Isa 41 | XteSC | STEP | Allahdi pepu. Ne pesene upu gekeprapmumdi, dimpepra kunkamrume. Uo, sun dana-dana tara, laut mokon di sekdongopu mutu kumum nesala yuma, tonda sun karen-karen mutu kumum nesala yala-yala yumada, puto boun kuramrum dinin, nedi sun puto kange di ton cap, karepkamsene. Atep sun yumada yamumpa, ne cap upu sisikamepe. Upu akapseryopda, sundi pepkamnerume. “Upu bongdina deiyoai bulupmepedi, upu talepkamepe. ‘Ila mambul pel dorur ngeboda, ware ngebo do?’ pepra upu talenkamepe.”

Isaiah 41

Allahda, Israel nesala tep kalekra melimrur ngebodi pepu upu

1 Allahdi pepu. Ne pesene upu gekeprapmumdi, dimpepra kunkamrume. Uo, sun dana-dana tara, laut mokon di sekdongopu mutu kumum nesala yuma, tonda sun karen-karen mutu kumum nesala yala-yala yumada, puto boun kuramrum dinin, nedi sun puto kange di ton cap, karepkamsene. Atep sun yumada yamumpa, ne cap upu sisikamepe. Upu akapseryopda, sundi pepkamnerume. “Upu bongdina deiyoai bulupmepedi, upu talepkamepe. ‘Ila mambul pel dorur ngeboda, ware ngebo do?’ pepra upu talenkamepe.”

2 Sun tenipetepso. Ware ngebodi upupupa, keteng yakan tara di, ila jen talena deiyo ngebo gekepudi yakanmar do? Ware ngebodi angebo tep, ‘Namutara kuredi, ne teneramsi pel donkamnere’ tenen, puto kemdirepa yankamre do? Ware ngebodi ajen talena deiyo ngebo tep, puto keiprepa, yuk mutu yuma kunge nesala tep, bisipra popyakankamre do? Utopu ware ngebodi, angebo tep puto karepupa, er ya cap, er jen cap doupredi, yuk mutu ila nimi deiyo neng yuma, yaniptapra popbisipkamre do? Anesala yuma popbisipredi, gawal dangkamre.

Ukupmanto ngeda, kumanya pupre pangeda, kalkal tu erepra embarure. Tonda, kumanya di pupre taruda, mutmuta kolupmarepa, kumanya yaredi doupra baramretopu, yuk mutu ila neng yuma peda, utopu kupkamenge. Ange utopu, angebodi, yuk yala nesala cap, sun ila nimi deiyo neng cap tep, popra gawal dakre pangeda, anesala yuma gum kupkamenge. Ukupra poryaryopda, amutu yumada, popra sikke buktapkamre. 3 Amenda yankamre ila jen talena ngebodi, sun yuk mutu nesala yala-yala yuma tep, ‘Popra gawal dakun’ tenen, pio tep domembankamre. Erdi menop taru men embaramu bisi dinin, abisi deikipu embenkamre. Sun yuk mutu nesala pona tep, domembankamre dinin, er pe tep nengeda, ikin keca tenpunge peda, men kupkamemere.

4 Ange yumada, ware ngebo teneramutopu, apel tek sisi donkamre do? Ware ngebodi akeca-keca kapul men kwamu tara di dipra, aneitam taru yumada, ‘Ayala nesalada, ukunkamenge. Sun yuk yala nesalada, ukunkamenge,’ teneramutopu, keteng tamun, keteng tamun yuma karerepa, tuai kunge nesala yuma, erdi teneretopu tek sisi angepu kunung do? Angeboda, ware ngebo do? Ne tek sisi pepsene. Neda, Allah, ne si Yahweh kunune. Akeca-keca yuma kapul men ketekeiamsi taruda, menmena taru ne konum kuramsi. Tonda, akeca-keca yuma tep, sirya gawal dangne taru gum kupre pangeda, ne pio akunkamne. Neda Pio Gam Kuna Ngebodi, amambul pel yuma donedi, pio donkamne.

