Isa 49 | XteSC | STEP | Allahdi nimi lyemna tep, er melimna pel donkamu ngebo wepra deipupa, angebodi pepu. “Uo, sun karen mutu dan-dana kurum nesala cap, laut mokon neitamai sengdongomu mutu buma kurum nesala cap yumadi, ne upupu moupra gekepneso. Ada, sun kapul men deiamnerei taru di konum Allah Yahwehdi, wepra deipneudi upupneue. Tonda nanin mumun tupa douamu taru di, konum wepra deiamneudi, ne si sipepra upupneue.

Isaiah 49

Allah Yahwehdi, Israel nesala cap, yuk karen mutu nesala cap, lyemna tep dokotepkamu ngebo tep, pepu upu

1 Allahdi nimi lyemna tep, er melimna pel donkamu ngebo wepra deipupa, angebodi pepu. “Uo, sun karen mutu dan-dana kurum nesala cap, laut mokon neitamai sengdongomu mutu buma kurum nesala cap yumadi, ne upupu moupra gekepneso. Ada, sun kapul men deiamnerei taru di konum Allah Yahwehdi, wepra deipneudi upupneue. Tonda nanin mumun tupa douamu taru di, konum wepra deiamneudi, ne si sipepra upupneue. 2 Allahdi, ne tep, ‘Erdi mambul upu penkamre’ tenen, upu telep kupra deipneue. Ukupmantoda, ya ketepmangepa, si jeretopu, upu pena ila kael kemna deiyo keca karepnudi, telep kupra deipneue. Ukupneudi, Allah er ila puto ngebo, er pe buru di kalekra melipneue.

Adeiki di Allah er upu peipneuada, mar lupra takke keteneipmange ngedi, lukserepa nong neitamai wekseredi, lep-lep peramsera utopu kupra deipneue. Ukupneudi, ‘Amenda doryankamre taru dopropnedi doupkamne,’ teneramengtopu, mar kin alen di kipra deriramengtopu, ‘Amenda taru pel dopkamnere’ tenen, er mar kin keca neitamai utopu kupra, inipra deipneue.” 3 Allahdi, ne Israel ^{▼▼Israel – Nabi Yesayadi, apasal neitamaida, ‘Israel,’ pepra seku ngeda, yambul domona utopu pepu dinin, aupu nongeda, ada nimi lyemna deiyo ngebo, Mesias tep pepu. Ada sun Israel yala nesala yuma tep asi men si pepu.} tep, upepneu. “Kanda ne amutara kumemdi, ne pelpu donkamnereme. Ne ila telep kunya cap, ne mambul weik kunya cap, kan deiki deipkene pangeda, kandi mambul pel domemnya deiki di, nesala ban-ban neitamai, weika di, ‘Uo Allahda ila telepe,’ tenepmengedi, ne sipu Allah erepra gudinkamnenge,” Allahdi peipneu. 4 Upepneu, dinin nedi tamupra, er tep upepsi. “Ne kangeda, tali pelpu donmanepane, ne puto gum kupneredi, puto boun kupkamnere. Pelda weik donkamne dinin, ‘Nongda men kupkamner do?’ tenenune. Angeda ne kange dipu uteneamsi dinin, ne kaele, Allah Yahwehdi er teneretopu tek sisi kupkamnere. Tonda, ne pel doneya utopu, Allahdi menenga karenkamnere.”

5 Allah Yahwehdi, ne kapul men deamnerei taru di, ‘Ne pel donkamre’ tenen, wepra deiamneue. Ada Allah kange deiamneudi, ‘Ne pel melimkamneu ngebodi, ne nyapu Israel nesala yuma bupra deiprepa, sun yuma tamupra ne koripu yakankameng’ tenen, weiamneue. Allah Yahwehdi, ‘Ne pel melimkamner ngebo, nimidi er si eremkameng’ tenen, ila si sipepra wepra deiamneue. Ne mambul pel donunada, Allah er puto deiki dipapu melimnerepa apel donune. Atep, erda ne melipra puto kemdina deiyo ngebo kunerure.

