Isa 38 | XteSC | STEP | Ataruda, Raja Hiskia, ila kange mun pu jenmaupa, depmanto Kupu. Amos erdi deiamu ngebo nabi Yesayadi, Raja Hiskia pu jenmauai diryaudi, aupu yana upepu. “Allah Yahwehdi Raja kan tep, ‘Erdi ange kupkamne,’ tereramre ngeda, adipapu kupropkukerure. Er ati dona keca cap, er pel doramrenge yuma capda, telep kupra deipredi gawal dakamre. Deiyoda, er dena tep taruda, konum damai kupmare,’ pepra, deipmakere,” pepra lap pepu.

Isaiah 38

Yudea mutu taleamu ngebo Raja Hiskia, ila kange mun pu jenmaupane, Allahdi gamapra deipu upu

1 Ataruda, Raja Hiskia, ila kange mun pu jenmaupa, depmanto Kupu. Amos erdi deiamu ngebo nabi Yesayadi, Raja Hiskia pu jenmauai diryaudi, aupu yana upepu. “Allah Yahwehdi Raja kan tep, ‘Erdi ange kupkamne,’ tereramre ngeda, adipapu kupropkukerure. Er ati dona keca cap, er pel doramrenge yuma capda, telep kupra deipredi gawal dakamre. Deiyoda, er dena tep taruda, konum damai kupmare,’ pepra, deipmakere,” pepra lap pepu. 2 Upepupa, gekepkopda, Raja Hiskiadi, apepra deipu upu konum gekepka cadi, akati dela pepra domi tara dirbeudi, Allah Yahweh tep moropu. Erdi moropu upuda ake. 3 Allah tep moropudi upepu.

“Uo, ne nai Allah Yahweh, neda kandi peipmumtopu kupra kunedi, tamna gum dipapu, pio kan pelpu weik donedi, kandi, ‘Angeda dumsisi kunange ake,’ tenemem ngeda, atelep kun kecapu kunun ngeda, konum kael kepnemum ngeda, lumdongona gum dinin, tupa tenenapu kunkamrum’ tenen, moropkene,” pepra, mali kange doupra, ila engena deiki di, Allah tep moropu.

4 Ukupkopda, Allah Yahwehdi, nabi Yesaya tep er damai yana upepra deipu. Allahdi pepu upuda ake. 5 “Yesaya, kandi tamupra Raja Hiskia, er kori bememdi, bena upepkurume. ‘Neda Allah Yahweh, kan apu bo Daud, erdi si eremamneu ngebo, ne akunune. Kandi moropmanerem ngeda, konum gekepmakene. Tonda, kan asi me sakmaker ngeda, konum epmakene. Atep nengeda, kan gam tupa kuna tep, lima belas (15) tahun ton go tupa karepkamkene. 6 Angepu gum dinin, tonda, nedi, kan cap, amutu Yerusalem mutu cap, amutu nesala capda, Raja Asyur, er buru deiki di dopra lyepropnedi, sun tep tupa melipra kalengkamsene.” Allahdi peipmakere. Yesayadi Raja Hiskia tep pepu.

7 Yesayadi aupu pepu dingeda, aupu ton dukdongopra pepu. Ne deiyo ngebo, kandi, ‘Tek sisi Allahdi peipneu upu nong kupkamre’ tenepmemdi, teka tenenkamrum’ tenen, Allahdi kan kael kemna tep Allah Yahwehdi peten kemdina keca ton karepkamakere. Allahdi kan tep, ‘Ukupkamkene,’ peipkeutopu kupkamkere. Apeten kemna ngeda adano. 8 Uda, Raja Ahasdi ketekeiamupa, dinung keteng asuru utopu keca, er si keteng kukiya dinada, Allahdi pel dopredi, aketeng kukiya giproprepa, sepuluh garis ton konum orbenapu dinin, ka tamupra arup taru kupmau keteng utopu kemdiryankamare. Ukupyopda, keteng dangbenmar dinin, kange di tamupra weleprepa, aketeng kukiyada, sepuluh garis ton tamupra banapra, arup tara keteng kupmautopu kemyankamre.” Yesayadi Raja Hiskia tep pepu. Upeputopu, Allahdi pel dopupa, aketeng kukiya dina deikida, keteng kukiya konum 10 garis ortara benapu dinin, ka tamupra arup keteng utopu kupra kemyanmaupa epi.

