Isa 40 | XteSC | STEP | Neda sun nai bo Allahdi pesenune. Nedi ne mawa tep weamsi nesala tep nengeda, kange mun kange doupra kunung dinin, ‘Sun yumada, kange deipra teleppu kunkameng’ tenen, sun dipru kwa dimna tep, telep upu perbenkurume.

Isaiah 40

Allahdi, er mawa nesala, Israel nesala tep, kange deipdana di tenepra, kuna tep, pepu upu

1 Neda sun nai bo Allahdi pesenune.

Nedi ne mawa tep weamsi nesala tep nengeda, kange mun kange doupra kunung dinin, ‘Sun yumada, kange deipra teleppu kunkameng’ tenen, sun dipru kwa dimna tep, telep upu perbenkurume. 2 Yerusalem mutu kunge nesala yuma tep, telep upu bouna di pepkamrume. Sun mali-mali weik kuramrum keca tep nengeda, sun wenemna tep, ikin keca sun nong deiki deriramsisipane, ukutaruda akonuma. Sun mali kuramrumnge kunumna tep, konum kareramsisi kecada akonuma. Neda Allah, ne si Yahwehdi, sun mali kuramrum keca wenemna tep, ikin keca weika di, sun deiki deriramsisi. Tenpu mali keca tep nengeda, wenemna keca ue butene deiki di kareramsisi. Dinino, ange yumada konuma. Ukupmantoda, nimidi mali kupmengepa, wenemna ati pumbon dongopmengepa, dakuramengepane, wenemna taru konum kupyopda, lotamamengtopu, sun tep lyepnedi, kange di ton cap, tamupra telep kupra deipkamsene.

3 Nimi ton ila upu di penkamre.

Nimi men kunge mutu, katuai mutu neitamai di, Allah er si Yahwehdi yankamre bisida, telep kupra yadinkamrume. Nun nai Allah yankamra tep, kwanedan bisi yumada, dumsisi kupra kwiryepu yadinkamrume. Er yankamre bisida, mali kwamyai yuma, dumsisi telep kupra yadinkamrume. 4 Dan mutu do yuma, mutu dana-dana bongong kuamya neitamaida, tu dalupra aca deiprumudi, erepra telep kupra yadinkamrume. Mutu buma bukamyai yuma, palipra ban kemdinkamrume. Kwerena cap, welena cap, kure bisi yumada, telep kupra ban kemdinkamrume. Erepra bukamre tu capda, paupra yamuptapra telep kudinkamrume. Ada, ‘Nun nai Allah yankamre bisida, pio telep kupkamre’ tenen, ketenem dinkamrume.

5 Ange yuma konum kuprumnyopda, Allah er pio telep kurya cap, er dirin weik kurya capda, katuai kupre pangeda, nimi tuai neng yumadi dinkamenge. Allah er dirine weik, jenek kupra yankamre taruda, nimi ban-ban yumadi, kikiman epkamenge. ‘Angeda ukupkamre do, gum do?’ tenena gume. Allah er si Yahweh, er pedipapu, “Ukupkamre,” pepra, aupu konum pepra deipmasera tep, ‘Ange yumada, tek sisi kupkamre,’ tenenkamrume.

6 Nimi upu utopu deiki di upepneu. “Allahdi penkamser upuda, katuaipu lap penkamrume,” pepneupa, nedi, “Atep, ware upu penkamne do?” pepra asipetepsi. Asipetepsipa, erdi upepneu.