6 Allahdi, er amutara pel melipra dorur ngebo, ne tep upeipneu. “Ne mi kanda ila mambul pel dopkamnerem dinin, ‘Ange yambul kuprur’ tenen, ila mambulnge ton pepkukene. Ada, Israel nesala, sun apu bo Yakubdi deiamupa dadeipdanen yakarami nesalada, yuk karen mutu yu nengdi, popbisipidi, ateng koupra sun mutu tamupra dubenami. Ukuramipane, kandi pel donmamemyane, anesala kange di ton cap, dekankamnerume. Yu nengdi Israel yala nesala weika di, dubenamipa, gum kupbaramipane, ne Allahdi kalekra melimamsipa, tupa gam kunge nesalada, kan pel domemnya deiki di, anesala doupra weika di, ne kori ka tamupra duyakankamnerume.

Ne Allahdi, kan tep, dirin kemna deiyo ngebo kupra deipkenepa, kandi Yahudi yala gum nesalada kunungnai utopu kunung dinin, sun tep, sun dipruai dirin kemdinkamrume. Ukupkamruma deiki di, ne dirinda Yahudi yala gum nesala sun deiki karepnepa, betapra tenepmengedi, ne tep kael kepkamnenge. Ne dirine sun tep karepnepa, adirin epmengedi, sun kange deipkamenga deiki di, sundi nesala ban-ban yuma cap, mutu sirik im sirik dakunge nesala cap, peterepmengepa, gekepra kael kepmengedi, sun mali kunge keca tapmenge pangeda, nedi nimi weike lyepropkamne.” Allahdi pepu.

7 Allah Yahwehdi pepu. “Neda Israel nesala, sun Lyemna Deiyo Ngebo kunune. Sun mali kunge keca tep, tali lupra popnedi, gawal daktene dinin, sun yo pununa tep, nedi sun tep kunupra lyepropkamne. Neda ila Dumsisi Kuna Deiyo Ngebo kunedi Israel yala nesala tep pio kalekra melimnune. Pio Lek ngebo kunepa, Israel nesaladi ne si eremnenunge. Ne Allahdi ne amutara pel donkamneu ngebo, ne melimna ngebo tep pepkene. Israel yala nesala yumadi kan tep, ‘Angebo nun songe’ tenen, kan tep mali upu weik peramkei. Tonda kandi ila nimi deiyo neng, sun amutara pel doramum ngebo tep pepkene.

Sun ila-ila nimi deiyo nengda, nedi kan tep donkamken pel epra kael kepmengedi, kan gispal dona tep, tekrapmengedi, kan si eremkamkenge. Tonda ila nimi deiyo nengdi, deriramenge nyape epkengedi, kan gispal dona tep, yana nong genepdongonkamenge. Ukunkamenga deiyoda pepkune. Ada, neda Allah Yahwehdi ‘Ukunkamne,’ pene upu yumada, tek sisi dungdongona ngebo kununa tep, ereipkenepa kan gispal dona tep, kan si eremkamkenge. Neda ila Dumsisi Kuna Deiyo Ngebo kunedi, Israel yala nesala tep pio kalekra melimnune. Ne dipapu kan tep wepra deiamkesa tep, yuk-yuk mutu deiyo-deiyo neng yumadi, kan si eremkamkenge.” Allahdi pepu.

