Isa 56 | XteSC | STEP | Allah er si Yahwehdi, sun Israel nesala, er nyapu sisa tep upepsere. Nedi sun tep ‘Angeda kunkamrume, angeda pio men kunkamrume,’ pepra deipsisi upu moupra talepmumdi, dumsisipu kunkamrume. Tonda, sundi yuk nesala yuma upu bongdinada, nimi urasin dina gum dipapu, upu tek sisi kupra bokeipkamrume. Ukupra kunkamruma deiyoda ake. Ada, menmenada ne yanedi, sun tep lyepropkamsene. Tonda, sun podan nesala neitamaida, ‘Nedi ne nyapu tep, lopra tapnedi deipkamnada, jenek kupra deipkamsene,’ tenemsi ngeda, jenek kupra deipnepa, sun yumadi epkamrume.

Isaiah 56

Allahdi, ‘Nesala ban-ban yuma tep, lyemna kecada konum keteneipsene,’ pepu upu

1 Allah er si Yahwehdi, sun Israel nesala, er nyapu sisa tep upepsere.

Nedi sun tep ‘Angeda kunkamrume, angeda pio men kunkamrume,’ pepra deipsisi upu moupra talepmumdi, dumsisipu kunkamrume. Tonda, sundi yuk nesala yuma upu bongdinada, nimi urasin dina gum dipapu, upu tek sisi kupra bokeipkamrume. Ukupra kunkamruma deiyoda ake. Ada, menmenada ne yanedi, sun tep lyepropkamsene. Tonda, sun podan nesala neitamaida, ‘Nedi ne nyapu tep, lopra tapnedi deipkamnada, jenek kupra deipkamsene,’ tenemsi ngeda, jenek kupra deipnepa, sun yumadi epkamrume.

2 Tonda, ukupu pepmasen ngeda, mali kun keca ton men kuredi, angepu moupra talepredi, beipra kurur ngeboda, nedi er tep, kange di ton cap telep kupra deipkamne. Angebo kange deipkamre ja! Tonda, nedi, ‘Atumida ne si eremna tumi cadi, Sabat tumi neitamaida, beipye peikrumudi, ne sipu eremkamnerume,’ pepra deipsisi ngeda, moupra kalengdaredi, telep kupra kuredi, atumi moupra talepredi, atumi neitamaida, nedi, ‘Atumi deikida, ange kuna meme,’ pepra deipsisinge tep, pio mali men kurur ngeboda, nedi telep kupra deipkamne.

3 Tonda, ware nimi bo ngebodi do yuma, ‘Allah Yahweh tep teka tenepnedi, er cap, er nyapu cap, sun tara yana kepnyopda, sun cap kikiman kunkamne,’ pepre ngeboda, erda ne mawa ngebo konum kwamu. Ato ngebodi, pio men pepkamre. ‘Uo, ne Allah, er nyapu sisa wepropredi, neda tapkamnere,’ men penkamrure. Tonda, ware ngebodi do yuma, ‘Allah tepapu pel donkamne’ tenen, bolop donung nengda, ‘Uo, koul co di men moupmanto’ kuramretopu, nun peda, nyapu ton tenpu peda men deipmupka tep, nunda Allah er nyapu kunupa guma,’ men tenenkamenge.

4 Apepmasenada, tali tep men pepne. Deiyoda, ake. Ada, ne Allahdi sun tep upepsene. ‘Bolop men kwamre neng peda, pio telep kupra deipkamsene. Ada, sundi, ‘Gume, Allahdi karepseu Sabat tumi deiki di, tali pel dona gum dipapu, er sipu eremkamnupe,’ tenena cap, tonda, nedi, ‘Angeda kunkamrume, angeda men kunkamrume. Ne kange derinun kecada, ake. Telep kuna ngeda ake,’ peipsisipa, angepu talepra kunange cap, tonda, nedi, ‘Sunda ukupmumnyopda, nedi ange-ange ton karenkamsene,’ pepra, pedina upu deiki di, upepra deiamsisinge yuma, moupra talepmengedi kunge neng cap, kunange capda, nedi sun tep, pio telep kupra deipkamsene.

