Isa 51 | XteSC | STEP | Allahdi sun Israel yala nesala yuma tep pepu. “Sunda moupra gekepneso! Sundi, ‘Uo, dumsisi kunada, ila di putaserure’ tenen, moupra kael kemrumu nesala tep pepsene. Tonda, sundi, ‘Uo, nun nai bo Allah Yahwehdi loptapra lyepseredi, ‘Telep kunada ake, atelep bisipu dombankamrume, pepra, peteremserur ngeda, pio telepe’ tenen, putaserepa, moupra dirpeterumu nesalada, sun co puna nesala tep, betapra tenipetepkurume. Ukupmantoda ake. Sundi tenepetepso. Nimidi, ‘Pio telep gel dopra telep gel ati donkamep’ tenen, ‘Telep gel tep palinada, dan mutu di palipra doproptepe do?’ tenen, gel telepai moupra dipetepmengedi, acei dipapu telep gel dopra ati banunge. Angetopu, sun apu yapu cap, sun nau nerapu cap, kange di ton cap moupra tenipetepkamrume. Sun buteneda yambulanun, telep gel palinai utonun kurunge.

Isaiah 51

Yerusalem mutu kange di telep kudina tep, pepu upu

1 Allahdi sun Israel yala nesala yuma tep pepu.

“Sunda moupra gekepneso! Sundi, ‘Uo, dumsisi kunada, ila di putaserure’ tenen, moupra kael kemrumu nesala tep pepsene. Tonda, sundi, ‘Uo, nun nai bo Allah Yahwehdi loptapra lyepseredi, ‘Telep kunada ake, atelep bisipu dombankamrume, pepra, peteremserur ngeda, pio telepe’ tenen, putaserepa, moupra dirpeterumu nesalada, sun co puna nesala tep, betapra tenipetepkurume. Ukupmantoda ake. Sundi tenepetepso. Nimidi, ‘Pio telep gel dopra telep gel ati donkamep’ tenen, ‘Telep gel tep palinada, dan mutu di palipra doproptepe do?’ tenen, gel telepai moupra dipetepmengedi, acei dipapu telep gel dopra ati banunge. Angetopu, sun apu yapu cap, sun nau nerapu cap, kange di ton cap moupra tenipetepkamrume. Sun buteneda yambulanun, telep gel palinai utonun kurunge.

2 Ange tep nengeda, ukupmanto upu nong neitamai deiyo ngeda ake. Ada, sun apu bo Abraham tep tenepetepso. Tonda, sun nau ner Sarah ton tenepetepso. Abrahamdi sun Israel yala nesala deiamseue. Angetopu Sarahdi, sun deiamseu. Abraham ^{▼▼Abraham – Allahdi Abraham wepra deiamu ngeda, ‘Israel nesala, sun gonga kemna deiyo ngebo kunkamre’ tenen, wepra deipke. Ange kael kemna tep, Ulangan pasal 7, ayat 12-14 dinkurume.} tep tenipetepkamrumnge deiyoda, ake. Pumun taruda, ne Allahdi Abraham tep wepra deipsi taruda, mi ton tenpunge peda kapul men deiamu. Mi men deiamu dinin, nedi er tep, wepra deiamsidi, pio telep kupra deipsidi, mi karepsipa, erdi deipupa, amenda taruda amidi ton deiamupa, dadeipdanen yakaramyanen, adeiki di, nyapu pio weik deiamipa, ukutaruda, sun Israel yala nesala denge weik konum kurume. Ange yumada ne dia.

3 Ange tep nengeda, sun ataru kurum Israel nesala peda, moupra tenipetepkurume. Tek sisi ne Allah Yahwehdi, sun Yerusalem ^{▼▼Yerusalem – Allah upu buku neitamaida, amutu si tep, ‘Sion’ mutu sengnung dinin, ada pumun taru perami mutu si tepa. Dinino, amutuda tenpua.} ila ati arum neitamai kurum nesala tep, amenda taru sun dipru kwa dipkamsene. Ne dipapu sun kangeda, telep kupra deipsenya deiki di, sun Israel yala nesala yuma cap, sun podana nesaladi yawa popra, sikke bungtamami mutu yuma peda, kange di ton cap telep kupra deipsenepa, sun yuma teleppu kunkamrume.

