Isa 47 | XteSC | STEP | Allahdi sun Babel mutu nesala tep pepu. “Uo, sun Babel mutu nesala gekepneso! Sunda kwerepso! Kwerepmumdi, tu but deiki yana bukso. Sunda puto weik nesala kuramrum dinin, amenda taruda, sundi yuk mutu kunung nesala ton cap men talenkamrume. Ukupmantoda, sun Kasdim mutu nesalada pio urasin telep kaber ner utopu kuramrum dinin, ukutaruda, ange yuma konum gum kupra deipsena cadi, ila deiyo nengdi, ila telep bungnai bungamengai utopu keca di kwerepmumdi, dipru amutara kepmumdi, tu but deiki bukrume! Nedi sun dopra amutarapu kupra deipkamsena cadi, nimi yumadi sun tep, ‘Sunda ila mambule, pio telep neng kununge,’ perami ngeda, ton cap men penkamsenge.

Isaiah 47

Doryankamre taru kupkamunge tep, Allahdi sun Babel mutu nesala tep, pepu upu

1 Allahdi sun Babel mutu nesala tep pepu. “Uo, sun Babel mutu nesala gekepneso! Sunda kwerepso! Kwerepmumdi, tu but deiki yana bukso. Sunda puto weik nesala kuramrum dinin, amenda taruda, sundi yuk mutu kunung nesala ton cap men talenkamrume. Ukupmantoda, sun Kasdim mutu nesalada pio urasin telep kaber ner utopu kuramrum dinin, ukutaruda, ange yuma konum gum kupra deipsena cadi, ila deiyo nengdi, ila telep bungnai bungamengai utopu keca di kwerepmumdi, dipru amutara kepmumdi, tu but deiki bukrume! Nedi sun dopra amutarapu kupra deipkamsena cadi, nimi yumadi sun tep, ‘Sunda ila mambule, pio telep neng kununge,’ perami ngeda, ton cap men penkamsenge.

2 Nimi amutara kunge pel melimna nerapudi kuramengtopu, men taruda, ila deiyo ner utopu kuramrum dinin, ukutaruda, pio amutarapu deipkamsena cadi, sun gandum du dopra tepung ketenemna tep nengeda, gel dipapu taingkamreme. Sunda, dipmengepa ikin pel dorameng nerapudi pel doramengtopu kunkamre.

Ila nerapu di kuramengtopu, sun aso deikida, kain di koudongoramrum ngeda, ange tapmumdi, kain di sun aso men koudongonkamrume. Tonda kan opkalda, ila deiyo nerapu kemameng ngeda, ange peda kwiriptapkamrume. Ukupmempa, yuk nesala yumadi sun dinkamsengada, ukupmanto me goupkongya tep, lyom opkal sirik talepdongopmengedi, erepra bangepa, sun yan yuma katuai kuprepa, me goupra baramengtopu, sun peda ukunkamrume. Deiyoda, sunda pio amutara kuna nesala utopu kupra deipkamsena tepa.

3 Tonda, ukupmantoda, sunda banagapu embamumpa, yuk nesaladi sun nong katuaipu dinkamsengepa, ali weik dangkamrume. Nimi yumadi sun tep yap-yap pepra nalemkengepa, ali weik dangkamrume. Deiyoda, ne Allahdi sun Babel mutu nesala, sun mali weik kurarumnge tep, tupa teneramnyadi, sun tep wenepra kwangdakamsene. Sun Babel mutu nesalada, tenpunge peda, ton men lyepdankamenge. Ne Allahdi sun yuma tep wenepkamsene. 4 Ne Yesayada, Allahdi peipu upu pepsene. Nun Israel nesala mali kuramepupa, Allahdi daepropseue. Allah erda, mali kun keca tenpunge peda men kuredi, erda Pio Dumsisi Kurur Ngebo kuredi, Pio Lengna Ngebo kurure. Nun Israel nesala tep, pio melipra kalengserure. Allah er sida, Allah Yahweh kurure. Erda akeca-keca yuma talepra, deiki tara erepra, ila puto weik ngebo kuredi, im deiki jen talena malaikat yuma, sun deiyo ngebo kurure.

5 Sun Kasdim mutu kurum nesala yumada, upu pena gum dipapu, dim pepra pio kunungnai wekra bukrume! Ada, sun Babel mutu nesala yuma tep nengeda, yuk mutu-mutu yuma kunge nesaladi sun tep, ‘Uo, sunda pio telepe kununge. Urasin pio telep kaber ner utopu kununge. Sunda, ila nimi deiyo ner utopu kununga cadi, yuk mutu-mutu yuma sundi talesenunge,’ pepra, sun tep gispal doramsei dinino, ataru di dipra, dorkunkamre taru yumada, sun tep aupu ton pio men penkamenge.

