Isa 48 | XteSC | STEP | Allahdi pepu. Sunda sun apu bo Yakubdi deiamseupa, dadeipdanen yakarumudi, kurum nesalao, sunda moupra gekenkurume. Yakubdi deiamu nesala tep, nedi, ‘Sun sida Israel yala nesala pepsena cadi, nimidi upenkamsenge. Tonda, men taruda sun co puna ngebo Yehudadi deiamupa, dadeipdanen yakaramrum nesala kurume. Sundi pedina upu peprum taruda, ‘Nun nai Allah Yahweh, er si deiki di pepsepe,’ perume. Tonda, ikin kupserepa, ‘Nun nai Allahdi melipkamser’ tenen, sun Israel nesaladi ne si eremnerume. Ange yuma ukupra perum dinino, tek sisi ngeda, sun kange dipru deiki di, teka tenepra men perume. Tali upu utopu pepra, sipyal deiki dipu pertamrume. Tek sisi telep kupra, telep deiki di men peramrume, tali upupu pertamrume.

Isaiah 48

Doryankamre taruda, ‘Allah er ila puto deiki di, Israel yala nesala Babel mutu neitamai di loptapra lyepropkamre,’ pepu upu

1 Allahdi pepu.

Sunda sun apu bo Yakubdi deiamseupa, dadeipdanen yakarumudi, kurum nesalao, sunda moupra gekenkurume. Yakubdi deiamu nesala tep, nedi, ‘Sun sida Israel ^{▼▼Israel – Menop taruda sun apu bo er sida Yakub kuramu. Yakubdi nyapu 12 deiamupa, sun adua belas nengdi deiamipa, dadeipdanen yakaramyanen, Israel nesala sun dua belas yala nesala kepi. Yakub tupa gam kuramu taru neitamaida, Allahdi er si tep, punupudi, ‘Israel’ pepra deipka cadi, ataru di dipra ukutaru peda, anesala tep nengeda, ‘Israel nesala’ penupe (Kejadian 32:28 dinkurume).} yala nesala pepsena cadi, nimidi upenkamsenge. Tonda, men taruda sun co puna ngebo Yehudadi ^{▼▼Yehuda – Yakubdi deiamu nyapu dumbari di deipu ngeboda, er si Yehuda kuramu. Atep, Israel nesala, sun apu bo si pena tep nengeda, Yehuda ton peramidi, ‘Nunda Yehuda er nyapsilip’ pepra tupa penunge.} deiamupa, dadeipdanen yakaramrum nesala kurume. Sundi pedina upu peprum taruda, ‘Nun nai Allah Yahweh, er si deiki di pepsepe,’ perume. Tonda, ikin kupserepa, ‘Nun nai Allahdi melipkamser’ tenen, sun Israel nesaladi ne si eremnerume. Ange yuma ukupra perum dinino, tek sisi ngeda, sun kange dipru deiki di, teka tenepra men perume. Tali upu utopu pepra, sipyal deiki dipu pertamrume. Tek sisi telep kupra, telep deiki di men peramrume, tali upupu pertamrume.

2 Angeda, tali tep men pepsene. Deiyoda, sundi, “Gume, nun Israel nesalada, Allahdi wepra deiamseu mutu, pio mambul mutu Yerusalem neitamaipu kunupa cadi, nun Israel nesaladi si eremnup Allahda, er si Yahweh kurure. Er dipapu nun tep melipra kalengserure. Allah Yahwehda, akeca-keca yuma deiki tara erepra, er ila puto ngebo kuredi, im deiki jen talena malaikat yuma, sun deiyo ngebo kurure. Er tepapu teka tenenupe! Er amutarapu kunupe,” perume.

3 Pumun taru sun tep ikin weik konum kuramu kecada, akeca kapul men kwamu taru, ne Allahdi, “Angeda, sun wenemna tep ukupkamsere,” pepra konum pediramsisi. Ne pe sipyal deiki di, ‘Ukupkamsere, ukupkamsere,’ pepra lape peiamsisidi ange yumada jenek kupra peipsisi. Ukupra peramsipanen, amenda taruda, akeca yuma dato-dato di, ange yuma nong kupke. Ada, nedi, ‘Ukupkamsere,’ pepsi keca yumada, apeipsisitopu nong kupupa, konum jenek kupra deipsisi.

4 Uda neda sun kurum keca yuma konum kael Keamsisi. Ada, sun kangeda, giso gat neng kuruma cadi, deiyo nengdi, ‘Ukupkurum-ukupkurum,’ pepsetenga peda, sundi pepmenge upuda, sun di balila kupra, ‘Nunda sun penge upu men gekepkupe’ tenen kika deipra kurume. Sun kumda besi beton utopu kurure. Sun asonda, pio gatnge, er si perunggu utopu kupra kuruma cadi, sun balila kange doupra kurumudi, wenemna upu pio men gekerume.