5 Sundi ange yuma konum kupmengopda, ne dingeda, Yerusalem mutu neitamai dinin, ne si eremna ati pumbon di, ‘Sun si cap, sundi kuraminge capda, nesala yuma tupa tenenkameng’ tenen, petenkemna keca ton deipkamne. Yuk neng yumada, ange epmengedi kael kepmengopda, ‘Uo, sun asi sekeiamu nesalada, tek sisi mambul neng kurami. Allah er nyapu sisa peda, yambul mambul kunung dinin, tek sisi anengda, pio ila mambul weik, telep neng kurami,’ tenenkamenge. Tonda, ‘Telep ngeda, nundi nyapu cap, ner nyapu cap, deiptepepa, nun si tupa akapkamser dinin, tek sisi ila mambul ngeda, Allahdi aneng sun petenkemna keca deipka cadi, sun si tupa-tupa tenenkamepe,’ tenepra penkamenge. Ne Allahdi, sun aneng si dopra, ne ati neitamai deipnepa, sun si akwapseryopda, tupa tenimkamsene. Ukupra sun si konum deipnyopda, nedi aneng sun tep, pio men lupronkamne. Pio atep akapkamsere, pepsene.

6 Tonda, angetopu, sun nimi bo neng peda, sun kankan ton nengdi, ‘Allah Yahweh tep teka tenepnedi, er cap, er nyapu cap, sun tara yana kepnyopda, sun cap kikiman kunkamne,’ pepre ngebodi, erda ne mawa ngebo konum kurure. Sun anengdi, ‘Gume, nunda Allah er tamna konum yana kepra kunkamepa cadi, nundi Allah tep, teka tenepra, kange deipmepedi, er amutara pelpu donkamepe. Tonda, nundi, ‘Gume, Allahdi karepseu Sabat tumi deiki di, tali pel dona gum dipapu, er sipu eremkamnupe,’ tenena cap, tonda, Allahdi, ‘Angeda kunkamrume, angeda men kunkamrume. Ne kange derinun kecada, ake. Telep kuna ngeda ake,’ peipseupa, angepu talepra kunange cap, tonda, Allahdi, ‘Sunda ukupmumnyopda, nedi ange-ange ton, tamupra karenkamsene,’ pepra, pedina upu deiki di, upepra deiamseunge yuma, moupra talepmepedi kunkamepe,’ pepmengedi, angepu kunge nengda, nedi sun tep, pio telep kupra deipkamsene.

7 Nedi animi bo neng yuma doupra, Sion ^{▼▼Sion mutu – Sion mutu pepka deiyoda, ada Yerusalem mutu neitamai dinin, yambul ortara keteng yakan tara domi ati, Allah er si eremna ati tep pepu.} pio lengna telep ati dubenkamne. Ne atida, ‘Nimi yumadi ne Allah tep, akati yana moronkamnenge’ tenen, deipsa tep, nedi go karepnepa, akati wekra moronkameng taruda, pio kange telep kupra deipsenepa, pingping kange doupra kunkamenge. Tonda, ne si eremna tep, sundi yapi keca popmengedi, ‘Allahdi nun mali kunange gum kupra deipkamser’ tenen, ne mesba deiki di uku dongopmengedi karenkamneng nge cap, tonda, sundi ne tep telep karen keca cap, karepnenge pangeda, nedi akeca yuma kange deipra doronkamne. Ada tali tep men pepsene. Deiyoda, ake. Ne si eremna atida, ‘Tuai nesala ban-ban yuma dakunung nesala, sun yumadi ne tep mororyakana ati kunkamre,’ konum tenemsa tep, angeda tek sisi nong kupkamre ja, pepsene!

8 Ange tep nengeda, ne Allah Yahwehdi, akeca-keca yuma talepra, deiki tara erepra, ila puto weik ngebo kununa tep, ange yuma tenepnetopu kununa cadi, tek sisi ange pepmasentopu, nong kupkamre ja! Ne Allahda, Israel yala nesala, sun mutu sisa neitamai di, yuk karen mutu dubena deiamyai di, nedi anesala doupra, ka tamupra acapu duyankamne. Ton nesalada, konum dopra, tamupra aceipu duyanamsi. Dinino, anesala doupra yanedi, ne damai konum deipnedi gawal daknyopda, yuk nesala peda buluprapnedi, tenpu keteneipnyaipu, deipkamne ja! Ada sun men taru konum duyasi nesala cap, amenda taru duyankamne nesala capda, wisipra deipnepa, telep kupra kikiman Kunkamenge.