“Tuai kunge nesala yumada, tali paramre mutmuta utopu kurume. Tonda kait keca popmarepa, ue buteneto, wenerito urasin telep kuramrepane, adipapu gelal sepdara kolupredi, kabo sakrepa, gum kuretopu, tuai nesala yuma peda angetopu kununge. 7 Ukupmantoda, tali paramre mutmuta cap, betei cap, tali paramre kait keca yala-yala yuma capda, kait popmaryane, Allah Yahwehdi keteng kareprepa, keteng deipredi bupu kuprepa, kolupra sangamretopu, tuai nesala peda gam kuramenganen, menmena depmengedi, gum kununge. 8 Tali paramre mutmutada, keteng bupu di gelal serure. Tonda, tali paramre kait keca yumada, kolupredi gelal sepdara kamsangdoramre. Akecada, tali kecapu tep, ukurur dinino, nun nai bo Allahdi pesere upuda, pio-pio atep akunkamre. Allah er upuda, men gum kupmanto keca tepa.” Nimi upu utopu deiki di upepneu.

‘Kai telep upuda, mutu deiki di penkamrume,’ pepu upu

9 Uda, sun Yerusalem mutu kurum nesalada, ila di erepra buku mutu deiki welepra benkurume. Sun Sion mutu kurum nesalada, kai telep upu penkamrume. Ukupmumnyopda, telep upu dopropmumdi, sun Yerusalem mutu kunge nesala yuma tep, ila upu deiki puto di penkamrume. Yerusalem mutu kurum nengda, pio telepe upu pepra, ila di penkamrume. Aupu yumada, Yehuda yala nesala gekenaipu lap penkamrume. Aupu penkamrum taruda, ‘Aupuda pepkup do, gum do?’ tenen, kwar dangna gume. Sun Yehuda yala nesala kunge mutu yuma tep, ‘Sun nai bo Allah konum yanmare,’ pepra penkamrume.

10 Sun yumada adiso! Akeca-keca yuma talepra, pio deiki tara kuredi, ila puto weik eremna deiyo ngebo Allah Yahwehda, ^{▼▼Allah – Acada, Ibrani upu di, Allah er pe si sisia ‘Yahweh’ cap, tonda ‘Adonay’ cap pepra sekya cadi, sun kael kemna tep, nundi aupu deiyonge jenek kupra sekmupu.} erdi, ‘Ukupkamne,’ teneretopu kurura cadi, er ila puto deiki di yanmare. Er pe buru puto deiki di, mutu ban-ban yuma kunge nesala tep, bisbisa kapra talenkamre. Er buru puto deiki di bisbisa kapudi, talenkamre keca cap, nesala capda, duyanmare. Tonda, er pe nyapu, sun menenga tep karenkamre keca peda, talepra duyanmare. Akeca-keca yuma mepra yakanmarepa, er Allahda amenda yakanmare.

11 Tonda, nimi tenpu bisam peina deiyo ngebodi, er domba bisam yuma bulupra tenpai deriramretopu, Allah er nyapu sisa yumada, bulupra telepai deipkamsere. Tonda, domba peina deiyo ngebodi, domba bisam nyapu bicau tenen, iripra dubaramretopu, Allahdi er nyapu sisa dopra, iripra dubenkamsere. Tonda, domba bisam nyapu yuma sun nindi, ‘Ne nyapu ne damai bouna di yakankuneng’ tenen, ‘Yakaso,’ pepropnen barepa, sun nin upu gekepra baramengtopu, Allahdi er nyapu sisa tep, utopu kunkamre.

“Allah erda, akeca-keca yuma deiki tara kuredi, ila kael ngebo kurure,” pepu upu

12 Sun tenipetepso. Ware ngebodi laut mokon yuma, er buru deiki yaten pulpula kepra keptenge do? Tonda, ware ngebodi, tenpu buru dipapu im deiki deipra, ‘Er palada ake’ tenen, kunuptudi, pepsetu do? Utopu ware ngebodi, tuai mutu ban-ban yuma, tu cap, tu but cap dopra, metek kunumterena mau pumbon dongoptu do? Ware ngebodi, mutu-mutu bukunge yuma cap, mutu buma cap, doproptudi, ‘Er ikinda ware kuprap do?’ tenen, timbangan deiki deripra kunupeteptu do? Gume, Allah er dipapu ange yuma kurure, yuk ngebo ton gume.

