Isa 50 | XteSC | STEP | Ne Allah Yahwehdi sun Israel nesala, ne nyapu tep, pepsene. Uo, Israel nesalao, sunda ne nyapu sisa kurum dinin, sundi tenemumnyada, ‘Allahdi nun konum tapseu,’ tenerume. Atep ukupmanto upu deiki pepkune. Ada er akengebodi, er douamre ner tapkurya tep, lap pepra sengdin surat, sekra karepredi tali tamamretopu, sun tep tamamsisi do? Ukupra tamsetene teptoda, ner domenga tapkunga tep lap pepra sengdin surat sekra deriramengtopu ngeda, dan cei do? Akeca men kurure. Yuk domon upu ton pepkune. Ada, er nai bodi, ‘Yuk neng keca karepkamsen ja,’ peptapra jepdongomrepa, akeca deiyo ngebodi, ‘Menmena karepneo,’ pepra mororepa, er co bo gum cadi, akeca yo pununa tep, er mipu tomopra kareramengtopu, sun tep ukuramsi do? Angeda tek sisi men kuramsisi. Dinino, sun pe mali kuramruma deiki, nedi peipsipa, yu nengdi sun tep popbisipseipa, ikin keca dororamrume. Sun pumun taru mali kuramruma deiki, yu nengdi sun Israel nesala ateng koupra dubenamsei. Ada mesum tep gume. Sun mali kuramruma deiki di kunumna kareramsisi.

Isaiah 50

Israel nesaladi sun mali kuraminge tep, pepu upu

1 Ne Allah Yahwehdi sun Israel nesala, ne nyapu tep, pepsene. Uo, Israel nesalao, sunda ne nyapu sisa kurum dinin, sundi tenemumnyada, ‘Allahdi nun konum tapseu,’ tenerume. Atep ukupmanto upu deiki pepkune. Ada er akengebodi, er douamre ner tapkurya tep, lap pepra sengdin surat, sekra karepredi tali tamamretopu, sun tep tamamsisi do? Ukupra tamsetene teptoda, ner domenga tapkunga tep lap pepra sengdin surat sekra deriramengtopu ngeda, dan cei do? Akeca men kurure.

Yuk domon upu ton pepkune. Ada, er nai bodi, ‘Yuk neng keca karepkamsen ja,’ peptapra jepdongomrepa, akeca deiyo ngebodi, ‘Menmena karepneo,’ pepra mororepa, er co bo gum cadi, akeca yo pununa tep, er mipu tomopra kareramengtopu, sun tep ukuramsi do? Angeda tek sisi men kuramsisi. Dinino, sun pe mali kuramruma deiki, nedi peipsipa, yu nengdi sun tep popbisipseipa, ikin keca dororamrume. Sun pumun taru mali kuramruma deiki, yu nengdi sun Israel nesala ateng koupra dubenamsei. Ada mesum tep gume. Sun mali kuramruma deiki di kunumna kareramsisi.

2 Nedi, ne nyapu sun tep, ‘Lyepkamne’ tenen, sun damai yana upuamsi taruda, ware keca deiyo tep, sun kan-kan di tenpu ngebo peda, “Nun akunmape,” men peamnerum do? Tonda ne yanamsi taruda, warya tep tenpu ngebo pe ton men kuramrum do? Sun, adim pemrum ngeda, sundi, ‘Erda puto gum ngebo cadi, nunda men lyeprosetue. Er buru bum tep, men lyepropsetue,’ tenemnerum do? Gume, akeca-keca yuma tep nengeda, neda ikin men kupnetue. Ada tek sisi ne dipapu, ila laut mokon deipua peda, ‘Cepropo,’ pepnepa cepkamre. Tonda ila-ila me embeua yuma peda, ‘Cepropo,’ pepnepa cepredi, tu gelal cepkamre. ‘Cepropo,’ pepnyopda, ame yuma ceproprepa, mekina amokon pumbon kuamunge yala-yala yuma, gelal semre tu deiki depredi, tong pepkamre. 3 Ukupmantoda, nimidi opkale kapkwetepmengepa, dirin keca lelimdongoramretopu, ne Allah dipapu, im deiki peda miripra derinepa kunungrure. Ne putoda ila weik kununa tepa. Allahdi pepu.

