Isa 55 | XteSC | STEP | Allah er si Yahwehdi, ‘Israel nesala ne damai yakangepa, nedi telep kupra melimkamsen’ tenen, adomon upu pepu. Sun me putaserur nesala yumada, nedi keteneipsi me kunumna gum, tali yan dopra jena tep yarume. Sun co bo gum nesalada, ne kori yamumdi, co bo men kwapmarepapu, sun jen kecada, kunumna gum, talipu dopropmumdi, jenkamrume. Ukupmanto ngeda, anggur tapu du mokon cap, sapi bisam moum teyung cap, konum keteneipsisi ngeda, kunumna gum talipu yan dopra jenkamrume. Atep, ne kori yarume.

Isaiah 55

Allah er si Yahwehdi, Israel nesala tep, ‘Nedi pio melimkamsene,’ pepra, pediramu upu

1 Allah er si Yahwehdi, ‘Israel nesala ne damai yakangepa, nedi telep kupra melimkamsen’ tenen, adomon upu pepu. Sun me putaserur nesala yumada, nedi keteneipsi me kunumna gum, tali yan dopra jena tep yarume. Sun co bo gum nesalada, ne kori yamumdi, co bo men kwapmarepapu, sun jen kecada, kunumna gum, talipu dopropmumdi, jenkamrume. Ukupmanto ngeda, anggur tapu du mokon cap, sapi bisam moum teyung cap, konum keteneipsisi ngeda, kunumna gum talipu yan dopra jenkamrume. Atep, ne kori yarume. 2 Ware keca deiyo tep, men jepmanto keca kunumrum do? Tonda, sun dipru kange telep kupra men deipsetu keca dinin, ware keca deiyo tep sundi, ‘Akeca doproptepe,’ tenen, ikin pel weik dorum do? Sunda, jepmumpa men boupmanto kusere keca, warya tep awapu perum do? Sun kunupra jerum kecada men bouserepapu, talipu dopra jerume. Atep, nedi, ‘Angeda ukunkamrume, angeda men kunkamrume,’ pepra peipsisi upupu moupra talepmumdi, dumsisipu kumum pangeda, sun dipru kange yuma teleppu kuserepa, kange deipra kunkamrume. Ukupmanto ngeda, ne damai yatumtoda, nedi pio tau jen kecapu karepsenepa, telepnge jenkamrume. Ange utopu, ne damai yamum pangeda, sun kange dipru telep kudina keca karepsenepa, pio teleppu kunkamrume.

3 Uo, ne Allahdi wepra deiamsi nesala yuma sunda, ne damaipu yamumdi, ne upu moupra gekenkamrume. Ne damai yamumdi, gekepnemumnyopda, nedi sun tep tek sisi pio gam kun keca karepsenepa, sun sambalada pio gam kunkamrume. Sun apu bo Raja Daud tep ‘Bicau tenekenedi, pio melimkamkene,’ pepra deiamsi ngeda, sun Israel nesala tep bicau kunerya tep, tamna gum di, pio tek sisi angepu kunkamsene. Akunkamsen ngeda, gum men kupmanto pio akunkamre. Men tamkamsene. 4 Nedi, ‘Tek sisi Daudda, Israel nesala, sun ila nimi deiyo ngebo Raja kunkamre’ tenen, wepra deiamsi. Tonda ‘Jen talena neng, sun ila deiyo ngebo kunkamre’ tenen, wepra deiamsi. Ada tali tep gume, Daud erepra deipsipa, ange yuma ukuramunge deiyoda ake. Ada, Daud erepra deipsipa, er kuramu ngeda, ‘Nesala yuma epmengedi, ne si cap, ne puto cap, betapra kael kepkamneng’ tenen, kuamsi.

5 Sun Israel nesala gekepneso. Tek sisi sundi men kael keamrum nesala, ban-ban yuma karen mutu dakunge nesala tep upupmumpa, sun anesala yuma gekepmengedi, adipapu sun damaipu yakankamenge. Ange utopu, yuk karen mutu kunge nesala, sun Israel nesala men kael keami dinin, sun kori sepdara yakankamenge. Sun kori yakankamenga deiyoda, ne si eremnerumu Allahda, ne Yahwehdi sun Israel nesala tep, wepra deiamsidi, ereipsisa tep, sun yuk yala nesaladi, ‘Uo, Israel nengda, ila mambule,’ tenesenunge. Neda mali kun keca tenpunge peda men kununa cadi, Pio Lek Ngebopu kunedi, sun Israel nesala tep pio kalekra melimsenune. Nedi sun tep erepra deipsidi, telep kudiramsisa tep, yuk karen mutu nesaladi, sun kori diryakankamenge.