13 Tonda, ware ngebodi Allah er si Yahweh, er Lek Sambala tep, ‘Ukupkurume, angeda, men kupkurume,’ pepra petereptu do? Ange utopu, ‘Abisi betume, apel donkamrume, telep kunada ake,’ pepra, petereptu do? Allah er upu lap pena tep melimna ngeboda, ware ngebo do? Gume, ange yumada men kupmanto. 14 Ware ngebodi, Allah Yahweh tep, ‘Mambul keca deiyonge kael kepkur’ tenen, ila kael di petereptu do? Ange utopu, ware ngebodi, Allah tep, ‘E, nimi upu bongdina tep, telep ngeda ake, ake. Ukupkamrume, ukupra upu bokeipkamrume,’ pepra, lap pepmemetu do? Tonda, ware ngebodi, Allah tep, ila kael kemna deiyo keca yuma petereptupa, kael keptu do? Ware ngebodi, lap peptupa, Allahdi, moupra teneptudi, pel telep kupra donkamre do? Gume ange yumada, men kupmanto keca.

15 Tek sisi pepsene. Tuai mutu ban-ban yuma kunge nesala, yala-yala yuma pio weik dakunung dinin, sun yumada me gwepmange mau pumbon di, duldul pepredi sangamretopu kununge. Utopu, tenpu me durungnga, kal tu deiki dourberepa paledoramretopu kurure. Tonda, tuai mutu kunge nesala yala-yala yuma buluptengedi, ila timbangan deiki deiptengopda, ada, tali sikke bute utopu kuptenge. Sun ikinda pio gume. Allah er puto cap, mambul cap kuryada, pio weik tepa. Laut mokon neitamai kurepa, dana-dana tara yuma, mokon di sekdongopu mutu pio men nukmanto dakurur dinin, Allahdi amutu yuma, tu but utopu bupra douptue.

16 Libanon mutu neitamai kure co yala-yala yumada, pio weik akapmar dinin, aco yala-yala yuma kweptepedi, ‘Nun mali kunup keca yo pununa tep, uku dongopkamep’ tenen, ketenepra kareptepeya peda, aco suktalepsetue. Ange utopu, Libanon mutu neitamaida, nimidi peinung domba cap, kambing cap, sapi capda, men nukmanto, pio weike dakunung dinin, agam keca yuma bulupra poptepya peda, ange peda suktalepsetue. Apepmanada, mesum tep gume. Israel nesala, sun mali kunge keca kunumna tep, yo men punupmanto. Co yuma cap, gam keca yuma cap ketenepra, ‘Allahdi nun mali kun keca kaukepsetue’ tenen, Allah tep kareptepeya peda, ange yuma deiki di, nun mali kunup keca yo men punuptue. 17 Tonda, mutu-mutu yuma kunge nesalada, pio men nukmanto weike dakunung dinin, Allah er kangeda, ‘Aneng yumada, tali pua. Sunda ila mambule gume,’ tenerure. Allahdi pel dore ngeda, ila mambul dinin, nimidi pel donungada, nong ton men kupkamra cadi, sunda ila mambule gume.

18 Atep nengeda, sunda ware ngebodi Allah er kuretopu kuptupa, ‘Er angebo dano,’ peptum do? Tonda, nimi buru di petupra deriramenge kecada, urasin pio telepnge peda, Allah pio-pio telep kuretopu kurur do? Gume, angeda, tek sisi men kupmanto. Allah er tenpu cadi, ware keca ton Allah er kuretopu kuptu do? Gume. 19 Nimi buru di, petupra deipmengedi, isok si eremna tep derirameng kecada, co petumna kael nengdi, petupra deipmengepa, yuk kael nengdi, kunumna weik keca, gat keca er si emas dopropmengedi, uku dongopmengepane, boun kupyopda, aco urasin telep keca deiki di, palepra derinunge. Tonda, kunumna weik keca, er si perakda, ila kael nengdi dopropmengedi, rantai tapu ketenepra betaipmengedi, apatung keca, er nong deiki derinunge. Ukupmenge dingeda, akeca er si eremnunge.

