Isa 52 | XteSC | STEP | Uo, Yerusalem mutu kurum Israel nesalao, kange moupra tenena gum di mapmarumada bukroso. Nimidi telep opkal kenekra baramengtopu, sun dipru neitamai puto kupserepa kunkamrume. Ukupmumdi, ‘Pio kange deipra kunkamep’ tenen, kwerya telep opkalpu kenekmumdi kunkamrume. Ne Allahdi, ‘Amutu neitamaida, ne sida amutu deiki deipnepa, ne mawa mutu kunkamner’ tenen, wepra deiamsi mutu, Yerusalem tep pepne. Nedi men wepra deiamsa tep, sun den bam bol men sengnung nesalada, mali kunge deiki di ne damai men yanetenge. Anesala yala-yala yumadi, ne Allah tep teka men tenenenung nesalada, Yerusalem mutu wiami beilya buplan neitamaida, kange di ton cap pio men wengkamenge.

Isaiah 52

‘Allah Yahwehdi Yerusalem mutu nesala tep lyepropkamre,’ pepu upu

1 Uo, Yerusalem ^{▼▼Yerusalem – Pumun taru mutu si seki ngeda, Sion pepra seki dinin, amutu sida butene si, Sion ton tonda, Yerusalem ton peramya cadi, nundi Yerusalem mutu sekmepu. Atep, yukaida, mutu si Sion ton epmumnyopda, ‘Ada Yerusalem mutu tep, seki,’ tenenkamrume. Yuk Allah upu buku neitamaida, ayat 1 cap, 2 cap, 7-8 cap neitamai, amutu si tep Sion seki.} mutu kurum Israel nesalao, kange moupra tenena gum di mapmarumada bukroso. Nimidi telep opkal kenekra baramengtopu, sun dipru neitamai puto kupserepa kunkamrume. Ukupmumdi, ‘Pio kange deipra kunkamep’ tenen, kwerya telep opkalpu kenekmumdi kunkamrume. Ne Allahdi, ‘Amutu neitamaida, ne sida amutu deiki deipnepa, ne mawa mutu kunkamner’ tenen, wepra deiamsi mutu, Yerusalem tep pepne. Nedi men wepra deiamsa tep, sun den bam bol men sengnung nesalada, mali kunge deiki di ne damai men yanetenge. Anesala yala-yala yumadi, ne Allah tep teka men tenenenung nesalada, Yerusalem mutu wiami beilya buplan neitamaida, kange di ton cap pio men wengkamenge.

2 Yerusalem nesalao, sun mali kange douna tep, buta deiki kurumupa buta palepseu ngeda, daeptapmumdi, ila kota mutu neitamai telep kupra kuramengtopu kunkamrume. Sun ila nimi deiyo nengdi, pio telep bungna keca deiki bungamengtopu, nedi ereipsenepa, telepai kunkamrume. Tonda yuk mutu nengdi, bisbisa kapseidi, ateng kouamsei nesala, sun Sion mutu kurum nesalada, sun kum dam tapu koupdongopra wenemna ati deiamseipa bungamrum ngeda, ukutaruda loptapdaso. Sun Sion mutu neitamai di deiamsei nesala tep pepsene.

3 Ukunkamrumada, mesum tep men pepsene. Deiyoda, ne Allah Yahwehdi, ne nyapu sun tep pepsene. Sunda kunumna gum di talipu dopra dubenamseitopu, ne peda kunumna gum di, talipu loptapsenedi, lyepropkamsene. Ada kunumna co bo do, yuk mambul keca do, karena gum dipapu, talipu lyeptapkamsene. 4 Neda akeca-keca yuma talepra deiki tara kunedi, ‘Ukupkamne,’ tenenetopu kunune. Nedi pepmasene. Ware keca do yuma, ne tenenetopu kunun ngebo, Allah Yahwehdi mesum tep men pepsene. Ada, ne Yahweh, akeca-keca yuma talenedi, ila puto weik deiyo ngebo kunedi, pumun taru wepra deiamsisi nesala, Israel nesala sun mutu neitamai jen gum kupupa, jen putana tep, Mesir mutu bena kuramrume. Ataru neitamaida, nimi bo neng utopu kuramrume. Dinino, aneitam taruda, sun Asyur neng yandi, sun pe kuramrum keca tep, yan popra dalumamseidi, ila ikin keca weik sun nong deiki deriramsei. Ukuramseitopu tupa talesenunge.