Tonda, ne dipapu sun ati walangyopu kupunge yuma cap, sun wa pena tep tu cap, sun mutu-mutu neitamai pio mali kupu tu cap, mutu cap yumada, kange di ton cap telep kupra deipkamkene. Ada, sun ati walang yo kupkai yumada, menop taru Eden ban mutu, pio telep kwamutopu, telep kupra deipkamne. Tonda, sun Israel tara nimi gumaida, ne Allah Yahweh, ne pio telep wai dam, tu pio telepai utopu kupra deipkamsene. Ukupne pangeda, sun mutu neitamaida, sun Israel nesala yumadi, kange deipmumdi, pingping kange deiki kumumdi, ‘Nun nai Allah telepe,’ peprumudi, kange lon mut pio penkamrume.

4 Ange tep nengeda, uo, ne nyapu sisa utopu kurum nesalao! Sun yumada, ne pepkusen upu moupra gekenkamnerume! Tonda, nedi wepra anuamsisi nesala, ne mawa nesalada, sun moupra gekepneso! Sundi ne upu moupra gekepkunerumnge deiyoda ake. Ada, nedi sun yuma tep, ‘Ange ukunkamrume, angeda, pio men kunkamrume,’ pepra, lap peterepkamsene.

Tonda, nedi, ‘Dumsisi kuna ngeda, ake. Pio telep kunada, ake, malinge ake,’ pepra, lap peterepkamsen upuda, nimi ban-ban yuma tep melipkamne. Ukupmantoda, nedi pepkusen upuda, tuai nesala ban-ban yuma kunge nesala tep nengeda, sun weica utopu kupkamre ja. Ange gekepra kael kepmengedi, ‘E, telep kuna ngeda ake,’ tenen, moupra kael kemkamnunge. Ne upu di nesala yumada, diriprepa dirin deikipu, telep kunkamenge.

5 Nedi sunda ne mawa nesala tep, sun podana neng damai, nedi loptapra lyepropkamsena tep, keteneiamsi ngeda, konum damai kupre. Menmena yankamre ja! Tonda nedi nesala ban-ban yuma Tep bisbisa kapkamne ngeda, konum yanmanto kupra. Damai konum kupre. Atep nengeda, sun ila laut mokon pirmanai kunge nesalada, ‘Uo, Allahdi dan taru yana melipra lyepropkamser do?’ tenen, kalekra dinapu kunenunge. Sunda, ‘Uo, Allah er ila puto ngebo dipapu, er puto buru di pel dopredi, lyepropkamser’ tenen, kalekra dinapu Kunkamenge.

6 Atep sun Israel yala nesala yuma peda, tekra im deiki tara cap, tuai mutu cap, dipetepkurume. Tek sisi pepsene. Im alau tara kure keca yumada, gum kupkamre ja. Ada ukupmantoda, nimidi ila ket deipmengepa, im neitamai welepmaryanen, adipapu gum Kudoramretopu, im alau taru kwamre keca yuma peda, gum Kupropkamre. Tonda, tuai mutuda, nimidi wirameng opkal pun deiamredi, gwelepra sangamretopu Kupkamre ja. Ukupre pangeda, tuai mutu neitamai, ban-ban yuma kunung nesala yumada, tali suma adipapu deramretopu kupra, depropkamenge. Dinino, ne Allahdi sun tep loptapra lyepropkamsen ngeda, men gum Kupkamre. Nedi sun tep loptapra lyepropkamsen ngeda, pio tep akunkamre. Angeda men gum kupmanto cadi, pio gawal dakra men gum kupkamre.

7 “Sunda moupra gekepneso! Sundi, ‘Uo, dumsisi kunada, ila di putaserure’ tenen, moupra kael keprumu nesala tep pepsene. Ada, nedi, ‘Angeda kunkamrume, angeda pio men kunkamrume. Telep kunada ake,’ pepra peteremsisi upu konum doprumdi, sun kange dipru neitamai dongoprumdi, angepu talepra kurum nesala tep pepsene. Sundi ne upu gekepneso! Sun yuk tali kunge nesala, tuai mutu kunge nesaladi, tali-tali upu pepra, nalemsenge upu cap, nyek-nyek pesenge upu cap, minina upu pesenunge cap yuma peda, kwar dangna pio gume. Tonda, tali nengdi sun tep nengeda, ‘Sunda mali kununge. Sunda tali keca tep, teka tenenunge,’ pepsengedi, mali upu sun deiki pesenge nesala tep nengeda, sundi, kwar dangna gum di, ‘Uo, ware keca deiyo tep aupu pesenung do?’ tenen, kange tenimtona pio men kunkamrume. Atali nengdi, sun tep, mali upu penkamseng dinino, sunda kwardangna cap, puto boun kuna capda pio men kunkamrume. Deiyoda, ake.