5 Sunda ukupra kuruma tep nengeda, pumun taru, nedi sun tep, ‘Amenda taruda, sun wenemna tep, ila ikin keca sun damai yankamre ja! Akange mun keca kapul men kupu taru di, ‘Ange tek sisi konum kupkamsere,’ peiamsisi. Ukupsa deiyoda, tali tep men kupsi. Ada, sundi, “Gume, akapmarenge yumada, nundi petupra deipmepu kecada, tali isok si eremna tep keca, petupra deipmepungedi, akeca dipapu ange yuma dopra karepseue. Agum dingeda, nun si eremnup keca, er puto deiki di, amambul pel yuma dopseudi, kange mun keca karepseue,” pepra, ‘Men pepnetum’ tenen, akeca yuma kapul men kupu taruda, nedi konum lap pepsisi.

6 Atep nengeda, sundi moupra tenepso! Nedi, ‘Doryankamre taruda, ange-ange kupkamsere,’ peramsisipa gekeramrumnge yumada konum kupu. Atep nengeda, nedi sun tep konum lap peiamsisi upuda, sundi, ‘Uo, nunda mali kupmepu. Allahdi tek sisi upupu peipseu. Erdi peiamutopu konum nong kupka tep, ikin kuserure,’ teneprumdi, ange ton katuai di men penkamrum do, penkamrum do? Dinino, ukutaruda, nedi sun tep, yuknge ton, ukupu Kupkamrenge tep pepkusene. Tonda, menop taru iniamsidi, men lap peiamsisi keca ton, sun kapul men kael keprumnge ton, lap pepkusene. 7 Tek sisi, apepkusen keca yumada, pumun taru di kapul men keteneiamsi. Ange yumada, ukutaru dipapu ketenepnedi, karepkamsene. Atumi di pepkusen dinin, arup taru neitamai di, nimidi men peramipa, sun ton ange yuma kapul men gekeramrume. Atarupu nedi ton ukupunge ketenepra deipkuna cadi, sundi, ‘Gume, ange yumada, nundi konum gekepra kael keamupke,’ pio men peptume.

8 Ne Kaele, sundi apepkusen keca yumada, men di pio men gekeramrume. Ange yumada, kapul men kael keamrume. Pumun taru di dipra ukutaru neitamai yumada, nimidi men peramya cadi, men gekeprume. Tonda, sun kange dipru neitamaida, ‘Allahdi pesere upuda, kange deipra adipapu moupra gekepkupe,’ pio men tenerume. Sun amul di aupu gekepmanto deiyo kecada, men kareramsisa cadi, aupuda men gekepmanto kuramrume.

Deiyoda, ake. Ne kaele, sunda teka tenena nesala men kurume. Sun apu yapudi deiamipa, dadeipdanen yakaramnyanen, sun tep deipseipa, sun metek nyapu kuramrum taru di dipra, ukutaru peda, sunda deiyo nengdi penge upu gekepmanto nesala men kurume. Sunda, deiyo nengdi penge upu yanitamna nengpu kurume. Tonda, sundi, ‘Dyo, kandi pepserem ngeda, talepra kupkamepe,’ peptuma peda, angeda tek sisi men kunkamrum dinin, yanitamnapu kuruma tep, aupu men lap pepsisi. Peptenya peda, tenpu peda sun amol pumbon men weksetue.

9 Tonda, nimi ban-ban yumadi, ‘Uo, Allahda, tek sisi dipru pio boun ngebo kurura cadi, tulum kupserya peda, yu weika di, adipapu men wenepra portamserure,’ tenepnengedi, ne si kael kepkamneng’ tenen, ne tulum tenesenun ngeda, tupa mawapu deipsi. Ukupnya deiki di nesala ban-ban yumadi, ne sipu kael kepmengedi, ‘Uo, tek sisi Allahda, pio teleppu kurure, pepmengedi, ne si erepra gispal donkamnenga,’ tenena tep, nedi sun tep yu weik kupneu ngeda, adipapu sun deiki kapul men deipsene. Tonda sun yumada, kapul yawa poptapra, men gum kupra deipsene. Tupa bicau tenesenune.

10 Sun betapra tenipetepso! ‘Ne mawa nesala teleppu kunkameng’ tenen, sun kunumpetena tep, nedi ila kange mun keca kareamsisipa, ikin weik kuramrume. Ukupmantoda, nimidi, kunumna telep keca perak dopra, uku dongopmengepa, uku bo di jeramrepanen, mali kwamre keca gum kupbarepa, perak pio telepngepu belepyopda, angepu wepra deriramengtopu, nedi ikin keca sun deiki deipra piripetepsisi. Ukupsi dinin, uku pumbon men dokotepsisi, kange mun kecapu karepsisidi, piripetepsisi.