20 Sun isomka nengdi, kunumna weik keca dopra, sun isok si eremna keca tep, kunumna weik keca deiki di, gambar utopu keca petupra derinunge. Dinino, yuk nengda, tali kankan kunge nesalada, emas cap, perak cap, men kunupmanto neng ton dakununge. Anengda, menmena men lyupmanto co di, gat co dopra, sun isok si eremna keca tep, aco di petupra derinunge. Ukupyopda, sundi akeca dona ila kael ngebo ton epetepmengedi epmengopda, ‘Angebodi gambar utopu keca, isok si eremna tep, keteneipseredi loka men sakmantonge dopkamser’ tenen, moronunge. Moropmengopda, angebodi isok si eremna keca dorbarure. Sun yumada bicaue. Si eremenge keca yumada tali keca tepa.

21 Sunda, ware keca deiyo tep men kael keprum do? Sunda, ware keca deiyo tep men gekeprum do? Akeca-keca yuma, gonga kemna taru di, yuk nengdi men lap peamseipa, pio men gekeprum do? Allahdi, tuai mutu cap, tuai mutu kure keca cap, gonga kepra ketekepra deiamu taru di, ange betapra men kael keamrum do? 22 Ne Allahda, im deiki ila bungna keca deiki bukamsidi, tuai mutu yuma bola urasin utopu kupra ketekepsidi, dinune. Tuai mutu ketekepsidi, tuai nesala ton ketekepra deipsipa, sundi deipipa dadeipdanen, yakarami nesala yumada, pio meteke. Tali po utopu kununge. Nimidi pala opkal dopra, yambulai lelipdongoramengtopu, neda Allahdi, im deiki cap, im deiki kure keca yuma cap, ketekepra tenpu taru dipapu deipsi. Nimidi, ‘Opkal bol di donup dodin ati kunkamep’ tenen, pala opkal dopra deriramengtopu, ne Allahdi im deiki kure keca yuma, kanam dipapu ketekepra deipsi.

23 Tonda tuai mutu nengdi, ‘Nun ila deiyo neng kunkameng’ tenen, wepra derinung deiyo-deiyo neng cap, Raja neng capda, ‘Sunda puto weik neng, ila mambul neng,’ tenenung dinino, ne Allahdi, adeiyo neng yuma bisbisa kapnedi, gum kupra derinune. Tuai mutu ila nimi deiyo neng kepra, ila mutu talenung neng yumada, ne puto dipapu aneng gum kupra derinune. Sundi, ‘Ukunkamepe,’ tenenunga yumada, gawal daknedi, gum kupra derinune. Sun peda tali neng pua. 24 Ukupmanto ngeda, nimidi ukupu koupmange keca kapul bongopredi yaten dokotenmarepane, keteng deipredi bupu weik kupyopda, gelal sepredi, koluramretopu kununge. Ada, nimidi, aila neng tep, ‘Nun deiyo neng kunkamseng’ tenen, wepra deipmengepa, adipapu sun anengdi akeca-keca cap, amutu cap talepmenge taru dipapu, ne Allahdi, ‘Akonuma,’ tenepne taru konum kupyopda, nedi sun tep gum kupra derinune. Kumanya pung peprepa, tali paramre mutmuta konum kolupredi, gelal sedoramretopu, ne Allahdi sun ila-ila neng peda, gum kupra derinune.