6 Allah er si Yahweh, er damaipu adipapu tamupra yankurume. Ada er tupa kurepa ditum tarupu, er damai yatume. Ange utopu, sun damai akure taru dipapu, er tep, ‘Naio, melipseo,’ pepra Allah tep upupkurume’ tenen, pepsene. 7 Sun mali kun kecapu tenepra kurumu nengda, ‘Nun mali kunupe,’ tenepmumdi tapkurume. Ange utopu sun dumsisi kun keca taprum nengda, sun mali tenemum keca yuma tapra telepngepu tenenkamrume. Ukuprumu dingeda, sun nai Allah, er si Yahweh damai tamupra yankamrume. Ada, ‘Nun mali kunup keca tep, tali poptapsetu dinin, er kange dipu bicau teneseredi lyepkamser’ tenen, kunkamrume. Sun nai bo Allah er damai tamupra yamumpa, ila di bicau teneseredi, sun mali keca weik akaptua peda, kaukemkamsere. Sun dipru boun kuredi, sun mali kurumu keca tapmumpa, gum kupra deipseredi kaukemkamsere. Atep nengeda, sun mali kumum nengda, tamupra Allah er damai yakankamrume.

8 Ne Allahdi pepmasenada, mesum tep men pepsene. Ne tenenunada sun tenemumya utopu men tenenune. Tonda ne kunun kecada, sun kurum keca utopu men kunune. Ne Allah Yahwehdi pepsene. 9 Ne tenenun nge cap, kune keca capda, sun tuai di im deiki dimumpa, pio alau kuramretopu tenepra kunune. Atep nengeda, ne kunun ngeda, sun kurumu ngeda utopu men kunune. Neda pio yuke. Ange utopu, ne tenenun nge peda im deiki dimumpa pio alau kuramretopu kupra tenenune. Sun tenerum ngeda pio yuke. Ada ne kune kecada pio yuke. Sun kumum kecada, pio yuk kurura tep pepsene. Nun utotopu pio gume.

10 Im deiki di mo tuai sangamre ngeda, kange di tamupra mesum dipu im deiki men welerbarure. Dinino, tuai mutu sakredi, tu mo popredi boun kuprepa, tuai kapu keca yuma telep kupra bongorure. Ukupredi nimi kouramenge keca nong kuprepa, sundi kipra jerume. Atep Allahdi mo karesere ngeda, talipu men kurure. Mo kareserepa, er teneretopu nong kurure. 11 Akurur utopu, ne Allahdi sun tep pepra derisene upuda, talipu tamupra ne pe damai men yankamre. Ange gum dinino, nedi, ‘Ukupkamre, angeda nong kupkamre ja,’ tenepra pedisene ngeda, tek sisi atenenedi penetopu nong kunkamre. Tonda nedi, ‘Aupu dokotepnepa, nongeda ukupkamre,’ tenenetopu tek sisi nong kunkamre.

12 Sun Babel mutu nesala bisbisa kapseidi, sun mutu dubenamseipa, dakuramrumnya tapra, sun pe mutu tamupra benkamrum taruda, pio kange deipra bankamrume. Ada Babel mutu neitamai di, ne Allahdi sun tep talepra dubenkamsene. Dubasenepa, bankamrum taruda, ila mutu cap, yambul mutu cap yumadi, sun tep kange deipsengedi, mut pepmengedi gispal dopra gudinkamsenge. Tonda co yumadi, sun Israel nesala tepapu buru bongopmengedi gispal donkamsenge.

13 Baling takke utopu kuramrenge yumada, waupum co utopu co, er sida cemara copu punupkamre. Ange utopu girikna takke utopu kuramrenge yumada, telep kait keca er si murad co paramrengepu punupkamre. Ange yuma konum kupyopda, nimi yuma epmengedi, ‘Uo nun nai bo Allah, er dipu amalinge punupudi, telepngepu deipmasere,’ tenen, kael kepmengedi, ne si Yahweh erepra gudinkamnenge. Mali keca yuma gum kupra deipnedi, telepngepu punupra deipnyopda, ada peten kemdina tep kupnepa pio kunkamre. Ange yumada, men gum kupkamre. Ukuprepa nesala ban-ban yumadi, ne Allah Yahweh tep, ne sipu eremkamnenge. Allahdi pepu.