Isaiah 5

Nimidi mali kunange tep dinin, domon upu deiki di, anggur wa tep, pepidi, mut semna deiki, pepu upu

1Gekenmanurumpa, mut penmanada, anggur tapu wa pena deiyo ngebo tep bicau kunerepa, penmane. Ne kayapu, anggur wa pena deiyo ngebodi wa peamnga tep, mut penkune. Mut pena deiki di pepne.
Bicau tenenun ngebodi, mutu bukamnga pirimanai tu pio telepai anggur wa pepu.
2Anggur wa pen taruda, tu palipsingipudi, gel wepra dopropu. Telep tu neitamaida, anggur tapu pio telepnge kouamu. Kouamudi, ‘Ne anggur tapu du upula dopropnenung’ tenen, lyom gel ati ton domu.
Ukupudi, ‘Anggur tapu du taiknepa, mokon deiprepa, me gwenkamne’ tenen, gel pala deiki kumupra deipu.
Ange yuma konum kupu dingeda, ‘Dan taru di anggur du telepnge moupkamner do?’ tenen, diramupane, anggur mokon telepnge men moupudi, anggur mokon yungepu moupu.
3Ukuamnga tep, uo ne kayapu sun Yerusalem mutu kurum nesala cap, Yehuda tara kurum nesala cap tep pepsene.
Mali kupu ngeda, anggur wa pena deiyo ngebodi mali kupu do? Anggur tapudi mali kupu do? Sun beta tenipetepkurume.
4Nedi, ‘Anggur tapu du mokon telepnge moupkamner’ tenen, apel yuma dorpeteramsipane, ware keca deiyo tep, du mokon sun ngepu mouramu do?
5Anggur du malingepu mouramneua tep, ukupkamne ngeda pepkusene. Ada, anggur wa peamsai dana-dana tara yuma, gel beilya wipra ongopdongopsi ngeda, dakra uruptapkamne.
Ukupnyopda, anggur wa mali kupkamre. Gel beilya wipra ongopdongopsi ngeda, dakra uruptapnyopda, yuk mali neng wekmengedi, amutu yuma yana yanipkamenge. Ukupra yanipmengedi, sikke buktapkamenge.
6‘Ne anggur tapu du weik moupkamner’ tenen, anggur tapu teru sektapnepa, gapu youpra, du weik mouptu dinin, angeda, men sektapkamne. ‘Du weik moupkamner’ tenen, penga men deipkamne.
Anggur wada, ‘Dakwapye’ tenen, tapkamne. Anggur wa peramsi mutu yumada, tali co mutmuta cap, takke keca cap, bolokreredi, papra kepdongopyopda, anggur tapu bo ton, men dinkamenge.
Tali kecapu paptapkamre. Tonda nedi dua cap mo cap tep, “Mepropkurume,” pepnepa, moda aca ton men saka douryankamre.
7Adomon upu pepmasena deiyoda ake. Anggur wa deiyo ngeboda, Allah akeca-keca yuma talepra kurya deiyo ngebo, Allah Yahweh kurure. Allah Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure.
Er anggur wada, Israel yala nesala kununge. Tonda, telep wa tu tep kange derirur ngeda, ada sun Yehuda yala nesala kununge. Israel nesala cap, Yehuda yala nesala cap, ‘Telep kupra kunung do?’ tenen, dirpetereramu dinin, anesala yumada, podanapu kurami.
‘Dumsisipu kunung do?’ tenen, dirpetereramu dinin, ton nengdi, ton tara neng tep, ikin keca weik sun nong deiki deridaramidi, malye pepra, ngolongamipa, gekeramu.
Ange tep nengeda, Allahdi anesala yuma tep, mali kange douramu.

