Isa 44 | XteSC | STEP | Allah er si Yahwehdi er pel don ngebo, Yakub tep upepu. “Uo, kan tep ‘Ne mawa ngebo kunkamre’ tenen, wepra deipkesidi, kan si Israel pepkesi. Atep nengeda, ne upupu gekenkunereme.

Isaiah 44

Allah Yahweh, Ila Eremna Ngebodi Israel nesala wepra deipua tep, pepu upu

1 Allah er si Yahwehdi er pel don ngebo, Yakub ^{▼▼Yakub – Nabi Yesaya seku upu neitamaida, Yakub si pepunge nongeda, ada Israel nesala yuma tep seku. Ada, Yakubdi deipupa dadeipdanen, barami nesala yuma tep tenepudi, Yakub er sipu pepu.} tep upepu. “Uo, kan tep ‘Ne mawa ngebo kunkamre’ tenen, wepra deipkesidi, kan si Israel pepkesi. ^{▼▼Israel – Allahdi Yakub er si ukupunge karepu taruda, ‘Israel’ pepra si sipepu. Dinino, ataru di dipra dortaru yumada, Yakubdi deipupa, dadeipdanen barami nesala yuma tep, Israel si sipepu. Asi pepu ngeda, ada Israel nesala yuma, er mawa nesala yuma tep, pepu.} Atep nengeda, ne upupu gekenkunereme. 2 Ada neda Allah, ne si Yahwehdi kan nin kapul men deiamkeu taru di, mundu pumbon tupa kuramumpapu, keteneiamkesidi weiamkesi. Ukuamkesa tep, tupa melimkenune. Atep nengeda, kandi ne tep kwar kuna gume. Israel ^{▼▼Israel – Yuk Allah upu buku neitamaida, asi tep Yesyurun sekra deipi dinin, asi nongeda Israel nesala tepa. Si butene akapu dinin, anesalada Israel nesala tepa.} kanda ‘Namutara kuredi, ne pel don ngebo kunkamre’ tenen, konum wepra keteneiamkesi.

3 Atep, kan kunkamrem mutu gelal tuai yumada, nedi me dikra deipkenepa, me embaredi teleppu kunkamre. Tonda, gelal tuai me karepnepa embankamre. Ne Lek Sambalada kan deiki deipkenepa, kandi deipmempa dadeipdanen bankameng nesala sun deiki deipkamne. Ne puto sun deiki deipnepa, telep kupra deipkamsene. Ukupneya deiki di, sun kun keca yuma teleppu kurepa, sun anesalada gung pio weik kupbankamenge.

4 Sun anesala kunkameng ngeda, me pirmanai mutmuta bolokredi, telep kupra tengamre utopu kunkamenge. Tonda kwelem co utopunge, er sida gandarusa co, me pirman tekredi me pumbon yaten dongoprepa, bo telep kupra douramre utopu, kandi deipmempa dadeipdanen bankameng nesala peda teleppu kupra weika di kupbankamenge. Tonda sun puto weik kupbankamre. 5 Teleppu kupra kungepa epmengedi, anesala yuma tenpu-tenpu, ‘Neda Allah er tara ngebo kunune’ tenen, ne sipu penkamenge. Ton nengda, ‘Yakub er yala ngebo kunune,’ tenepmengopda, sun anesalada Yakub kandi deipmempa, dadeipdanen bankameng nesala tarapu kemyakankamenge. Ukupmenge dingeda, aneng sun pedi sekameng ngeda, ‘Neda, Allah Yahweh er tara ngebo kunune,’ tenepra, sun pe buru deiki di sengkamenge. Tonda sundi sun pe tep, ‘Neda Allah er tara ngebo, er mawa ngebo kunune,’ tenen, Israel si penkamenge.

