Isa 54 | XteSC | STEP | Yerusalem mutu kurum nesalao, ne Allahdi sun tep, domon upu deiki di pepsene. Pumun taruda, you nerapu utopu kuramrume. Mundu men douamrum taruda, mi deiyo jepseupa, nyapu ton men deiamrume. Dinino, ataruda sun kange deipmumdi, pingpinga di mut penkamrume. Ada, sun nyapu pio weik kupbankamenga tepa. Ukupmantoda, nimi doamenge nerapudi derinung nyapuda, yambula di derinung dinin, sunda, nimi men domi nerapu utopu kuramum dinin, amenda taruda, sun nyapu pio weika di deipmumpa, weik kupbankamenge. Ne Allah Yahwehdi pepsena tep, angeda tek sisi nong kupkamre ja.

Isaiah 54

Allahdi Israel nesala tep, pio telep kupra derinkamra tep, pepu upu

1 Yerusalem mutu kurum nesalao, ne Allahdi sun tep, domon upu deiki di pepsene. Pumun taruda, you nerapu utopu kuramrume. Mundu men douamrum taruda, mi deiyo jepseupa, nyapu ton men deiamrume. Dinino, ataruda sun kange deipmumdi, pingpinga di mut penkamrume. Ada, sun nyapu pio weik kupbankamenga tepa. Ukupmantoda, nimi doamenge nerapudi derinung nyapuda, yambula di derinung dinin, sunda, nimi men domi nerapu utopu kuramum dinin, amenda taruda, sun nyapu pio weika di deipmumpa, weik kupbankamenge. Ne Allah Yahwehdi pepsena tep, angeda tek sisi nong kupkamre ja.

2 Ange tep nengeda, sun kunkamrumai tep, opkal bol di dodin tenda ati doamumaida, ayomnya betapra ikdarapmumdi, kange di ton cap go tapangna tep, akayumnya ikmumya di, lyom opkal bol yana gerekdongopra gipropmumpa benkure. Aopkal bol tenda ati buplanda, ila di pakra deipkamrume. Akati gerengna tapuda, pio bepekra karenai gerekdongopkamrume. Ange yumada mesum tep gume. Sun nyapu pio weik kupbangedi, sun damai yakankamenga tep pepsene.

3 Ton deiyoda ake. Ada, sundi ‘Go ton cap tapakamepe,’ tenepmum dingeda, dumsisi tara cap, tebalal tara cap, yuk-yuk talepra gipropmumpa bekropkurure. Ukuprepa sundi deipmumpa, dadeipdanen bankameng nesalada, weik kupbangedi, yuk mutu kunge nesala yala-yala weik, mutu-mutu weik tep, bisbisa kapmengedi, amutu neitamaipu kunkamenge. Tonda, ton tara nengdi, ton tara neng tep, popbisimengepa, nesala kuna gum di, dimbulung pepu mutuda, ne mawa nesala, Israel yala nesala bena kunkamenge.

4 Ange tep nengeda, sunda ‘Yuk nesaladi, nalepra malya pesengepa, ali dangnedi kwar kunkamser do?’ men tenenkamrume. Kange mun kange doupra puto bouna di, men kunkamrume. Ali men dangkamruma tep pepsene. Atenena ngeda, adipapu tamkamrume. Ukupmantoda, sun kaber kuramum taru di, mali kuramrumpa, ali kuramseu ngeda, gekepra men dukdongopra kuramum dingeda, ka di ton cap men tenenkamrume. Tonda, nimidi nerapu doamenganen, solu tapmengepa, mambul kange doupra kuramengtopu, men kunkamrume. Ange utopu kuramrum dinin, ange peda ka di ton cap tupa men tenenkamrume. ‘Nun pe yuk kunupa,’ men tenenkamrume.

