Isa 53 | XteSC | STEP | Allahdi pepu. “Ware nesaladi, nun gekeramepu upu gekepra teka tenerami do? Allah er si Yahwehdi er puto katuai kemdiramupa, diramidi kael keami nesalada ware nesala do?”

Isaiah 53

Allahdi wepra deipupa, nimi lyemna pel donkamre ngebo tep, pepu upu

1 Allahdi pepu. “Ware nesaladi, nun gekeramepu upu gekepra teka tenerami do? Allah er si Yahwehdi er puto katuai kemdiramupa, diramidi kael keami nesalada ware nesala do?” 2 Allah er si Yahwehdi teneramutopu, er pel doramu ngeboda, gelal tuai di du telep keca pakra bongoramra utopu kuramu. Angeboda, urasin telep ngebo men kuramnga cadi, diramepudi, er tep, ‘Angeboda urasin telep ngebo,’ men teneramepu. Angebo er nong kamoda, dabal ngebo kuramnga tep, nundi er tep diramepudi, ‘Uo, angebo tep, nun kange deipmepe,’ men teneramepu. 3 Uteneramepudi, er tep dabal kuramseupa, nimi yumadi luludiramepudi, er damai tapra karenaipu kuramepu. Angeboda, ikin keca weik er nong deiki deriramipa, kange mun kange doupra kuramu. Atep nengeda, nimidi yuk neng tep, ‘Nun song’ tenen, urasin tamupra nira dongdongoramengtopu, tenpu ngebo peda, er tep men dirami. Utopu, nun peda er tep, ‘Telep ngebo akurure’ tenen, kange men deriramepu. Er tep nengeda, ‘Erda tali ngebo cadi, dakwapye,’ teneramepu.

4 Ukupra teneramepu dinin, tek sisi nun mali kunup keca dopra dubenamseue. Tek sisi angeda nun men kupmanto kuramepudi, mali kuramepu ngeda, nun pununa tep, er deikipu deipdana dopropseudi, gum kupra deipseue. Tonda, nunpu jeserenge yuma, gum kupra deriserure. Nun kange mun kange doupra kuramepunge tep, dopropseudi, ikin weik kuramudi punupseue. Nun ikin keca kuramseunge yumada, nun melimna tep dopramseupane, nundi tenepmepu ngeda, ‘Ada Allahdi er wenemna tep ikin keca er nong deiki derinmar adano,’ teneramepu.

5 Angeda, walwal di teneramepu dinino, nun mali kuramepu keca deiki di, er tep yu nengdi poramipa, er nong deiki dila weike kuramu. Nun mali-mali weik kuramepunge tep nengeda, takke keca di talepra bonongmaipa, er nong deiki dila weik kupu. Ange deiki di, nun tep, telep kupra deipseue. Nun yo pununa tep nengeda, ikin keca weik er nong deiki deipdi, wenepya deiki di, nun tep lyepra deipseue. Nun men kupmanto keca cap, nun mali kuramepunge yuma cap, gum kupra deipseudi, lyepseudi, telep kupra deipseue. 6 Ukuramunge deiyoda ake. Ada ukupmantoda, nun yuma wangan domba bisam utopu kuramepu. Nun mali kuramepua deiki di, nun kange yuk-yuk teneramepudi, bisi yuk-yuk tenepra baramepu. Domba bisam bura saka yuk-yuk dabaramengtopu kuramepu. Allah Yahwehdi nun tuai nesala mali kuramepunge tep poptapsetu dinin, nun yo pununa tep, nun mali kuramepunge yuma dopra, er amutara pel doramu ngebo, er nong deikipu deipu.

7 Allah er wepra deipu ngeboda, nun mali keca lyemna tep, yu nengdi tulum deiki di ikin keca weik er nong deiki deipmemei. Dinino, upu pena gum dipapu, tali dimpeptapnapu kupu. Erdi tamupra, ‘Ware keca deiyo tep kunmaneng do?’ pepra, mali men pepu. Domba bisam popkamenga tep, dopra banmange taru upu men peramretopu kupu. Tonda domba bisam potong toun nengdi, er potong tounmange taru, upu pena gum di, dimpepra bouna di ketenem diramretopu kupu. Ada, yu nengdi er tep mali upu weik perami taruda, erda dimpeprap bouna dipu kuramu.

