Isa 57 | XteSC | STEP | Allahdi, “Angeda kunkamrume, angeda pio men kunkamrume,” pepra deipseu upu, talepredi, kuramre ngebo konum depyopda, yuk nengdi, ‘Uo, angeda pio mambule’ tenen, moupra men kalengnunge. Tonda, Allah tep teka tenepredi, pio telep kupra dumsisipu kuramenge neng depmengopda, yuk neng epmengedi, ‘E, angeda deiyo ake,’ tenepra, betapra men kael kemnunge. Tek sisi ngeda, Allahdi perur upu talepra, pio moupra dumsisipu kunge nesala konum depmengopda, ataru dipapu, ikin keca damai ton men kununge. Ange yuma tapra, gopra yukai bena kununge.

Isaiah 57

Israel nesaladi, tali keca isok si eremenge nge tep, pepu upu

1 Allahdi, “Angeda kunkamrume, angeda pio men kunkamrume,” pepra deipseu upu, talepredi, kuramre ngebo konum depyopda, yuk nengdi, ‘Uo, angeda pio mambule’ tenen, moupra men kalengnunge. Tonda, Allah tep teka tenepredi, pio telep kupra dumsisipu kuramenge neng depmengopda, yuk neng epmengedi, ‘E, angeda deiyo ake,’ tenepra, betapra men kael kemnunge. Tek sisi ngeda, Allahdi perur upu talepra, pio moupra dumsisipu kunge nesala konum depmengopda, ataru dipapu, ikin keca damai ton men kununge. Ange yuma tapra, gopra yukai bena kununge.

2 Konum depmenge dingeda, sunda telep dipapu, beipye peingbangedi, ikine gum dipapu, telep kupmengedi, tali kange doupra, dim peprappu kunkamnunge. Ware neng do yuma, sunda, Allahdi, ‘Angeda kunkamrume, angeda pio men kunkamrume,’ pesere upu moupra talepmengedi, dumsisipu kunge nesalada, ikin kange douna cap, kange tenimtona cap, pio gum dipapu teleppu kungedi, sun mapmenge taruda, sun ason deiki di beipye peikmengedi, telep kupra manunge.

3 Dinino, sunda mali kun keca talepra kurum nesalada, ne damai yana gekepneso! Sunda yamumpa, nedi wenepkamsena deiyoda ake! Ukupmantoda, sunda isok si eremengedi, nimi kerdona nengdi deriramenge nyapu utopu nesala kurume. Tonda, sunda pio ila mali kuruma cadi, ukupmantoda, sunda upula dopra tali-tali nyangdarameng ^{▼▼tali nyangdarameng nerapu – Aupu deiyoda, ada ukupmanto upu pepu dinin, deiyoda ake. Sun Israel nesaladi, Allah Yahweh konum tamamidi, yuk tali keca cap, isok si cap tep si erememamya tep wenepu. Ada, nimidi tali nerapu upula nyangdarameng utopu, sundi Allah tapra, yuk tali keca talepra, si eremamya tep, aupu pepu.} nerapudi, nyapu tali derirtamameng nge utopu nesalapu kurume! Tonda, nerapu konum nimi domi nerapudi, yuk neng domi nerapu dopra, upula nyakmengedi, deiptapmenge nyapu utopu nesala kurume.

4 Sun mali weik kurum nesalada, ware keca deiyo tep, mali upu deiki di nyek-nyek pepnerumdi, autunerum do? Sundi, ‘Erda tali ngebo,’ tenepnerumudi, mali upu tupa penerumudi do? Sun ton tenipetepso! Sunda tali mok upu pena nesala men kurum do? Allahdi, ‘Angeda kunkamrume, angeda pio men kunkamrume,’ pepra deipseu upu yanina nesalapu men kurum do? Gume, ukupmantoda, sunda balila kupra, mali weik kun nesaladi, deiamengepa, dadeipdanen yakarameng nesala utopu nesala kurum adano! 5 Sundi, isok-isok si eremna cap, ‘Nyapu cap, jen keca cap weikanun doproptepe,’ tenena cap tep, ila-ila co ^{▼▼ila co tekamreyai – Aupu deiyoda ake. Ada, pumun taruda sun Kanaan tara kurami nesalada, Allah men kael keamya tep, sun isok-isok si eremna tep, ila co tekamngai cap, gel imir pumbon cap, ceproamu me pirmanai cap bena, sun pe nyapu popramidi, sun isok si eremna tep karerami. Ada, ‘Isok melipserya deiki di, nun koun keca weik bongopredi, nun nyapu cap, weika di derinkamepe’ tenen, ukurami. Kanaan tara kurami nesala ukuramipa, Israel nesala kankan, ton neng dingeda, akeca diramidi, sundi ton akeca talepra kurami.} tekamya damai bemumdi, amem co damai isok si eremrumudi, nyangdarume. Tonda, ‘Nun koun keca koupepa, isokdi yana barimserya deiki di, telep-telep kupra bongoserure’ tenen, gel imir damai bemumdi, sun pedi deiprum nyapu dopra, isok si eremrumudi, aisok karena tep, sun nyapu portamrume.