5 Angeda, mesum tep men pepsene. Deiyoda, sun ketekepra deiamseu ngebo, er Allah tep nengeda, ‘Uo ne dopneu ngebo utopu kurure’ tenen, kunkamrume. Allahda, er si Yahweh kurure. Erdi sun akengebo utopu melipra kunkamsere. Er dipapu, im deiki kunge jen talen malaikat yuma talepra, sun ila deiyo ngebo kurure. Sun Israel nesaladi, mali kuramrumnge tep, poptapsetu dinin, sun mali kurum keca kaukepseredi, sun lyepropkamser ngeboda, er Allah kurura cadi, Allahda Pio Lek Ngebo kuredi, sun tep pio kalekra melimserure. Nimi ban-ban yumadi, er tep, ‘Allahda Ila Eremna Ngebo kuredi, tuai mutu ban-ban yuma kunge nesala talerur deiyo ngeboda, er sida Allah Yahweh kurure,’ pepra, Allah er si tepapu eremkamenge.

6 Israel nesala sunda, nimi doamenge nerapu tapmengepa, ‘Uo,’ tenen, pio ikin kange doupra kuramengtopu, kuramrume. Tonda, kaber nengdi, wisi kapul men deipmenge taru, kaber nerapu dopmengedi, kikiman dakuramrenganen, angebodi er doamu ner taprepa, aner pio ikin kange doupra kuramretopu, sun peda ukuramrum dinin, ukutaruda, sun nai bo Allah Yahweh nedi, ila di dipru karepnerepa, tamupra upupkamsene. Upupsenepa, kange deipra pingpinga di kunkamrume. Neda, sun nai bo Allahdi pepsene.

7 Sun mali kuramrumpane, nedi sun tep tapsisipa, ke taru tep sun pe yuk dakuramrumpane, ukutaruda, sun tep ila di dipru karepnerepa, tamupra doropkamsene. Ila di bicau tenesenuna cadi, dana-dana tara di bulupra dekankamsene. 8 Mali weik kuramrum pangeda, nedi sun tep yu kupneupa, tamamsisi. Sun mali weik kuramrumpa, yu weik kupneupa, ke taruda yambulanunpu tapsisidi, ne amyo karekra, sun ton men diramsisidi, men melimamsisi. Dinino, ukutaruda, ne tulum kupneunge tapra, nedi sun tep bicau kunerepa, tupa tenenkamsene. Pio men tapkamsene. Angeda, tali men pepsene. Sun nai bo Allah, ne si Yahweh, sun tep kunupra lyepramsisi ngebodi pepsene.

9 Pumun taru Nuh kuramu taruda, tuai mutu nesaladi mali-mali weik kuramipane, ne Allahdi, ila mo kareramsipa, mokon deiya jeamu. Ukupu pangeda, nedi Nuh tep pepsi. ‘Kandi deipmempa dadeipdanen, bankameng neng kunkameng taru yumada, nedi ton cap, ila mokon karepnepa, deipra tuai mutu yuma men jepkamre cadi, sun yuma kange di ton cap men popkamsene,’ pepra deiamsi. Ange utopu, ukutaruda, nedi sun Israel nesala tep nengeda, upepsene. ‘Ne yu kupnerepa, wenepra men poptapkamsene,’ pepra deipsene.

10 Atep ila-ila mutu bukua cap, yambul-yambul mutu buma bukua cap yuma longmarepa, saka gum kuptua peda, nedi sun tep dipru karenerura tep, men lupronkamsene. Nedi sun tep pio tupa tenenkamsene. Bicau tenesenedi, nedi sun tep yu kupnerepa, ikin keca sun damai men derinkamsene. Tonda, nedi sun tep, ‘Sun cap, ne cap telep kupra kikiman kunkamepe,’ pepra deiamsisi upuda, men gum kuptue. Ada, ne si Allah Yahwehdi pepsene. Nedi sun tep dipru karenerur ngebodi pepsene. Allahdi Israel nesala tep pepu.

Allahdi Yerusalem mutu ukupunge ketekeipkamrenge tep, pepu upu

11 Ne Allah Yahwehdi, sun Yerusalem kurum nesala tep pepsene. Uo, sunda ikin keca weik sun deiki kuamupa, kange mun kange doupra kuramrume. Sun dipru puto boun kuamseu taruda, puto kemdina ngebo ton men kuramupa, men meliamseu. Dinino, yu nengdi, sun Yerusalem mutu ati arum yuma uruptamipa, walang kuamngaida, melipsenedi, lepsisikra donkamsene. Ada, urasin pio telep, kunumna weik gel dopra sun ati-ati lepsisikra dopkamsene. Yerusalem ati ayomnya tep nengeda, ila kunumna weik gel, er warnada im kalum utopu, er sida batu nilam dopra deipnedi, adeiki di sun ati-ati yuma dopkamsene.

