Isa 37 | XteSC | STEP | Ataruda, sun Yudea tara weneri deiyo neng yaidi, yana lap pepipa, Hiskiada, Asyur mutu ngebo Rabsekadi peipmau upu gekenmaupa, ‘Uo ware kupkamep do?’ tenen, kange mun kange doupudi, dipru boun kupupa, petenkemna tep, er kepmau opkal gwelepratapudi, mali opkal karong goni bol opkal keprapudi, Allah Yahweh, er si eremna ati dam beu.

Isaiah 37

Yudea mutu taleamnga deiyo ngebo, Raja Hiskiadi, nabi Yesaya tep, “Ne kwadimna tep upu ton pepneo,” pepu upu

1 Ataruda, sun Yudea tara weneri deiyo neng yaidi, yana lap pepipa, Hiskiada, Asyur mutu ngebo Rabsekadi peipmau upu gekenmaupa, ‘Uo ware kupkamep do?’ tenen, kange mun kange doupudi, dipru boun kupupa, petenkemna tep, er kepmau opkal gwelepratapudi, mali opkal karong goni bol opkal keprapudi, Allah Yahweh, er si eremna ati dam beu.

2 Tonda, Hiskiadi, er amutara pel dona deiyo neng ton doproipu. Ada, er kuramu ati melipra pel dona deiyo ngebo, er si Elyakim cap, amutu neitamai kurami keca yuma sengna deiyo ngebo, er si Sebna cap, tonda imam pel dona deiyo wisi neng, ware kupra neng cap, aneng yuma wepra deipupa, Amosdi deiamu ngebo, nabi Yesaya kori dokotepupa, sundi er damai bei. Anengdi Yesaya kori bei taruda, sun yumadi, ‘Uo, nun ikin kuserure,’ petenkemna tep nengeda, petenkemna tep, sun kenengami opkal gwelepratapidi, mali opkal karong goni bol opkalpu kenekra bei. 3 Nabi Yesaya damai bena, pepi.

“Naie, nun deiyo ngebo Raja Hiskiadi, ‘Upepkamrume,’ pepra, deipmaseu upuda, pepkukepe. Ada, ataruda, sun Asyur mutu nesaladi, nun Yudea tara nesala yuma tep, poryankamsenga cadi, ataruda, ila kange mun taru kupsere. Allahdi ikin keca deipra wenemseredi, mali Kudiserura cadi, nun ali weik kupmasere. Ukupmantoda, nun Yehuda tara nesalada, mi deipkungedi, mi deiyo pu jeramrepanen, puto boun kuprepa, mi men deipmanto kuramengtopu kupsere. Deiyoda, nun putoda pio gume.

4 Uo, nun nai Yesayao, kandi Allah moropserume! Nun yambulanun tupa gam kunmap nesala tep nengeda, kandi, ‘Allah melipserume!’ pepra moronkamrume. Ada, nun walwal dinin, nun kangeda, kan cap, nun capdi, si eremnup Allahda, Asyur mutu talerur ngebodi, er amutara pel dorur ngebo, Rabsekadi doproipupa, nun damai yana, Allah tep mali upu peipseu ngeda, konum gekepu do? Angebodi, Pio Gam Kurur Allah, er si Yahweh tep, nyek-nyek pena deiki dipu Allah tep mali weik pepka cadi, nunda, ‘Allahdi Asyur mutu nesala yuma tep, ila di wenepra popkamre ja,’ tenepmepe. Angebo Rabsekadi, Allah Yahweh tep, mali upu pepmau ngeda gekepmaua cadi, ‘Sun Asyur mutu neng tep wenepra popkamre,’ tenepmepe. ‘Ukuptue,’ tenen, kandi Allah tep, nun amutu kunup nesala tep, Allah moronkamrume.”