9 Yudea tara taleamu ngebo Raja Hiskia, pu jeramnganen, konum telep kupupa, erdi Allah tep, ‘Telepe,’ pena mut ton seku upu mutda ake.
10 Nedi pepne. Ukupmanto, keteng komuni yambul neitam taru utopu, neda kapul wisi men deipsi dinin, tupa keteng tamun yambulanunpu nepra kunmasi taru neitamai dipu, pu jepneupa, pio puto boun kupneu.
Ukupneupa, nedi, ‘Uo, tuai mutu go yambulanunpu gam tupa kunmanyanen, adipapu depkamne ja,’ tenepsi. Tonda, ‘Atep nengeda, konum deami neng kunungai, Sheol mutu neitamaipu kunkamne,’ tenepsi.
11 Tonda, upepsi. “Gume, tuai mutu kunedi, Allah Yahweh tep ton cap pio men dinkamne.
Deiyoda, ne menmena depkamna cadi, tuai mutu tupa gam kunung nesala cap, ne cap kikiman men kunkamepe. Tuai mutu neitamai, tupa gam kunge nesala yumada, ne ton cap pio men dinkamne.
12 Neda, dena damai konum besi. Domba bisam peina nengdi, sun opkal di, dodin tenda ati urumtamameng utopu, ne gam kuna deiyo ngeda, kanam dipapu gum kupmanto kupneu.
Tonda ukupmanto ton, opkal wina nengdi, lyom opkal konum winmanganen, sundi, ‘Aopkal lyomda akonuma,’ tenepmengopda, adipapu tema di sengtamamengtopu, Allahdi ne gam kuna taru tep, sekmanto kupneu.
Tumi-tumi yumada, Allahdi ne tep, ‘Er akure ngeda, gum kupra deipkamne, tenepneue,’ tenepsidi pepsi.
13 Neda, ila kange mun pu jeramneupa, lukunda neitamai yuma pe, bereng tamne pe yumada, ‘Uo, melipra kwetepneo!’ pepra moropsidi ngolongamsi.
‘Yu pus utopu keca singadi, nimi yo yuma garupra yawa portamamretopu kupnere,’ teneramsi. ‘Allahdi ne gam kunada, acapu deipkamnerdi, kupnera,’ tenepsi.
14 Ne upu pena peda, puto gum kupneudi boun kupneupa, ne upu putoda, metek ma sepdaro embaramredi, upu meteka dipu peramretopu kupneu.
Ne kange mun kupneupa, im deikipu diramsidi, ‘Allahdi yana melipra kwetepkamner do, gum do?’ tenen, dinapu kuramsanen, siryada, ne asuru pio puto boun kupneudi, ‘Dakwapye,’ tenepsi.
Dinino, ne nai Allah, ^{▼▼Allah – Acada, Ibrani upu di, ‘Adonay’ pepra sekya cadi, sun kael kemna tep, nundi aupu deiyonge jenek kupra sekmupu.} kanda akeca-keca yuma talememdi, ila puto weik deiyo ngebo kurume. Atep, ‘Neda ila kange mun kange doupnedi, ikin weik kununa cadi, kan dipapu yana melipneo,’ pepra moropkenune.
15 Dinino, ne dipapu ware upu peptenepa, Allahdi gekepnetu do? Tek sisi ne kange mun pu jepnerenge yumada, Allah er dipapu ange yuma dopra, ne tep karepneua cadi, ware upu peptenepa gekepnetudi kwetepnetu do?
Gume, ne upu ton men peptene. Ne kange dipru neitamaida, ila kange mun kuramsipa, dipru buluksakneua cadi, lukunda yuma telep kupra men maptene. Tonda, berekyopda, ikin kange doupra nemkaiya dipu’ embanune.
16 Ne nai Allah, kan ila puto deiki di akeca-keca yuma talepra, ila eremna deiyo ngebo kurume. Kan pesemem upu pena deiki cap, kan puto di kumem keca deiki cap di, nun nimi yuma gam kunupe. Angetopu ne peda, ne gam kuna go ton cap tapakra karepnerume.