‘Isok si eremenge nesalada, walwal dipu kununge,’ pepu upu

6 Neda akeca-keca yuma talepra deiki tara kunedi, Ila Eremna puto ngebodi pepkukene. “Neda, Yahwehdi pepkene. Neda, Israel nesala sun ila nimi deiyo ngebo, Raja kunune. Israel nesala sun mali kuna tep, poptaptene dinin, sun yo pununa tep, kaukepsidi, kunupsisi. Ne amutarapu kunkamenge. Neda Ila Eremna Ngeboda, ne tenpu kunune. Ne Allah Yahweh, akeca-keca yuma talenedi, im deiki jen talen malaikat yuma, sun ila deiyo ngebo kununa tep, neda gonga kemna cap, gawal dangna cap yumada, ila deiyo ngebo, ne pua. Yuk Allah ton men kurure. Allah ne tenpu kunune. 7 Ware ngebo do, ne utopu ngebo ton akuramreyopda, pepmumpa ne damai yaredi, ‘Ne akunune,’ pepkamnere. Ukupredi, ne Allahdi ‘Aneng ne mawa nesala kunkameng’ tenen, Israel nesala weiamsi taru di dipra, dukdongopra pel doramsanen, ukutaru pel donenge yumada, lap pepnetu do? Ange utopu amenda doryankamre taru, pel donkamnenge yuma peda, yuk ngebodi lap pepnetu do? Gume, ange men kuptenge.

8 Atep nengeda, ne nyapu sunda kwar dangna gume. Pumun taru dorkupyakaramnganen, ukutaru kurur keca yumada, nedi ‘Ukupkamre’ tenen, pio moupra kael keamsidi, keteneiamsinge men kurya tep do? Sundi ne kuramsinge epra kael kemamnerumanen, ukutaru peda epra kael kemnerume. Sun putaserur keca tep melimna nengda, yuk neng ton kusengepa, kael keptene dinin, tek sisi men kurura tep, men kael kepsi.” Allahdi pepu. Neda ila mutu yangne gel pio abukudi, kwaputopu kunkamre. Ange utopu, ne peda pio akunune. Ne dipapu kalekra melimkamsene.” Allahdi pepu.

Gam kuna gum keca tep, ‘Nun nai bo,’ pepra, si eremnung nesalada, Allahdi, ‘Pio mali kununge,’ tenerura tep, pepu upu

9 Allahdi pepu. “Nimi buru deiki dipapu ketenepra deipmengedi, si eremnung keca yumada, deiyo ton men kurure. Ada tali keca tepapu “Nun nai bo,” pepra si eremnunge. Akecada, kange douna cap, gekena cap, kael kemna capda pio gume. Ada tali kecapu kurura cadi, sun ange talepra kunung nesalada, asuru puna nesala utopu kununge. Pio walwal nengpu kununga cadi, sirya taruda, ali weik dakamenge. 10 Sun pe buru deiki dipapu akeca ketenepra deipmengedi, “Nun deiyo ngebo ake,” pepra, si eremnung nesalada, pio talipu penunga cadi, ali weik dakamenge.

11 Tek sisi, nimi yumadi, isok si eremenge nesala yumada, ali dakamenge. Ada tali keca ketenepra deipmengedi, “Nun nai bo,” pepra si eremenge keca yuma ketenepra derinung nengda, tali nimi sisi dipapu kununge. Atep nengeda, “Sun yuma bulupso,” pepmumpa, bulupmengopda, anesala yuma epnengedi, ‘Allahdi popserur’ tenen, pio kwar dangkamenge. Yuk neng yumadi anesala tep, ‘Sunda tali keca tepapu si eremamya tep, sunda tali neng pua,’ pepra mali pepmengepa, tali keca si eremamenge nengda, ali weik dangkamenge. 12 Gat keca ketenemna kael nengda, sun pe puto di sekra buma keipmengedi, uku dongopmengepa, uku jepredi, bupu weik kuprepa, boun kupyopda, angebodi taingne keca, palu di taikrapmengedi, pel donunge. Ukupra pel donmanganen, betamdinunge. Apel donmange taruda, jen cap, me cap putapredi, boun kupmarya peda, men minunge.