5 Tonda, ila laut mokon di dana-dana yuma sekdongopu mutu yuma, sun ila karenai kunge nesala yumadi, ne mambul pel doramsipane, dinunge. Atep akeca-keca kupnepa epmengedi, ne tep kware kurure. Ne mambul pel donepa, mutu sirik, im sirik dakunge nesalada, epmenge dingeda, lukdangedi, ‘Uo’ tenen, moropsemnunge. Ukupre pangeda, sun yuma tenpuai bulupra, ne damai yankamenge. 6 Ukupmenge taruda, ton tara nengdi, ton tara neng tep, melipra dukdongopmengedi, sun puto boun neng tep, ‘Ne kayapu, puto kepdaso,’ pepra, ukupmenga deiki di, dipru puto kemdidanunge.

7 Tonda co dopropmengedi, isok si eremna tep, urasin telep keca betaimenge neng, ila kael nengdi, sun gat keca, er si emas di urasin telep keca betaimenge neng tep, dipru puto kemdinunge. Ange utopu, besi palu di, yuk besi keca, ‘Urasin telep kupkamre’ tenen, bongopre ngebodi, er kayapu, besi keca deiki deipredi, tema cap, parang cap, ketenepra betaimne neng tep, ‘E ne kayapu, pel telep kupra donkamrume,’ pepra, dipru puto kemdidanunge. Aneng yumadi, sun kayapu neng tep, isok si eremna keca ketenepra betaimenge taruda, ‘E ne kayapu, urasin telep keca dopmap adano,’ pepra, telep upu pedanunge. Upenung dinin, sundi isok si eremna tep, betaipmange kecada, ‘Loka sakrur’ tenen, akeca bukamraida, ‘Longna gum di, dimpepra tekamre’ tenen, paku di donunge.

8 Sun anengda, tali-tali pelpu donung dinino, ne Allahdi pepsene. Ne Allahdi, sun Israel nesala tep, ‘Ne mawa nesala kungedi, ne amutara kungedi, ne pel donkamneng’ tenen, wepra deiamsisi. Sunda, Yakubdi deipupa, dadeipdanen yakarami nesala kurume. Sunda, ne weamsi nesala, ne kabo sisa, sun apu bo Abrahamdi deipupa, dadeipdanen yakarami nesala kurume. Ukuruma tep, nedi bicau tenesenun dinin, sunda malipu tupa kurume.

9 Uda ne kayape, sunda mutu sirik, im sirik dakuramumpane, nedi wepra dopropsisi. Tonda, nedi mutu-mutu yuma karenai dakuramrum dinin, nedi peipsisipa gekepnerumdi, yakaramrume. Nedi sun tep, ‘Sunda, nedi wepra dopropsisa tep, ne pel don neng kunkamrume,’ pepsisi. Nedi, ‘Sunda ne amutara pel don nesala kunkamrum’ tenen, nedi wepra deipsisi. Ukupsisidi, pio men tamamsisi. Pio kalekra melimnapu kuramsisi. 10 Ange tep nengeda, nedi pepsisi.

Sunda kwar dangna gume. Neda sun damai kunedi, pio melimkamsene. Neda, sun nai bo Allah kununa tep, sun kange tenimtona men kunkamrume. Kange mun kange doupra men kunkamrume. Neda, sun nai Allah kunedi melimkamsene. Ne dipapu puto karenkamsene. Tonda neda, mali keca tenpunge peda men kunune ngebodi, ne dumsisi buru deiki di, pio talenkamsene. Ukupra melimsenya deiki di, akeca-keca yuma bisbisa men kapkamsere.

11 Neda sun nai bo Allahdi, pio melimkamsena cadi, yuk yala nesala yumadi, yu kuprepa sun tep, ‘Yan poptepe’ tenen, piripetepkamsenga peda, sun deiki ikin keca men deipkamsenge. Nedi melimsenepa, sun podan nengda, ali weik kupkamenge. Tonda, yuk mutu nengdi sun podan neng tep, “E, anengda, tali neng pua,” pepra yap-yap penkamenge. Yuk mutu nesaladi, sun tep, ‘Aneng poptepe,’ tenenkameng nesala yumada, nedi melimsenepa, aneng depkamenge. Aneng tep popra gawal daknyopda, anesala gum kupkamenge. Sundi, aneng tep, ‘Sunda pio tali neng pua. Sun mambule gume,’ tenenkamrume. 12 Sun Israel nengdi, sun tep, ‘Aneng poptepe’ tenen, piripetepkamseng nesalada, ‘Dan mutu kunung do?’ tenen, epetepkamrum dinin, sundi anengda men epkamrume. Sun pona tep eramsei neng yumada, nedi gum kupra deipkamnepa, aneng tep tupa men tenenkamrume. 13 Ange yuma pepmasenada, mesum tep men pepsene. Deiyoda, neda sun nai bo Allah Yahweh kunune. Nedi sun dumsisi buru talepnedi, sun tep, ‘Ne nyapu, sunda kwar dangna gume,’ pepsenune. Nedi sun tep, pio kalekra melimkamsena cadi, sunda kwar dangna gume.