5 Raja Hiskia er pel don nengdi, nabi Yesaya damai yana, ‘Naio, nun melimna tep, Allah tep moronkamrume,’ pepra moropmai pangeda, Yesaya gekepudi, aupu ton pepu. 6 Yesayadi aupu yana peipmai neng tep upepu. “Sun deiyo ngebo Raja Hiskia tep, uperbenkurume. Ada Allah Yahwehdi pepser upuda ake. “Gume, Raja Asyur er amutara pel dona ngebo doproipupa, erdi, ne tep mali upu pepra, nyek-nyek pepmaneu ngeda, pio gekepra kwardangna gume.

7 Ne Allahdi, angebo Raja Asyur tep, er kange dipru neitamai pel dopnyopda, yuk nengdi, bamur upu pepmenge ngeda, erda, ‘Uo, yuk mutu nengdi ne tara poryakankamnenge,’ tenepredi, kware kuprepa, ‘Angeda tek penung do, gum do?’ tenen, er pedi, ‘Dirbenkun’ tenen, er pe talerur mutu tamupra benkamre. Tamupra beryopda, ne Allahdi, pel dopnepa, er pedi talerur mutu neitamai, yuk nengdi nimi pon parang ya dopra, angebo popmengopda, depkamre ja. Atep, sundi angebo peipmau upuda, tupa tenena gume, dakwapye,” Allahdi peipupa, Yesaya gekepudi, sun Yehuda tara deiyo neng tep pepu.

Asyur mutu nesala tep tulum tenena keca ton sun damai deipi upu

8 Ataruda, Raja Asyur, er amutara pel dona deiyo ngebo Rabseka tamupra Asyur mutu beu taruda, yuk nengdi, “Nun deiyo ngeboda, ila ati arum, er si Lakdish mutu di tapra, itara ati arum er si Lipna mutu nesala tep porbenmaue,” pepipa, gekepu. 9 Uda, ataru dipapu, yuk dakunmai nengdi, “Sunda moupra gekepkurume. Mesir mutu talerya deiyo ngebo, Tirhakadi, er pe mutu Kush mutu ngeboda, Mesir mutu tapra, gonga kepmardi, er jen talen neng cap, sun Asyur mutu nesala pona tep, bisi deia yakanmange,” pepipa, gekepu. Asyur mutu nesala taleamnga deiyo ngebo, Raja Senakaribdi aupu gekenmaupa, adeiyo tep nengeda, Asyur mutu Raja, er si Senakaribdi, surat sekra karepupa, er tara nengdi, Yudea tara Raja Hiskia tep dubena lap perbei.

10 Asyur Raja Senakaribdi upepu.
“Sunda, Yudea tara talerur deiyo ngebo Raja Hiskia tep upeipkurume. ‘Kanda moupra tenipetepo! Kandi teka tenepmem Allahdi, pedina upu deiki konum peipkeu upuda, teka men tenenkamrume.
Allahdi, ‘Ukupra melipsenepa, Raja Asyur mutu talerya deiyo ngebo Rajadi, sun tep poptapseredi, sun ila ati arum Yerusalem mutu yuma dalupra, men dopropkamsere,’ peipkeue.
11 Dinino, Kandi moupra tenipetepkurume. Kandi konum gekerume.
Nimidi pengepa gekeramrum ngeda, ‘Ware mutu nesala do yumadi, ‘Raja Asyur tep popkupe,’ tenerami nesala yumada, ne Senakarib cap, pumun taru Asyur mutu taleamu Raja capda, sun yuma konum popra yawaraptapmepudi, amutu-amutu nesala yuma gum kupra deiamepu.
Atep, kan Hiskia tenpu tep nengeda, men popra tapkamep do? Tapnepa, tali kange doupra teleppu tupa gam kunkamrem do? Gume, kandi, ‘Allahdi ne tep lyepropneryopda, ne tenpuda, men popkamnenge,’ tenenmarem do?
12 Tonda, moupra tenipo! Neda, Asyur mutu talenun ngebo, ne co puna neng kurami taru di dipra, ataru neitamai yumada, sundi, yuk mutu-mutu popbisirami taruda, amutu nesala yumadi si eremami isokdi, sun tep yana lyepramu do, gum do? Gume, sun yumada popra gawal dakami.
Tonda, Gosan mutu cap, Haran mutu cap, tonda Resef mutu cap yumada, ne apu yapudi amutu nesala yuma tali lupra yawa potamami.
Tonda, Eden tara neng, sun Telazar mutu kurami nesala peda, dan cei kunung do? Sun peda, ‘Dan cei kunung do?’ tenen, popra tami. Anesala yumada, sun si eremami kecadi, ton men yana lyepramu.
13 Tonda, Hamat mutu cap, Arpad mutu cap, Sefarwaim mutu cap, Hena mutu cap, tonda Iwa mutu cap, amutu dorami ati arum yumada, ‘Sun amutu-amutu talepra kurami nimi deiyo-deiyo nengda, ukutaru dan cei kunung do?’
Aneng yuma peda portamamipa, konum deami.

