Isa 42 | XteSC | STEP | Allah er si Yahwehdi pepu. Sun yuma diso. Ne amutara kuredi, ne mambul pel donkamre ngeboda, sun kael kemna tep, erepra deipsene. Nedi angebo pio melipra talenkamne. Nedi angebo wepra deiamsa tep, er tep nengeda, pio kange derinkamne. Ne weamsi ngeboda, ne Lek Sambala weika di, er deiki derinkamne. Ukupnyopda, erdi sun tuai nesala yala-yala yuma tep nengeda, dumsisi kupra upu bongdinkamre. Ukupre dingeda, sun ikin weik kuraminge gum kupra deipredi, nesala weika di telep kupra derinkamre. Ukuprepa, sunda kange deipra kunkamenge.

Isaiah 42

Allah er amutara kuredi, mambul pel donkamre ngebo tep, pepu upu

1 Allah er si Yahwehdi pepu.

Sun yuma diso. Ne amutara kuredi, ne mambul pel donkamre ngeboda, sun kael kemna tep, erepra deipsene. Nedi angebo pio melipra talenkamne. Nedi angebo wepra deiamsa tep, er tep nengeda, pio kange derinkamne. Ne weamsi ngeboda, ne Lek Sambala weika di, er deiki derinkamne. Ukupnyopda, erdi sun tuai nesala yala-yala yuma tep nengeda, dumsisi kupra upu bongdinkamre. Ukupre dingeda, sun ikin weik kuraminge gum kupra deipredi, nesala weika di telep kupra derinkamre. Ukuprepa, sunda kange deipra kunkamenge. 2 Namutara mambul pel donkamre ngeboda, ‘Nimi yuma gekenkamneng’ tenen, ila upu deiki di mali upu men penkamre. Erdi penkamre upuda, ‘Nimi yuma epkamneng’ tenen, nimi bisi embaramengaipu, men penkamre. Er penkamre upuda, nimi yuma diramengaipu perepa, men gekenkamenge. 3 Tonda ukupmantoda, pina tekamyai kumanya dopredi, gwemtoramrenge peda, ‘Mali tep tapkune’ tenen, men coptapkamre. Ange utopu lampu weicada, tapna-lapna kemaryanen tamamre ngeda, ‘Dakwapye’ tenen, men tapkamre. Ange men kunkamre dinin, tek sisi erdi, ‘Ukunkamne,’ perurtopu, akeca yumada, tek sisi pel donkamre. Ukupredi, dumsisi kun kecapu pel dopbaredi, nesala weika di telep kupra derinkamre.

4 Erda tenimtona deiki kuna cap, bulung tamna kange douna cap, pio gum di dumsisi kangepu doupra, tek sisingepu kunkamre. Er pel kapul men gawal dakre taruda, nimidi er tep upu men sekmemetenge. Tonda, er tep men poptenge. Pel dumsisipu dopbaramreyane, dumsisi kuna deiyo keca konum telep kupra pel dopyopda, pel yapkamre. Ila laut mokon pirimanai kunge nesalada, ‘Uo, erda dan taru nun mutu yana peteremkamser do?’ tenen, er tep pio kange deipra dinapu kunkamenge.

Allah Yahwehdi, er amutara pel donkamre ngebo tep, pepu upu

5 Neda Allah ne si Yahweh kunune. Nedi pepkene. Im cap, im neitamai kure keca cap, im deiki cap yumada, ne dipapu ketekepra deipsi. Tonda, ne dipapu, tuai mutu ban-ban yuma cap, tuai mutu kure keca cap, tu deiki di bolokra paramre keca yala-yala yuma capda, nedi ketekepra deipsi. Ne dipapu tuai nesalada, sun isin karesenune. Karenepa gam kununge. Tonda, sun sambala peda, ne dipapu sun dipruai dongosenune. 6 Atep ne si Allah Yahwehdi, kan tep wepra kongpepkena deiyoda, ake. Ada neda, mali kuna pio gum dipapu, dumsisipu kununada, kandi, ‘Tuai nesala yuma kael kepkameng’ tenen, katuai kupra deipkamrema tep, wepra deipkesi. Atep, kanda telep kange doupra, dumsisipu kupbankamrume. Nedi kan buru talepra pio kalekra melimkamkene. Deiyoda ake.