14 Sun apu bo Yakubdi deipupa, dadeipdanen yakarami nesala, sunda er yala nengda, sun kwar kuna gume. Yuk yala nesaladi sun tep, “Sun Israel nesalada, metek cap, puto boun cap kununga cadi, sunda, tali po cap, kwali cap utopu nesala kununge. Sunda mambule pio gume,” pepra, nyek-nyek penkamsenge. Upepsenga peda, ange tenena gume. Deiyoda, neda Allah Yahwehdi pepsene. Nedi sun Lyemna Deiyo Ngebo kunune. Neda, Allah Lek ^{▼▼Lek Ngebo pepkada, ada mali kun keca tenpunge peda men kurur ngebo tep pepu. Ada, ‘Bol kurun ngebo’ tenena gume.} Ngebo kunedi, Israel nesala tep, lyemdona cap, kalekra melimna cap tep, deiyo ngebo kusenune.

15 Ne nyapu Israel nesalao, gekepneso. Ukupmanto upu pepkusene. Sunda, ‘Gandum bam lapmepedi, er dunge wepra dopropkamep’ tenen, ila ikin co, gandum deiki deipra, darapra gamup baramumpa, gandum er du yuk lapra dourbaramre. Utopu er bam peda, yuk lapra dourbarure. Ukupre pangeda, nimidi gandum bam yuk, gandum du yuk, wepra derirbaramengtopu kupkamrume. Ila ikin co deiki, gat takke keca dongomumdi, tu deiki gamupra baramrumpa, tu paliramretopu kupkamrume.

Ada, sundi ila mutu-mutu dup cap, yambul mutu buma cap, adeiki kunge nesala yumada, popbaramumdi, popra sikke buktapkamrume. Ada, sundi sun podan nesala yuma tep, popbisipra gawal dangkamrume. Ukupmumnyopda, nimidi wa tu palipra tamamengtopu, sun yuk mutu neng tep poptapkamrume. Tonda, pinas bam lapmengedi, katbala sakrepa, kumanya yana pung peprepa doupra baramretopu, sundi sun podan neng tep, bisbisa kapra gum kupra deipkamrume.

16 Ukupmantonge ton pepkusene. Ada, gandum du nimidi gapkunga tep, pala keca deiki yakra deipmengedi, nimi buru dana-dana talepra long-long pepmengepa, er katbala barorure. Ange utopu, sundi sun podan neng tep, poptapmumdi, gum kupra deipbankamrume. Ukupmanto ngeda, gandum du taikmengepa, bam keca sakrepa, ila kumanya puto yaredi doupra, tali-tali dubaredi, tamamretopu, sundi sun podan neng tep utopu kupbankamrume. Ukupra kupmumnyopda, neda sun nai bo Allah, ne Yahweh tepapu kange deipra, si eremkamnerume. Neda Allah, mali kun keca tenpunge peda men kunerura cadi, Pio Lek Ngebo kunedi, sun Israel nesala tep, kalekra melimsenune. Atep nengeda, sundi, “Uo, nun nai Allahda, pio telep kurure. Erda, ila mambul ngebo kurure,” pepra, ne si eremkamnerume.

17 Tonda, ware ngebo do yuma, sun tali kankan kunge nesala cap, me men kuprepa, me putapredi sipyal gelal serepa, kange mun kupredi, ‘Me dan do?’ tenen, pio erterenkameng dinin, men epkamenge. Ukupmengedi, ikin kange doupra, ne tep moropmengopda, nedi gekepkamsene. Neda Allah, Israel nesala sun nai bo kunedi, sun tep pio kalekra melimnuna cadi, nedi sun tep melipra lyepkamsene. Nedi sun Israel nesala tep, pio men tapkamne. 18 Ne melipsenedi, mutu deiki, gel si katuaipu kupmaryai peda, amutu dupai di me bukra deipnedi, me karenkamsene. Me bukra deipnepa, mutu douai tara yuma, me popredi embankamre. Ange utopu, mutu iriamu tarada, me bungna deipnepa, me weika di welepra embankamre. Tonda, me gum tep, nimi men kunungaida, me deipnepa, ila mokon katuai kupkamre. Ange utopu, mo men cemre mutu, pio gelal semre mutu neitamaida, nedi me telep kupra deipkamne. Ukupnepa, gelal semre tuai yuma me embankamre.