Allah Yahwehdi, Israel nesala kange di telep kupra deipkamnga tep, pepu upu

8 Ne Allah Yahwehdi ne nyapu Israel nesala tep upepsene. “Nedi teneamsi taru konum yare pangeda, sundi mororamnerum keca tep gekepsenedi, makunkamsene. Tonda nedi teneamsi taru konum kupyopda, sun melipra lyepropkamsene. Ukupsenedi, sunda ne amutara kumumpa, nedi tupa kalekra melimkamsene. Ukupkamsena deiki di, doryankamre taru kunkameng Israel nesala peda, ange epra kael kepmengedi, ‘Nun peda tek sisi lyepropkamsere’ tenen, kael kemkamenge. Atep ne pel donkamsena deiki di, yuk mutu nengdi sun mutu yuma dalupra dopropsei ngeda, tamupra karepkamsene. Ukupsene dingeda, nedi sun pumun taru ati dopra kuramrumai dinin, ati walangpu kupseuaida, tamupra karepsenepa, ati doprumudi amutuda pio talepra kunkamrume. Angeda, ne teneramsi taru konum kupyopda kupkamre.”

9 Nimi wenemna ati bungnung nengda, loptapsenedi, ‘Bura beso,’ pepnepa benkamenge. Tonda kunungnai kunung nesalada, dirin damai dopra deipkamne. Ukupnedi sun anesalada, dopra katuai mutu akeca-keca yuma telep kupra bongona gum mutu deipnepa, kunkameng dinin, sun kunkamengai yumada, jene ton pio men putapkamre. Akapnapu kupkamre. Sun peinung keca peda, bisi pirimanai paramre mutmuta cap, mutu buma paramre mutmuta cap, tali lupra jenkamenge. 10 Sun anesalada, jen cap, me cap, ton men putapkamre. Tonda, me gumai, pio katuai mutu kunkameng dinin, sun nong deiki keteng men jenkamre. Ada, nedi sun tep bicau tenepra lyepramsi ngebo, ne Allahdi sun tep pio tupa kalekra melimkamne. Katuai mutu neitamai kunkameng dinin, nedi sun anesala douprapnedi me puai derirbankamne.

11 Nedi sun embankameng bisi tep nengeda, ila lyom mutu dinin, ban kepra deipnedi, bisi telep kupra yadinkamne. Tonda, ila gwalin bisi embaramenge ngeda, ban telep kupra yaipkamne. Tonda sun embankameng bisi tep nengeda, bongongai bisi yuma, tu erepra deipnedi yadinkamne. Nedi telep kupra deipnepa, sun embankameng bisi yumada, teleppu kupkamre. 12 Ukupne pangeda, ne nyapuda karen mutu di, Yerusalem mutupu tamupra yakankamenge. Ada utara di yakankamenge. Tonda, keteng dangban tara di yakankamenge. Tonda itara di, mutu si Sinim mutu ^{▼▼Sinim mutu – Amutuda, Mesir mutu dinin, itara kurure.} di Yerusalem mutu tamupra yakankamenge.

13 Ukupkamenga tep nengeda, ime cap, tuai cap, mutu-mutu yuma cap, sundi, kange deiprumdi, pio kange lon mut pepkamrume. Ukunkamruma deiyoda ake. Ada, Allahdi ‘Ne nyapu sisa’ tenen, wepra deiamsi nesalada, yu nesaladi popbisipra tomopidi, ikin pelpu dimamipa, apelpu doramidi kange mun kange douramya tep, ukutaruda ne Allahdi ne mawa nesala tep pingping keca karepkamne. Atep pingping kange doupra mut penkamrume. 14 Dinino, sun Yerusalem ^{▼▼Yerusalem – Ibrani upu deiki di Sion mutu perami dinin, amutu sida butene penunge. Ton ngeda, Yerusalem, ton ngeda Sion penunge.} mutu kunung nesaladi upenunge, ‘Uo, ne nai bo Allah, akeca-keca yuma talepra, ila puto weik deiyo ngebodi, nun tep pio men teneseredi, konum tapra luprosue,’ penunge.

