Isa 58 | XteSC | STEP | Allah Yahwehdi pepu. Sun upu ila puto di, ne nyapu Israel nesala sun damai perbenkurume. Ukupmanto ngeda, ila upu perur bum-bum pena, er si terompet lelim ila di peramretopu, sun upu ila puto di Israel nesala tep penkamrume. Ada sundi ne tep tamamneidi, sun mali weik kunge keca tep, jenek kupra lape penkamrume. Sun apu bo Yakubdi deipupa dadeipdanen, yakarami nesala, Israel yala nesala tep, sun mali kunge keca katuai di lap penkamrume.

Isaiah 58

Jen jena gum dipapu, tali kungedi telep kungenge tep, pepu upu

1 Allah Yahwehdi pepu. Sun upu ila puto di, ne nyapu Israel nesala sun damai perbenkurume. Ukupmanto ngeda, ila upu perur bum-bum pena, er si terompet lelim ila di peramretopu, sun upu ila puto di Israel nesala tep penkamrume. Ada sundi ne tep tamamneidi, sun mali weik kunge keca tep, jenek kupra lape penkamrume. Sun apu bo Yakubdi deipupa dadeipdanen, yakarami nesala, Israel yala nesala tep, sun mali kunge keca katuai di lap penkamrume.

2 Angeda mesum tep men pepsene. Israel nesalada, atumi-atumi yuma ne sipu eremengedi, ‘Allahdi, ange kunkamrume, angeda men kunkamrume,’ peipseu ngepu, ‘Nun ton kael kepkamepe,’ penunge. Sundi, ‘Nunda teleppu kupra kupedi, Allah tenere ngeda kael keptepe,’ tenenge nesala yambulanun kunung dinino, yuk nesala yumada, tek sisi ange utopu men kununge. Israel nesaladi talipu kununge. Sundi ne peramsi upu konum tamnunge. Sundi upenenunge, “Gume, nun kange deipmepedi Allah si eremkamepe. Tonda, Allahdi, ‘Ukunkamrume, angeda men kunkamrume,’ peiamsemum ngeda, tupa tenenkamepe. Allah tep moropmepepa, dumsisi kupra upu bokeipkamsere,” penung dinin, angeda tek sisi men kununge. Mawa dipapu mok upupu penunge. Tek sisi sun kange dipu mali kununge.

3 Sun anesaladi upepra asimnenunge. “Allah kandi melipseo, pepra jen jena gum di, si tepra kupedi morokenupe. Dinino, warya tep Allah Yahweh men disemem do?” penenunge. Tonda upenunge. “Ware keca deiyo tep Allahdi peipseunge amutara kupedi gekepra kunup dinin, erdi men diserur do? Ada ware keca deiyo tep, nun kupe keca diseredi, ‘Telep kununge,’ men teneserur do?” pepra mali penenunge. Upenenunga tep, ne Allah Yahwehdi sun tep tamupra pepne.

Tek sisi sun jen jena gum di kunmarumdi, ne tep moronerum ngeda, disenun dinin, ataru neitamaida, tek sisi ne tep men tenenerume. Sun pedi sun putan keca tepapu tenerumdi, sun kange dipapu tenemum ngepu mali-mali kurume. Tonda sun amutara pel don neng tep ikin pel kareramumpa doramipane, kunumna men karerume. Sun nong deiki ikin keca weik derirume. 4 Tonda, sun jen jena gum di si tepra kunmarumdi, ne tep moronerum taruda, tek sisinge ton men kurume. Ange kumum tumi dipapu sun pe nengpu, ila di mali upu pepra pedarumdi, sun mali buru di podanapu kurume. Ukumum ngeda, pio mali kuruma cadi, sundi moronerum ngeda, im deiki kununa di, pio men gekenkamsene. Sun tenerumu ngeda, ‘Nun moropnup ngeda, Allahdi gekepra karepkamser ja,’ tenerum dinin, ukupra mali kumumnyopda, gekenkamsen do? Gume, sun mororumu ngeda, pio men gekenkamsene.

5 Sun tenipetepso. Sun jen jena gum di si tepra kumum taru yumada, sundi, ‘Nun tep gekepredi karepkamsere’ tenen, kurum dinin, sun malipu kurumnya deiki di, sun pedi sun pe tepapu kange mun kudidarume. Ne tenepsi ngeda, ‘Telep ngeda, tenpu tumi dipapu, ne amutara kungedi, telep kunkamenge. Yuk taru yumada talipu kunkamenge,’ teneramsisi do? Ange pio gume. Kumanya yana dopredi mutmuta longamretopu, sun giso geidongomumdi, bomtorume.