25 Atep nengeda, sunda, ‘E, angeboda, Allah utopu kurure,’ teneptum do? Ware ngeboda, ne puto cap, ila mambul cap kunetopu kurur do? Neda, pio telep Ila Eremna Ngebo kunetopu, ware ngebo ton, ‘Allah kuretopu angebo ton ukurure,’ tenen, pepnetum do? Gume ne tenpua cadi, tali tuai neng yumada, ne Allah kunetopu men kununge. Ada men kupmanto tepa. 26 Ukutaruda, sundi im deiki erepra dipeteprumdi, moupra tenepkurume. Betapra teneprumdi kael kepkurume! Ware ngebodi keteng cap, war cap, kuru yuma cap, ketekepra deipupa, im deiki kurur do? Im deiki kure keca yuma ketekepra deipu ngebo, er pedipapu kuru cap, keteng cap, war cap, im deiki kure keca yuma capda, ketekepra deipudi, sun tenpu-tenpu, si yuk-yuk karepudi, sun si yuk-yuk si pepra upurure. Kuru im deiki kure keca denge yumada, men nukmanto kurure. Dinino, Allah ne si Yahwehda, ne ila puto deiki di ange yuma talepra kununa cadi, tenpunge peda men gum kuptue. Ange yuma tupa akapmaretopu, pio kunkamre.

27 Ange tep nengeda, sun Israel yala nesalada, ware keca deiyo tep, kange mun kupserepa tenimtorum do? Sun apu bo Yakubdi deipupa, dadeipdanen, yakaramrum nesalada, ware keca deiyo tep, sun dipru neitamai di tenimtonapu kuseredi, ‘Uo, nun ware kupkamep do? Nun ikin kuser ngeda, nun nai bo Allahdi men diserur do?’ pepra, mali pepra engerum do? Tonda, sundi, ‘Uo, nun iriwarye kuserenge yumada, Allah er si Yahwehdi men kael kemserur do? Nun putaser ngeda, Allah men diseredi men kael kemserur do?’ pepra, mali penerum ngeda, ware keca deiyo tep do? Moupra men tenerumdi, amali upu penerum do?

28 Sunda ware keca deiyo tep, men kael keprum do? Sunda, ware keca deiyo tep men gekeprum do? Sunda ware keca deiyo tep, walwal kurum do? Neda Allah, ne si Yahweh kunune. Neda Gam Pio kunune. Pumun taru di dipra, doryankamre taruda, pio akunkamne. Mutu sirik cap, im sirik cap, daneitamai mutu yuma ketekepra deipsa deiyo ngeboda, ne pua. Neda Allah, puto boun kupnerepa, beipye peingna ton gum ngebo kunune. Ila mambul pel donun dinin, ikin men kupnetupa, beipye men peingnune. Tonda, nedi ila mambul keca nong neitamainge yuma, konum kael keamsinge yumada, tali tuai nesala yumadi, pio tek sisi men teneptenge. Tonda ne kael keamsinge sun ton men kael keptenge.

29 Tonda, ne Allahdi puto boun nesala yuma tep puto kemdinune. Neda puto boun tep, ‘Uo, ware kuptene do?’ tenen, pel tapmanto nesala tep, nedi sun puto tapakra karenune. 30 Sun kaele. Puto weik kaber neng yuma peda, ikin pel weik doramengepane, sun puto boun kupre pangeda, ‘Uo, tupa men pel doptepe’ tenen, tapra beipye peingnunge. Tonda, karen mutu bange taru neitamaida, welena cap, kwerena cap bisi neitamaida, sun puto boun kupre pangeda, sun yan giso gel dukrepa sangnunge.

31 Dinino, ware ngebo do, ware ner do, nesala yuma sun nai bo Allah Yahweh tepapu, ‘Allah dipapu melimkamser’ tenen, erpu talepra kunge nesalada, teka tenepnengyopda, nedi karepnepa, sunda ukupu puto dopropkamenge. Ukupu puto dopropmenge nesalada, seng-seng pena ma, pol puto deiki di lakra erepra baramretopu, kanam dipapu kunkamenge. Sunda puto boun kuna gum dipapu, sepdara bankamenge. Sundi bisi bange taruda, sun puto gum kuprepa, giso biri-biri men pepkamre. Puto dipu, tali lupra bankamenge. Atep kwar dangna gume. Ne Allah Yahweh tep, teka tenenkamnerume. Allahdi Israel nesala yuma tep pepu.