Allah Yahwehdi wepra deiamu ngebo, Allah teneramutopu kupkamunge tep, pepu upu

4 Allah weamu ngebodi pepu. “Allah ^{▼▼Allah – Aca ayat 4 cap, 5 cap neitamai cap, tonda ayat 7 capda, Ibrani upu di, ‘Yahweh’ cap, tonda, ‘Adonay’ cap pepra sekya cadi, nundi aupu deiyonge jenek kupra sekmupu.} Yahweh, erdi ‘Ukupkamne,’ teneretopu kurure. Erda, akeca-keca yuma talepra, ila puto weik deiyo ngebodi, ila kael kemna deiyo keca kareramneua deiki di, peteremna deiyo ngebo kunune. Er puto karepneua deiki di er upu peteremnune. Atep nengeda, ne upu pepnya deiki di, ‘Nimi puto boun kurur ngeda, puto kunkameng’ tenen, peipneu. Ipna mapmane taru yumada, Allahdi ne bukeipnerdi, er upu pena tep, ‘Ne kunkamne keca ake. Kandi peterepkamrum keca ake,’ pepra lap pepneredi, ne putan keca pingping kupra deipnerepa peterembanune. Ukupra bungdinerya deiyoda, ‘Peterepne keca gekepkamre’ tenen, er sipu eremkamne. Adeiki ne penkamne upuda erdi tupa peteremnerepa, gekenune. 5 Allah Yahweh, akeca-keca talepra, ila puto weik deiyo ngebodi, ‘Ukupkamne,’ teneretopu kurure. Er dipu ne tep, ‘Ne upu gekenkamner’ tenen, namul telep kudineredi, ila kael kemna deiyo keca karenerure. Erdi penere upu tep, pio tamna gum dipapu, amnyo karekra men banune. Nedi, Allah tep, ‘Ne songe’ tenen, men beimdonune. Allahdi peneretopu angepu kunune.”

6 “Atep nengeda, yuk nengdi ne pona tep yai pangeda, bali deiki tara keteneipsipa popneiye. Tonda yu nengdi, ‘Er bana potong lyekropkup’ tenen, yai pangeda, nedi keteneipsi. Nyek-nyek pepra, ne aso deiki silong tuluipnei taruda, men tamuprosi. 7 Akeca-keca talepra, deiki tara ila puto weik deiyo ngebo, Allah Yahwehdi, ‘Ukupkamne,’ teneretopu kurure. Erda Ila Eremna Ngebodi ne melimnerura tep, sun mali neng tep ali men dangkamne. Erdi teneneretopu kupkamne. Neda Allahdi konum melimnerura cadi, pio pe deipra puto di pel donkamne. Ne kaele, Allah melimnerya deiki di ali men dangkamne. Erdi teneneretopu, apelpu tek sisi donkamne.” 8 “Allahda, ne damai kurura cadi, erdi ne tep, ‘Mali men kurure,’ peptu pangeda, ware ngebodi, ‘Angeda gume,’ pepra taptu do? Ange tep nengeda, nun tonpa kunkamep taru yumada, ware ngebodi, ‘Erda mali kurure,’ pepkamner do? Ware ngebo do, ‘Erda mali kurure,’ pepkamne tenerur ngeboda, sundi pepmumpa er adipapu ne damai yaredi lap pepkamre. Ange peda men kupmanto.

9 Akeca-keca yuma talepra, ila puto weik deiyo ngebo, Allah Yahwehdi, ‘Ukupkamne,’ teneretopu kurure. Erda Ila Eremna Ngebodi ne melimnerura tep, ware ngebodi ne tep, ‘Erda mali kurure,’ pepkamner do? Apepkameng neng yumada, lyom opkal deiamengepa, sinedi jepra gawal daramretopu, gum kupbankamenge. Opkal deiamengepane, keteng tamun weik mapmengepa, pun deriramretopu, ‘Allahdi wepra deiamu ngeboda, mali kurure,’ penge nengda, gum kupbankamenge.”

10 “Sun kan-kan neitamaida, ware nengdi Allah Yahweh tep, ‘Uo er ila mambul ngebo’ tenen, er si eremrum do? Tonda Allahdi wepra deipupa, er pel dore ngebo perur upuda, sun kan-kan di, ware nesaladi aupu gekepra dumsisipu kurum do? Ware nesala do yuma, kunungna bisipu bamumpa, dirine men kusere nesalada, Allah er si Yahweh tepapu teka tenepra kunkamrume. Tonda, ‘Nun nai bo Allah er dipapu melimkamser’ tenen, sun kange yuma er deikipu derinkamrume. 11 Dinino, sundi dirin deiyo ngebo tep, ‘Nun songe’ tenen, tapmumdi, sun pe weicapu upra embarum neng cap, sun pe uku sekra peingrum neng cap, sundi sun pe tep mali kudidarume. Ukumum nesala tep, ne Allahdi wenepkamsen ngeda, ake. Siria taruda, ila kange mun kange doupra kumumdi, engenkamrume. Sun yuma depkamrume.” Allahdi pepu.