Nimidi mali kunange tep dinin, domon upu deiki di, anggur wa tep, pepu upu

8Sun mali kurum nesalada, Allahdi wenepkamsera tep, sunda bicaue. Ada, sundi sun pe ati konum doprum dinin, yuk kan-kan nesaladi domi ngeda, sundi kunumna cap, dalupra dorona capdi, dopropmumdi, sun pe kecapu weika di tapakra derirume. Ange utopu, sun wa tu konum akapu dinin, yuk nengdi peramenge wa tu ton, dalupra doproprum nengda, malipu kurume. Sun dipapu sun yuk nesala talerami keca cap, kurami mutu cap yumada, konum doproprumpa, anesala yukai bendopmengopda, sun dipapu amutu talepra, sun yukpu akunkamrume. Ukurum ngeda mali pua. Allahdi pepu.

9Neda nabi Yesaya gekenmasipa, akeca-keca deiki tara erepra, ila puto weik kurur ngebo Allah Yahwehdi, “Tek sisi ukupkamne,” pepupa gekepsi. Apepu upuda ake.

“Nedi Israel nesala wenepkamne taruda, ila telep ati konum dominge yumada, akati neitamai nesala ton men kunkamenge. Sundi, urasin pio telep ati, er si istana dominge yuma peda, akati pumbon nimi ton men kunkamenge. Nedi anesala tep wenepsenedi, pio gum kupra deipnepa, akati-akati yuma walangyopu kupkamre. 10Nimi cap, sun sapi bisam capdi, ila pala wa, go weik 10 hektar kwamre ngeda, wa pepmengedi, anggur yal koupkameng dinin, amenda taru anggur du moun li yaryopda, anggur du dakra, me purupra deipkameng ngeda, pio yambulanunpu, 22 literpu kupkamre. Ange utopu ton, gandum yal tep, er si bibit, ketenepra deipkameng yalda, 220 liter doupra koupkameng dinin, gandum wa pepra kouamenganen, nepredi, er nong kupkamre ngeda, weik gum dinin, yambulanunpu 10 literpu kipkamenge. Deiyoda, nedi jen putana taru karepkamsena tep, sundi yal kourameng keca yumada, amenda taru pio gum kupra deipkamne.

11Sunda bicaue, ila di wenepra popkamsena tepa! Ada, sun Israel yala nesala kankan di, ton nengda, ipna sisa di, bukmengedi, ‘E, adipapu kange yawaramne me jerbenkupe,’ tenepmengedi kununge. Ton neng dingeda, ipna di dipdongopra, aneitam taru cap, lukunda taru capda, sundi yu me pu pio jenunga deiki di ame er yu di, sun kange pio yawaramserure. 12Sun anengdi, ila kailya kalepra jepmenge taruda, mut pena tep, lelim pedan keca, er si kecapi cap, gambus cap, tonda rebana cap, suling cap pepmengedi, kange yawaramne me, anggur mepu jenunge. Ukununga deiki sundi, ‘Uo, nun nai Allah Yahweh, erdi amambul pel doramnge’ tenen, sundi er tep moupra men tenepmengedi, er pe buru di mambul pel doramunge tep, gispal men donunge.

13Ne nyapu sisa, sun Israel yala nesalada, mali weik kununga tep nengeda, nedi go karepnepa, yuk karen mutu yu nengdi, Israel nesala tep poryangopda, sun pe mutu dubena, ikin pel dipkamenge. Yuk mutu neitamai dubenkameng taruda, sun Israel nesala, ne mawa nesalada, akeca-keca yuma kael kemna gum neng, walwal kunung nesalapu doupra, yuk karen mutu derirbenkamsenge. Sun deiyo-deiyo neng yumada, jen putana deiki di depkameng ja! Tonda, sun amutara tali dakunge nesalada, me jena gum dipapu, pio putanapu kunkamra deiki di depkamenge.