Ange tep nengeda, kandi melipra kwetepnetumdi, gam kuna go ton karepnetumtoda, ne tupa gam kunkamne. Atep, kan tepapu teka tenepkenedi kunkamne.
17 Tek sisi ne konum betapra kael kepsi. Ada, ne dipru pu jenere ngeda, kandi ne telep kemdina tep karepnemume. Kange mun pu jeramneupa, depmanto kupmasi dinin, kange di ton cap telep kupra deipmanerempa, kapul men depmane.
Deiyoda, nedi mali kun keca weika di kuramsipanen, kandi, ange yuma dopra kan amnyo tara deipmume. Naie, kandi ila kange mun keca damai di, lyepra deipmaneremdi, ne mali kuramsinge gum kudinerume.
18 Kandi gam kuna go ton karepnemumnge deiyoda ake. Ada, nimi depmengedi, Sheol mutu banungai konum bengopda, nimidi kan tep tamupra, ‘Naie telepe,’ men pepketenge. Tonda, sun konum deami nesaladi, kan Allah tep, ‘Kanda pio telepe,’ pepra, kan si men erepketenge.
Tonda, konum deamenge nesala tu pumbon bengopda, sundi kan tepapu, ‘Gume, nun nai Allahda, erdi peseretopu tek sisi angepu kupkamser’ tenepmengedi, ‘Dan taru melipra lyepkamser do?’ tenen, kan tep dinapu men kunkamenge.
19 Uo ne nai Allah, sun gam tupa kunung nesala dipapu, kan si erepmengedi, kan tep, ‘Telepe,’ pekenunge. Ange utopu ne dipapu, atumi deiki di kan si erepra, kan tep, ‘Telepe,’ pepmakene. Nimi wisi neng yumadi, sun nyapu tep penunge.
Ada, “Nun nai Allahda, erdi, ‘Ukupkamne,’ peretopu, ange yuma tek sisi kurure. Bicau teneseredi, pio tep men tamserure,” pepra, sun nyapu tep penunge.
20 Ange tep nengeda, ne kangeda, ‘Ne nai Allah Yahwehdi, tek sisi lyepseredi, kange di tamupra telep kupra deipkamsere,’ tenenune. Konum telep kupra deipseryopda, sun cap, ne cap, nun yuma gam tupa kunkamep taru yumada, kikiman mut penkamepe.
Ada, mut lelim pena deiyo keca yuma, bung-bung pena er si kecapi cap, gitar cap di, nun gam kunkamep taru neitamai yumada, mut penkamepe. Ada, Allah Yahweh, er si eremna ati damai bepe dingeda, er tep, ‘Telepe,’ pepra, kikiman mut pepmepedi, er sipu eremkamepe.

Raja Hiskiadi aupu yuma pepu.

21 Uda, Raja Hiskia pu tupa jeamu taru, Allahdi er kapul men kweteipu taruda, nabi Yesayadi yuk neng tep pepu. Ada, “Raja Hiskia, ‘Er kange mun pu toro deiamu ngeda kaikamre,’ tenen, sun kael nengdi, kwarang co du dakra, taikra popmumdi, Raja Hiskia damai yana, er toro deiki akeca likra deipkurume,” peipupa, gekepidi er damai yana likra deipi. 22 Tonda, Allahdi Raja Hiskia kapul men kwetepu taruda, Raja Hiskiadi Yesaya er gekena tep upepu. “Allahdi ne kwetena cap, Allah Yahweh er si eremna tep ati damaida, welerbenkun do, gum do?’ tenena cap, ne kael kemna tep nengeda, Allahdi peten kemdina keca karepkamner ngeda, wareto keca karepkamner do?’ pepra asipetepu.