12 Sun kunkamrumai lyom weik atida, nedi bi gel, kunumna weik gel er sida delima gel, kamo telepnge doprapnedi lepsisikra dopkamsene. Yerusalem ati-ati ongomgenepra lyom beilya wipdongopkamsen ngeda, yuk yala kunumna weik gel dopra dopkamsene. Tonda abeilya buplan tep nengeda, kunumna weik gel er si permata, pio kamo telepnge di dopra betaipkamsene. Tonda beilya iknya dupaida, kamo telep kunumna weik gel er si ratna di deipra wipnepa, urasin pio telep kupkamre.

13 Sun nyapu amutu kunkameng nesala yumada, ne Allah Yahwehdi peteremkamsene. Sundi deiprumupa, dadeipdanen bankameng nesalada, telep kupra deipnepa, sundi akeca-keca yuma pel dopra kunkameng ngeda, nong kupkamre. Ukuprepa bunga weik talenkamenge. Ne tara kemkameng. Ukupmenga deiki sun yuma dumsisi teleppu kupra kunkamrume. 14 Sun mutu cap, sun Israel nesala cap talepmengedi, nimi deiyo neng kunkameng nengda, dumsisipu kunkamenge. Sun podan nesalada, karenaipu kunkamenge. Men poryakankamsenge. Ukunkamenga tep nengeda, sunda tali kange doupra teleppu kunkamrume. Ukupra kunkamruma cadi, kware men kunkamrume.

15 Yuk mutu nesaladi sun tep, ‘Popbisipkupe,’ tenepmengedi, yana popetepsengopda, sun kware men kunkamrume. Ada, sun pona tep yankameng nesalada, nedi pepnepa men yankamenge. Atep, ware nesala do yuma, ‘Israel nesala tep popkup’ tenen, yankameng nesalada, sun Israel nesaladi aneng tep popbisipmumpa, aneng sun amutara kunkamenga cadi, aneng tep kwar dangna gume. 16 Besi gat keca betamna kael nengdi, ‘Nimi pon keca telepnge ketenepkamepe,’ tenen, besi keca dopra, uku dongopmengedi, kalum pupmengepa, bupu weik kupyopda, nimi pon keca betamnunge. Ukuramengtopu, ne Allahdi yuk karen mutu neitamai, yu neng keteneipnedi, dokotepnepa, yuk mutu nesala sun wenemna tep, ‘Porbeso,’ pepne pangeda, jen talepmengedi, nimi porbanunge. Angeda, ne dipapu ketenepra derinune.

17 Dinino, ware nesala do yuma, ‘Israel nesala poptepe,’ tenen, nimi pon keca ketenepmengedi, popterepsetenge dinin, men kupmanto kupkamenge. Ange utopu, ware neng do yuma, sun Israel nesala tep, ‘Mali men kupmengepapu mali upu sun deiki penkupe,’ tenepkamseng nengda, talipu kunkamenge. Sundi penkamseng upuda, talipu peptenga peda, nong men kupkamre. Tonda aupu penkamsenga deiki di mali men kweipsetenge. Nedi melimsenepa, sun Israel nengdi amali upu penge neng tep, upu sekmumpa, dimpeprappu kunkamenge.

Neda Allah Yahwehdi sun Israel nesala tep pepsene. Arup pepmasen upu yumada, ne amutara kunkamrum neng melimsenepa, doronkamrume. Yuk nesaladi sun tep, mali upu penkamseng dinin, ne Allahdi sun tep pio melimsenepa, telep kuprumnyopda, yuk mutu nesala yumadi, kael kepkamenge. Ada, ‘Uo, Israel nesalada, tek sisi Allah er mawa nesala kununge,’ tenen, kael kepkamenge. Nedi maton don kecada, pio telep kuna deiyo keca karepsenepa, teleppu kunkamrume. Allahdi Israel nesala tep pepu.