Isa 36 | XteSC | STEP | Raja Hiskiadi, Yehuda tara taleamupanen, keteng tamun empat belas tahun konum kupu pangeda, Asyur mutu ila nimi deiyo ngebo, er si Sanherib, aRaja ngebodi, er jen talena neng doproipupa, Yehuda tara yaidi, Yehuda nesaladi, gel beilya wipra ongopdoamidi, puto weik doami ila ati arum yumada, poptapidi, dopropi.

Isaiah 36

Asyur mutu nengdi Yerusalem mutu nesala poryankaminge tep, pepu upu

1 Raja Hiskiadi, Yehuda tara taleamupanen, keteng tamun empat belas tahun konum kupu pangeda, Asyur mutu ila nimi deiyo ngebo, er si Sanherib, ^{▼▼Sanherib – Angeboda, Asyur mutu ila deiyo ngebo, Raja kuramu. Erdi Yehuda tara popbisipunge kael kemna tep, Allah upu neitamai di 2 Raja-Raja 18.13—20, 19 cap, tonda, 2 Tawarikh 32.1-19 cap epmumdi kael kepkamrume.} aRaja ngebodi, er jen talena neng doproipupa, Yehuda tara yaidi, Yehuda nesaladi, gel beilya wipra ongopdoamidi, puto weik doami ^{▼▼doami – Yudea tara neitamai, ila ati arum dopra, gel beilya wipra ongogpdongopra, wiami ngeda, Raja Rehobamdi apel doramu. Ange kael kemna tep, Allah upu neitamai di 2 Tawarikh pasal 11 epmumdi kael kepkamrume.} ila ati arum yumada, poptapidi, dopropi.

2 Raja Sanheribdi ange yuma konum kupu dingeda, er amutara pel dona ila deiyo ngebo tenpu, ila pangkat ngebo Rabsake tep peipupa, angebodi, Asyur mutu nengdi poptapi ati arum er si Lakis mutu di dopra deipupa, erda Yerusalem mutu yana upu peipu. Ada, er cap, er jen talen neng gungda, denge weikanun ton cap yai. Yerusalem mutu yaidi, Yudea tara taleamu ngebo Raja Hiskia, ‘Er taleamu ngeda, adipapu tapra karepkamser’ tenen, aupu peryai. Yerusalem mutu konum yaidi, akati arum damai dinin, itara me mokon paliami got damai di, amutu sida, Opkal Me Kunai, peramya damai, yana kunmaidi upu peipi.

3 Acapu teka kunmaipanen, nimi si Hilkiadi deiamu ngebo, er si Eliakim, erda Raja Hiskia kuramu ati pel dona neng, sun deiyo ngebo kuramu. Ton ngeboda, Yudea tara kuraminge sengna deiyo ngebo er si Penatia Sebna cap, tonda weneri ngebodi upu peipne taru gekepra sengna ngebo, er si sekretaris Asaf cap, yana antapi. Ada, ‘Upu talepkup’ tenen, sun Yudea tara aweneri nengdi, Raja Asyur amutara pel dona ngebo, ila pangkat taleamudi kuramu ngebo, er damai yana antapi.