8 Sun amali pesenge nesala peda, ton gam men kunkamenge. Sun anesalada ukupmanto ngeda, kekludi, opkal bol jedoramrepa, bon weik kuramretopu kunkamenge. Tonda, nimidi, domba bisam potong dopra, ange di opkal wiramenge, er si wul, sindi ange jedoramrepa, gum kuramretopu, anesala peda tek sisi depra gum Kupropkamenge. Dinino, ne Allahdi sun Israel nesala tep lyepropkamsen ngeda, men gum Kupkamre. Tonda, nedi sun tep, sun podan dam neng damai di, loptapra lyepropkamsen ngeda, pio tep akunkamre. Ange yumada, men gum kupmanto cadi, pio gawal dakra men gum kupkamre. Ne dipapu sun konum lyepropsenyopda, ne nyapu sisadi deipmumpa, dadeipdanen dortaru bankameng nesala yuma peda, sun yuma pio tep akunkamenge. Gum men kupkamenge.

Allahdi aupu yumada, sun Israel nesala tep peipupa gekepi.

Israel nesaladi Allah tep, “Naie, melipseo!” pepra, moropya deiki di, pepi upu

9 Allahdi aupu peipupa, sun Israel nesaladi pepi. “Uo, nun nai Allah Yahweh, kan adipapu gekepsememdi, melipra lyepseo! Naio, kan ila puto deiki dipapu nun lyepropseo! Menop taru kandi nun apu yapu tep, melipra lyepropmumtopu, nundi, ‘Adipapu tekmemdi, nun ataru kunup nesala tep ton, yana lyepropsetum’ tenen, moropkepe. Uda nun nai Allah kan tep, nun apu yapudi, ‘Nun nai bo Allah, melipseo!’ pepra, moropkeipa, ila yu kuramu isok bal, agam kuramu keca, er si Rahab, konum parang ya di sesekra popu deiyo ngeboda, ware ngebo di do? Gume, yuk ngebodi gume. Kan Allah dipapu, ila laut mokon neitamai gam kuramu bal, er si Naga Laut, ila laut mokon pumbon di lukra popmumpa, deamnge.

10 Tonda, ‘Ware ngebodi amambul pel dopu do?’ tenen, pio tenimtona men kuserure. Gume, Allah kan dipapu, Bi Laut Mokon, ila kaurye me mokon akwamupa, alaut mokon me popra, embendaudi, bupra deipu laut mokon me yumada, kan dipapu amokon cepra deiamume. Yuk ngebodi gume kan pua. Kan ila puto di alaut mokon deiamngai cepra deipmumdi, aneitamai bisi bana tep, kalkal tu ketenepra deiamume. Ukupmuma deiki di, kan dipapu lyepropmum nesaladi, alaut mokon neitamai, kalkal pemu bisi deiki yanipra beidi, me ortara benami. Kandi lyepropmum nesaladi, abisi deiki telep kupra ortara bei.

11 Atep nengeda, nun peda ukupra melimserume. Menop taru ila mambul pel doramumtopu, ukutaru peda melipra lyepropkamserume. Ada, kan nyapu sisada, yu nengdi yana poptapseidi, sun pe karen mutu dubenamsidi, ikin keca nun nong deiki deiamsi dinin, Allah Yahweh kan dipapu konum lyepropsemum nesala yumada, tamupra Sion ^{▼▼Sion – Amutu sida, ‘Sion’ pepra sekami ngeda, ada Yerusalem mutu tep pepi.} mutupu yankamepe. Ada, ‘Pio teleppu kunkamep,’ tenepmengedi, Yerusalem mutu tamupra yankamenge! Tonda, tamupra yankameng taruda, sun aso deiki yang-yang peprepa, kange deipra, ila upu di kange lon mun mut pepmengedi, sun adipapu tamupra, Yerusalem mutu yankamenge. Tonda, sun anesalada, keana tep gum dinin, pio tep, ila kange deipmengedi, kan tep gispal donkamkenge. Tonda, sun anesala ikin-ikin kuramupa, ila kange mun kange doupra kuraminge yumada, konum gum kupkamra tep, pingping kange deipra kungedi, gispal donkamkenge.