Raja Hiskiadi Allah Yahweh tep, yana moropu upu

14 Raja Asyurdi nimi doproipupa, er sekeipmau suratda, Yudea mutu taleamu ngebo Raja Hiskia tep, yana karepi. Karepipa, asurat epudi doupra, Allah Yahweh, er si eremna ati bo beudi, er nai Allah dinai di, asurat katuai deipu. 15 Raja Hiskiadi, Allah Yahweh tep yana moropudi upepu.

16 “Uo, Nun nai Allah Yahweh, kanda akeca-keca yuma deiki tara erepra kumemdi, ila puto weik kurum ngebodi im deiki jen talena malaikat yumada, sun deiyo ngebo kurume. Nun Israel nesala yumada, Allah kan nyapu kupedi, kan sipu eremkenupe. Tonda, naie, kanda Peti Perjanjian buplan deiki malaikat urasin utopu keca er si Kerub butene petupra deipmupkai, deiki tarada, bukmemdi tupa acapu kurume. Nun nai Allah, kan tenpu dipapu erepra kumempa, atuai mutu nimi deiyo kepra talenung neng yumada, kan amutarapu Kununge. Allah kandi im cap, tuai cap ketekepra deipmumdi talerume. Mutu ban-ban yuma talenga deiyo nengda, kan amutarapu kununge. Kan tenpupu kurume. 17 Atep nun nai, kandi epra kael Kemkamserume. Nundi kan morona tep pepkukep upu yumada, kandi moupra gekepkusereme. Tonda, ware kun keca do yuma, nun damai kunkamser kecada, kandi dinkureme. Nun nai Allah kan tep, Raja Sanheribdi, kanda Gam Kuna Deiyo Ngebo kurum dinin, erdi, ‘Allah tep nengeda, mali-mali upu pepnedi, er tep nyek-nyek pepkamne,’ tenepudi, nimi dopra deipupa, sundi amali upu yana peipsei.

18 Tek sisi nun nai Allah Yahweh, sun Asyur mutu ila nimi deiyo nengdi, yuk mutu kunge nesala yuma cap, yuk-yuk karen mutu yuma capda, yawa poptamipa, walangyopu kupu. Nun yumadi ange konum kael kemnupe. 19 Tonda, amutu nesala yuma poprapidi, sun anesaladi si eremami keca peda, dopra uku dongopipa, uku di jepropupa gum kupu. Uda, sun si eremami kecada, tek sisi tali kecapu kupka cadi, kan Allah utopu men kwamu. Sundi si eremami kecada, nimi buru di petupra deiami kecada, co cap, gel cap di petupra deiamya tep, ukupupa akeca peda puto men Kwamupa, sun Asyur mutu nengdi akeca yuma sikke bungtamamya cadi, gum kupu.

