Isaiah 43

Israel nesala sun Lyemna Deiyo Ngeboda, Allah er tenpua tep, pepu upu

1Allahdi Israel nesala tep pepu. “Sun mali kuramrumpa, wenepsisi dinin, ukupsisa peda tupa moupra men tenerume. Dinino, ukutaruda, neda Allah Yahwehdi pepsene. Ne dipapu, sun apu bo Yakub wepra deipsidi, ketenepra deiamsipa, erdi deipupa dadeipdanen, yakaramrum nesala, ne mawa nesala kurume. Sun Israel nesalada, ne dipapu sun tep ketenepra deiamsisi. Atep nengeda, sun kwar dangna gume. Ada mesum tep men pepsene. Gume, nedi, ‘Ukunkamne,’ konum teneramsi ngeda, sun mali kurumnge tep, wenepra poptapsetene dinin, bicau tep sun mali keca kaukepnedi, lyepropkamsene. Nedi sun si konum kael keamsisidi kongpepsisa tep, sunda ne nyapu sisa kurume. Sunda ne mawa nesala kurume.”

2“Ange tep nengeda, sundi ila me goupra bankamrum dinin, me neitamai bankomum taru pe, nedi melipkamsena deiki di, ame ouptua peda, me goupbamumpa, men dopkamsere. Tonda, ila uku bu jenmaryai embankamrum dinin, uku bu neitamai bankomum taru pe, nedi melipkamsena deiki di, auku ila di jeptua peda, uku neitamai embamumpa, auku di men jepkamsere. Utopu ton, yuk kurpeten keca yuma sun damai yakaserya peda, bisbisa men kapkamsere.

3Ange pepmasenada, mesum tep men pepsene. Deiyoda, Israel nesala sun nai bo Allah, ne si Yahweh kunune. Israel nesala, sun kalekra melimna deiyo ngebo, Pio Lek Ngebodi, sun tep lyepropkamsena tep pepsene. Israel nesala sun Lyemne Deiyo Ngebo kunune. Sun mali kurumnge tep, wenepra poptapsetene dinin, sun yo pununa tep nengeda, Mesir mutu kurami nesala cap, Etiopia mutu kurami nesala cap, Syeba mutu kurami nesala capda wenepra poptapsi. Ukupsidi, sun Israel nesala tep loptapsisi. 4Ukupsa deiyoda ake. Nedi sun Israel nesala tep, pio bicau tenesenune. Ne kangeda, sunda ne mawa nesala kurume. Sunda konum wepra deiamsa tep, lupra men wenepra poptapsisi dinin, sun yo pununa tep, yuk karen mutu nesala wenepsidi poptapsi. ‘Israel nesala tupa gam kunkameng’ tenen, yuk mutu nesala weike, punupra wenepsi.” Allahdi pepu.

5Upepudi aupu ton pepu.

Atep sunda kwar dangna gume. Nedi, sun tep pio kalekra melimkamsene. Ne cap, sun cap kikimanpu kunkamepe. Men tamkamsene. Sunda yu nengdi tomopra dana-dana tara mutu, karen mutu dubenamsei dinin, ne meliamsisa deiki di, keteng yakan tara cap, keteng dangban tara cap di, sundi deiprumpa dadeipdanen yakankameng neng weika di, go karepnepa bulupra yakankamenge. 6Ukunkamna tep nengeda, nedi pepnepa, utara mutu kunge nesala cap, itara mutu kunge nesala cap, bisbisa kapseidi, tomopra dubenamsei nesalada, tapkamenge. Nedi, ‘Menmena tapso,’ pepnepa tapkamenge. Nedi, ‘Ne nyapuda, pio karen mutu di duyankamrume,’ pepne pangeda, tapmengepa yakankamenge. Ange utopu, nedi, ‘Ne ner nyapu ton, mutu sirik, im sirik dubenamipa dakunge mutu di duyakaso,’ pepne pangeda, tapmengepa yakankamenge. Men dimpeptenge.