11 Ange yumada, sun deiki ikin keca karesenuna deiyoda, ake. Ada, ‘Nimi yumadi, ne pio telep si, tupa telep tenenkamneng’ tenena tep kunune. Teka, ada ne pio Lengna si tep nengeda, kunune. Ware deiyo keca tep, ne tali dakunmanepa, sundi mali kupmumnya deiki di, yuk mutu nesala ban-ban yuma epmengedi, ne telep si yanipnengedi, ‘Allah erda malipu kurure,’ tenepmengedi, ne si tep mali pepkamneng do? Gume, ‘Angeda dakwapye’ tenen, men kuptene. Ada, ne pio telep kune keca cap, ne ila puto cap, ne mambul weik kunange cap yumada, yuk keca do, yuk nesala do, sun deiki ton men dopra deiptene. Ange yumada ne mawa kecapu kunerure.

Allahdi er mawa nesala, Israel yala neng tep kupkamu keca tep, pepu upu

12 Allahdi pepu.

“Uo, sun Israel yala nesalada, ne pepkusen upu moupra gekepneso! Tonda, sun apu bo Yakubdi deiamupa, dadeipdanen yakaramrum nesalada, sun tep upupsisidi, ne mawa tep wepra deipsisa cadi, ne pepkusen upu gekepkunerume! Neda sun nai bo Allah pio tep kunune. Pio akunkamne ngeboda, nepu akunune. Akeca-keca yuma kapul men kwamu taruda, ne akonum kuramsi. Tonda, akeca-keca yuma konum gum kupyopda, nepu tupa gam kunkamne! Neda akeca-keca yuma gonga kemna cap, gawal dangna cap, ila deiyo ngeboda, nepu kunune. Yuknge ton pio men kurure. 13 Ne ila puto buru di, tuai mutu amutara tara, mutu yungne gel deiamsi, ange yuma baripra talepsi. Ne dumsisi buru, ila puto buru di, im neitamai cap, im alau tara cap kure keca yumada, ne dipapu lelepra deiamsi. Tonda, im alau tara kure keca yuma peda, nedi upupnedi, sun si sipepra, ‘Yaso!’ peptenyopda, sun adipapu sepdaro yangedi, ‘Ware pepkuser do?’ tenen, ketenepmengedi, dim pepra tengnunge.

14 Atep tuai nesala ban-ban yuma, dana-dana tara yuma di, sun yuma bulupra wekmumdi ne pepkusen upu gekepneso! Sun mutu neitamai di, ware nesala do, ware dewa-dewa isok do, ne kupkamne keca tep, sun pe kange dipapu ange lap peptengepa gekeptum do? Gume ange men kupmanto. Ne Allah Yahwehda, Babel mutu poryankamre ngebo ^{▼▼ngebo – Babel mutu popkamre ngebo pepkada, nimi si men pepu dinin, angebodi Babel mutu nesala konum popra gawal dakua tep, nun konum kael keamupu. Ada Asyur mutu, tonda Persia mutu nimi deiyo ngebo er si Sirus tep, Allah go karepudi, melipka deiki di, Sirusdi Babel mutu nesala poptapu.} bicau tenenedi, melimnune. Atep, angebo melipkamna deiki di, sun Babel mutu kunge nesala tep, yana popredi, gawal dakamre. Tek sisi, er puto buru erepra, adeiki di, sun Kasdim ^{▼▼Kasdim – Kasdim mutuda, ada Babel mutu tep, pumun taru perami si tepa.} nesala tep yawa poptapkamre. Ange yuma ukupkamre ngeda, ada ne Allah Yahwehdi sun Babel mutu nesala wenemna tep ukupkamne ja! 15 Angeboda, ne Allahdi konum upupnedi, kong pepsi. Tonda nedi er tep upupsidi, er nong dopra konum duyana deipsi. Doupra yanepa, erdi, ‘Ukupkamne, ukupkamne,’ tenere keca yumada, kupkamre ja. Erdi tenere keca yumada, telep kupra pel dopbanmaryanen, ange yuma nong kupkamre ja!

Aupu yumada Allahdi peipupa, nabi Yesaya gekepudi seku.

16 Upepu dingeda, Yesayadi pepu. “Ukuda sun Israel nesalada, ne damaipu yarume. Yamumdi, Allahdi peipseu upu gekepkurume! “Pumun taruda, ne Allahdi kupkamnenge yumada, men inimamasi. Ange-ange yuma jenek kupra lap peramsisi. Upepra deiamsisi taru di dipra, aneitamai taru yuma peda, ne tupa akunedi, akeca ketenepra derinune. Ange yuma tek sisi konum nong kepra derinune,” pepu. Atep ne Yesayadi pepsene. Allah ^{▼▼Allah – Acada, Ibrani upu di, ‘Yahweh’ cap, tonda, ‘Adonay’ cap pepra sekya cadi, nundi aupu deiyonge jenek kupra sekmupu.} Yahwehda, akeca-keca yuma taleredi, ila puto weik deiyo ngebo kurure. Ataruda, Allahdi er Lek Sambala puto ^{▼▼puto – Aupu deiyoda, ada Allah er Lek Sambala puto dopra, Yesaya deiki deipudi, dokotepu tenena tep pepu.} karepneua deiki di dokotepmanerpa, sun damai konum yanmasene.