4 Konum yaipa, Raja Asyur amutara pel dona ngebo, Rabsekadi upepu.
“Sundi amutu taleamnga deiyo ngebo Raja Hiskia tep, er damai bena upepkurume. ‘Asyur mutu talerur ila nimi deiyo ngebodi pepmaser upuda, ake.
Hiskia kanda, ware keca deiyo tep, ‘Ne cap ne pedina upu pepdapu neng cap, kikiman melipra kumepyopda, ila puto neng kunkamepe,’ tenememdi, kurum do?
5 Kanda ware tenepmarem do? Kandi, ‘Yuk mutu neng cap, nun mutu neng cap, pedina upu kikiman peptepya deiki di, tenpu nesala utopu kepdape dipapu, nun podan neng popra bisiptepe,’ tenepmarum do?
Tali upu deiki di, ‘Ukupkamepe,’ pepra, puto keipdatumdi, ataru di nun cap mar podana gonga keptum do? Kanda, ware ngebo tep, ‘Melipkamner ja?’ teneptumdi, ne Asyur mutu ngebo, ne upu tep bisipnetumdi, yanipnetum do?
6 Kanda moupra tenipetepo! ‘Mesir mutu jen talen nengdi melipkamneng ja,’ tenepmemdi kurum do?
Dinino, kandi atenemem ngeda, men kupmanto. Ukupmantoda pepkukene. ‘Balana dopra doupkup’ tenen, kamamnya yo kwenepra dourameng utopu kupkamreme. Abalanada, suka sakredi, kan pe meneng burupu lukamkere.
Tek sisi ngeda, Mesir nesala talerur ngeboda, ange utopu kurure. Ada, yuk mutu neng peda, ‘Er angebodi yana melipkamser ja,’ tenenung dinin, nimi deiyo ngebo Firaunda, yuk mutu nesala peda melipra men lyeptue.
Kan tep men melipmanto kupkeryopda, amenda ware kupkamrem do?” Raja Asyur amutara pel dona ngebo, Rabsekadi aupu pepu.
7 Raja Asyur er amutara pel dona deiyo ngebo, Rabsekadi aupu pepkopda, aupu ton dukdongopra pepu.
“Agum dingeda, sundi, ukupmanto ne tep yuk upu ton pepnetume. Ada, ‘Gume, nun Yehuda tara nesalada, nun nai bo Allah Yahweh, er sipu eremnup Allahda, er dipapu melipra lyepropkamsera cadi, ‘Erdi ware kupkamser do?’ tenen, er tep, dinapu kunupe,’ pepnetume.
Upepra pepnetum teptoda, nedi tamupra sun tep pepsene. Gume, sun Raja Hiskiadi, Yerusalem mutu ila ati arum kunge nesala cap, Yehuda tara neitamai kunge nesala capdi, Allah karena tep, gam keca popnedi, mutu buma deiki bena, uku dongorbaramiyai yuma tep nengeda, uruptapudi peipu.
‘Gume, sun yumada, yuk-yuk mutu buma deiki di, Allah tep gam keca popra men karenkamrume. Allah er si eremna tep telepaida, Yerusalem mutu neitamai domepu atida, ila karena ati, er sida Bait Allah, aceipu yana kareryakankamrume.
Allah er si eremna ati damaipu yana er si eremkamrume,’ peipu. Raja Hiskiada, amutu nesaladi, Allah er si eremna tep, gam keca popnedi, uku dongorbaramiyai cap, tonda, mutu buma deiki Allah er si eremna tep, ketenepra deiamiyai capda, erdi amutu yuma gum kupra deipka tep pepsene.
8 Atep nengeda, ukutaru Raja Asyur, er si deiki di pepsene, “Sundi ange kuptum do, gum do?
Nedi, kuda bisam denge weik, dua ribu ekor dopra, sun Yudea tara jen neng tep karepsetene teptoda, sun dingeda, akuda bisam bali deiki bukra, nimi porbana tep jen talen neng ketenepra deiptum do, gum do?
Ne kangeda, sun atara kurum nesaladi, jen neng denge weik, angetopu men ketenepra deiptume.
9 Sundi jen talen neng denge weik men keteneiptuma tep nengeda, ware kuprap di, Raja Asyur er jen talen neng, sun deiyo ngebo tenpunge peda, popbisiptum do? Ange men kuptume.
Tonda, nun Asyur mutu talerur Raja, er amutara pio yambul ngebo peda, men poptume. Ange jenek kuserya deiyoda ake.
Sunda, ‘Uo, Mesir mutu nesaladi, jen talen neng cap, kuda bisam di gipra banung kereta perang cap, kuda bisam cap, kuda bisam bali deiki bukmengedi, nimi porbankameng jen neng cap, karepsetengopda, adeiki dipapu nun cap, sun cap tenpu kepdapedi, Asyur mutu jen neng porbetepe.
‘Sun Mesir mutu nengdi melipkamseng ja,’ tenerumudi kuruma tep, pepsene. Gume, sun pedipapu sun tara neng tep men melipdatume.
10 Angepu gum dinin, apepkusen upu ton moupra gekepkurume. Uteneprume. Nunda, sun mutu poryakanmapada, Allah Yahwehdi men melimserur do?
Sundi, ‘Gume, Allahdi sun Asyur mutu neng tep, go karepudi, sun tep melipka deiki di nun mutu yana popkusenge,’ men tenepmarum do?
Gume, tek sisi ngeda, Allah Yahweh er pedi, ‘Yudea mutu tara bemumdi, anesala yuma tep yawa popmumdi, sun cap, sun mutu kure keca yuma capda, gum kupra deipkamrume,’ pepra peipseupa, ayanmarpa adano!”
Aupu yumada, Asyur mutu taleamu deiyo ngebo, er amutara pel dona deiyo ngebo Rabsekadi pepu.