7Ange tep nengeda, nedi ne si kareramsisidi, ‘Ne mawa nesala kurume,’ pepra weamsisi nesala yumada, nedi ketekepra deiamsi. Anesala yumada, “Ne pio telep kununa cap, dumsisipu kununa cap, dirin weik kununa cap, anesala deiki deipnepa, sun kunkamenga deiki di, jenek kuprepa, yuk nesala yuma epra kael kepmengedi, ne Allah tep, ‘Uo, Allah erda pio telepe. Ila Eremna Ngebo kurure,’ pepra, ne si eremkamnenge. ‘Ukunkamenge’ tenen, sun Israel nesala wepra deiamsisi.” Allahdi pepu.

Allahdi, ‘Israel nesalada, betapra kael kepkamnenge,’ pepu upu

8Allahdi pepu. “Ne nyapu yumada, asuru tupa akapupane, sunda asuru pu jeramne nesala utopu kununge. Tonda, sun amulda tupa akapupane, sunda amul konum kinipu nesala utopu kununge. Atep, nedi pepnepa adipapu bisipra ne dinai tengbenkamenge. 9Nedi pepnepa, ban-ban yuma dakunge nesala bulupra tenpu mutu wisipra kunkamenge. Ware nesala do yumadi, ‘Amenda taru ukupkamsere,’ pepra lap peramsei do? Tonda, ‘Menop taru Allahdi pel doramseu ngeda, ake,’ pepra, akeca yuma kapul men kuamu taru konum lap peramseu do? Ware ngebo do, amenda akwapkamre keca epra kael keptenge teptoda, lap pepsetu do?

Sundi lap peramipa, sun upu gekerami nesala akungopda, sun eprum nesaladi buluprapmengedi, ‘Teka, akeca kapul men kwamu taruda, anengdi konum lap pepsei,’ pepra lap pepsetenge. Ange peptenge teptoda, yuk neng ton gekeptengedi, ‘Angeda teka’ tenen, kael keptenge. Ukupmenge dingeda, sun yuma gekepmengedi, ‘Teka angeda utopu konum kupre,’ pepkamenge. Dinino tenpu ngebo peda akeca yuma men lap peptue.”

10“Uo, ne nyapu sunda ne kune keca tep, lap pen neng kurume. Tonda, ‘Ne mambul pel melipra donkamre’ tenen, wepra deipsi ngebo cap, sun capdi lap peprumu pangeda, sun pedi kael kepkamnerume. Ada, ‘Tek sisi, Allah erda tenpu kurure,’ tenepra kael kemkamnurume. Allah neda pio pumun taru cap, ataru cap, amenda doryankamre taru cap yumada, neda pio akunune. Yuk Allah ton pio men kurure. Atep nengeda, yuk nengdi, ‘Allah kapul men kuramu taruda, nun si eremnup keca konum kwuamu,’ men peptenge. Tonda, ne pio akunkamna cadi, yuk nengdi, ‘Allah konum gum kupkamre taruda, nun si eremnup keca apio kunkamre,’ men peptenge. Neda, pio men gum kupmanto ngebo kununa tepa. Kapul taru pe, amenda doryankamre taru peda, nepu kuramsitopu, pio akunkamne. Allahda ne tenpua. 11Allah Yahwehda ne tenpu kunune. Yuk ngeboda Nimi Lyemna Deiyo Ngebo ton pio men kurure, ne tenpua.”

12“Sunda yuk keca cap, isok si cap, gonga kepra kapul ererum taruda, ne akonum kuramsi. Neda peteremna cap, lap pena cap, nimi lyemna cap, telep kudina cap deiyo ngeboda, ne akunune. Yuknge ton men kurure. Sunda ne upu lap pena nesala kurume. Sun kael keamrumdi, lap perume. Neda Allah Yahweh kunune. 13Pumun taru dordi dipra, ukutaru pe, neda Allah pio tep kunkamne. Ne buru deiki di pel donkamne ngeda, ware ngebodi upu seknetu do? Ware ngebodi ne tep bisipnetu do? Nedi talene kecada, ware ngebodi doproptu do? Nedi pel konum dopnyopda, ware ngebodi, gum kupra deiptu do? Gume ange yumada, nimidi men kuptenge.” Allahdi pepu.

