Isa 59 | XteSC | STEP | Anengo gekepneso! Sundi Allah tep, ‘Erda buru puto boun ngebo kurura cadi, nun ikin kuserur ngeda, men lyepropkamsere,’ tenena gume. Tonda, ‘Erda amol kinin ngebo cadi, nun moropmepe ngeda, men gekepsetue,’ tenena gume. Tek sisi ngeda, er puto weik cadi, nun penup upu gekepmanto ngebo kurure.

Isaiah 59

Nabi Yesayadi Yudea tara kurami nesala, sun mali kuraminge tep, wenepu upu

1 Anengo gekepneso! Sundi Allah tep, ‘Erda buru puto boun ngebo kurura cadi, nun ikin kuserur ngeda, men lyepropkamsere,’ tenena gume. Tonda, ‘Erda amol kinin ngebo cadi, nun moropmepe ngeda, men gekepsetue,’ tenena gume. Tek sisi ngeda, er puto weik cadi, nun penup upu gekepmanto ngebo kurure. 2 Dinino, erdi kapul melipra men lyepropmasernge deiyoda ake. Ada, sun mali kun kecapu tupa talepra kuruma tepa. Mali weik tupa kumumnya deiki dipapu, er tep, ‘Uo, melipseo!’ pepra, moroptuma peda, ataruda erdi gekepra men melipkamsere. Sun mali kuruma deiki di, sun cap, sun nai bo Allah cap tep, wilimdidarume. Ukurumnya deiki, erdi men diserure. Tonda, men gekepra melimserure.

3 Sun mali kurum ngeda, ake. Nimi porumupa, sun buru deikida, yapi bepra kuserure. Tonda, sundi mali kun keca weik kuruma cadi, sun buru du yumada, konum mali kweipdanmarume. Tonda, sundi mok upu cap, minina upu cap, tupa-tupa pertamrume. Sun lyemu deiki di kip upu dopra perume. Adeiki di, sunda kika deipra kurumupa, Allahdi derepserure. 4 Tonda, sundi yuk neng tep derepdarumudi, nimi deiyo neng, upu lepsisingna neng damai bemumdi, sun tep, ‘Upu gekepsemumdi, upu bokra lepsisikra deipkuserume,’ pepra mororum dinin, tek sisinge tep gume. Sun kankan di, tenpu ngebo peda, dumsisi kunange tep, aupu pepra men mororure. Sun yumadi, upu lepsisingna deiyo neng damai bemumdi, mok upu cap, minina upu cappu perume. Upu bongdina deiyo neng damai bemumdi, ‘Anengda mali kupmange,’ pepra, bena perum dinin, ada tek sisi upu men perume. Ange gum dinin, sundi, ‘Gume nundi aneng deiki ikin keca deipmepyopda, mali kunange ton cap tapakra kupkamep ja,’ tenerume. Sundi aupu sisingmumnya deiki di, ‘Ange-ange ton kupkamepe,’ teneprumudi, yuk mali kun keca ton tenepmumdi, angepu talepra kurume.

5 – 6 Sundi pio mali kunange tepapu, ‘Angeda ukupkamepe, ange ton kupkamepe,’ tenepra, upu sisingmumnya deiki di, nimi ponange cap, nimi denangepu, keteneiprumudi, mali pelpu dororume. Ukupmantoda, nimi pon yu bal er du deiyamya, amenda taru, adu bongopredi, yu weik balpu dandopredi, nimi topra poramretopu, sun peda ukurume.

Tonda, sundi, ‘Ange kuptepe,’ tenepra kurum ngeda, tek sisi nong men kupkamser ngepu kurume. Talipu kurure. Ukupmantoda, tenipetepso! Sundi gwalema ati dopra, nimi kenekmanto opkal wiptum do? Gume! Angetopu, sundi mali kurumu keca yumada, telep men kupkamre. Ange gum dinin, sun yumadi, mali kuna cap, tali pertamna upu cap, mawa di mok upupu pena cap, minina upu cap pertamumnya deiki di, nimi podana cap, upu di pangdana cap, yuk mali kunange cap ton tapakra kurume. Adeiki di, mali kuna weik ton cap kurume. Ange ukurumunge yumada, tali keca pua.