14Atep nengeda, nedi dena kecada, jen cap, me cap putana deiki di, tonda nimi podana deiki di, nimi weika di konum depmengopda, dena nesala sun sambala baramyaipu, bena kunkamenge. Tu paliramengai cap, sun sambala benkamrai capda, men dekpepmanto. Nimi depmengopda gung men nukmanto, denge pio weik bankamenge. Ada, Yerusalem mutu talepra kunkamrum deiyo-deiyo neng cap, sun nyapu cap, sundi taleprumpa, sun amu tara kunge nesala cap, nimi podange nesala cap, kange yawaramne me weik jenung nesala cap, kailya kalepra kange deipmengedi tali lupra jengedi, mali-mali kunge nesala cap, nedi sun yuma tep, poptapnyopda, deprumupa, tu palipkamsenge. Konum deami nesala beidi kunge tarapu, sun peda bena kunkamrume.

15Ne Allahdi aikin keca, sun deiki konum deipnyopda, nesala yumada amutarapu deipkamne. Ware mutu do yuma, ban-ban yuma kunge nesalada, mali kweipnyopda, ali dakrapu kunkamenge. Tonda, ware neng do yuma, sun dipru eremna deiki di, salnong-nong kamnung nesalada, dipru amutara kepra deipkamne. Sun yumada ‘Uo’ tenen, kange mun kange doupra kunkamenge.

16Mali kun nesala yuma ukunkameng dinino, neda gume. Neda Allah Yahweh, akeca-keca yuma deiki tara erepra, ila puto weik kunun ngebo, neda pio telep pel dopnya deiki di, ne si jenek kupra deipkamne. Neda Allahdi, sun mali kunung nesala yuma tep, dumsisi kupra nimi upu bokra deipnedi, sun mali kuramengtopu konum wenepnyopda, yuk mutu nesala yuma epmengedi, ‘Uo, Allah Yahwehda, er sipu eremkamepe’ tenen, kunkamenge. Angetopu, ne Allahda, mali kunange tenpu peda kuna gum dipapu, pio dumsisi pelpu donkamna deiki di, yuk mutu nesala yuma epmengedi, ‘Uo, Allah Yahwehda, erda tek sisi dumsisi kunangepu kuredi, pio Lek ngebo kurure. Erda mali kunange tenpu peda, pio men kurure’ tenen, betapra kael kemkamnunge. Ange yumada, jenek kupra deipkamne.

17Ne Allahdi ange yuma konum pel dopnyopda, domba bisam nyapu cap, domba bisam nong weik nemrenge cap, sun mutmuta jenai epetepmengedi, pio telepaipu jenkamenge. Ada tali bura mutu taliyai cap, tonda menop taru sun isomka nesala kuramyai dinin, sun ati walang damai neitamai peda, mutmuta pankamraida, tali kange deipra jenkamenge.

18Ton nesalada, tali upupu tupa-tupa tali pertamnunge. Anesala kunungada, ukupmanto pepkusene. Ada, tali upu weik penung nengda, nimidi tu deiki ban keca, er si gerobak, ikin keca gerobak pumbon dongopmengedi, tapke di gerekra, gipropmengedi, dubaramengtopu kununge. Sundi mok upu pengedi, mali kun kecapu tupa-tupa kunge nesalada, bicaue! Sun nong deikida pio ikin keca, men tenepmanto kange mun keca kupkamre!

19Deiyoda ake. Sun anesalada, Allah tep mali upu pepmengedi, nyek-nyek pepra nalemnunge. Sundi upenunge. “Dyo, Allah erdi, ‘Ukupkamne,’ tenere ngepu, menmena di pel doptupa, nun asuru di eptepe! Nunda akunmapyanen, Allahdi, ‘Angeda ukupkamne ja,’ tenemu kecada, adipapu aca yatudi apel doptuopda, nun ton ange epra kael kepkupe. Tonda, Israel nesaladi er si eremnung ngebo, Pio Telep Lek Kurur Ngebo, erdi nun damai yatupa, nun asuru di epmepedi, moupra kael keptepe,” pepnunge. Upenung dinin, teka tenena gum di, tali nyek-nyek penunge.