5 Atep nengeda, ukutaruda, ne mawa nesala wareto kunung do? Neda Allah Yahwehdi, pepsene. Mali nengdi ne tep penenung ngeda, pio mali cadi, ne dabal weik kunerure. Ada Babel mutu ^{▼▼Babel – Amutu sida butene cadi, ton ayatda, Babel mutu penupe, ton ayat neitamaida, Kasdim mutu penupe. Dinin amutu tenpu tep, si butene penupe.} nengdi, yan popbisipseidi, sun keca yuma yan dalupra dopramsei ngeda, sun yo pununa tep, Babel nesaladi ne tep men kareramnei. Ukuramidi, ‘Israel nesala pio talenkamep’ tenen, dipru eremdangedi, ne Allah tep nyek-nyek penengedi, ne si tep mali pedinenunge. Tumi-tumi yuma, ne si deiki pio mali penenunge. Neda Allah Yahwehdi pepsene.

6 Ange tep nengeda, ne wepra deiamsisi nesala, sun Israel nesala tep lyepkamsene taruda, sun yumadi ne tep, ‘Allah Yahwehda, akurure’ tenen, kael kepkamnerume. Nedi lyepropkamsen taru dipapu, sunda, ‘Ange kapul men kupu taruda, Allahdi konum peamseu’ tenen, kael kepkamnerume. Tek sisi, ne Allah dipapu ‘Ukupkamne,’ pepra pediramsisi.

7 Nedi wepra deipnepa, kai upu peryankameng nengda, sun epmumdi ila kange deipkamrume. Aneng tep nengeda, ukupra tenenkamrume. ‘Uo, pio kai telep upu duyasenge nengda, sun tuai bisi yanipra telep upu duyanmasenga cadi, sun yan peda pio telepe tenen, kange derinupe,’ tenenkamrume. Anengda, mutu ban-ban yuma embangedi, ne kai telep upu lape pepembankamenge. Tonda, podana gum di, dipru dukdongopra telep kuna tep, upu peterepra embankamenge. Tonda, nimi lyemna upu duyankamenge. Aupu peryakankameng nengdi, sun Sion mutu kurum nesala tep, ‘Sun nai bo Allah, akeca-keca talepra, ila deiyo ngebo Raja, Allah dipapu taleseredi akurure,’ pepra penkamsenge.

8 Atep nengeda, sun mutu neitamai kalekra dina deiyo nengdi, kange deipra kuna tep penkamenge. Pining kange doupra penkameng upuda, moupra gekenkamrume. Ada, sun nai bo Allah Yahwehdi, ‘Ne mawa nesala lyepropkune’ tenen, Yerusalem mutu yarepa, sun pe asuru di epmengedi, kange deipra ila upu deiki di gispal dopra gudinkamenge.

9 Ange tep nengeda, Babel mutu nengdi Yerusalem mutu ati uruptamipa, walang kuamngai di, kange deipra gudinkamrume. Ada, sun Israel nesala tamseipa tupa kurum nesala cap, ka tamupra yakankamrum nesala capdi kange deipra gudikamrume. Ange deiyoda, Allah Yahwehdi er mawa nesala Israel neng tep, melipra lyemdoserepa kange derinkamenge. Babel mutu nesaladi sun Yerusalem mutu kumum Israel nesala taleamseiya neitamai di loptapserepa tali kange deipra teleppu kunkamrume. Yerusalem mutu tamupra karepkamsera tepa. 10 Allah Yahwehdi nesala ban-ban yuma sun dinai, er puto jenek kupra benbeneprepa, ila puto pel doprepa epmengedi, kael kepkamenge. Pio Lek Ngebodi, puto weik donkamre pelda men inipkamre, jenek kupra pel dorepa dinkamenge. Ange tep nengeda, mutu sirik im sirik, ban-ban yuma kunge nesala, nun nai bo Allahdi nimi lyemna keca kareserepa epmengedi, kael kepkamenge.

