Isa 39 | XteSC | STEP | Allahdi Raja Hiskia tep kwetepupa, dakuramnganen, amenda taruda, Babel mutu talepra kuramnga deiyo ngebo, er si Baladan, erdi deiamu ngebo, Merodak, erdi nimi deiyo talepra Raja ngebo kuramu. Er Merodakdi, nimi wepra doproipupa, sundi Raja Hiskia damai bei. Deiyoda, yuk nengdi, “Raja Hiskia er kange mun pu jeramu ngeda, konum telep kupmare,” pepra lap pepipa gekepu. Aupu pepipa gekepkopda, telep karen keca menenga cap, surat cap sekra ketenepra doroipupa, anengdi Raja Hiskia damai dubei.

Isaiah 39

Babel Mutudi dopra deipipa, dakuramyanen, Yerusalem mutu tamupra yai nesala tep, seku upu

1 Allahdi Raja Hiskia tep kwetepupa, dakuramnganen, amenda taruda, Babel mutu talepra kuramnga deiyo ngebo, er si Baladan, erdi deiamu ngebo, Merodak, erdi nimi deiyo talepra Raja ngebo kuramu. Er Merodakdi, nimi wepra doproipupa, sundi Raja Hiskia damai bei. Deiyoda, yuk nengdi, “Raja Hiskia er kange mun pu jeramu ngeda, konum telep kupmare,” pepra lap pepipa gekepu. Aupu pepipa gekepkopda, telep karen keca menenga cap, surat cap sekra ketenepra doroipupa, anengdi Raja Hiskia damai dubei. 2 Babel mutu Rajadi nimi doproipmau nengda, Raja Hiskia damai beipa, Raja Hiskiadi, “Telep yarume,” pepra, kange telep deiki di napropu. Napropkopda, Hiskiadi er mambul keca mawa deiamu ati benbenepra deipupa epi. Ada, erdi mawa deiamu kunumna weik keca cap, er mambul keca cap yumada, aneng tep katuai deipupa epi. Ada, Hiskia di mawa deiamu kunumna weik keca emas cap, perak cap, jen keca tau pena deiyo keca, er si rempah-rempah cap, pio telep minyak zaitun me cap, tonda jen nengdi nimi porbana tep dorameng keca cap, ange yuma deiamu ati pumbon wekidi, sun aneng tep, ‘Akeca dirume,’ pepra peterepupa epi. Raja Hiskia, er ati damai kwamu keca cap, er taleamu keca yala-yala yuma capda, ton tamna gum, ayuma katuai dipu peterepupa, sun anengdi akeca-keca yuma epi.

3 Ange yuma peterepropu pangeda, amenda taru nabi Yesayadi Raja Hiskia damai beudi asipetepu. “Sun anengda, dan mutu di yanmang do? Tonda, sundi ware upu pepmakeng do?” pepra asipetepu. Asipupa, Hiskiadi, “Gume, sun anengda karen mutu Babel mutu neng yanmange,” pepu. 4 Upepupa, Yesayadi tamupra Raja ngebo tep, “Naie, kan ati pum deiamum keca ton dinmai do? Ware keca yuma peterepmaumpa epmai do?” pepra asipetepu. Asipupa, Raja Hiskiadi tamupra Yesaya tep, “Sunda, ne ati pumbon cap, ne mambul keca dopra, mawa keca deiamsi ati pumbon cap, akati-akati neitamai kurur keca yala-yala yumada, konum peterepmanpa, epra kael kepi. Tenpunge peda, men inipsi, ange yuma konum epra kael kepi. Nedi mawa derina ati pumbon deiamsi keca yumada, peterepmanpa, sun aneng epra kael kepmangdi benmange,” pepu.

5 Upepupa, nabi Yesayadi tamupra, Raja Hiskia tep, “Uo, ange tep nengeda, Allah Yahweh im deiki kunge jen talena malaikat yuma talerura deiyo ngebo, ila puto kurur ngebodi, pepser upu moupra gekepkurume. Erdi kan Hiskia tep upepkere. 6 Amenda yankamre taruda, kan cap, kan apu yapu neng, sun yuma capdi, pumun taru di bulupra deipyakaramipa, kan cap, kan mawa derin ati pumbon talepra deiamum keca yumada, amenda taru ton go karepnyopda, sun Babel mutu neng yangedi, popsengedi akeca yuma upula dopropmengedi, sun pe karen mutu dubenkameng ja. Akeca-keca yuma dubenkamenga cadi, tenpu keca peda, ton men tapkamenge. Ne Allah Yahwehdi konum pepkena tep, ange yuma tek sisi nong kupkamre ja,” pepkere.

7 Upepu dingeda, ange ton dukdongopra pepu. “Kandi deiamum nyapu neitamai di, ware kuprap, kandi nyapu ton deiamumpa, dadeipdanen bankameng nyapu neitamai di, Babel mutu nengdi, ton neng dopra, sun pe Babel mutupu dubengedi, amutarapu deipmengedi, ikin pel karepmengepa, Babel mutu talerura kurya deiyo ngebo Raja, er ati neitamaipu pel donkameng ja. Allahdi upeipkere,” Yesayadi pepu. 8 Nabi Yesayadi Hiskia tep upu pepupa, Raja Hiskia gekepudi tamupra Yesaya tep pepu. “Allah Yahweh erdi peipmaker upu yana pepnerem ngeda, telepe pua tenepne,” pepu. Dinino, Hiskiadi er kange dipru neitamaipu aupu tenepudi, pepka deiyoda, ‘Gume, ne gam tupa kunkamne taruda, amutu cap, ne talenun nesala cap, ange yuma talenkamne taru neitamai yumada, nun yuma kange deipra teleppu kikiman kunkamepe. Tonda, nun podan neng peda, men poryankamsenge. Teleppu kange deipra, teleppu kunkamepe,’ tenepudi pepu.