6 Ange tep nengeda, ila me cepropkai pirman banai, urasin telep gel, alam-alam peramre gel kwamngaida, sundi si eremrum isok-isok dakununga cadi, acapu bemumdi, sun si eremrum isok tepapu, ‘Nun nai melipseo,’ pepra, mororbenkurume. Sundi ne Allah tep konum tapneruma cadi, sun si eremrum isok dipapu, melimkamsenge. Nedi guma! Ne tepapu sun telep karen keca kareamnetum dinino, sundi anggur me gweprumudi, alam-alam peramre gel deiki dingdirume. Tonda, ‘Isokdi melimkamser’ tenen, aisok karena tep, gandum du bupra karerume. Atep, sun tenipetepso! Sundi, sun isok si eremrumudi, karerumu keca deiki di, sun tep ne yu kunere ngeda, gum kupkamner do? Sun mali kurum keca tep, nedi, ‘Anesala weika di wenepra popkamne,’ tenepra ketenepsisi ngeda, ‘Dakwapye’ tenen, kau kepsenedi, tapkamne do? Gume, angeda men kupmanto.

7 Angepu gum dinin, tonda, sun pe kange deiki dipapu, ‘Nunda gam keca popmepedi, nun si eremnup isok karerbenkamep’ tenen, ila mutu dup weleprumudi, akeca dubarume. Sundi, ‘Nun si eremnup isokdi melipserepa, nun nyapu weik deiptepe’ tenen, amutu dup deiki welepmumdi, nyangdarume. 8 Sundi, ‘Tali nyangdaramep ati ake, tenepkameng’ tenen, petenkemna keca sekra, anyangdana ati-ati buplan dam derirure. Ukurumnya deiki di, sunda ne Allah tep konum tapronerume. ‘Akati nerapu cap, nimi cap, antapmepedi, kikiman nyangdankamepe’ tenen, sun kenengrum opkalda, konum kwiripra taprumudi, sun mana ason deiki wekrumudi, ‘Ware ner do, ware ngebo do, ne cap kikiman mapnemedi, nyangdankamnem’ tenen, keteneiprume.

Ton nesala tep nengeda, ‘Kikiman mana tep ketenepra deiprumudi, sun kunumna tep keca, co bo konum karerumudi, tupa-tupa nyangdarume. Sundi, sun tali nyangdarameng nerapu cap, nimi cap, nyangdanmangedi, manungaida, sundi, ‘Uo, angeda pio putaserura cadi, ange kuptepe’ tenen, kange derirume. Sundi, yuk nesala cap kikiman maruma deiki di, sun opkal kenengna gum di, sun nong balangapu didarume. Ukuruma yumada, pio mali weik kurume.

9 Tonda, sundi, amutu isok er sida, Molok, ^{▼▼Molok – Molokda, ada Kanaan tara kurami nesaladi si eremami isok, er si tep seki. ‘Aisokda, tuai mutu iriamu tara kurure’ teneramidi, er si eremami. Tonda, aisok Molok tep, sun pe nyapu popra karerami. Ada Yerusalem mutu damai dinin, Hinom banai bena ukurami.} telep minyak me cap, tonda, ‘Nun nong deiki likeipmepepa, nintong telep pepkamser’ tenen, nintong telep pena me cap, weika di doupra bemumdi, bena sun nong deiki likeiprumudi Molok si eremrumdi, tali nyangdarume. Tonda, sundi, ‘Ware isok ton si ereptepepa, melipsetu do?’ tenen, nimi doproiprumpa, pio karen-karen mutu kunung nesala damai tep, upu perbaramidi, mororami. Angepu gum dinin, sundi, ‘Konum deami nesala banungai, Sheol mutu, ^{▼▼Sheol mutu – Sun Kanaan tara kurami nesaladi, ‘Molokda, Sheol mutu kurure,’ tenerami. Sheolda, ada, nimi konum depmengopda, sun sambala amutupu banunge,’ teneramidi, ukurami.} yuk isok ton akunung do? Sundi ton melipsetenge do?’ tenen, mororamrumpa, asuru kwa nengdi ton dirpeterami.