6 Pumun taruda, ne nyapu Israel nesaladi, mali kun keca weika di kuramipanen, ne Allahdi sun wenemna tep, yu kupneupa, sun tep ila ikin keca sun deiki deiamsi. Ada, nedi dopra, sun Babel mutu neng buru deiki deiamsipa, sun Babel nengdi, Israel nesala popra pio mali weik deipi. Ukupsi dinin, sun Babel mutu nesaladi, ne mawa neng, Israel yala nesala tep, bicau men teneramrume. Sun yu kupnepa, Israel nesala yuma dinin, sun pio wisi-wisi neng pe tep nengeda, ila ikin keca sun nong deiki deipra daramdongoramrume.

7 Men taruda, sun Babel mutu kurum nesalada, salnong-nong kupruma deiki di, sunda uperamume. “Nun Babel mutu neng dipapu, ila nimi deiyo ner utopu kuprapmepedi, sun ban-ban yuma kunung nesala yuma tep nengeda, nun dipapu talenkamepe. Nunda pio tep, ila deiyo neng kepra, yuk mutu nesala yuma talenkamepe,” peramrume. Dinino, sun peda moupra men tenepra kael kepdanamrume. Ada, nedi pel doramsinge cap, sundi ila ikin keca dopra Israel nesala deiki deiamrumnge cap, tonda amenda taru nedi sun tep menenga karepnedi, wenepra kupkamsen keca capda, sundi moupra pio men teneramrume.

8 Sundi, ‘Amenda taru ware kupkamser do?’ tenen, pio men teneramruma tep nengeda, sun Babel mutu nesalada, ne Allahdi aupu pepkusen ngeda, moupra gekepkunerume. Uo, sun Babel mutu kurum nesalada, sun pe kange di, “Nun kange deipmepe kecapu tenenkamepe,’ tenepra kurume. Sunda, tali dim pepra bukmumdi sun ati arum dopra kuramrum mutuda, ‘Nunda pio ila puto mutu nesala kunupe,’ tenepra kuramrume. Tonda, ‘Gume sun yuk mutu kunge nesala yumada, nun tep men poryasetenge. Nunda pio teleppu kunkamepe’ tenen, sun pe dipru erepdamumdi, kuramrume. Angepu gum dinin, sunda, ‘Gume, nunda Allah utopu kunupe. Ila puto pio weik kunge nesala ton, men kununga cadi, nun puda ila mambul nesala pio kunkamepe. Sundi kange di, ‘Gume, nunda, solu nerapu, sundi deiami nyapu yuma depmengepa, pio kankan nerapu kuramengtopu, nunda angeda pio men kupkamsere. Nunda pio teleppu kunkamep ja!’ teneramrume.

9 Ukupra teneramrum dinino, tek sisi pepsene. Tenpu taru dipapu, sun domrum neng pe, sun deiamrum nyapu yuma peda, ayuma adipapu tenpu taru deiki di depkamsenge. Tenpu taru dipapu, sun domrum nenge cap, sundi deiamrum nyapu yuma capda, depropmengopda, ataru dipapu sunda, pio kankan solu nerapu, akeca-keca yuma men talengedi, pio ikin weik kuramengtopu kunkamrume. Teka, sun mutu neitamai kunung asuru kwa neng cap, ‘Teleppu kunkamep’ tenen, mambul pel dona kael neng capdi kunge kecada, yambul puto keca kurur dinin, sundi sun mutu melimna tep apel dopkamenga peda, men melipkamsere. Amenda taru nedi karepnepa, ikin weik kupkamser kecada, tek sisi sun damai yankamre ja!

10 Men taru sundi mali weik kuramrumdi, sun kangeda, ‘Gume, yuk nengdi ton men epra kael kepsetenge,’ teneramrume. Tonda sundi, ‘Nunda ila keal neng kunupa cadi, akeca-keca yuma konum kael keamupu,’ tenen kuramruma deiki di, mali bisipu benmarume. Tonda sundi teneramrumada, ‘Nunda pio telep, puto weik kunupa cadi, nunda Allah utopu kunupe. Yuk nesala pe, yuk Allah peda, nun utopu men kurure. Nun pepu pio telep kunupa,’ teneramrume. 11 Sun dipru erepdaruma deiki di, ange yuma teneramrum dinino, ukutaruda sun Babel mutu nesalada, pio ikin keca, ila kange mun keca, sun deiki yaserepa doropkamrume. Aikin kupkamser ngeda, sun mutu asuru kwa nengdi, mambul pel doptenga peda, angedi men yana melipra upu sekamsenge.