Sun Israel nesaladi Allah tep, pepi.

12 Allahdi sun Israel nesala tep upepu.

Neda Allah akunune. Nedi aupu pepsenedi, sun kange dipru kwa dipra deipsenepa, teleppu kunkamrume. Ne dipapu sun yuma tep, kange pio telep kupra deipkamsene. Ukupkamna tep nengeda, sunda ware keca deiyo tep, tuai mutu neitamai mali kunung nesala tep kware kuserur do? Tuai nesala yumada, denapu kunkamenge. Ukupmantoda, tali mutmuta, keteng bupu di poprepa, gelal seramretopu kununga cadi, sun tali tuai nesala tep kwar dangna gume.

13 Sun tali tuai nesala tep kware dakra kurum nesalada, neda Allah Yahwehdi, sun yuma ketekepra deiamsisi ngeboda, ne konum lupronerume. Tonda, ne dipapu im alau tara kuramrenge yuma peda, bepekra deipsidi ketekeipsi. Tonda, tuai mutu amutara deiyonge peda, ne dipapu keteneipsidi tekeipsi ngebo, Allah tep konum lupronerume. Ukupra konum lupronemuma deiki di, sunda, ware keca deiyo tep, tumi-tumi yumada, ‘Sun popkupe’ tenen, ketenepra deipmengedi, ila yu di poryakankamseng neng tep, kware kuserur do? Dinino, moupra tenipetepso! Tek sisi sun yu weik kunge nengdi, sun tep konum poryakanmaseng do? Anengda, dan cei kunung do? Gume, anengda, ukutaru men poryasetengedi, men gum kweipsetenge.

14 Sun wenemnai dongoramipa, tupa dakunung nesalada, nedi adipapu loptapkamne. Anengda, sun jen ton men gum kupkamre. Tonda, sun anesala yumada, depmengepa, tu pumbon ton men peinkamenge. 15 Angeda, tali tep men pepsene. Deiyoda, ake. Neda sun si eremnerum nai bo Allah, ne si Yahweh kunune. Ne ila puto di ila laut mokon deiki deipnepa, me kait buka welerepa, ila lelim perure. Ne si ton penenungada ake. Neda, Allah Yahweh, akeca-keca deiki tara erepra ila puto ngebo kunedi, im deiki jen talena malaikat yuma talepra, sun deiyo ngebo kunune. 16 Ne Allahdi, ‘Ne upu karepnepa gekepredi, lap perbenkamre’ tenen, kan Yesaya tep ne upu dopra kan sipyal pumbon konum dongopkesi. Tonda, nedi kan tep tupa kalengnapu kukenune.

Ukupmantoda, ne buru pumbonpu kuneruma cadi, ware keca do yuma kan tep men yana popketue. Ne Allahda, im deiki tara kuramre keca yuma peda, konum bepekra deiamsi. Angetopu, ne dipapu, tuai mutu amutara barimna tep, telep kupra deipsipa, tupa akurure. Ukununa tep nengeda, nedi Sion mutu kunung nesala tep, pepsene. “Sunda ne nyapu sisa, ne mawa nesala kurume,” pepsene.

“Yerusalem mutu kurum nesalada, sun ikin kusere ngeda, sirya gawal dakamre,’ pepu upu

17 Gekepneso! Sun Yerusalem mutu neitamai kurum nesalao, adipapu bukroso! Anengo, sun yuma bukroso! Sun Yerusalem kurum nesalada, tekra ketenepdaso! Neda Allah, ne yu kupneupa, kange mun kange doupra wenemamsisi ngeda, sundi konum doproprume. Ukupmantoda, ila yu me, kange yawaramrenge karepsisipa, ange yuma jepra sirya gawal dakmarume. Metekanun peda, ton men diktapmarume. Ange yuma konum jepropmarumpa, sun kange yawarapseupa, tuai sakmanto kurume.