Allahdi Babel mutu nesala bisbisa kapredi, Israel nesala lyepkamra tep, pepu upu

14Neda Allah Yahwehdi sun Israel nesala tep pepsene.

Neda, pio Lekpu kunedi sun Israel nesala tep pio kalekra melimsenune. Sun mali kuna tep poptapsetene dinin, sun yo pununa tep, kunupra lyemdosenune. Nedi pepsene. Sun lyemna tep nengeda, nedi pepnepa yuk karen mutu ila yu jen talen nengdi, Babel mutu kunge nesala tep, poryakamenge. Bengedi, wenemna ati pumbon buplan dekdongopnen bei ngeda bena urupra paksingipkamenge. Babel nesala tep popbisipmengedi, sun Babel nesala ateng koupmengepane, sun Babel nesalada ila di engepra mali penkamenge. Ukutaruda, dipru erepdangedi, gemepra banung dinin, amendada kange mun kange weik doupra engenkamenge. 15Neda Allah Yahweh kunune. Neda, pio Lekpu kunedi sun Israel nesala tep pio kalekra melimsenune. Israel nesala, sun ila nimi deiyo ngebo, Raja kusenune. Nedi ketekepra deipsisidi pio talesenune.

16Neda Allah Yahwehdi, ‘Ila laut mokon neitamaida, ne nyapu kalkal tu bisi deiki benkameng’ tenen, nedi pepsipa, me dan-dana tara kepropupa, tu deikipu berume. Laut mokonda, ila weik me mokon longteng-longteng penmaupa, akwamu dinin, aneitamaida nedi bisi ketenepra deipsisipa, telep bisi deiki berume. 17Ne dipapu pepsipa, Mesir mutu ila deiyo ngebo cap, er jen talen neng weike cap, sun kuda bisamdi gipra, akeca deiki bukra tu deiki embarami keca, kereta kuda cap, sun kuda bisam weik capdi, ‘Israel nesala porbenkup’ tenen, sun tep sepdaro yaipane, nedi poptapsi. Ada puto-puto neng yumadi poryai dinin, bena popsipa konum depyopda, kange di ton cap men mikipronkamenge. Weica uku jerepa, deiyo ngebodi ‘Akonuma’ tenen, tamamretopu, ne Allahdi anesala yuma poptapra gawal daksi. Ange tep nengeda, upepsene.

18Pumun taru kuramu keca ton pio tupa men tenenkamrume. Pumun kurami kecada, ton cap tenepra bana gume. 19Apepmasenada, mesum tep gume. Deiyoda, nedi ukupu keca ton kupkamsena tep pepsene. Atep, akeca pel dopnepa, sundi moupra tenepmumdi men dinmarum do? Ukutaruda apel konum gonga kepra pel donmane. Nedi me gumai tep, nimi men kunge mutu, katuai mutu neitamai bisi yaipkamsene. Tonda me gum di tali bukamre mutu neitamaida, me bukra deipnepa, me pakra embankamre. Atep sunda ‘Kapul do?’ tenen, men kael kepmarum do?

20Nedi me gumai tep, nimi men kunge mutu, katuai mutu neitamai me ketenepra derinune. Tonda me gum di tali bukamre mutu neitamaida, me bukra deipnepa, me pakra embarure. Amambul pel donunada, ‘Ne wepra deiamsi nesala, Israel nesala, ne mawa nesala kunkamenge,’ teneramsi nesaladi, ‘Ame jepra, telep kungedi, ne si erepra, ne tep gispal donkamneng’ tenen, kunune. Ukununa tep nengeda, nimidi talepra men peirameng keca, bura tara tali kure keca yala-yala yuma cap, bura dumre kam cap, bura kuramredi lukunda neitamai embaredi kupe popra jere ma capdi, ne tep gispal donenunge. Ame embare pangeda, ne weiamsi nesala tep karepnepa, jenkamenge. 21Anesalada, ketekepra deipsidi, ‘Nedi sun tep kange deipnepa, sundi ne si erepra mut penkamnenge. Ukupra pemengepane, yuk mutu nesala kael kepkamnenge’ tenen, Israel nesala ketekepra deipsi. Allahdi pepu.