11 Ukutaruda, Babel mutu tapmumdi, sun pe mutu tamupra yankamrume. Allah Yahweh er si eremna ati pel don keca yuma dopra dubenami ngeda, kange di tamupra duyankamrume. Akeca dopra duyankamrum nengda, Allahdi, ‘Akecada, mali keca cadi, akeca talena meme,’ peramunge yala-yala yumada, sun ton men talenkamrume. Ukumumdi, sun Babel mutu di tamupra Yerusalem mutu yankumum taruda, sun nong yuma me kupra telep kudinkamrume. 12 Sun bankomum taruda, kwepdanen bana gume. Tonda, domembanmange neng lukdanen barameng utopu men kunkamrume. Ange men kupkamruma deiyoda, sun nai Allah Yahwehdi, sun damai melipseredi, doupra bankamsera tepa. Sun Israel nesala tep pio kalekra melimserur Allahdi, ‘Dana-dana tara di yana sun mali kudirur’ tenen, akeca tep, kalekra melimkamsere. Atep lungdanen bana gume.

‘Allah pel dona tep wepra deiamu ngeboda kange mun kunkamre,’ pepu upu

13 Allah Yahwehdi pepsene. Tek sisi ne pel donkamre ngebodi, pio ila kael kemna deiki di, mambul pel dorepa, nong kupkamre. Ukupre pangeda, nimi weika di epmengedi, er tep si eremdinkamenge. Nedi, ‘Erda, akeca-keca yuma deiki tara kuredi, ila nimi deiyo ngebo pio kunkamre’ tenen, er tep si ereipnepa ila ngebo kupra deipkamemene. 14 Menop taru nesala weike er tep diramidi lungdaramidi, ‘Uo, bicaue,’ tenerami. Ukuraminge deiyoda, yu nengdi, er tep popra, er nong deiki ila kange mun keca weika di deiamipa, er urasin kamo pio mali kupra deipi. Ukupya tep nengeda, nimidi, ‘Uo, yuk neng ton poramipa, sun urasin yambula di mali kudirami dinin, angeboda, tek sisi pio weik poramipa, er urasinda, pio mali kupra deipi,’ tenerami. ^{▼▼tenerami – Aupuda, nabi Yesayadi akeca yuma konum kuamu utopu pepra seku dinin, ada amenda taru Yesus tep kupkaminge tep seku. Ada kapul men kupu taru di seku dinin, nabi ngebodi pepu upu cadi, konum kupu utopu sekra deipu.}

15 Pumun taruda, yu nengdi er tep wenepra poramipane, urasin yuk kupupa, nimi diramidi, ‘Uo,’ tenen, lukdana giso talanga baramu. Dinino, amenda taruda, nesala ban-ban yumadi, er kupkamre keca mambul pel dore pangeda, nimi weika di, ‘Uo, erda ila mambule, pio telep ngebo kurure’ tenen, kael kemkamenge. Tonda, ware mutu do yuma, ila nimi deiyo neng, Raja neng weika di, er tep epmengedi, sun upu pena gum di dipdolom pepra, er tep dinkamenge. Ukupra epmengedi, pio lungdanapu kunkamenge. Ada mesum tep gume. Deiyoda, pumun taru di men kuramupane, sun Raja neng men kael keaminge cap, tonda yuk nesaladi sun tep men lap peramipa, moupra men kael keaminge cap, ataru di ange ukuprepa epmengedi, betapra kael kepkamenga tep pepsene. Allah Yahwehdi pepu.