11 Upepu pangeda, sun Yudea tara deiyo neng, Elyakhim cap, Sebna cap, tonda Yoah cap, sundi Raja Asyur mutu deiyo ngebo, Raja er amutara pel dona deiyo ngebo Rabseka tep tamupra pepi. “Uo, kao, kandi Aram upu deiki dipu upu pepkuserume. Nundi Aram upu pepmempa, nundi aupu kael keamupka cadi, gekepmepedi, kael kepkupe. Dinino, nun pe mutu neitamai di penup upu, Yudea tara penup upu deiki di, men pepkuserem’ tenen, moropkepe. Deiyoda, kandi nun tep Ibrani upu deiki di pepsemem pangeda, ‘Nun kayapu neng ton gekepsenung’ tenen, pepkepe. Ada, akati arum dopmepunge dana-dana tara yuma ongopgenepra wiamepu lyom gel beilya deiki tekmengedi, amutu kalengmang neng ton, ‘Kandi peprem upu gekepra kael kepnung’ tenena tep pepkepe,” pepi. 12 Upepipa, Rabsekadi, tamupra pepu. “Gume, Raja Asyurdi peipupa, nedi peryanman upuda, ada sun Raja cap, sun deiyo neng, weneri neng cap, sun gekena tepapu, yana upu pepmasen do? Gume, ange gum dinin, amutu nesala yuma cap, alyom gel beilya deiki tengemengedi, amutu kalengna deiyo neng cap, sun yuma wisipra gekena tep upu peryanmasene! Deiyoda, sun weneri neng cap, agel beilya deiki tengmenge neng cap, akati arum neitamai kunge nesala yuma capda, kikiman wisipra kurum nesala, amenda taruda, nundi popsepyopda, sun pe deipu dopra jenkamrume. Sun pe linpu gwepra jenkamrume. Asyur mutu Raja amutara pel dona deiyo ngebo Rabsekadi pepu.

13 Upepudi, aupu ton dukdongopra pepu. Yudea tara perami Ibrani upu deiki di, aupu ton ila upu deiki di pepu. “Raja Asyurdi peipseu upuda, sun yuma moupra gekepso! 14 Asyur mutu Raja ngebodi upepsere. “Sun Yudea tara kurum nesalao, sun Raja Hiskiadi pepkamser mok upuda, men gekepkamrume! Er Hiskiadi, sun tep melipra men lyepropsetue!

15 Sun mutu talerur deiyo ngebo, Raja Hiskiadi, pepkamser upu tep, teka men tenepkamrume. Ada, erdi, ‘Anesalada, ne upu gekepmengedi, nun nai Allah Yahweh, er dipapu melipra lyepsetue, tenen, Allah tep teka tenepmengopda, telepe pua,’ tenerure. Raja Hiskiadi, ‘Gume, Allahdi nun cap, nun mutu cap dopra, Asyur mutu nesala, sun buru deiki men deiptapkamsere. Asyur mutu jen talen nengdi, nun tara nesala yuma tep, men poptapkamsenge,’ pepra peipkamser dinino, erdi pepkamser upuda, teka men tenepkamrume. Gume, Allahdi sun tep men melipra lyepropkamsere.

16 Ne deiyo ngebo Raja Asyurdi sun tep pepsere. Sun Raja Hiskia, erdi pepkamser upuda, sundi men gekenkamrume. Sun akurum mutu di tapra, ne damai tara yankurume. Ada, ‘Ne cap, sun cap, podana gum dipapu, telep kupra kikiman kunkamep’ tenen, pedina upu peipdape dingeda, teleppu kunkamepe. Ukupmum pangeda, amenda taruda, sun pe wai dam kouamrumu anggur tapu dupu puruprumudi, ame dopra, sun pedi jenkamrume. Sun pedi bolokamrumu kwarang co dupu dakrumudi, sun pe dipapu adu jenkamrume. Tonda, sun pedi paliamrumu bunkon mepu gweprumudi, sun pe dipapu jenkamrume.