20Sunda ila di wenepkamsena cadi, sunda bicaue. Sundi tek sisi pio mali kunange tep, ‘Gume, ange kunada telepe pua,’ perume. Agum dingeda, sundi, tek sisi telep kunange tep, ‘Gume, angeda pio malipu kurure,’ pepra peteremrume. Tonda, pio mali kunung kecapu, kunungna akapmarepapu, sundi, ‘Gume angeda, dirine utopu kecapu kurure,’ pepra peteremrume. Tonda, dirine akapmarepapu, sundi, ‘Gume, angeda kunungna utopu keca kurure,’ pepra mok upupu perume. Angetopu, sundi, pio tau pen keca akapmarya peda, sundi, ‘Gume, angeda yu kecapu kurure,’ perume. Tonda, yu keca akapmmarepapu, sundi, ‘Gume, angeda tau peramre kecapu kurure,’ pepra mok upupu perume. Ange utopu perum nesala yumada, nedi wenepra popkasene.

21Sunda, ila di wenepkamsena cadi, sunda bicaue. Ada, ware neng do yuma, sun akurum nesalada, ‘Nunda weik kael keamupu neng kunupe,’ tenepdamumdi kurume. Sundi, ‘Gume, nunda akeca-keca yuma kael kepmupka cadi, nunda tek sisi kael neng kunupe,’ tenepdaruma cadi, ange utopu penge nesala yumada, nedi wenepra popsenepa, ikin weik kunkamrume.

22Sunda ila di wenepkamsena cadi, sunda bicaue. Ada ware neng do yuma, sundi anggur yu me, kange yawaramrenge, weika di jenge nengda, yuk neng epmengedi, ‘Uo, sunda tek sisi telep kununge,’ tenepmengedi, sun tep gispal donunge. Ange utopu, sunda yu me, kange yawaramrenge cap, yuk yala yu me cap tapakra keteneiprumdi jepmumnyopda, yuk nengdi epmengedi, ‘Uo sunda mambule. Yuk nengdi apel yambula dipapu donung dinin, sun tep nengeda, pio ila kael deiki di apel dorume,’ pepmengedi, sun si eremsenunge. Ange utopu kurum nesala tep nengeda, adipapu ikin keca deipkamsene. 23Tonda, sun anesalapu dinin, sundi bul kemna tep, karen co bo dopropkunga tep, tek sisi mali kupmare ngebo tep, ‘Gume dakwapye, erda mali men kupmare,’ pepra telep kupra deiprumudi, men wenemrume. Ange utopu, tek sisi mali pio men kupmare ngebo tep, bul co bo dopropmumnya deiki di, ‘Erda mali kupmare,’ pepra, er nong deiki ikin keca deiprumudi wenemrume.

24Sunda, Allahdi, ‘Angeda ukunkamrum dinin, angeda pio men kunkamrume,’ pepra, deipu upu yuma konum taprume. Tonda, sun Israel yala nesala, sundi er si eremnung Allahda, Pio Lengna Telep Ngebo, erdi peipseu upu tep mali kupra derimumdi, yanitamrume. Ukuruma tep nengeda, sunda sepmenga keca cap, kelkel penmare mutmuta cap, uku bu di jedoramrepa, gum kupra gawal dangamretopu, sun amali kurum nesala peda, Allahdi gum kweipkamsere. Ange utopu, nimi kourameng keca, yaten kwamrenge peda, yaten lyuproprepa gelal sedoramretopu, sun peda gum kupbankamrume. Tonda, bura tara kait keca, kait popmaredi, lapmarenge nunumdoramretopu, sun peda, Allahdi wenepra gawal dakamsere.

25Allahdi er nyapu sisa, sun Israel nesala tep, yu kupya tep, derepkamsere. Ada, ila uku bu jeramretopu, yu weik kuprepa, sun tep wenepkamre ja. Erdi anesala wenepra popkamra tep, ‘Anesala popkun’ tenen, er buru erepra konum ketenepu. Ukupre taruda, mutu-mutu yuma lokamre. Tonda, sun anesala poprepa depkameng neng, sun gemnada, tali suakolonga kuna bisi-bisiai yuma kuramretopu akapkamre. Ukupya peda, Allahdi sun anesala sun wenemna tep, ‘Akonuma,’ men tenepkamre. Erdi sun mali kunange tep, ila yu kuprepa, tupa wenemnapu kunkamre ja.

