Isa 45 | XteSC | STEP | Allah Yahwehdi, Babel mutu ila nimi deiyo ngebo, er si Koresda, nedi er dumsisi buru talepra dubenyopda, ‘Ne tenepsi pel donkamnere’ tenen, wepra deiamsi. Ukupudi, aupu peramu. “Yuk mutu nesala yuma popbisipkamre. Tonda, yuk nimi deiyo neng yuma popbisipredi, sun gat opkal kenengamengenge yumada, kwiriptapkamre. Ne Allahdi Kores tep melipnepa, buplan dengamenga yumada, pakra derinkamre. Ukupnyopda, tenpu buplan peda, men dekdongopkamenge. Raja Koresda tali lupra wengnapu kuredi porbankamre.

Isaiah 45

Allahdi Babel mutu ila nimi deiyo ngebo Kores wepra deiamu upu

1 Allah Yahwehdi, Babel mutu ila nimi deiyo ngebo, er si Koresda, nedi er dumsisi buru talepra dubenyopda, ‘Ne tenepsi pel donkamnere’ tenen, wepra deiamsi. Ukupudi, aupu peramu. “Yuk mutu nesala yuma popbisipkamre. Tonda, yuk nimi deiyo neng yuma popbisipredi, sun gat opkal kenengamengenge yumada, kwiriptapkamre. Ne Allahdi Kores tep melipnepa, buplan dengamenga yumada, pakra derinkamre. Ukupnyopda, tenpu buplan peda, men dekdongopkamenge. Raja Koresda tali lupra wengnapu kuredi porbankamre. 2 Ne sida, Allah Yahweh kununa cadi, Kores kan bankamrem bisi yumada, ketenepra derinkamkene. Tonda ila mutu bukamyai cap, yambul mutu buma cap yumada, ‘Kanam dipu menmena betue’ tenen, pio ban telep kupra derinkamkene. Tonda gat keca er si tembaga di buplan betapra dekdongomenge ngeda, kan wengbana tep, nedi paktapkamkene. Tonda buplan wengban bisi besi keca di dekdongomenge ngeda, kan wengbana tep dakra tapkamkene.

3 Ne Allahdi, kunumna weik keca, yuk inipra deiami keca yumada, kan tep jenek kepra deipkenepa, doronkamreme. Ukupkenepa, kandi, ‘Ne puto kael kepnememdi, tek sisi Allah Yahwehda, Israel nesala talepra kurure’ tenen, kael kepkamnerume. Ange kael kepmemdi, ‘Allahdi ne si sipepra, wepra deipneue,’ tenen, kael kepkamnerume.” Allahdi Raja Kores tep pepu.

4 Allahdi Raja Kores tep pepu. “Kores kanda, ne men kael keamnemumpane, nedi, ‘Erda nimi deiyo ngebo kunkamre’ tenen, wepra deipkesidi, ila mambul si karepkesi. Ada ‘Ne mawa nesala kunkameng’ tenen, weamsi nesala, sun Israel nesalada, ‘Kandi, ne nyapu Israel nesala talepkamrem’ tenen, weipkesi. 5 Allah Yahwehda, ne tenpu kunune. Yuk Allah ton men kurure. Neda akeca-keca yuma talepra deiki tara kure ngeboda, ne pua. Kandi ne men kael keamnemumdi, ‘Allah erda ila deiyo ngebo, Allah kurure,’ pepra kapul men pepnemem taru dipu, ne puto weik karenkamkene. 6 Ukupnepa, keteng tengyakaramre tara di, dipdongopra keteng dangbaramre tara yumada, nesala sun yumadi, ‘Erda Allah Yahweh kurure’ tenen, kael kepnengedi, ne sipu eremkamnenge. ‘Ada yuk Allah ton gume, er Allah Yahweh kurura utopu ngebo ton men kurure’ tenen, kael kepkamnenge,” Allahdi pepu.

7 Dirine cap, kunungna cap, ne Allah dipapu ketekepra deipsi. Ange utopu, akeca-keca telep kudisene ngeboda, ne pua. Tonda, nimi tuai nesala tep, ila di pirin keca yumada, ne Allah Yahweh dipapu ketenepra derisenune. Ne Allah Yahweh ^{▼▼Yahweh – Allah er si, tek sisi ngeda, Yahweh kurure. Allahdi Musa tep, aupu katuai di lap pepu (Keluaran 3:15). Ibrani upu deiki di ‘YHWH’ sengnunge. Ibrani upu penge nesaladi, ‘Allah er si sisa men peptepe’ tenen kware kununge. Kware kununga cadi, sundi huruf YHWH angepu sengnunge. Dinino, Allahdi Musa tep, “Gume, ne sida Yahweh kunerure. Asi Yahweh kael keprumdi, asipu erepra ne tep gispal donkamnerume,” pepu. Ibrani nesaladi YHWH sengnung dinin, ‘Angepu sekmepyopda, aupu penada iriwarye kupsurur’ tenen, nun Inggris upu deiki di, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh’ tenenkamrume. Allah er si Yahweh penada telepe pua.} dipu apel yuma donune. 8 Ne Allahdi, telep kuna tep deiyo keca yumada, im deiki di dokotepnepa, tuai mutu neitamai mo cemamre utopu kupredi, dumsisi kuna deiyo keca tuai mutu sakredi, nesala yuma sun dipruai wekrepa, dumsisipu kunkamenge. Ange tep, ne Allahdi, konum keteneipsi. Tuai mutu ban-ban yuma nimi lyemna keca karepnepa dopropmengedi, dumsisi kun kecapu weik kupbankamre. Ne Allah Yahwehda, konum keteneipsa tep ukunkamre.