8 Erda mali men kuramupapu, yu nengdi ateng koupra upu bongdina deiyo neng kori dubeidi, wenepra er nong deiki ikin keca deipra popi. Akupi ngeda, dumsisi kupra men kupi. Mawa di inipra mok upu penmaidi, wenepra popi. Ataruda, ware ngebodi, ‘Uo, nun yo pununa tep, depkure,’ tenen, betapra kael keami do? Gume, ange moupra men tenerami. Popipa depu pangeda, tuai mutu gam kurami nesala kan-kan di, er nong gum kupu. Er depka deiyoda, ne Allahdi wepra deiamsi nesala mali kuraminge tep, ‘Gum kupra deipnedi, anesala lyepkamne’ tenen, depu. 9 Er peipkoi taruda, mali neng Allah tep teka tenena gum neng kan-kan popipa, er nong peipi. Er gel imir pumbon peipyaida, isomka nengdi keteneiamyaipu bena peipi. Angeboda mali kuna cap, mok upu pena capda, pio men kuramupapu, popi. Deiyo men kuamupapu, poptapi.

10 Mali nengdi popi dinin, Allah er si Yahwehdi, pumun taru dadi, ‘Angeboda kange mun kange doupra dadepkamre,’ teneramutopu, nun yo pununa tep depseue. ^{▼▼Aupu yumada, nabi ngebo Yesayadi, seku taru kapul men kupu dinin, ‘Amenda taru tek sisi ukupkamre ja,’ tenepudi, konum kuputopu upu sekra deipseu.} Tonda Allah Yahwehdi teneramutopu, er pe nongpu depka deiki di nimi mali kunung keca yuma gum kupra deipudi, tuai nesala sun yo pununa tep depue. Konum depu dinin, gam bukredi, er kunkamre taru peda weik maramredi, erdi deiprepa dadeipdanen bankameng nesala epkamre. ^{▼▼nesala – Ange upu pepu ngeda, ada Yesusdi deipkamre nesala tep gume, dinin, erdi lyepkamre nesala yala-yala weike kupbankamenge tep, adomon upu pepu.} Angebo deiki di Allah Yahwehdi, ‘Ukunkamne,’ teneramunge yuma angebo pel dorepa, tek sisi nong kupkamre. 11 Allah er si Yahwehdi wepra deipupa pel donkamre ngeboda, kange mun kange doupra ikin deiki dipu kuramyanen konum popmengepa depkamre. Ange konum kupyopda, gam bukra kange deipredi, kange mun kange douamunge nong kupkamrenge epyopda, erdi, ‘Ne konum kupne,’ tenen, kange deipkamre. Er kange mun kange doupra kunkamra deiki di, nimi tuai nesala weike, erdi sun tep, ‘Konuma, nedi anesala tep, konum telep kupra deipmane,’ pepra deipkamre. Adeiki sun dipru kange telep kudinkamre. Ne Allah tep pel donkamner ngebodi, nesala ban-ban yuma mali kunge keca wenemna tep, er pe nong deikipu dopra deipdankamre. Ukupkamra deiki di, ne Allahdi nesala ban-ban yuma neitamai di nimi weik kaukepnedi lyepropkamne.

12 Er kange dipapu er pe nonge cap, er pe gam kuna cap, nimi yo pununa tep tali karepseu. Nimi ban-ban yuma, sun mali kunge keca dopra, er pe nong deiki deipdau. Ukupua tep nengeda, ne Allahdi, er tep erepra deipnepa, pio ila mambul ngebo kunkamre. Puto weik neng cap, ila mambul pel donge neng cap tep, nesala yuma gispal doramengtopu, er tepapu, er si erepra gudinkamenge. Tonda, puto nengdi, yuk mutu neng tep popbisipmengedi, sun talerami keca dalupra dororamengtopu, ne Allahdi er tep pio telep keca weika di karenkamne. Erda telep ngebo kuramupane, er cap kurami nengdi er tep, ‘Erda mali kun ngebo,’ pepra, er nong deiki mali upu pepra deriramemei. Erda, ‘Allahdi mali kunge nesala, kaukepkamre’ tenen, mororamu. Ukuramudi, sun mali kunge kecada, er pe nong deiki dopra deipdaue. Ange tep nengeda, ne Allahdi ne pel don ngebo tep, kunumna karepnepa, ila mambul ngebo kunkamre. Nimi yumadi er tepapu gudinkamenge.