15 Upepinge tep, ne Allahdi sun anesala tep tamupra pepsene. Ukupmanto ngeda, tenpu nerdi er mi tenpu deiamyopda, lumdongrur do? Tupa tenerur do? Tonda aner er mundu pumbon di deiamre mi tep bicau tenerur do, gum do? Aner er mi tep men lumdongorur utopu, Ne Allahdi sun tep men lumdongonkamsene. Nerapuda, sun nyapu lumdongoptenga peda, ne Allahdi sun tep pio men lumdongonkamsene. 16 Yerusalem nesalao, ne Allahdi sun tep men luprosisi. Pio tupa tenesenune. Atep ukupmanto ngeda, sun sida, ne buru tang deiki konum sekeipsi. Sun kurum mutu dana-dana tara lyom gel beilya wiprumdi, aneitamai kurum mutu cap, sun amutu kurum nesala capda, pio tupa tenesenune.

17 Ukutaruda, sun popbisipsei nengda, adipapu, sun damai di konum tapra bendopkamenge. Tonda, sundi deiamrum nyapuda, karen mutu di tapra, menmena sun damai yakankamenge. 18 Atep nengeda, tekraprumdi, sun kurumya dan-dana tara ton diprepkurume. Sun nyapu yumada, tamupra sun damaipu konum yakanmange. Angeda, tek sisi pepsene. Ne Allah gam kuna deiyo ngebodi, tek sisi pepsene. Sun nyapu sun damaipu yange pangeda, pio ila kange deipkamrume. Ukupmantoda, nimi dopkamare ner kwerya kupra bukmarepa, epmengedi kange deriramengtopu, sun nyapu tamupra yangyopda, sundi kange deipra kunkamrume.

19 Pumun taru yu nengdi sun tep popbisipseidi, sun taleramrum keca cap, sun kuramum mutu cap yuma, sikke utopu buktapseidi, nimi yuma dopra benamseiye. Dinino ukutaruda, Israel nesala weik yangedi, amutu yan kungepa, nimi pio weik kupmengedi dinikronkamenge. Israel yala nesalada, pio weik kupbankamenga tep, amutu tuda, metek cadi, dinikronkamenge. Sun yu nengdi, ‘Amutu nesala yuma popra gawal dakmepedi, sun mutu talepra kunkup,’ tenepidi, sun popbisiamsei nengda, adipapu tapra bendopmengedi, karenaipu bena kunkamenge. 20 Babel mutu nengdi dubenamsei taruda, kange mun kange doupra kuramrum taru di deiamrum nyapudi upenkamsenge. ‘Amutu nun kunkamepaida, go yambulpu cadi, ton cap amutu karepsetumpa, go weik kupsetuopda, akunkamepe,’ pepra moropsengepa, sundi gekenkamrume.

21 Upepsenge pangeda, sun kange neitamai di, tenepkamrume. ‘Anyapuda, ware nengdi, nun tep deipra kareramsei nyapedi penmaseng do?’ tenenkamrume. ‘Nun nai bo Allah tapseupa, nun kange mun kange doupra kuramepu taru neitamaida, nun nyapu yumada, men gum kuamseu do? Tonda nyapu ton cap men deipmanto tep kuamseu do, gum do? Gume, nun nyapu gum kupka tep, men deipmanto kuramseue. Tonda nun karen mutu neitamai kuramepu taruda, nun yuk bungamupka cadi, anyapuda dan tara nengdi deiami nyapu yanmangdi penmaseng do?’ tenenkamrume. Amenda taruda, sun nyapu weik kupbankamenga tep, aupu penkamrume. 22 Ne Allah Yahwehdi pepsene. Neda akeca-keca talepra deiki tara kunedi, ila eremna deiyo ngebo kunune. Nedi, ‘Ukupkamne,’ tenenetopu kunune. Ne nyapu Israel yala nesala tep upepsene. Nedi nimi yuk mutu nesala, Israel yala gum nesalada, sun kunungai peten keipnepa, sun Israel nyapuda, yuk nengdi dopra benamipa, sun kan-kan daneitamai benkunung nyapu yumada, tamupra amutupu iripra duyakankamenge. Tonda sun ner nyapuda, opra duyakankamenge.