Ange yumada, Allahdi sun Israel nesala tep lap pepu.

Israel nesala talena tep, nimi deiyo kepra kurami deiyo neng yumada, mali kuramya cadi, amenda taru wenepkamrenge tep, pepu upu

9 Allahdi sun Israel tara deiyo-deiyo neng tep pepu.

Allahdi, sun yuk karen mutu kunung jen talena neng tep, aupu pepra deipu. “Ukupmantoda, bura tara tali dakuramre yu gam keca yuma tep upupredi, ‘Sunda bura tara kurumu yu keca yumada, adipapu yankurume! Yarumudi, ne nyapu sisa, sun Israel yala nesala tep, deiyo kepra talenung deiyo-deiyo neng yuma tep, yana popra jepkamrume!’ pepsene,” pepu. 10 Deiyoda ake. Ada, “Israel yala nesala tep talepra, kalengna deiyo neng yumada, asuru pupredi, kunungamre neng utopu kununge! Sunda, ‘Amenda kupkamser keca ake,’ men penunge, tonda, akeca-keca yumada men kael keamya cadi, sunda walwal nengpu kununge. Sun adeiyo neng yumada, ukupmanto, nimi popmanto keca damai akapmarepapu, kamdi men kaimamre kam ^{▼▼kam – Pumun taru pe, ataru peda, Israel yala nengdi, yuk neng tep, ‘Kanda kam utopu kurume,’ pepra nyek-nyek pepmengopda, aupu gekepi nengda, pio ali weik dangami, tupa dangnunge. ‘Kamda pio mali weik keca,’ teneramya tepa.} utopu kununge. Sunda, upu lup neng kununga utopu kununge. Sunda tali kange doupra, manapu putaprepa, mapmengedi, ken manapu kununge. Sun anengda, manapu pio putarure.

11 Sun anesalada, kam utopu kununge. Ukupmanto, Kamdi, jen putanapu kurura cadi, moupra tenena gum di, tali-tali akapre keca yuma lupra jenmarepane, men bouramretopu, aneng peda ukununge. Sun animi deiyo nengda, akeca-keca yuma tep, pio putanapu kurure. Tonda, ukupmanto, sunda domba bisam peina deiyo neng utopu kunung dinin, sunda, moupra men kael kepmanto neng Kununge. Sunda, sun kange neitamai dipapu tenepmengedi, ‘Telep kunange tep, abisipu benkupe,’ men teneptenge. Sun pe kange dipapu, ‘Nun pe yuk-yuk tenepmepe bisipu, atali bisipu benkupe,’ tenepmengedi, mali bisipu banunge. Tonda, sun aneng yumadi, ‘Gume nun pedipapu, bung keca weik doronkamepe,’ tenepmengedi, sun pe putana kecapu tenenunge. Tenpunge peda, yuk nesala putan keca men tenenunge. Sun Israel tara kunge nimi deiyo neng yumada, autopu kangepu doupra, malipu kununge.

12 Tonda, sundi upenunge. “Sun ton yarume! Nun cap, sun cap, kange yawaramre yu me dopropmepe dingeda, ame weikanun kikiman jenkamepe! Sun ton yakaso! Nun cap, sun capdi, yu weik anggur me dopra jenkamepe. Jeramepyanen, konum boupseryopda, telep kange doupra kunkamepe. Tenena gume, mapmepya, berekyopda, ambutumi peda, akunmap tumi utopu kupkamepe. Atumida, yambul telep kupmaser dinin, ambutumida, pio ila telep tumi yankamara cadi, ambutumida, ila di kange deipra, teleppu kunkamape!” pepra pedanunge.

Allahdi sun Israel yala deiyo neng tep pepu.