13 Ange utopu, co di dopra, ketekemdinung kael nengda, co bena sekrap deipmengedi, aco sekmengeyaida, ‘Ukupra ketenepkamape’ tenen, tu di sekra, akeca urasin utopu gambar kepmengedi, sengna tapu deiki di kunupetepra yan deiprapmengedi, nimi urasin utopu kuprap, peten keipmangetopu dubengedi, betamna keca di urasin pio telep kupra betamdinunge. Ange urasin telep kupra betapmengopda, ‘Akeca isok si erepkamep’ tenen, adipapu akeca dopra, sun pe ati neitamai derirbanunge. 14 Abetamnung coda, wapum cap, yuk gat co cap yumada, bura mutu tekamrepa, kwepra duyakanunge. Tonda boun co ton ati damai koupmengepane mo cepredi, bongopra ila di neramre co di betaimnunge.

15 – 16 – 17 Tonda, abetamnung co tenpu dipapu doprapmengedi, nimi uku peingna cap, roti kwaneng dana cap, tu keca dana cap, acopu bokra uku sekra dongopmengedi, kange deipra kununge. Tonda aco dipapu bokra, uku sekra, tu keca popmengedi dapra jepmengepa bourure. Aco dipapu bokra, uku sekra uku peingmenge pangeda, sun nong telep kupredi, jepmange keca cap telep kudirure. Dinino, aco dipapu ton ngeda, tali keca tep ketenepra deipmengedi, “Nun nai bo Allah,” pepra, gutam tu dipdongopra, isok si eremnunge. Tonda, aco deiki dipapu gam men kure keca tep betapra deipmengedi, “Nun nai bo, kandi nun tep, lyepseo,” pepra moronunge.

18 Sun anesalada, tek sisi walwal neng utopu kununge. Sun asuru lelimdongona cap, dipru buplan dengdongona cap utopu nesala kununge. Ukunga deiki di, moupra men kael kemenga deiki di, tali kecapu si eremnunge. Sunda bicaue, moupra men tenenunga tepa. 19 Co di nimi urasin utopu kupra betamnung nengda, pio moupra men tenenunge. Ada, ‘Aco dipapu, uku dongopmengedi, peingna cap, roti kwaneng dana cap, yapi keca cap, dapra jenup keca,’ men tenenunge. Ada ‘Ukunup co sirik dipapu doprapmepedi, nimi urasin utopu keca ketenepra deipmepedi, si eremnupada, talipu kunupe,’ men tenenunge. Moupra tenena gum di, tali kangepu doununge. Tonda, ‘Nun si eremnup kecada, tali keca pua,’ men tenenunge. 20 Akunung nengda, mening sikke dopra jeramengtopu kununge. Anesalada, sun walwal tenenga deiki di, sun pedi sun pe tep mali kudidanunge. Ange tep nengeda, men melipdatenge. ‘Aco tenpu deiki di ne buru deiki talepra pel done kecada, mok upu pedinerure,’ men tenenunge. Atep, anesalada ‘Tali kecapu si eremnupa,’ men tenenunge.

‘Allah er si Yahwehda, ketekemdina cap, lyemna cap yuma deiyo ngebo kurure,’ pepu upu

21 Allah er si Yahwehdi Israel nesala tep upepu. “Yakubdi deipupa, dadeipdanen barami nesala, sunda ne kune kecada, pio men lumdongonkamnerume. Pio moupra tenemumdi kunkamrume. Sunda, ne amutara pel don neng kurume. Ne kael kepkunerume, ada nedi sun wepra deiamsisidi, ketekepra deiamsisa deiyoda, ‘Sunda ne nyapu, ne mawa nesala kunkameng’ tenen, kuamsisi. Atep, Israel neng sunda, nedi men lupronkamsene. 22 Atep sun mali kurumu keca yuma yamupra dopropnepa, dua embaramre utopu kupkamre. Tonda, kumanya puto di pung peprepa, dua yukai dopra baramretopu, sun mali kurum keca yuma enepronedi, gum kupra deipnepa, sun damai men kunkamre. Sun mali kuramrum keca neitamai di, kunupra loptapsisidi, lyepsisa tep, ne damai tamupra yakankamnerume.” Allahdi Israel nesala tep pepu.