20 Ukupra kuramnga cadi, nun nai Allah Yahweh, kan sipu eremkenupa, kandi nun tep melipra kalengserume. Atep, Asyur mutu nesala talerya ila deiyo ngeboda, er buru neitamai, kandi nun tep lyepropserume. Kandi nun tep lyepropsemem pangeda, ban-ban yuma kunung nesala kael kepkengedi, ‘Uo, tek sisi Allah Yahweh, er tenpupu kurure,’ tenen, kael kepkamkenge.” Raja Hiskiadi Allah tep, upepra bena moropu.

Nabi Yesayadi, Raja Hiskia tep, ‘Ukunkamrume,’ pepra deipu upu

21 Raja Hiskiadi upepra moropudi ange konum kupkopda, nimi si Amosdi deiamu ngebo, nabi Yesayadi, Raja Hiskia tep pepu. “Allah Yahwehdi kan tep upepkere. ‘Kanda ne Allah tep moropnemuma deiki di, ‘Asyur mutu talerya deiyo ngebo er si Raja Sanherib tep, ‘Melipra lyepropserume,’ pepra moropmaneremada, konum gekepkene. Atep, aupu pepkukene. 22 Ne Allah Yahwehdi, angebo Raja Sanherib tep pepne upuda, ake.
Yerusalem mutu ila ati arum neitamai kunge nesalada, ukupmanto kanam nerapu utopu kununge.
Uo, kan Raja Saheribo, kan tep, ‘Erda bicaue. Tali ngebo kurura cadi dakwapye,’ pepra, nalemkengedi, autukenunge.
23 Kanda moupra kael kepkurume. Kandi, Yudea tara nesala tep, mali upu peipmumdi, nyek-nyek pepra autupmamum ngeda, sun tepapu nalepmumdi, autupmamum do?
Tonda, ware ngebo tep kan pe dipru erepdamumdi, salnong-nong kapmamumdi, kan asuru erepra dinmamumdi, mali upu weik peipmamumdi nalemamum do?
Tek sisi ngeda, neda Israel nesala, sun tep pio melipra kalengrur ngebo, pio Dumsisipu Kurur Ngebo, neda Pio Lengna Ngebo tepapu mali upu peipnemume.
24 Kandi nimi dopra deipmumpa, minina upu peryanmaiya deiki di, neda Allah, akeca-keca yuma talenedi, ila puto weik deiyo ngebo kunun dinin, ne tep nalepra autupmanei.
Kandi upepra deipmume. Kandi, “Neda nimi bukra porbana tep keca, er si kereta perangda, denge weik deipsidi, ila mutu dup welepsidi, iknapi dam tara Libanon mutu neitamai peda, ila mutu deiki tara welepsi.
Libanon mutu neitamai yumada, ne putan keca tali dalupra dopropsi,” peipmume. Ada, aupu deiki kan kange ereipdamumdi, salnong-nong kamemdi, “Urasin pio telep gat wapum co, pio telep lyoma di tekamunge yumada, kwepra gawal daksi.
Tonda, ila telep wapum lyom co palpal tekamu ila mutu dup, nimi men benmanto mutu peda, nedi amutu welepsidi aco kwepra gawal daksi,” pepmume.
25 Tonda, kan pe kange dipapu, yuk nengdi, “Erda, ila mambul ngebo, tenepkamneng’ tenen, nedi bunkon me jena tep, sun mutu bena, tali lupra mokon palipra deipsidi, me jeramsidi, amutu yuma dalupra dopropsi.
Tonda, ne cap, ne jen talena neng cap, denge pio weika di, Mesir mutu neitamai embaramu me yanipra goupmupudi embaramepu taruda, sun me yuma cepropke,” pepmume.
26 Dinino kanda bicaue. Kanda men taru di aupu ton men gekeramum do?
Tek sisi ngeda, ange yumada, ne Allah Yahwehdi, ‘Ange ton, ange ton ukupkamne,’ konum teneamsi. Ukupra konum tenepra peiamsa cadi, ukutaruda, apeiamsi ngeda, konum nong kepra pel donune.
Nedi kan tep, ‘Ukupkamre ja,’ tenemkesitopu, puto kareamkesidi, go karepsipa, kan cap, kan jen talena neng capdi, apel dorume.
Ada, yuk mutu nesaladi, ‘Nun podandam neng poryasenung’ tenen, ila lyom gel beilya wiaminge, kan cap, kan jen talena neng capdi, agel beilya urupra sikke bungtamamrume.
Ne puto deiki di amutu yumada konum popra yawaraptamume. Kan pe puto deiki di guma!
27 Kandi, amutu-amutu sikke buktaprum taruda, sun amutu kurami nesala yumada, sun puto pio boun kuramupa, sunda dupdup pepra, ‘Uo ware kuptepe do?’ tenen, kange mun kange doupra, dipru buluksaknepa, kwar dangamidi, men kupmanto kurami.
Ukupmantoda, sun amutu nesala yumada, mutmuta katawai di paramrepa, ila bupu kumanya pung peprepa, koluramretopu kurami.
Tonda, ati amnya bo deiki di yambul keca paramredi tengamre ngeda, dou mapredi bupu weik kuramrengedi, ila puto kumanya keteng yakan tara di yana doprepa, akeca nunumdoramretopu, anesala peda utopu kupi.
28 Dinino, ne Allahda, kan Sanheribdi mapmamemnya bukra bamem taru pe, kange di bukra beipye peingrum taru pe, ne kaele.
Tonda, kandi bura embamem taru pe, kan ati ka tamupra yana kumem taru peda, ne kaele. Kan kumem keca yuma cap, pel domem keca yuma capda, ne kaele.
Tek sisi ne Konum kael kemkenuna cadi, kandi ne tep ila di deremnerumnge peda, ne kaele.
29 Kan ila di kange eremna deiki di, ne tep deremnemem ngeda, ne konum gekekenune. Tonda, kandi dipru erepra salnong-nong kupmemdi mali pemem upu yuma peda, ne konum gekenune.
Ange tep nengeda, ukutaruda kan u pumbon bisida, nedi besi cincin dongopkenedi, tapu gerekra dongopnedi, kan bana darapra koupdongopkamkene. Ukupkenyopda, nedi gipdara kan yanamum bisipu tamupra dubenkamkene.
Allah Yahwehdi Asyur mutu Raja tep konum pepke.” Yesayadi lap pepupa, Raja Hiskia gekepu.

