Isa 46 | XteSC | STEP | Ukutaruda, Babel mutu nesaladi, isok sida Bel isok cap, isok sida Nebo isok cap, si eremami ngeda, konum puto boun kuprepa, nema di geiya banunge. Dinino, aisok yumada, doprapmengedi, tali gam kuramre keca keledai bisam bali deiki deipmengepa, ikin weik kuprepapu dubarure.

Isaiah 46

Babel mutu nesaladi isok si eremaminge tep, pepu upu

1 Ukutaruda, Babel mutu nesaladi, isok sida Bel isok cap, isok sida Nebo ^{▼▼Bel Nebo – Sun Babel atau Kasdim mutu nesalada, sun ila isok si eremami ngeda er si Marduk perami. Aisokpu dinin, er si butene ngeda Bel ton perami. Sun tenerami ngeda, isok Bel er mida, er si Nebo perami. Abutene sida, sun isok si eremaminge tepa.} isok cap, si eremami ngeda, konum puto boun kuprepa, nema di geiya banunge. Dinino, aisok yumada, doprapmengedi, tali gam kuramre keca keledai bisam bali deiki deipmengepa, ikin weik kuprepapu dubarure. 2 Sun isok sida Bel cap, Nebo capdi, ‘Akeca sakrur’ tenen, gutam tu dipdongoprengedi, sun urasin utopu petupra deiya si eremami keca, ‘Uo, nun urasin utopu betami keca sakrur’ tenen, buru yakra deiya barerunge. Dinin, sun urasin utopu betami keca saktua peda, sun isok butene di akeca lyepra men dopropretenge. Sun patung peda, yu neng tomopmengedi, pio karen mutu dubenkamenge.

3 Atep nengeda, Yakubdi deipupa dadeidanen barum nesala, Israel nesalada, sun tupa gam akunmarum nesalada, “Ne upupu moupra gekepneso. Sunda ne nyapu sisi tep pepsene. Ada, sun apu yapudi sun kapul men deiamsei taru di, nedi meliamsesa tep pepsene. Sun deipsei taru di dipra, ukutaru yumada, nedi tupa kalekra melimsenedi, talesenune. 4 Neda, sun deiyo ngebo Allah kunune. Ukunedi, melimamsenepane, wisi derinkamrume. Ange utopu pio melimamsenepane, kul potong kunkamsere. Ne Allahdi sun tep pio tupa-tupa bicau tenesenedi, kalekra melimsenune. Nedi ketekepra deiamsisa tep, nedi sun melipra dubenkamsene. Menmena taru di melipra lyepramsisitopu, tupa sun putapsere keca karesenedi, lyemdonkamsene.”

“Nimidi tali keca si eremnung keca yumada, ne Allah kune utopu men kurure,” pepu upu

5 Allahdi pepu. “Sundi ne tep nengeda, ‘Er utopu ngebo ton akurure’ tenen, ‘Angebo ake,’ pepnetum do? Ware ngebo ton ne kunya utopu ngebo akurura pepnetum do? Ne Allahda, ne tenpua cadi, sundi tenepetepso. Sundi, ‘Angebo ton, Allah yambul utopu kurure,’ men peptume. Ne kunya utopu ngebo ton, pio men kurura tepa. 6 Ton nengda, gat keca kunumna weiknge, emas kiamenga pukra yamoptapmengedi, tonda, kunumna weik keca perak pukrapmengedi, ‘Akeca er ikinda ware kuprap do?’ tenen, kael kemna tep erempeten keca er si timbangan deiki deipra dirpetenunge. Ukupmenge dingeda, adipapu, betamne ngebo kori doupra bengepa, er angebodi nimi urasin utopu kupra betaiprepa, abetamrur ngeboda, er pel kunumna tep, kunumna keca karenunge. Ukupmengedi, akeca tep ‘Nun nai bo,’ pepra, sun nong geipdongopra, isok si eremnunge.