Tonda, mali opkal getepdongopra tu deiki mapmumdi, sikke but dopra sun giso cap, nong deiki cap deridarume. Ukurum ngeda, ada ‘Jen jena gum di si tepra kupe taruda, Allahdi telepe tenepkamsere’ tenen, kurum do? Sundi, ‘Jen jena gum di si tepra kunada, tek sisinge ake,’ tenepra kurum do? Ukurumu ngeda, nong bol deikingepu kurum dinin, sun dipruaida malipu kurume. Tali-talipu kurum ngeda, ‘Allah Yahweh epseredi, kange deipkamsere’ tenen, kurum do? Sunda ‘Angeda telepe,’ tenerumu dinin, neda ange utopu men tenenune. Ne Allah Yahwehdi, sun kurumnge tep nengeda, kange men derisenune.

6 Ne Allahdi sun Israel nesala tep pepsene. Sundi ne tep, ‘Erdi melipkamsere’ tenen, jen jena gum di si tepra kumumdi, telep kupmumnyopda, angeda, yambul telep dinin, tek sisi pio telep kunkamrum tenepsi ngeda adano. Puto nengdi yuk tali neng tep, deiyo men kuamupapu, yu kupmengedi ateng koupra deiami nesalada, ‘Aneng tep bicau tenepmumdi aneng lortamkamruma’ tenen, peipsisi. Tonda anesalada deiyo men kuamupapu, rantai tapu di ateng kouprap, wenemna ati dongorami nesala tep, ‘Aneng tep bicau tenepmumdi, lortamkamruma’ tenen, peipsisi. Tonda mutu-mutu yuma talepra kunge ila deiyo nengdi, sun amutara neng nong deiki ikin keca derirameng ngeda, gum kupra deipmumdi, anesala tep loptapra melimkamrume. Ukupmum pangeda, ne Allahdi sun tep kange derinkamsene. Tali kange deipra, jen jena gum di si tepra kuna tep ngeda gume.

7 Tonda, ‘Telep kunkamrum’ tenepsi ngeda, adano. Sun jen keca akapsere pangeda, bokrapmumdi sun jen keca gum neng tep bokra karenkamrume. Tonda, kan-kanpu kungedi tali bisi embandanung nesala cap, nimi bo neng cap tep, ‘Nun ati wekra yamumpa, nun cap jen kikiman jepra kunkamepe. Nun ati mana telep pua,’ pepra kunkamrume. Tonda sun opkal kenengna gum di, nong banangapu kuramenge neng tep, sun opkal bokrapmumdi, melipra karenkamrume. Tonda sun kayapu neng cap, sun pe yala neng cap, akeca-keca yuma putapre pangeda, sun tep tamna gum di melipra karenkamrume. Ukupmum pangeda, ne Allahdi sun tep kange derinkamsene.

8 Arup pepmasentopu konum kupmum pangeda, berekredi keteng tengyarepa, dirin weik kuramretopu, nedi telep kupra deipsenedi, teleppu kunkamsere. Tonda sun ikin weik kuser ngeda, gum kupra deipnedi, adipapu telep kupra derinkamsene. ^{▼▼ikin – Ibrani upu deiki sekinge nonge neitamai ngeeda, betapra tenenada ikin kuserura cadi, nun yambul walwal kunup dinin, ton kael nengdi, sun buku neitamaida, ‘sun suse jesere ngeda, kaikropkamsene’ sengnunge. Ton nengda, nun sekmeputopu sengnunge. Ada Babel mutu neitamai kurami dinin, ‘Allahdi loptapra lyepkamre’ tenen, seku tenepmepe.} Neda Pio Dumsisi kune ngebodi mepra banepa, ne amnyo tara domyakanerume. Tonda, ‘Dana-dana tara yumadi mali kudiryaserur’ tenen, ne Allah Yahweh ^{▼▼Yahweh – Allah er si, tek sisi ngeda, Yahweh kurure. Allahdi Musa tep, aupu katuai di lap pepu (Keluaran 3:15). Ibrani upu deiki di ‘YHWH’ sengnunge. Ibrani upu penge nesaladi, ‘Allah er si sisa men peptepe’ tenen kware kununge. Kware kununga cadi, sundi huruf YHWH angepu sengnunge. Dinino, Allahdi Musa tep, “Gume, ne sida Yahweh kunerure. Asi Yahweh kael keprumdi, asipu erepra ne tep gispal donkamnerume,” pepu. Ibrani nesaladi YHWH sengnung dinin, ‘Angepu sekmepyopda, aupu penada iriwarye kupsurur’ tenen, nun Inggris upu deiki di, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh’ tenenkamrume. Allah er si Yahweh penada telepe pua.}, Dirin Weik ngebodi melipra sun amnyo tara melipra kalengkamsene. Ukupsenedi, duyakankamsene. Sun damai kunedi telep kupra melimsenya deiki di, lyemdonkamsene. 9 Ukusenya deiki di, ataru-ataru yuma sundi ne moropnemum pangeda, ne Yahwehdi gekepra makunkamsene. Tonda sun ikin weik kusere taru, ila di mali pepra, sundi ne tep, “Uo naio, melipseo,” pepnemum pangeda, gekesenedi, ‘Ne akunune,’ pepra melimkamsene.