26Yu tupa kupre pangeda, Allah erdi pio karen mutu dakunung nesala tep, ‘Adipapu aca yankunung’ tenen, upu di upupkamre. Tonda, erdi, ‘Aca menmena yangedi, anesala popkung’ tenen, ukupmantoda, nimidi petenkemna tep, ila spanduk sekra deipmengedi, erepra derinungtopu, upuprepa, sun karen mutu dakunung nesalada, adipapu yana popkamenge. Sun diso! Ayu nengda, konum adipapu menmena yakanmange! 27Sun karen mutu di, Israel nesala damai yankameng nesalada, ‘Mar podarbenkamep’ tenen, ketenepra yankameng taruda, sunda beipye ton men kupkamre, men mapkamenge. Sun puto boun men kuprepa, bisi neitamai di men sakamenge. Tonda sunda u ton men dungkamenge. ‘Beipye peikup’ tenen, sun deiyotengda, men loptapmengedi, sun yan koudongona keca, er si sandalda, tapu men loptapkamenge. Sepra poryakanapu kupkamenge.

28Anesala sun marda, pio takke lupra doupkamenge. ‘Israel nesala adipapu popkup’ tenen, sun jenda, mar dona tepapu ketenepkamenge. Tali buru dipapu men talenkamenge. Sun yu kuprepa, menmena yankamenga cadi, anesala sun kuda bisam yan gala putoda, pio gat gel uku sengnai tep, betapra derirameng gel utopu kupkamra cadi, akuda bisamdi, tu deiki embankamre keca, er si kereta perang doupra barepa, kereta yan rodada, menmena sepra benkamre. Ukuprepa, ukupmantoda, ila puto mungna sika gum, puto di bupatekra embaramretopu kupra, sunda sepra yankamenge. 29Sun karen mutu di yankameng jen talena nengda, sun upu ila di pepkamengada, yu pus utopu keca, er si singa pus, er jena popredi, ila upu peramretopu, upu weik pepkamenge. Sun anesaladi nimi tomopkameng ngeda, singa pusdi, er popra jepkure keca tomopredi ila upu peramretopu kupra, anengdi Israel nesala tomopmengedi, sundi atopmenge nimi adipapu doupra bendopkamenge. Ukupkameng taruda, yuk mutu ngebo tenpunge peda, sun Israel yala nesala tep, men yana lyeptue. Ayu nengdi tenpu ngebo ton men tapra benkamenge. Sun yuma adipapu doupra benkamenge.

30Tonda, ukupmantoda, sun yu jen talen nengdi Israel nesala tep poryankameng taruda, singa pusdi ila upu peramretopu, sundi ila upu deiki di penkamenge. Yehuda mutu kunge nesaladi gekenmangepa, mar podanmangedi, ngolokameng ngeda, ukupmantoda ila laut mokon me kait welepredi, ila lelim peramre utopu kupra, ngolokamenge. Tonda, ware nesala do yuma, sundi amutu neitamai yuma dipetepmengepa, kepdongopnapu kupredi kunukamre. Komuni taru dinin, kunukamre. Tonda, amutu kunkameng nesala yumada kange mun kange doupmengedi, ikin weik kunmangepa epkamenge. Keteng weleprepa dirine weik kupkamre dinin, atumi neitamaida, ila mutu dupai, kunukmare dua kwerepna weleapna kemamretopu kupra, amutu yumada kunukamre. (Ada kereta cap, kuda cap deiki bukra banmangepa, tu bute welepya deiki di, dua kemamretopu kupra, bute di kepdongoprepa amutu yuma kunukamre. Ukupre pangeda, Yehuda mutu nesala yumada, kange mun kupkamre.