“Allahdi akeca-keca yuma ketekepudi, ‘Angeda, ukunkamre’ tenen, ketenepra derina deiyo ngeboda, Allah pua,” pepu upu

9 Ware nesala do yuma, sundi Allah tep mali upu penge nengda, Allahdi poptapkamre. Ada, Allah er ketekemdina deiyo ngebo tep, ton nengdi, “Allah nun songe. Kanda warya tep ange kupmaserem do?” pepra tamenge nengda, Allahdi wenepra popkamre. Allahdi pepu. “Sun utenenge nengda, ukupmanto upu pepkune. Ada, kerah tu di, ketekepra deipmenge mau saka olokrengedi, amau ketekemdina deiyo ngebo tep, ‘Kanda ware keca deiyo tep kupnemum do?’ men pepmanto kuramretopu, tuai nesaladi, sun ketekeiamseu ngebo, ne Allah tep, wenemna upu men pepnetenge. Ange utopu, nimi buru deiki di kerah tu telepra me mau ketenemdinge keca di, ‘Kanda, buru talena men keteneipmanerema tep, walwal di kupmarem do?’ men pepmanto kuramretopu, tuai nesaladi, ne Allah tep men wenepnetenge.” Allahdi pepu.

10 Ware ngebo do yuma, er nai bo tep, “Naio kanda ware keca tep, neda ukupra deiamnemum do?” pepra asimpeterur ngeboda, Allahdi wenepra popkamre. Ange utopu ware ngebodi, er nin tep, “Nanino, kanda ware keca tep, neda ukupra deiamnemum do?” pepra asimpeterur ngeboda, Allahdi wenepra popkamre.

11 Ne Allah Yahwehdi pepsene. “Israel nesala sundi ne si eremnenung ngeboda, pio dumsisi Lek Kuna ngebo kunune. Nedi sun ketekepra deiamsisidi, pio kalekra melimsenuna cadi, sun Israel nesala dorkupbankamrum taru yuma tep nengeda, ware keca deiyo tep ne asimyanmanerum do? Sundi ne tep, ‘Akeca ton kuipseo, apel ton doipseo,’ pepra men penkamnerume. Sunda ne nyapu kuruma cadi, nedi sun tep pel dosenun ngeda, ne tep, ‘Warya tep do?’ pepra, men asimpetenkamnerume. 12 Ne Allahdi, tuai mutu ban-ban yuma ketekepra deipsidi, ‘Amutu neitamaida nesala kunkameng’ tenen, tuai nesala yala-yala yuma ketekepra deipsi. Tonda im deiki cap, im neitamai cap kure keca yuma peda, ne dipapu, ketekepra deipsidi, kuru yuma ne tenepsitopu deipsipa ingrure.”

13 “Ne Allahdi Babel mutu ila nimi deiyo ngebo, er si Kores tep, ‘Teleppu kunkamre’ tenen, wepra deipsi. Atep nengeda, ‘Kanam dipu benkamre’ tenen, er bankamre bisida, nedi kwirye kupra derinkamne. Nedi melipnepa er kunkamrenge yumada, teleppu kunkamre. Ne weamsi mutu, Yerusalem mutu uruptami ngeda, ne puto Kores karepnepa, erdi kange di punupra Yerusalem dopkamre. Tonda pumun taru Babel mutu nengdi, Israel nesala popbisipidi, aneng yuma Babel mutu dubenami nengdi deiami nyapuda, dopra Yerusalem mutu duyankamre. Ada, nedi melipnepa, maton keca ton karena gum dipapu, ne nyapu lyepropkamre. Ne Allah Yahwehdi ange yumada, ne tenepsitopu tek sisipu kupkamre pepne. Ne Yahwehda, akeca-keca yuma deiki tara talepra, im deiki jen talen malaikat yuma, sun ila deiyo ngebo kununa tep pepne.”

14 “Ne Allah Yahwehdi, sun Israel nesala tep pepsene. Israel nesala sundi ne si eremnenung ngeboda, pio dumsisi Lek Kuna Ngebo kunune. Nedi sun ketekepra deiamsisidi, tupa kalekra melimsenune. Mesir mutu nesala wa pepmengedi kipra derinung keca cap, tonda, Etiopia mutu nesala sun kunumna tep, ketenepra derinung keca cap, Syeba mutu nesala sun lyoma di nenung nesala, sun bunga cap weika di kareryakankamsenge. Amutu neng cap, sun talenge keca yuma capda, sun kori duyangepa sunpu doropkamrume.