Ada, ‘Ne mawa nesala kunkameng’ tenen, wepra deiamsi nesala tep, nedi, ‘Ukunkamrume, angeda men kunkamrume. Ukuprumnyopda, nedi sun tep ukunkamsene,’ pepra deipsi upu, ‘Pio teka tenepkameng’ tenen, kan dopra sun kori dokotepkamkene. Kanda, mambul pel dopbaramempane, adeiki di anesalada, ‘E, tek sisi nun nai bo Allahdi pesere upuda, nong kupkamre ja’ tenen, moupra kael kepkamenge. Ukupmempanen, sun betapra kael kemna tep, kandi sun dipru neitamai dirine karenkamrume. Ukupmantoda, lukunda neitamaida, nimidi weica upmengedi mepra bangepa, yuk nesala aweica dirine epmengedi, telep bisi baramengtopu, kandi karen-karen mutu nesala yuma tep, dirine keipkamrume. Ada, ‘Israel yala gum nesalada, ne dirine epmengedi, teka tenepkamneng’ tenen, dirin deiyo ngebo erepra deipkene.

7 Kandi ne mambul pel dopembanmamemyane, sun asuru pun nesalada, asuru ladina kepkamrume. Tonda, sun wenemna ati dongoramipane, kuramenge nesalada, buplan pakra loptapkamrume. Tonda, pio kunungnai kuramenge nesalada, kandi anesala dopra telep dirinai deipkamrume. Ada ikin kange doupra kunge nesala yuma, kan pel donkamrema deiki di, ne Allahdi anesala lyepkamna tep pepkene.

8 Neda Allah Yahweh kunune. Ne si sisada, Yahweh kunune. Ne ila puto cap, ila dirine cap, pio mambul cap kununa tep, nimidi ne si eremkamneng ngeda, yuk neng ton pio men karepmanto! Nimi yumadi, ne si erepnetenge dinin, sun pe buru di betaimengedi, isok si eremnungada, ne pio songe. Ne sipu erepnetenge ngeda, isok-isok tep men kareptenge. Ukupmengopda, nedi, ‘Dakwapye’ tenen, men kaukeptene. 9 Pumun taru nedi pepsisi. ‘Amenda doryankamre taruda, tek sisi ukupra-ukupra kupkamre,’ pepra pediramsi ngeda, ukutaru ange yuma nonge konum akupre. Akeca yuma kapul men kuamu taruda, konum pediramsisi. Ukutaru di dipra, doryankamre taru kupkamre ngeda, ‘Ukupkamre ja,’ pepra pedisenune. Amenda taru kupkamrenge yuma, konum kael kepmana tep pepne. Akupkamrenge yuma tep, kapul men kupmare taru di, apuda sun tep pesenune.