Yu nengdi yuk neng tep ateng koupra deiami nesala tep, ‘Aneng tep bicau tenerumdi, lortamkamruma’ tenen, peipsisitopu konum kupmumnyopda, telep kupra deipkamsene. Tonda, ikin keca sun nong deiki kusere tep nengeda, sunda, ‘Deiyo er ca, kan ca,’ pepra, buru men bupungdankamrume. Ange utopu, sun kayapu neng tep tulum kuserepa, aneng tep mali upu pepra luludina gume.

10 Tonda, ‘Kankan nesala melimkamep’ tenen, sun jen keca akapsere pangeda, bokrapmumdi, sun jen keca gum neng tep bokra karenkamrume. Aneng melimna tep, pio pe deipra puto di pel donkamrume. Tonda ware nesala do yuma, deiyo men kuamupapu, ateng kouprap, wenemna ati dongoramipa kange mun kange douramenge nesala tep, lortamkamrume. Ukupmum dingeda, sun putan keca karepra melimkamrume. Apepmasentopu konum kupmumnyopda, kunungna kan-kan kumum ngeda, dirin weik kupkamsere. Ada, ne pepsene keca kupmumnyopda, ukutaruda, lukunda neitamai kunungretopu, ikin weik kurum dinin, amenda taruda, komuni taru dirin weik kuramretopu, telep kunkamsere.

11 Ne pepsene keca kumumnyopda, ne Allah Yahwehdi pio tupa talepra dubasenedi, kalengsenepa, teleppu puto di kunkamrume. Tonda, sun tu kalkalai kurumnya peda, nedi sun tep pio tupa-tupa melipra kalengsenepa, sun jen jepmumya peda bounkamsere. Ukupmantoda nimidi koun keca koupmengepa, mo weik ceprepa, telep kupra bongoramretopu, nedi melimsenepa, telep kunkamrume. Utopu tonda me bungnada cena gum di, me pio tupa embaramretopu, pio melimsenepa, teleppu kunkamrume.

12 Sun kuramrum mutu dinin, yu nengdi urupra sikke buktami ngeda, sun pe nesala, Israel nesaladi, ka di tamupra akati arum yuma punupra donkamenge. Tonda pumun ayumnya uruptami ngeda, ka di ton deipmengedi, ange deikipu akati arum yuma deipra donkamenge. Ukupmum pangeda, yuk nengdi epra kael kepmengedi, sun tep upenkamsenge. ‘Sun Israel nesalada, lyom gel beilya dakra taminge cap, gel ati uruptaminge cap, ukuda kange di tamupra akeca yuma lepsisikra wina kael neng kununge,’ penkamsenge. Tonda, sun ati arum yuma cap, bisi capda, yu nengdi ange yuma uruptami dinin, “Ukutaruda, men di bisi dumsisi yamitopu, Israel nesaladi lepsisikra yapmangdi, nimi kunkameng ati dana-dana tara donmange,” penkamsenge.

Allahdi ne gispal dona tep, beipye peingne peipsisi tumi tep, ‘Atumida ila mambul tumi’ tenen, ketenem dinkamrume,” pepu upu

13 Ne Allah Yahwehdi pepsene. Nedi, ne gispal dona tep, nedi wepra deiamsisipa, beipye peingne tumi, Sabat tumi, konum kupre pangeda, sundi ne tep gispal dopra, ne si eremkamnerume. Atumi deiki di sun pe putan keca tenepra, yuk-yuk tali pel ton men donkamrume. Tonda, atumida yuk-yuk karen mutu men embandankamrume. Tonda, atumi deiki di, tali-tali upu men pertamkamrume. Atep ‘Atumida ila mambul tumi,’ tenepra ketenem dimumdi, ne sipu eremkamnerume. Tonda sundi, ‘Allahdi beipye peingne tumi kareramseu ngeda, pio telepe. Allah Yahweh, er tumida, ila mambul tumi tep, atumida nun kange deipmepe,’ tenepra kumumnyopda, nedi telep kupra derinkamsene. Atumida ne mawa tumi cadi, tali pel dona cap, tali-tali upu pena cap, pio men kunkamrume.

14 Ange tenepmumdi, tek sisi ne pepmasen utopu kumumnyopda, sun yumadi ne tepapu tenepra, ne si eremnemumpa, nedi pingpinga kange karenkamsene. Ne tep kange deipra teleppu kunkamrume. Nedi sun tep erepra, telep kupra deipsenepa, ila mutu deiki kumumdi, yuk mutu-mutu kunge nesala weika di talepra, sun ila deiyo neng kunkamrume. Ukupsene pangeda, sun apu bo Yakub tep, ‘Ukupra karenkamkene,’ pepra pediramsi keca cap, telep mutu cap dopropmumdi, adipapu teleppu kunkamrume. Aupu yumada, sun nai bo Allah Yahwehdi konum pepsena tep tek sisi nong kupkamre. Allahdi pepu.