7 Nimidi, isok si eremna tep betaipmenge kecapu douprapmengedi, sun ati bena deipmengedi, ‘Nun nai bo,’ pepra si eremnunge. Ada, er derina tep keteneiameng atipu bena deipmengepa, akecada, abena deipmengaipu pio akurure. Ton men embandarure. Nimidi, akeca tep, ‘Nun deiyo ngebo, kandi nun putapser keca karepseo,’ pepra moroptenga peda gekepra men kareptue. Aneng sun ikin kuprepa, ‘Ware kupkup do?’ tenepmenge taruda, aisokdi melipra men lyeproptue. Akecada, gam men kure keca tepa. Tali kecapu kurura tepa.” 8 “Atep, Uo, sun mali kumumudi, ne upu yanitamnerum nesala yumada, moupra tenenkamrume. Ne Allahdi pepkusen upuda, sun aso deiki deipmumdi, pio tenenkamrume.

9 Ada, pumun taru ne Allahdi pel doramsipa, kupyakaramunge kange di ton cap, akeca yuma moupra tenepmumdi, kael kemkamrume. Ukupmumdi, ‘Allahda er tenpu kurure. Er dipu ange yuma kuamnga’ tenen, ne sipu kael kepnerumdi, eremkamnerume. Ada, ne kunya utopu ngeboda, yuk Allah ton men kurure. Ne tenpu kunune,” Allahdi pepu. 10 Upepudi aupu ton pepu. “Akeca-keca yuma kapul men ketekeiamsi taru di, ‘Siria taruda, ange kupkamre,’ pepra lap peiamsi. Tonda, pumun taru di dorkunkamre taru tep, ‘Amenda taruda ange ton ukunkamre’ tenen, moupra teneramsidi ketenepra deiamsi ngeda, lap peiamsi. Atep, ne tenepsidi ‘Angeda kupkamre,’ peiamsi ngeda, ton men tapkamne. Ayuma teneramsitopu dukdongopkamre. Tonda, ne kange deipsidi, ‘Ukupkamne’ tenemsi ngeda, adipapu tek sisi nong kupkamre, men tapkamne.”

11 “Nedi, nimi deiyo ngebo keteng yakan tara di upupnepa, yankamre. Ayankamre taruda, ne tenepsidi pepsitopu yankupkamre. Ukupmantoda, solnyau ma menmena lakra yaredi, er teneretopu, yambul gam keca popra jeramretopu, nedi upupkamne ngeboda, ama utopu kupra, menmena yaredi kupkamre. Atep, tek sisi nedi, ‘Ukunkamre,’ tenen, peiamsi keca cap, teneamsinge cap yumada, tek sisi nong kupkamre. Ange yumada, men gum kupkamre. Ayuma dungdongopnapu kunkamne.”

12 Allahdi pepu. “Sun dipru eremumdi, balila kurum neng yumada, apeipne upu moupra gekepkurume. Sunda dumsisi pio men kurumudi, malipu kurum nesalada, gekepneso. ‘Angeda, kapul kupkamre,’ tenena gume. 13 Nedi, sun ikin kange doupra kumumnya neitamai di loptapsenedi, sun lyemna taruda, damai kupra deipkamsene. Sun lyepkamsen taruda, ‘Amenda dortarupu yankamre do?’ men tenenkamrume. Ada tek sisi damai kupre peipsene. Sun lyemdona tep yane pangeda, ware ngebodi ton, ‘Angeda men kuptue,’ tenen, upu seknetu do? Ada pio men kupmanto. Ne Allahdi Yerusalem mutu kunge nesala yuma tep, tek sisi lyepropkamsene. Tonda, neda pio telep kunetopu, Israel nesala tep, telep kupra deipkamsene. Ukupnedi, kai upu dakeipnepa, yuk mutu nesaladi, Israel nesala tep, ‘Uo sunda mambul weik nesala,’ pepra gispal donkamsenge.” Allah Yahwehdi pepu.