Allah Yahwehdi, ‘Mut pena deiki di, ne si ila di eremkamnerume,’ pepu upu

10 Ne Allahdi sun tuai nesala yuma tep pepsene.
Sun yumadi, ne Allah Yahweh tep, kange deipra, “Nun nai Allah pio telep kurure,” pepra, ukupu mut deiki di, ne si erepra gispal donkamnerume.
Sun mutu sirik, im sirik kurum nesaladi, ne Allah tep, mut penkamruma deiki di, ne si eremkamnerume.
Ange utopu, sun ila laut mokon deiki di, ila gapung co wekra, mokon deiki embaramrum neng cap, tonda ila laut mokon pirman kurum neng cap, ne Allah tep, mut penkamruma deiki di, ne si eremkamnerume.
11 Uda mo men cemrur mutu, tali katuai go weik kwamyai kurum nesala yuma cap, amutu neitamai ati dopra kuramenge nesala capdi, ne Allah tep, mut penkamruma deiki di, ne si eremkamnerume.
Tonda, Kedar ^{▼▼Kedar mutuda, me gum tep, nimi weik men kurami mutu dinin, sun Kedar mutu neitamai kurami nesalada, Arab yala nesala kurami. Ati dona gum dipapu, tali embanapu, ayanap, orbenap kemnapu kurami.} mutu neitamai, tali embarameng nesaladi, ne Allah tep, mut penkamruma deiki di, ne si eremkamnerume. Sun yumadi, ne tep, “Uo, nun nai Allah erda pio telepe,” pepra, ne sipu erepra mut penkamenerume.
Tonda, sun Sela mutu ^{▼▼Sela mutu kurami nesalada, Edom yala nesala kurami. Sun mutuda, mutu buma weik mutu.} kurum nesaladi, telep kange doupra, “Nun nai Allah erda pio telepe,” pepra, mut penkamrume. Ne si erepmumdi, ila mutu deiki di mut penkamnerume.
12 Tonda, ila laut mokon pirman kurum nesala, sun yumadi, “Nun nai Allah erda pio telepe. Erda dirin cap, ila mambul ngebo cap kurure,” pepra mut penkamnerume.
Nesala ban-ban yumadi, ne Allah tep, ‘Telepe,’ pepra, mut pepmengedi, gispal dopmengedi, ne si eremkamnenge.
13 Neda Allah Yahwehdi, nimi podan nengdi, kwar gum dipapu, balila kepra, puto di nimi porbaramengtopu kunune. Neda, jen talena deiyo nengdi, sun podan neng tep, yu kuprepa, puto di, ila upu deiki pepmengedi podarbaramengtopu kunune.
Ne Allah tep, ‘Nun songe,’ tenen, mali penenung nesala yuma tep nengeda, ila puto dipu, porbanune.

Allahdi tuai nesala tep, wenemna cap, makuna cap, kupkamrenge tep, pepu upu

14 Pumun taru di dipra, daneitam taru dine, ataru peda, ne mawa nesala Israel yala nesala ikin kuramipapu, ne Allahdi ne upu ton men peramsi.
Tali kange doupra, dimpeprappu kuramsipane, ukutaruda ange konum kupmara tep, ataruda ne upu puto di penkune.
Ada nerapu mundu douamenganen, mi deipkunge taru mi deiyo jerepa, ila di ngolokra mali peramengtopu, penkamane.
15 Ne mawa nesala lyemdona tep, nimidi ati urupra sikke bungtamengtopu, ne Allahdi ila mutu cap, yambul mutu buma cap, mali kupra deipnedi, gum kupra deipkamne.
Amutu deiki kounung keca cap, tali bolokra paramre keca cap yumada, kolupra deipnepa, gum kupkamre.
Tonda, mutu-mutu embaramre me cap, mokon cap yuma, gum kupra deipnepa, gelal sepropredi mutu katuaipu kuptapkamre.
16 Ne nyapu, sun asuru puamre nesala tep, nedi meliprapnedi sun men embaramengedi, men kael keamenge bisida, nedi sun buru talepnedi, mepra benepa, embankamenge.
Kunungnaipu embaramenge nesalada, sun benkamengai nedi dirine kepra deipnepa, dirin di epra, telep kupra embankamenge. Tonda, ‘Kanam dipu benkameng’ tenen, gormair ingne bisi yuma telep kupra deipkamne.
Ukupnyopda, tali lupra telep bisipu benkamenge. Teka ange-ange yumada, nedi sun tep ukupra melimkamsene. Ne wepra deiamsipa, ne mawa nesala, Israel yala nesalada, pio men tapkamne. Kalekra melimnapu kunkamsene.
17 Ne nyapuda, lyepkamne dinin, ware nesala do yuma, sundi tali keca ketekepra deipmengedi, ‘Akecada nun nai bo kurura cadi, angedi melipkamsere,’ pepra, si eremenge neng yumada, wenepnyopda ali weik dakamenge.
Sun kuramenge keca yuma, nong men kuprepa, kange mun kange doupmengedi, ali dakamenge.