Ukupmumdi, sun anesalada buru amnyo bisi dopra ateng koupmengepa, sunda sun Israel nesalapu domyankamsenge. Sun aneng yuma sun kori yangedi, sun gispal dona tep, urasin genepdongopkamenge. Sundi, ‘Allah er tenpu kuredi, sun Israel nesala pio melimrure’ tenen, kael kemengedi, ‘Sundi nun men ponkamsere,’ tenena tep, moronkamsenge. ‘Israel nengdi si eremnung Allahda, pio tek sisi ngebo kurure. Yuk Allah ton men kurure,’ penkamenge.” Allahdi pepu.

15 Yeremiadi pepu. Sun Mesir mutu neng cap, Sudan mutu neng cap, Syeba mutu neng cap penkameng upuda ake. “Israel nesala si eremengepa sun lyemdore Allahda, jenekai men kurure, erda inipra kurure. 16 Ukuredi, nimi buru deiki di, ketenepra deipmengedi, ‘Nun nai bo,’ pepra akeca tep si eremnung nesala tep nengeda, sunda tali keca si eremnunge. Amenda taruda, nimi yumadi anesala tep nalemengepa, sun aneng ali kupkamre ja. Ukupre pangeda, sun yuma wisipra bendopkamenge.

17 Dinino, Israel nesala yumada, Allah Yahwehdi lyepropkamre. Ukuprepa pio tep gampu kunkamenge. Tonda yuk mutu nesaladi, sun Israel nesala tep, mali upu pepra sun deiki men luludinkamsenge. Atep nengeda, pio tep ali men dangkamenge.”

18 Ne Allah Yahwehdi pepsene. “Allah ne dipapu ime pe, im deiki kure keca pe ketekepra deipsi. Neda Allah tenpu kunune. Ukupsidi, tuai ketekepra deipsipa dimpepra abuku. Atuai mutu ban-ban yuma ketekepra deipsada, ‘Talipu akunkamre’ tenen, men ketekepra deipsi. Ange gum dinin, ‘Akeca-keca yala-yala yuma kunkamre’ tenen, ketekepra deipsi. Ukupsi ngeboda, Allah ne tenpu kunune. Yuk ngebo ton men kurure pepne. 19 Ne upuda iniprap men penune. Tonda kunungnai di inipra men penune. Tonda ne weamsi nesala Israel neng tep, ‘Talipu dipra embankamnenge’ tenen, men petamnune. Neda, tek sisi Allah Yahweh kununa cadi, ‘Dumsisipu telep kupra kunkameng’ tenen, tek sisi upupu pedinune.” Allahdi pepu.

Nesala yuma tep upuprepa, ‘Sun mali kunung keca tapra, Allah damaipu yakankameng’ tenen, pepu upu

20 Allahdi pepu. “Yuk mutu nengdi, popbisipseipane, tupa tapseipa, gam kurumu nengda, ne koripu yakankamrume. Sun pedipapu co deiki di petupra deipmengedi, ‘Nun nai bo,’ penung nesalada, pio walwal dipu kununge. Sundi si eremenge kecada, men lyepropmanto keca kurure. 21 Sun tali keca si eremrum nesalada, upu sisikrumudi, dortaru kupkamre keca lape pepkamnerume. Tonda sundi sun pe tep asipdankamrume. Ada, ‘Dortaru kupkamrenge tep, pumun taru ware ngebodi peiamseu do? Pumun taru di ware ngebodi peiamseu do?’ pepra asipdankamrume. Aupuda, ne Allah Yahwehdi, peiamsisi. Dumsisi lekpu kuredi, nimi lyemre deiyo ngeboda, yuk ngebo ton men kurure, ne Allah tenpu kunune.”

22 “Sun tuai mutu ban-ban yuma kurum nesala, sun mali kurum keca yuma tapra, ne damaipu yakankamnerume. Ukupmum pangeda, nedi sun tep lyemdonkamsene. Ukupkamrum pepmasenada, mesum tep gume. Deiyoda, ne kunya utopu ngeboda, yuk Allah ton, men kurure. 23 Tek sisi, ne Allah Yahwehdi konum pepsene. Pio telep dumsisi upupu pepmasena tep, men gum kupkamre. Ne pepsene upuda, tek sisipu kunkamre. Ne dipapu pesenune cadi, ne peipsisi upuda, ka di tamupra men doropkamne. Atep nengeda, nimi ban-ban yumadi, ne damai yana, gutam tu dipdongopmengedi, ne tepapu si eremkamnenge.”

24 “Ne si erepmengedi, upenkamnenge. ‘Telep kupra dumsisi kuna cap, pio puto di kuna cap yumada, Allah Yahweh er dipapu kurure.’ Ne Allahda ukupra kununa cadi, ne tep yu tenepra, mali upu penenge neng yumada, amenda taruda ne Allah tep epnengedi, ali kuprepa kwar dangkamenge. 25 Dinino, Israel nesala sundi deipmengepa, dadeipdanen bankameng nesala yuma, ne si Allah Yahweh tep, teka tenepnengepa, nedi sun tep dumsisi kupra deipsenepa, ne si erepra pio gudinkamnenge.” Allahdi pepu.