkamre. Tenpunge peda, ton men gum kupkamre. 17 Ange ukupkamrenge yumada, Allah er dipapu, ‘Amutuda, sun abura tara kuramre gam kun kecada, yuk-yuk bokra deipnepa, Edom mutu tara yuma dopropmengedi, talepra kunkamenge. Nimidi gum dinin, sun bura gam kuramre kecapu amutu neitamaipu tupa pio kunkamenge. Atuda sun dipapu talepmengedi, sun nyapu deipmengepa, dadeipdanen bankameng nge yumada, amutupu pio kunkamenge. Nimida gume.