Allahdi, sun Israel nesala mali kurami keca tep, wenepra pepu upu

22Allahdi Israel nesala tep pepu.

Ne Allahdi, sun apu bo Yakubdi deipupa dadeipdanen, yakaramrum nesalada, weika di meliamsisi dinin, tek sisi sun Israel nesalada ne si ton men eremnerume. Ne si erepra, ne gispal dona tep nengeda, sun Israel nesaladi, ne tep, ikin pel doramrumpa, puto boun men kupsere. 23Ada, sun mali kupmum keca tep, ‘Gam keca popra Allah tep karepmepepa, erdi kaukepkamser’ tenen, domba popra, men dekanerumdi, uku men dongorume. Tonda sundi ne si eremna tep, mambul keca dopra men karenerume. Tonda, nedi sun tep, ‘Teka tenepnerumdi, sun kouramrumu keca nong kuprepa, ton tarange kipra ne gispal dona tep talipu karenkamnerume,’ men pepsisi. Ange utopu, nedi sun tep, ‘Ne morona tep nengeda, nintong telep keca dopra uku dongopmumpane, uku jeryopda, kete weleprepa, anintong keca gekepsenya deiki di, sun tep kange derinkamsene,’ pepra ikin keca sun nong deiki men derinsenune. Nedi sun mali kun keca kaukemna tep, ikin keca weik sun deiki men derisenune.

24Tonda, ‘Nun nai Allah kange deipsetue,’ tenen, sundi ne tep nintong telep keca kunupra men dekanerume. Tonda, sun mali kun keca kunumna tep, ‘Sun peirum keca popra nong galemna telepnge duyakankamnerume,’ pepra sun deiki men deipsisipa, akeca ne karena tep men dekanerume. Akeca yumada ne ton men putanurure. Dinino, sundi mali kurumnya deiki di, ne tep ikin keca derinurume. Tonda, sun dipapu tenepmumdi, mali kurum keca yuma tep nengeda, ne dabal weik kunerure. Allahdi pepu.

25Upepudi aupu ton dukdongopra pepu. “Ware ngebodi, sun mali kurumu keca kaukemseredi, akeca gum kupra deriserur do? Ne Allah dipapu, sun mali kumum keca yuma tep, kiliptapra kaukemsenune. Ukununa deiyoda, ‘Sun mali kunge keca deiki di, ne si mali kupra deipnenung’ tenen, kaukemsenune. Nedi sun mali kurum keca yumada, tupa men tenenune. Konum kaukepnedi, gum kupra derinuna tep, akeca tupa men tenenune. 26Sun cap, ne capdi, kikiman tenepetepkupe. Sun pumun taru mali kuramrum ngeda, ka di ton cap tenepetepkupe. Sun mali kurum ngeda, upu kikiman sisikamepe. Sun Israel nesaladi, ‘Gume nun mali kuna gum dipapu, teleppu kuramepu,’ pepnetumtoda, gekepkamasene. ‘Nundi mali kun keca tenpunge peda men kuramepu,’ pepnetumpa, gekepsetenedi, ‘Tek sisi kuramye,’ teneptene dinin, ange men pepnetume.

27Menmena taru sun co puna deiyo ngebo peda mali weik kuramu. Ange utopu, sun apu yapu cap, sun deiyo-deiyo neng cap, ne upu lap pena neng, sun nabi-nabi neng cap, sun yumadi, mali kupyakaramidi, ne upu yuma yanitamnapu kurami. 28Ange tep nengeda, Allah si eremna ati pumbon pel dona deiyo neng, sun imam-imam nengda, ne konum tapsi. Sundi ne si eremna ati pumbon wekra, ne tep gispal men dopnetenge. Tonda, nedi pepnepa, yuk karen mutu nengdi, sun Israel nesala tep popbisipsengedi, ateng koupra dubenkamsenge. Ukupsenge pangeda, sun Israel nesala yumada, ali weik dangkamrume. Sun Israel nesalada ne tep mali-malipu kuruma tep nengeda, Yakubdi deipseupa, dadeipdanen bange nesala yumada popra gawal dakamne. Sunda ali weik kupra kange mun kange doupra kunkamrume.” Allahdi pepu.