23 “Uda, im deiki kure keca yuma cap, tuai mutu neitamai kure keca yuma capda, ne Allah Yahwehdi apel yuma doramsa tep, ne si erepra gudinkamnerume. Ange utopu, mutu-mutu yuma cap, co palpal cap, tali paramre co cap yumadi, kange deipra mut pepmumdi, ne si eremkamnerume. Ukunkamruma deiyoda, ne Allah Yahwehdi, Yakub yala nesala yumada, konum loptapra lyeamsi. Konum lyeamsisa tep, ne si eremkamnerume. Ne telep kupra dirin weik kunere kecada, Israel nesala neitamai jenek kemdinune.” Allahdi pepu.

Israel nesala tami dinin, ka tamupra Yerusalem mutu yana kunkamya tep, pepu upu

24 Uda, ne Allah Yahwehdi, sun nin yapu kapul men deiamsei taru di, mundu pumbon tupa kuramrumpapu, keteneiamsisidi weiamsisi. Ukuamsisa tep, tupa melimsenune. Neda, sun Lyemna Deiyo Ngebo kusenune. Ne Allah Yahwehdi akeca-keca yuma ketekepra deiamsi. Ukuramsidi, ne dipapu im deiki kure keca yuma ketekepra lelekra deiamsi. Ange utopu, ne dipapu tuai mutu neitamai kure keca yuma peda, ketekepra lelekra deiamsi. Yuk nengdi ton men meliamnei. Ne dipapu apel doramsi.

25 Ne Allah dipapu, amenda taru kupkamrenge lap pena deiyo neng dinin, sun mok upu penge nengda, sun mok penge upu tep bisbisa kapra yanitamnune. Sundi, ‘Ukupkamre, ukupkamre,’ penge upuda, nedi upu sengnepa, nong men kurure. Tonda, isok puto deiki di, konum deamenge nesala sambala cap upu talenung nesaladi penge upuda, nedi yanitamnune. Sun penge mok upu yaniptapne pangeda, yuk nengdi, ‘E, anengda walwal nengdi penunge’ tenen, kael kemnunge. 26 Dinino, ne amutara pel donge neng, sundi penge upuda, nedi melipnepa tek sisi nong kurure. Ange utopu, nedi wepra deipsipa, ne pene upu lap penga deiyo neng, sun tek sisi nabi nengda, anengdi penge upuda, nedi melipnepa tek sisi nong kurure.

Atep nengeda, ne Allah Yahwehdi, “Yerusalem mutu tep, pumun taruda, yu neng yana popbisipipa, amutu tami dinin, ka tamupra ne mawa nesala tamupra yangedi, Yerusalem mutu neitamai yana kunkamenge,” pepra pedinune. Tonda, “Yehuda tara neitamai kurami mutu domi ati uruptami ngeda, kange di tamupra dopkamenge,” pepra pedinune. Yehuda tara mutu neitamai domi ati, yuk nengdi uruptamipa, buluktami ngeda, ne dipapu lepsisikra donkamsene,” pepra pedisenune.

27 Tonda nedi pepne pangeda, ila laut mokon deipunge yumada ceproptue. Utopu “Me yuma cepropo,” peptenyopda, ame yuma cepra gelal ceproptue. Ware keca do yuma ne penetopu kurure. 28 Sunda Babel ^{▼▼Babel – Yuk Allah upu buku neitamaida, amutu si tep, Kasdim mutu perameng dinin, amutu tenpu. Si butene kurure.} mutu ila nimi deiyo ngebo Kores tep, ‘Uo, erda ila mambul ngebo,’ tenerum dinin, erda ne amutarapu kurure. Atep, nedi Babel mutu ila nimi deiyo ngebo, er sida Raja Kores wepra deipsidi upepsi. Ukupmantoda, domba peina deiyo ngebo kuramretopu, nedi peipnepa, Koresdi ne nyapu Israel nesala talepra kunkamre. Angeda ne tenepsitopu apelpu donkamnere. Nedi er dipru tamupnyopda, Raja Koresdi, ‘Yerusalem mutu ati yumada, ka di ton lepsisikra dopkamrume,’ pepra deipkamre. Tonda ne Allah, ne si eremna ati tep nengeda, ‘Akati ayumnya tep gel deipra domi ngeda, kange di punupra dopkamrume,’ pepra deipkamre. Aupu pepre pangeda, apel donkamenge.