30 Nabi Yasayadi aupu konum lap peipudi, aupu ton dukdongopra pepu. Ada, Raja Hiskia tep aupu pepra deipu. “Apepra deipken upuda, kandi, ‘Tek sisi Allahdi apel donkamre,’ tenepkamrem tenena tep, apeten kemna tep aupu ton pepkene. Ada ake. Aketeng tamun neitamaida, tali bura tara er pedi tali paramre keca kipra jenkamrume. Angetopu oryankamre keteng tamun butene nge cap neitamaida, keteng tamun tenpunge di yal keca sakredi, tali paramre keca ton kipra jenkamrume. Dinino, keteng tamun weneri nge neitamaida, sun pedi wa peprapmumdi, yal keca kounkamrume. Sun gandum du bolokamrume. Tonda, sun pedi sun anggur tapu ton koupkamrume. Akeca yuma konum du moupyopda, nesala yuma jen putapre taruda, sun wa neitamai paramre keca kipra jenkamrume.

31 Angetopu, sun Yehuda yala nesalada, Asyur mutu jen nengdi denge weik poptapkameng dinin, men gawal dangkamsenge. Sun tupa gam kunkameng nesalada, akeca-keca yuma weik kuprepa, kange telep deiki dipapu kunkamenge. Ukupmantoda, nimidi sun koun Keca koupmengepa, er yaten tu neitamai beryopda, tu deiki di telep kupra bongoramredi, du weik mouramretopu kupra Kunkamenge.