19 Me gum tep, nimi men kunge mutu, katuai mutu neitamai yumada, nedi urasin telep co yala-yala yuma koupkamne. Ada, cemara co cap, zaitun du mouramre co cap, murad co cap, akasia co cap, sanobar co cap, kasoari tonda, er si eru perameng co cap, yuma, nedi amutu bongongai yuma koupkamne. Urasin telep co, cemara co cap, dang co cap koupbanyaipu, aco yuma tapakra koupkamne. Aco yala-yala yumada, pumun taru pio gelal semu tuaipu koupkamne.

20 Ukupkamna deiyoda, mesum tep gume. Ukupne pangeda, nimi yuma epmengedi kael kepkamenge. Ada, ‘Allah er si Yahweh, er buru puto deiki di kupke’ tenen, betapra tenipkamenge. Nimi yuma epmengedi moupra tenenkamenge. Ada Allah Yahweh, Pio Lek Ngebo kuredi, Israel nesala tep kalekra melimrure. Sun yumadi, ‘Allah er dipapu akeca yuma ketekepra deipupa akurure’ tenen, betapra kael kepkamenge.

Allahdi isok-isok si eremami nesala tep, pepu upu

21 Allah er si Yahwehdi, isok-isok tep pepu.

Israel nesala walwal di isok si eremnung isok cap, nimi urasin utopu keca betaipmengedi, deriramenge keca yumada, ne damai yakankurume. Neda, Yakubdi deipupa, dadeipdanen yakarami nesala, sun ila nimi deiyo ngebo, sun Raja kunune. Atep nengeda, sun isok si eremenge keca bulupra, ne damai yamumnyopda, sun tenepmarum ngeda, pepkunerume. “Deiyo ake,” pepra, tek sisi lap pepnetumtoda, gekepkusene. 22 Uda, sun Israel nesala, sun isok si eremrum keca yuma dopra, ne damai duyamumpa, atali keca di, ‘Lap pepsetenge do?’ tenen, gekenkamepe. Ada, amenda doryankamre taru kupkamre ngeda, ware kupkamre do? Tonda, pumun taru konum pel doramumpa, kupyakaramu keca yumada, yana lap pepsengepa, nun yuma moupra tenepetepmepedi, ‘Deiyo ake’ tenen, kael kepkamepe. Tonda, menop taru kuamunge, lap pepsemumpa gekepmepedi, ‘E, ange kuramnga tep, amendada er nong ukupra kupkamre ja’ tenen, kael keptepe. Amenda taru kupkamreng peda, lap pepsetumtoda, gekepra kael keptepe.

23 Sun isok si eremna tep betaiprum keca di, upu peptenge dingeda, amenda doryankamre taru kupkamre keca, lap pepsetenge pangeda, apeptenga deiki di, ‘E, teka akecada, Allah er puto cap, gam kuna cap utopu kurure,’ teneptepe. Dinino, ange men pepsetenge pangeda, ‘Ada tali keca pua,’ tenenkamepe. Tonda, akeca deipserumpa, sun pedi mambul pel telepnge do, malinge do, tek sisi doptengepa, nun asuru di eptepedi, kwar weik kupsetu teptoda, ‘E, sun si eremnung kecada, tek sisi mambul keca kurure,’ teneptepe. 24 Angeda, “Lap pepserume,” pepmasen dinin, nun kaele, isok si eremna tep, nimi buru di betapra derinung kecada, gam men kurure. Akeca yumada, tali keca pua. Sun pel tenpunge peda, men pel dopmanto kununga cadi, talipu kurure. Atep nengeda, ware ngebo do yuma, nimi buru di betapra deipmengepa, isok si eremna tep, akeca talepra si eremenge nesala yumada, ne Allahdi, ‘Anesalada ne pio songe. Sun kunge kecada, pio mali weik kurure. Ne damai men kuptenge,’ tenepra pesenune. Isok si eremenge keca, yala-yala yumada, tali keca pua.