10 Sundi, ‘Uo, dan mutu di nun kange deipsetu keca ton eptepedi, doproptepe do? Dan cei di, yuk puto isok antaptepedi, moroptepepa, melipkamseng do?’ tenen, pio dipetepra embanapu kuramrumpanen, adeiki di, puto boun kupseue. Ukupseupapu, sundi, ‘Ukuda akonuma. Ange yumada, malipu kunupa cadi, akeca yumadi men melipsetue, dakwapye,’ ton pio men teneprume. Ange gum dinino, sundi, ‘Gume ange yumada, pio putanapu kunmasera cadi, akecada pio dirterena cap, dorona cap kunkamepe,’ tenen, pio pe deipra puto dipapu, ‘Akecapu talepra kunkamepe’ tenen, puto ton cap tapakra kupbaramrume.

11 Allahdi pepu. “Uo, sun Israel yala nesalao. Sunda, ware isok tep kware weik kupseua deiki di, ne tep minina upu cap, mok upu cap peramrumdi, ne tepapu konum tamamnerum do? Sun aisok-iskoda, wareto kunga tep, sun yumadi kware kupseupa, sundi, ne tep mok upu peramnerum do? Ukuramruma deiki, ne Allahdi sun tep weika di meliamsisinge yumada, pio lupropnerumdi, ne tep teka tenepra, pio tupa men tenepnerum do? Tonda, nedi sun tep, wenemna upu weikanun ton men peramsisi. Men wenemamsidi, sun mali kurum keca tep dina gum di, kaukemamsisa cadi, sun dingeda, ‘Erda ware keca ton kupsetu do? Erdi ware kupkamser do, gume?’ teneramrumdi, ne tep ton cap kware men kuserur do? Sunda, ‘Gume, nundi yuk tali keca si eremnupada, tupa kunkamepe,’ tenerum do?

12 Dinino, ne Allahdi sun Israel nesala yuma tep upepsene. Tek sisi telep kunange gum dinino, sundi sun isok si eremna tep, moupra taleprumudi pel weik dorum ngeda, epra kael kemsenun dinino, ange yumada, nong pio men kupkamrenge, tali kecapu talepra kurume. Tonda, sundi atalepra pel domumnge yumada, deiyo ton men kwapmara cadi, akeca yumadi men melipsetenge.

13 Dinino, sundi konum tapmaneruma cadi, sundi, ‘Uo, ware ngebodi melipra lyepsetu do? Ware keca puto di melipsetu do?’ tenen, ila upu di mali pepra ngolongmumdi, moromum taruda, sun pe buru di, isok urasin utopu kupra, petupra deipmumdi, si eremum keca dipapu lyemdonkamsenunge! Sun aisok yumada, nimi si puto, ue tenpu pung pepmenga deiki di, akeca yuma gum kupkamre. Tonda, kumanya yambulnge dipapu, akeca doupra bendopredi, gum kupropkamre. Dinino, ware neng do yuma, ‘Allah er dipapu nun melipra lyepropkamsere’ tenen, ne amutara yana inipra kunkameng nesalada, tek sisi amutu talepra kunkamenge. Tonda, nedi karepsenepa, sun ne damai kunkameng nesala tep karepnepa, sun dipapu ne mawa mutu dup, apio telep lengnai, Sion mutu ^{▼▼Sion mutu – Amutuda, Yerusalem ila ati arum domyai tep pepu. Allah tep teka tenenung nesalada, amenda taru amutu yuma dopropkamenge. Tonda aca ton dinkurume. (Ulangan 8.1; 10.11; Mazmur 37.9, 11, 34).} dopropmengedi, acapu kunkamnunge.

Allah pedina upu deiki di, “Ne nyapu sisa, Israel nesalada, melipnedi, kange di telep kupra deipkamne,’ pepu upu

14 Allahdi uperure. “Ne nyapu sisa, Israel nesala sun benkamenga tep bisida, moupra ketenemdinkamrume. Pio telep kupra yapra deiprumudi, abisi neitamai leleamre keca yala-yala yumada, wepra yukai dopra donongkamrume. ‘Ne nyapuda, lupra sepra bankamenga’ tenena tep, pepsene. 15 Neda Allah, akeca-keca yuma deiki tara erepra kunun ngebodi pepsene. Tonda, akeca-keca yuma deiki tara kununa cadi, ne sipuda ila di eremnenung ngebodi, pepsene. Neda menop taru konum gam kuramsidi, amenda dorkunkamre taru peda, ne pio Gam Kuna Deiyo Ngebo kunune. Ne cap, ne si capda, pio telep, ila Lengnapu Kurur Ngebo kunune. Neda, pio ila eremnai, im deiki kunune. Ne kununaida, tek sisi mali keca tenpunge peda men kurura cadi, pio telep lengnaipu kunune.