Allahdi Babel mutu nimi deiyo ngebo popredi, er mawa nesala lyepropkamrenge tep, pepu upu

Yesayadi sun Israel nesala tep pepu. “Allahdi upepra deipser upuda ake!” Allahdi pepu.

17 Ukutaruda, ne Allah Yahwehdi pepsene. Israel nesala sun Lyemna Deiyo Ngebo kusenune. Neda, mali kunange tenpu pe men kunerepa, pio telep Lengna Deiyo Ngebo kunune. Sun tep pio melipra kalengsenune. Neda, sun nai bo Allah kunedi, akeca-keca yuma deiki tara kunedi, ne puto di talenune. ^{▼▼talenune – Aupuda, Ibrani upu deiki di ‘Yahweh Adonay’ seki. Ibrani upu ‘Adonay,’ pepinge deiyoda, ‘Allahdi akeca-keca yuma deiki tara erepra kuredi, er ila puto deiki di talerure’ tenen, perami.} Nedi sun tep, “Ukupra kunkamrume. Telep kuna ngeda ake,” pepra peteremsenuna deiyoda, ada ‘Sun moupra kael keprumudi, amenda teleppu kunkamrum’ tenena tep, pio peteremsenune. Ne dipapu, “Sun telep bankamrum bisida ake,” pepra peteremsenepa, angepu gekepra kuruma tep, pio dumsisi bisipu dubasenune.

18 Atep, upepsene. Uo, nedi sun tep, ‘Ange kupkamrume, angeda pio men kupkamrume,’ pepra konum deiamsisi upupu moupra kael Keamtumdi, angepu gekepmumdi, talepra konum kutumtoda, sun kun keca yuma, pel dopbaramrumpa, ange yuma konum pio teleppu kupsetue. Ukupmantoda, ila me cena gum di, tupa-tupa embaramretopu konum kupsetue. Tonda sun kunada, pio ping-ping deikipu kuptume. Tonda, ila laut mokon, er puto di tupa-tupa tamna gum di, welepna, kwerepna kemredi, pio tupa yakaramretopu, sun peda tupa teleppu kuptume. Telep kecada, sun damai tupa-tupa yakanapu kupsetue.

19 Angepu gum dinin, sundi deiprumpa, dadeipdanen bankameng nesala, sun dengeda, nimidi me wenenga weik tep, men nukmanto kuramenga utopu konum kupmatenge. Nedi sun tep melipsetenepa, sun deipbankamrum nyapu peda, pio tep kunmatenge. Nedi sun tep pio dipra kaleknyopda, sun nyapsilipda, ne damai di, men gum kupkamtenge. Ada, yuk mutu nesala, yu nengdi, sun nyasilip tep, pio yawa popra, men gawal dakamtenge. Nimi ban-ban yumadi, sun si tupa tenenapu kunkamtenge. Sun nyapsilip yumada, men popkamsenge. Pio atep kunkamtenge.

20 Ange tep nengeda, sun Israel yala nesalada, Babel mutu di tapra, sepdaro bememdi, yuk-yuk mutu yumada, embanapu kunkamrume. Sun yumada, Kasdim mutu tapra, sepdaro bendopkamrume. Nedi pepkusen upuda dopra, ila upu deiki di aupu pepra, dana-dana tara yuma embankamrume. Sun kange pingpinga deiki di aupu penkamrume. Ada ake. “Nun nai Allah Yahwehdi, er amutara pel dona ngebo Yakub, erdi deiamupa, dadeipdanen yakaramidi deiami nesala, Israel nesalada, konum loptapra lyepropmar adano!” pepra, aupu ila di penkamrume.

21 Tonda, aupu ton ila di penkamrume. Ada, “Allahdi, er mawa Israel nesala, nimi cap, me cap pio gumai, pio katawai mutu doupra benamu taru neitamai yumada, sun anesala me putapupa, erdi me kareamupa, sunda me ton pio men putaramu. Allahdi ila gel bukamu mutu kan-kan di wilipropupa me pukra yaupa, gwepra jerami.” 22 “Dinino, ne Allah Yahwehdi pepsene. Sun mali kun kecapu talepra kunung nesalada, tek sisi tali kange deipra teleppu pio men kunkamenge. Ikin dipapu kunkamenge. Ne Allahdi pepsene,” pepu.