32 Ada tali tep guma. Deiyoda, Yerusalem mutu cap, tonda, Sion mutu deiki cap di, nimi yambulanun ton lyeproprepa, anengdi amutu neitamai embankamenge. Angeda, Allah Yahweh er dipapu apel donkamre. Allahda, akeca-keca deiki tara erepra ila puto kuredi, im deiki malaikat yuma sun deiyo ngebo kuredi, er pio pe deipra, ila puto deiki, erdi, ‘Ange kupkamne ja,’ teneamu keca yuma, tek sisi pel dopkamre. Allahdi upepka cadi, akeca yuma, tek sisi nong kupkamre!

33 Ange tep nengeda, Allah Yahwehdi aupu pepra deiamseuada, Asyur mutu talerur ngebo, erdi kupkamrenge tep peiamseu. Raja Asyurda, erdi Yerusalem mutu ila ati arum neitamaida men wekra yankamre. Sun amutu nesalada, men wenepra popkamre. Tonda, amutu kunung nesalada, Raja Asyurda, mar tenpu deiki di men popkamsere. Tonda, er jen talena neng, ‘Nun podan nengdi marapsenung’ tenen, sun nong kalengna tep dounung keca, er si perisai doupmengedi, sun amutu neng pona tep men erepkamenge. Tonda, er jen nengdi, ‘Amutu ongopdongopra wiami lyom gel beilya welepra bepedi, amutu neitamai wekamep’ tenen, tu palipra sun gel beilya damai men derinkamenge. Tek sisi amutu damai ton, yana men wekamenge.

34 Tek sisi pepsene. Raja Asyur er tamupra benkamre bisida, er yanamu bisi dipapu, er pe mutu tamupra benkamre. Amutu Yerusalem ati arum neitamaida, pio men wekamre. Angeda, ne Allah Yahwehdi konum pepsena cadi, angeda tek sisi nong kupkamre!

35 Deiyoda, ne Allahdi Yerusalem mutu ila ati arum cap, amutu nesala cap tep, pio melipra kalengkamsene. Ada tali tep guma. Amutu lyepropkamna deiyoda, ada nedi amutu kaleknedi lyepropnyopda, nesala yumadi, ‘Uo, Allahda, pio mambul ngebo kurure,’ tenepmengedi, ne si kael kepkamnenge. Tonda, ne amutara pel doramu ngebo, Raja Daud tep, ‘Amutuda, pio tep kalengkamna cadi, kandi deipmempa, dadeipdanen bankameng nengdi, nimi deiyo kepmengedi, Yerusalem mutu talenkamenge,’ pepra deiamsa tep, nedi amutu pio melipra lyepropkamne ja!

Asyur mutu taleamu ngebo, Raja Sanherib poptapinge tep, seki upu

36 Allahdi aupu yuma konum lap pepu pangeda, Allah Yahwehdi wepra doproipu malaikatdi, atumi lukunda dipapu Asyur mutu jen talena neng, sun keana tep dodin tenda ati dopra kuramyai yana pepupa, nimi denge pio weik, seratus delapan puluh lima ribu (185.000) jen talena neng yuma popu. Poptapupa, lukunda dakupmauanen, berekupa ipnada, apoptapmaipa depmai neng, sun nong yumada, katuaipu kupupa epi. 37 Nimi weika di popka cadi, Raja Asyur ngebo Sanheribda, ange kael kepudi, er adipapu gopra, er pe mutu, Niniwe mutupu tamupra beudi dakuramu.

38 Amenda taru, tenpu tumi ton, Raja Asyur er si eremamu isok, er si Niserok damai beudi, er tep bena gispal donmau. Ukunmaupa, Sanheribdi deiamu neng, Adramelek cap, Sarezer cap, sun abutene neng bereidi, nimi pon parang ya dopra, sun nai bo Sanherib damai bena poprei. Popyopda, sun aneng butene, adipapu sepdaro, Ararat mutu berei. Atep, adepu ngebo pununa tep nengeda, er mi Esarhadon tep, nimi deiyo ngebo keipidi, erepra deipi.