23 Yuk mutu nesaladi, sun nyapu cap, sun ner nyapu cap dopra deriryakankameng taruda, yuk karen mutu, sun ila nimi deiyo kepra taleami Raja nengdi, Israel yala nesala sun nyapu tep, melipra kalengkamenge. Tonda, aRaja neng sun nerapu, ila deiyo nerapu kepra kurami dinin, ataruda anerapudi, Israel yala nesala sun nyapu tep, melipra kalengkamenge. Sun yuk mutu Raja neng cap, sun nerapu cap, sun Israel yala nesala sun amutu tarapu kunkamenge. Ukupsengedi, sun Israel nesala gispal dona tep, sun damai yangedi genepdongopra gispal donkamsenge.

Sun yuk mutu ila deiyo nesala, mambul neng kurami dinin, ataruda, tali nesalapu kunkamenge. Sun Israel nesala damai yangedi, sun gispal dona tep, giso genepdongopra tu deiki mapmengepa, sun yan deiki kupmare tu buta sun lyemu deiki palepkamre. Sun ila nimi deiyo nengdi sun Israel nesala tep, sun amutara kungedi, gispal donkamsenge. Ange ukusenga deiki di, sun Israel nesalada kael kepkamnerume. Ada, ne si Allah Yahweh ne tep kael kepnemumdi, ‘Uo, tek sisi Allah er dipapu apel dopmasere,’ tenenkamnerume. Tonda, ‘Allah er dipu melimkamsere,’ tenen, ne tepapu moropmengedi, ne si eremnenung nesalada, mali kange men dounkamenge. Nedi anesala tep, tek sisi melimkamna cadi, ali men dangkamenge.

24 Sunda tenipetepso. Upepra asimdankamrume. ‘Mar podana tep ila deiyo puto neng, kunmatengai di, sundi deiami bunga, yuk tali nengdi bena dalupra doproptenge do? Ange utopu, yu nengdi, yuk mutu neng bisipmengedi, aneng ateng koupra deiamtenge nengda, yuk mutu nengdi, tali lupra ateng loptaptengedi, doupra betenge do?’ pepra asimdankamrume. Gume, sun kaele ange men kupmanto. 25 Dinino, ne Allah Yahwehdi pepsene. Asipeteprum ngeda, teka nedi ukupkamne. Mar podana tep deiyo nengdi, sun Israel nesala popbisipseidi, ateng koupra dubenamsei dinin, aputo neng akunmangepapu, nedi sun Israel nesala tep dalupropkamne. Tonda yu nengdi kalekmangepapu, nedi sun kori bena dalupropkamne. Ada tek sisi ne Allah dipapu, sun podan nengdi, sun Israel yala nesala popbisipsei neng tep, nedi kwang dangna tep, sun damai bena popbisipnedi, Israel nesala sun nyapu yuma lyepra tamupra duyankamne.

26 Nedi sun Israel nesala popra yanidongoramsei neng tep, popnepa, sun pe nengdi sun pe nengpu popra jedankamenge. Ukupmantoda, popra jedanmengedi, sun pe yapipu popra jedangepa, kange yawaramkamre. Nedi ukupnyopda, nesala ban-ban yumadi, kael kepkamenge. Ada, ‘Allah Yahwehdi sun Israel nesala Lyemna Deiyo Ngeboda er akurure’ tenen, kael kepkamnenge. Tonda, Israel nesala sun mali kunge keca tep, Allahdi wenepra poptaptu dinin, ‘Sun yo pununa tep, anesala konum kunupra lyepseue’ tenen, kael kepkamnenge. Neda, akeca-keca talepra deiki tara Ila Puto Ngebo kunedi, Israel nesala tep, pio kalekra melimnun ngebo, Pio Lek Ngebo kunune. Ukunepa, Israel yala nesaladi ne si eremnenunge. Ne Allah kunune. Israel nesala sun mali kunge keca yuma Gum Kupra Derina Deiyo Ngeboda, ne akunune. Nesala ban-ban yuma ange kael kepkamnenga tep pepsene. Allahdi pepu.