25 Sun Israel nesalada, mali weik kuruma tep, nedi sun wenemna tep, sun kurum mutu di dipra, utara mutu kure ngebo, yu weik ngebo tep upupsipa, yakankamre ja. ^{▼▼utara yu weik ngebo – Aupu pepunge deiyoda, ada Babel mutu ila nimi deiyo ngebo er si Darius tep pepu.} Upupne pangeda erda keteng yakare tara di yakankamre ja. Angebodi, ‘Ukupkamrume,’ pepkamre upu neitamaida, ne si ton pepkamre. Angeboda, yuk yala nesala yuma tep, popra bisbisa kamre ngebo kurura cadi, ukupmantoda, kael nengdi kerah tu yanipmengedi, bental kuprepa dopra, sun tenepmenge keca betaimamengtopu, ayu deiyo ngebodi, yuk mutu deiyo-deiyo neng cap, Raja neng cap tep, yanipsingipkamserepa, gawal dangkamsere. Er teneretopu tali lupra kunkamre ja. 26 Nedi upupsipa, yakankamre yu ngeboda, ‘Amenda taru poryankamsere,’ pepra lap peamseu ngebo, ware ngebodi menmena taru di aupu lap peamseu do? Ange yumada, kapul men kuramu taru di, lap peramseupane, akeca yuma konum kupsere pangeda, “E, ange kupkamsera tep, lap peamseu ngeboda, tek sisi upu peamseu,” peptum ngeboda, ware ngebo do? Tek sisi pepsene, sun isok si eremna tep, betapra deriramrum keca, tenpunge peda, “Ila yu ngebo poryankamsere,” pepra men lap perami. Isok si eremna tep, nimi buru di betaimrum keca yala-yala yumada, upu men pepmanto keca cadi, upu tenpunge peda, men lap perami. Tali dimpeprappu kununge. Sun isok si eremna tep, derirumnya kan-kan neitamai di, tenpu keca peda, upu pediramtupa, gekepra kael keamtum do? Gume angeda, men kupmanto tepa.

27 Gume, neda sun nai bo Allahdi, sun Yerusalem ^{▼▼Yerusalem – Ibrani upu deiki di amutu si tep, Sion perami dinin, amutuda si butene perami. Tongeda, Sion mutu perami. Tongeda, Yerusalem mutu perami dinin, amutuda tenpu mutu tepa.} kurum nesala tep lap peramsisi. Ne Allahdi menmena, sun Sion mutu kurum nesala tep, kai upu peiamsisi. Nedi, “Sun diso, ayakanmange nesalada, konum damai yanmang adano,” pepra lap peiamsisi. Tonda, ne dipapu, sun Yerusalem kurum nesala tep, ‘Kai telep upu pepkamre’ tenen, kai telep upu perbana tep, angeboda nedipu nimi ton wepra deipsidi, sun kori dokotepsisi.

28 Ne Allahdi sun Israel nesala kan-kan neitamai, “Amenda kupkamre nongeda, ake,” pepra, ‘Lap pena upu pepmanto ngebo akurur do, gum do?’ tenen, diramsipane, sun isok si eremamrum nesala kan-kan, tenpu ngebo peda, lap pena upu pepmanto ngebo ton men kurure. Tonda, nedi, ‘Telep kunada ange do, ange do?’ tenen, lap pepneso. “Ange deiyoda, ake lap pepnerume,” pepra, sun Israel nesala tep asipetepsene taruda, nimi tenpunge peda men penerume. Sundi men lap pepmanto nesala kuruma tepa.

29 Deiyoda ake. Sun Israel nesalada, isok-isok si eremrum nesala yumada, mok upu pena nesalapu kurume. Sundi dorum pel yumada, tek sisi nong ton men kurure. Sun pe buru di betaiprumdi, isok si eremna tep derirum keca yala-yala yumada, tali keca pua. Ukupmantoda, kumanya di puprepa tali-talipu embaramretopu, isok si eremrum keca peda, angetopu kurure. Tonda nimidi, ‘Ware kupkup do?’ tenen, kange wang-wang peprepa, kange tenimtonapu kuramengtopu, isok si eremrum keca peda, angetopu kurure. Akeca yumada, talipu, men kupmanto kurepapu kununge. Allahdi sun Israel nesala tep, weneprapudi pepu.