18 Uo, sun Yerusalem kurum nesalao! Sunda bicaue. Sun Yerusalem mutu neitamai kurum nesaladi, sun nyapsilip meliamrumpa, konum nepra nimi du neng kunung dinino, tenpunge peda sun tep, ‘Telep bisi benkurum ada ake,’ pepra, nedi sun buru talepra mepra banmanepa, sunda ne amenda tara yakankurume,’ pepra men peptenge. Sun anesala kankan di, tenpu ngebo peda, ‘Ne talepsenedi, telep bisipu dubenkamasene. Ne dipapu moupra kalengsenedi, melipra doupra embankamsene,’ men peptue. 19 Sun deikida, ila kange mun kuna deiyo keca buteneda, konum sun damai yana, sun tep ila ikin keca di yana taikmasere. Ada, mar podana deiki di, sun Yerusalem mutu nesalada, konum yawa popra sikke buktapmasenge. Tonda, sun mutu neitamai kunung nesalada, jen putana li taru kepupa, dopropmarume. Ukupra ikin weik kuramrum dinin, ware yuk mutu nesaladi, sun tep, bicau kuprepa, yana melimkamseng do? Ware mutu nesaladi yana, sun dipru kwa dipkamseng do? Gume, nedi yuk mutu nesala doproipnepa, sun damai men yana melimkamsenge.

20 Uo, sun Yerusalem mutu kurum nesalao, sunda bicaue. Sundi deiamrum nyapsilip yumada, puto pio boun kupupa, kange tenena gum di, tuai saka dourbenmai. Dan bisi do yuma, dana-dana tara bisi bana tep gonga keap embanung bisai yuma, sun nyapsilip tu deiki saka manunge. Rusa bisamdi, mangkau kange doupra embangedi, nimidi derinung jaring utopu kecada, mankau men epmengepa, tomoramretopu, kununge. Ware kuptenge do gume. Sundi deiamrum nyapu yumada, sun mali-mali kuraminge tep, Allah Yahwehdi yu weik kupupa, sun menenga keca wenepra, sun deiki weika di karepka cadi, ange yuma konum dopromya cadi, men kupmanto kununge.

21 Ange tep nengeda, ila kange mun keca, sun deiki yanamupa dopramrumdi, ukuda amutarapu kurume. Ukupmantoda, sunda, yu me, kange yawaramre anggur me weika di jepmengepa, sun kange yawaraprepa, tali kange doupra, men kupmanto kurameng utopu kurume. Atep sunda nedi pepkusen upuda, moupra gekepneso! 22 Sundi si eremrum ngebo, sun nai Allah, neda akeca-keca deiki tara erepra ila puto di, akeca-keca yuma talepra kunune. Neda Allah Yahweh, sunda ne mawa nesala kuruma cadi, sun si eremrum Allahdi upu pepsene. Sun tara kepra melimsenun ngebodi, sun melipra kalengna tep, aupu pepsene. Ada, sun mali kuramrumnge tep, ne ila yu kupneupa, sun deiki ila ikin keca deipsisipa, kange mun kuserur ngeda, sun damai di tamupra doropnedi, gum kupra deipkamne. Ukupmantoda, nimidi kange yawaramre yu me jepmengepa, kange yawarapyopda, tuai saka dourbaramengtopu kuramrum dinin, ukutaruda, ange ton cap men karenkamsene. Nedi sun tep yu teneamsisi ngeda, konum gum kupra deipnyopda, sun deiki ikin keca ton yarepa, men dopropkamrume.”

23 Nedi menop taru sun ikin kupnepa, kange mun kange doupra kuramrumnge yumada, nedi dopropnedi, sun nong deiki ikin keca deriramsei nesala, sun podan neng tep nengeda, sun deikipu akeca tamupra deipkamne. Ada, sun podana tep yakaramsei nesaladi, sun tep, ‘Tu deiki mapmumpa, sun nong deiki yanipra benkusepe,’ pepya deiki di, sun deiki yanirami yu neng tep, nedi wenepkamne. Sun anengdi, sun tep, ‘Tu deiki mapmumpa, sun nong deiki yanipra benkusepe,’ pepya deiki di, ukupmantoda, sundi tu deiki mapmum taruda, sun ayuk mutu nesaladi yana, sun deiki yanipdongopsei. Sun deikida, tali tu bisi yanipra embaramengtopu kupra, sun nong deiki yanipra embarami. Dinino, ukutaruda, sun Israel nesala tep ikin weik kuramseunge yumada, dopropnedi sun yanidongoramsei nesala tep, sun deiki deipnedi, ila di wenepkamne.