Allahdi sun deiki ikin kunange tep doroipkamser ngeda, sundi, ‘Angeda upu sekdongopkupe,’ teneptuma peda, ange men kupmanto. Tek sisi sun nong deiki yankamser ja! Dato-dato di sun damai ila kange mun keca yaserepa, doropmumnyopda, sun cap, sun kun keca cap, sun mutu neitamai kure keca yumada, yawa popra sikke buktapseredi, gum kweipkamsere. Tonda ange kapul men kupmare taru di, ‘Ange-ange kupkamre ngeda, ukupra kupkamsere’ tenen, pio betapra men kael kepkamrume.

12 Sun Babel mutu nesalada, pumun sun kaber taru di, sun tuai mutu kael kemna deiki di, meri upu do, asuru kwa nengdi perameng upu do, ker dona nengdi mambul pel donange do, ange-ange yuma peda, ange di men melipdanmanto kupkamsere. Sun mutu neitamai tali keca talepmengedi, mali-mali kunge nengdi, sun mambul upu cap, mambul pel cap dopmenga deiki di, yuk neng epmengedi, kware kuprepa, sun yo moropsepkamenga peda, ato keca talepra pel dona deiki di, ayankamser ikin kecada, upu men sekmanto kunkamrume. Tek sisi sun nong deiki yankamser ja! 13 Sun Babel mutu nesalada, ware kuprap taru neitamai di, sun mutu ila kael neng cap, asuru kwa neng cap tep, ‘Uo, amenda taruda ware kupkammser do?’ pepra, asimnapu kurum dinino, sun anengdi men melimsengepa, sunda dabal kuserepa, ‘Dakwapye,’ konum tenerume.

Sun mutu kael nengdi, sun damai aupupu tupa-tupa peryakasenunga deiki di, sunda konum dabal weik kuserure. Dinino, sun mutu nengdi, ‘Amenda kupkamser keca kael kepkamep’ tenen, im neitamai kure keca yuma moupra epmengedi, tenerpetenunge. Angetopu, sundi im neitamai ingnung kuru peda epra, ‘Kael kepkup’ tenen, piripetenunge. Tonda, ukupu war belepra tengyarepa, epmengedi, ukupmepya deiki, sundi, ‘Ange-ange yuma kupkamsere. Amenda kupkamser kecada, ake,’ pepra, sun damai lap penunge. Ukupra kununga cadi, sundi upupmumpa, alap pesenge neng dipapu, dortaru sun deiki yarepa, dopropkamrum ikin keca yumada, sundi, ‘Ange-ange yankamsere,’ pepra, jenek kupra penkamsenge.

14 Dinino, sun moupra gekepkurume! Sun mutuda kael nengdi, aupu utopunge tupa penkamseng dinino, sun yuma epra kael kepso! Kuru ikmengepa, epra kael kempetenung neng cap, dortaru kupkamrenge epra kael kempetenung neng cap, sun asuru kwa neng cap, sun yumadi sun mutu nesala melimna tep, ton cap tupa yana men lap pepkamsenge. Sun anengda, ukupmanto ngeda pepkusene. Mutmuta kelkel peramre ngeda, uku bo menmena di jeproredi, sikke bungtamamretopu, kununge. Ila uku di akeca-keca yuma jedoramretopu, sun aneng peda, amenda ila kange mun keca yankamrengedi, sun ton jepra gawal dakamre. Sun wenemna tep yankamre ikin kecada, ila uku utopu kunkamra cadi, aneng peda, men lyepdankamenge.

Tonda, ukupmanto, ila uku bu di, mutmuta yuma jepropredi, sikke buktamamrepa, uku kalum yopu ton kurepa, nimidi, ‘Nun uku peingkamep’ tenen, asikke tapmarya damai bukra men peingamengtopu, sun mutu ila kael nengdi, ‘Amenda kupkamser kecada ake, ake,’ pepra, tali upupu penunge. Atep, sun anengdi penge upuda, tek sisi men melipkamsere. Ange yuma deiki di men lyepdankamrume.

15 Ange utopu, sun im neitamai kure keca cap, kuru cap dinung neng cap, asuru kwa neng capdi, sun Babel mutu nesala tep telep men kweipsetenge. Sun yumada tali pua. Sun mutu kurum nesala yumadi, sun kaber taru di pepyakaramseipa gekeramrum dinin, sundi, ‘Dortaruda ange, ange kupkamsere,’ penge upuda, nong men kupkamsere. Tali upupu pertamenge dinin, walwal nengdi, aneng tep, co bo tupa karenunge. Sun anengda, yuk-yuk bisi epra dombanung dinin, sun tali neng yumadi, sun Babel mutu nesala tep, tenpunge peda men melipra lyepropsetenge.”

Aupuda, Allahdi sun Babel tara nesala tep peipupa, nabi Yesaya gekepudi, aupu sekra deipseue.