17 Ukuramrumnyanen, amenda taru ne tamupra yanyopda, sun yuma dopropnedi, amutu di tapra, yuk orkaren mutu neitamaipu dubenkamsene. Sun dubenkamsen mutuda, sun pe mutu sisa utopu mutu dopra deipsenepa, dakunkamrume. Abena kunkamrum karen mutuda, anggur tapudi anggur du weik mourure. Tonda, gandum du ton weik mourura cadi roti kwaneng ton dapra jenkamrume. Tonda, anggur du purupra anggur me ton jenkamrume.

18 Ange tep nengeda, sunda Raja Hiskiadi pepkamser mok upu tep, gekena gume. Erdi sun tep, ‘Allah Yahwehdi melipra lyepropkamsere,’ pepkamser ngeda, tali mok upupu pertamkamsera cadi, angeda teka men tenenkamrume. Sun ton tenipetepso! Nedi Asyur mutu taleamsi taru yumada, ware mutu nesala ton, men popsidi, sun mutu men talenun do? Gume, yuk-yuk mutu dana-dana tara yumada, poptapsidi, sun mutu yuma dalupra dopropsa tep, amutu-amutu nesala yumada, men lyepdanmanto kurami. Amutu-amutu kunge nesaladi, ‘Nun nai ake’ tenen, si eremami isok-isokdi sun ton yana melipra lyepromi do? Gume, tenpunge peda, melipra men lyepropi. Amutu yuma konum yawa poptapra talepsi.

19 Ange utopu, Hamat mutu cap, Arpad mutu cap, kunung nesala sun si eremnung kecada, dan cei kunung do? Tonda, Separwaim mutu kunung nesaladi isok si eremnung keca, sun puto deiki di Samaria mutu kunung nesala tep, yana lyepropi do? Aisok peda, dan cei kunung do?

20 Sun tenipetepso! Dan tara mutu ban-ban yuma kunung nesaladi si eremnung keca, sun pe puto deiki di, ne konum poptapsidi, ukutaru talepra kunun mutu nesala tep, yana lyepra dopropi do? Gume, tenpunge peda men lyepmanto kurami. Ange tep nengeda, nedi, ‘Sun mutu yawa poptapnedi, sun mutu yuma dalupra dopropkamne,’ tenepnyopda, Allah Yahwehda er pe puto deiki di, Yerusalem mutu Kurum nesala tep lyeproptu do? Gume tenepne. Asyur mutu nimi deiyo Raja, er amutara pel dona deiyo ngebodi, aupu yuma pepudi sengpepu.

21 Upepu pangeda, sun Yerusalem mutu kuramya deiyo nengdi, erdi pepu upu konum gekepi dinin, sundi ton tamupra upu men pepi. Deiyoda, Raja Hiskia, “Erdi pepkamre upu konum pepserepa gekepmumnya peda, sundi ton tamupra upu pio men penkamrume,” pemnga tep, sundi upu ton men perami. 22 Ange tep, aupu pepu pangeda, Hilkadi deiamu ngebo Elyakim cap, amutu upu sengna pel dona ngebo Sebna cap, tonda Asafdi deiamu ngebo Yoah, erda upu pepne taru buku neitamai di sengna deiyo ngebo cap, sun aweneri nengda, Raja Asyur er melimna ngebodi peipmau upu yuma gekepmaidi, ‘Uo, ware keca deiyo tep, aupuda pepmaser do?’ tenen, sun dipru engenmaipa, sun kenekami opkal yumada gwelenmai. Sun opkal gwelepmaingepu kenekmaidipu, Raja Hiskia damai tamupra yanmai. Tamupra yanmai dingeda, Raja Asyur er amutara pel dona deiyo ngebodi peipmau upu yuma dopra, sun deiyo ngebo Raja Hiskia damai lap peryai. Ada Rabsekadi peipmau upu lap pepipa, Raja Hiskiadi gekepu.