Dinino, neda ware nesala do yuma, sun dipru amutara kepmengedi, sundi, ‘Uo, nun mali kunup keca tep, ali dakra kunupa cadi, ange yuma tapmepe,’ tenepmengedi, dipru eremna gum di, mali kange doupra, sun kange dipru bounpu kunge nesala cap, kikiman kunkamne. Ne cap, sun cap antapra kikiman kunkamepa deiyoda, nedi sun mali kange doupra dipru amutara kepra kunung nesalada, puto karepnepa, sun kange deipkamenge. Tonda, sundi, ‘Uo, nun mali kunup keca tep, ali dakra kunupa cadi, ange yuma tapmepe,’ tenepmengedi, engemenge nesala tep, sun dipru kwa dipnepa, sun peda kange deipra teleppu kunkamenge. Sun ato kunge nesala, sun damaida, ne akunkamne, pepsene.

16 Aupu pepmasenada, tali tep gume. Deiyoda ake. Ada, nedi ne nyapu, sun damai tep, “Sunda pio malipu kurum nesala,” pepra pio tep men wenepkamsene. Tonda, nedi sun mali kunge keca tep, tupa-tupa yu kupnerepa, sun tep men deremkamsene. Deiyoda, ‘Ne yu tupa-tupa kupnedi, sun tep pio wenepsenedi, ikin keca sun deiki pio deipsenyopda, ne nyapu sun kange mun kange doupra, dipru buluksakrur’ tenen, tupa ton cap men deremkamsene. Nedi sun yumada, ketekepra deiamsipa, kununga cadi, amenda taru ne dipapu, sun tep, kange di ton cap telep kupra deipkamsene.

17 Nedi sun tep yu weik kupneua deiyoda ake. Ada, sundi, ‘Uo, akeca ton doproptepe, akun keca ton kuptepe’ tenen, pio putanapu kuramya deiki di, mali weik kuramya cadi, nedi sun tep yu kupneu. Ila yu weik kupneua cadi, sun wenemna tep, ila ikin keca sun nong deiki deriramsidi, ‘Ne tara tamupra yankameng’ tenen, sun tep taprosidi, ‘Aneng men melipkamne’ tenen, iniprosidi, sun ton men melimamsisi. Ukupra kuramsi dinino, sun ne nyapuda, balila di, gel giso deipra, dipru gat kun nesala kuramya cadi, ka di tamupra, sun pe kange dipapu, ‘Gume, abisida telep tenepmepengepu bena kunkamepe,’ teneramidi, tupa mali-malipu kurami.

18 Nedi sun mali kuraminge yumada, konum diramsidi, tupa dinune. Dinino, nedi, sun amali kecapu talepra kunung nesala tep, kange di tamupra telep kweipkamsene. Tonda, nedi sun tep melipnedi, dumsisi bisipu dubenkamsene. Tonda, sundi, ‘Uo, ware kuptepe do?’ tenen, kange mun kange doupra kunge nesala tep nengeda, nedi sun dipru kwa dipnedi, sun kange dipru tamupra telep kupra deipkamsene. Ukupne dingeda, ware nesala do yuma, sundi ikin kange doupra engemenge nesala tep nengeda, telep kupra deipsenyopda, sundi kange deipra ne tep, ‘Uo, Allahda pio telep kurure,’ pepra, ne tep si eremkamnenge.

19 Nedi Israel nesala yuma, aca damai kunge nesala pe, pio orkaren mutu neitamai kunge nesala pe yumada, nedi ka di ton cap telep kupra deipnepa, tenimtonda gum dipapu, tali dim pepra, pio teleppu kunkamenge. Neda, Allah Yahwehdi aupu pepmasena cadi, ange yumada tek sisi nong kupkamre ja,’ pepsene. Ne nyapu sisa yumada, nedi kwetepnedi, pio telep kupra deipkamsene. 20 Dinino, sun mali kecapu talepra kunung nesalada, mali kange doupra, kange bongtonapu kunkamre. Ukupmantoda, ila laut mokonda, dim pena pio gum di, me kait welepna, kwerepna, kepredi, longteng-longteng peramretopu kunkamenge. Tek sisi ukupre dingeda, amokon amutara di, bental cap, sepmenga cap, weik diningamretopu, sun amali kun keca kunge nesalada, mali kun keca dipapu dinikamre.

21 Atep, sun mali kun kecapu talepra kunung nesalada, telep kange doupra, dim pepra men kunkamenge. Sunda kange mun kange doupmengedi, ikin kangepu doupmengedi, pio kunkamenge.”

Allahdi sun Israel yala nesala tep pepu.