Allahdi, ‘Sun Israel nesalada, asuru puna cap, amul kinina cap kunge nesala utopu kununge,’ pepra wenepu upu

18 Allahdi Israel nesala tep pepu.

Uo, sunda amul kinin nesala utopu kurum nesalada, gekepneso! Uo, sunda asuru pun nesala utopu kurum nesalada, ukutaru diso! 19 Ne nyapu Israel nesalada, ila di asuru puamre nesala utopu kununge. Ne Allah Yahwehdi sun tep, ‘Ne upu dopra yuk karen mutu nesala lap perbenkameng’ tenen, wepra deiamsisi dinin, sunda amul kinin nesala utopu kununge. Israel nesalada, amul kinina cap, asuru puna cap, kungetopu, ware mutu neng ton angetopu kunung do? Gume, sun pua. 20 Nedi ila mambul pel weik doramsipane, sun Israel nesala weika di dirum dinino, moupra men tenerume. Sundi, ‘Dakwapye’ tenen, betapra men dirume. Sun yuma amul pakra deiya gekerum dinin, ‘Deiyo ake,’ tenen, moupra gekena gum tep, men kael kemrume.

21 Ne Allah Yahweh kunune. Neda mali kun keca tenpunge peda, men kunedi, pio dumsisipu kunune. Dumsisipu kununa cadi, nedi Israel nesala tep, “Ange kunkamrume, angeda men kunkamrume,” pepra deiamsisi ngeda, pio telep kupra peramsisi. Aupuda, pio telep dirin weik kemdirur upu kurure. Ukupsa tep, ne kange deiamsi. 22 Ukupra pio telep upu karepsisi dinin, ange yuma taprumpa, yuk karen mutu nesaladi, yana sun tep popbisipsei. Popbisipseidi, sun taleramrum keca yuma upula doproamsei. Tonda, ton tara nengda, tomopidi, ateng koupra, wenemna ati tu pumbon nge donopra deiamsei. Ton tara nengda, yuk wenemna ati pumbon ateng koupra deriramsei.

Ukuramseipa, sun tep lyepmanto ngebo ton men kuramupa, tupa ikinpu kurume. Sun taleramrum keca yuma upula dororamsei dinin, ‘Sun kecada, tamupra karepso,’ pepmanto ngebo cap, tonda loptapra lyepsetu ngebo ton men kuramnga tep, tupa ikinpu kurume. 23 Men di ikin kuamseunge tep, apepmasen upuda, sun kan-kan di ware ngebo amul pakra deiya moupra gekenkamar do? Apepmasen upu gekeptudi, ‘Uo, amenda taru peda ukupserur’ tenen, ware ngebodi, gekeptudi, moupra kael kepkamre do? Menop taru ikin kupseunge, betapra teneptumtoda, amenda taru yankamserenge peda, betapra teniptume. Dinino, sun kan-kan di, ware ngebo gekeptudi, kael keptu do? Pio gum tepa.

24 Ware deiyo ngebodi, ila go karepupa, yu nesaladi yanamidi Israel yala nesala sun talerami keca yuma upula dororami do? Ange utopu, ware deiyo ngebodi, go karepupa, yu nengdi Yakub er yala nesala, popbisipidi, ikin keca sun nong deiki derirami do? Angeda sundi betapra men kael keamrum do? Ila go karepu deiyo ngeboda, ne Allah Yahwehdi kupsi. Ukupsada mesum tep gume. Deiyoda, sun Israel nesaladi ne upu yaniptapmuma deiki di, ne tep tapnerume. Nedi sun tep, “Angeda kunkamrume, angeda men kunkamrume,” lap pepra kareramsisi upuda, sundi yaniptaprume. Nedi, “Telep kuna tep, dumsisi bankamrum bisida ake,” pepra kareramsisi upuda, sun dipapu, “Angeda nun songe,” pepra tamnerume. Atep nengeda, ikin kusere ngeda, deiyo sun ca. Ne Allah dipapu gume. 25 Sun Israel nesaladi, ne upu yuma tapneruma tep, yu weik kupneupa, nedi sun wenemna tep, pio ila kange mun keca karepsisi. Ukupra ne yu deiki di, sun podan neng tep go karepsipa, yaidi sun tep, popbisipsei. Ukupseia deiki di, ukupmantoda ila ukudi akeca-keca yuma jeredi gawal dangamretopu, kupseu dinin, sunda tupa betapra men teneprume. Ne Allahdi, Israel nesala sun wenemna tep, ila kange mun keca karepsisipa, gawal dakmanto kupseu dinin, tupa moupra men tenerume. Ikin kupseupa, adeiki di ne tara tamupra yanetum dinin, ukupseua peda, ange yuma moupra men tenerume. Allahdi pepu.