7 Sundi mali kunange tepapu, ‘Angeda, ukupkamepe,’ tenepra, upu sisingrumudi, tupa-tupa tenerum ngeda, sun ange tenemumtopu, adipapu menmena kupbarume. Ada, sundi, ‘Ukupmepyopda, amenda taru ware kupkamser do? Ikin keca nun damai yankamser do? Yuk neng tep mali kweipkamep do?’ tenen, moupra tenena gum dipapu, mali kecapu tali lupra kurume. Sun kange dipru neitamai tenerumu keca yumada, mali kunangepu kurure. Tonda, yuk neng tep, ‘Popkamep,’ tenepmarumu ngeboda, adipapu lupra ponapu kurume. Sunda, dan mutu do yuma, sun bisi embarumai cap, yuk mutu bena kunkamrumai yumada, nimi popra, akeca yuma gum Kudinapu kurume. Sun atida, walangyopu kunkamsere.

8 Tonda, sunda, nimi pona cap, pangdana cap gum dipapu, tenpu kange doupra telep kunange ton men kael keamruma cadi, ange men kurume. Tonda, sundi dumsisi kunange cap, nimi upu lepsisikra bongdinange ton men kael keamrume. Ukupmantoda, sunda gwalin bisipu yapra embarume. Sun embarum bisipu melipra domyakasenung neng peda, telep keca ton men kunkamenge.

Nabi Yesayadi sun Yudea tara kurami nesala tep upepu.

Sun Yudea mutu nesaladi Allah tep, sundi sun mali kuraminge kael kepdanaminge tep, lap pepi upu

9 Sun Yudea nesaladi Allah tep upepi.

Ukuda, kan Yesayadi lap peipsemum ngeda, nun konum kael kepmepe. Allahda, nun tep men loptapseudi, kau kepseupa, nun deiki di ikin keca deriserepa tupa doronupe. Tonda, Allahdi nun podan neng damai di lyepra men loptapsetuada, nun mali kunange tepa. Lyemna kecada, nun damai kapul men yaue. Ukutaruda, ukupmantoda, nunda, ‘Bereng tamne keteng yaredi, dirine kuramretopu, ila di putaserepa, dan taru yankamaser do?’ tenen, pio dinapu kunupe. Dinino, nun damaida, dirine gum di, pio kunukdongopnapu kupseupa, kunungnaipu kunupe. ‘Dirine di bisi telep epra embankamep’ tenen, dinapu kunup dinin, tupa kunungnapu kuserure.

10 Tonda, ukupmanto, nunda asuru puamre nengdi, ‘Ange taleptene’ tenen, komdaramengtopu, kunupe. Asuru konum mali kupu nengdi, keteng komuni neitamai embanmapya peda, lukunda neitamai embanmangepa, yan giso dungamretopu kuserure. Tonda, nunda gam nesala kunungai kunup dinino, nunda konum derameng nesala utopu kunupe.

11 Nun yumada, ikin weik kupserepa, kwar deiki engena cap, tonda bicau-bicautopu ngolongna cappu kunupe. Nunda, ‘Uo Allahdi lyepropsetue. Erdi nun podan neng damai di loptapsetupa betepe’ tenen, dinapu kunup dinino, ange pio men dinupe. Tonda, Allahdi nun ikin weik kusere ngeda, gum kupra deiptudi lyepropsetue’ tenen, dinapu kunupe. Dinino, ange yumada, kapul men kupseue. Nunda ange putaserepa, tenenup ngeda, karenai utopu kurura cadi, angeda tali tepapu tenenupe.

12 Kapul men lyepropsemumnge deiyoda ake. Ada, tek sisi, nundi Allah kan damai pio mali weik kunupe. Kandi, ‘Angeda kunkamrume, angeda pio men kunkamrume,’ pepra deipsemum upuda, yaninapu kunupe. Nun kaele, nun pe mali weik kunupa menenga di tamupra, nun pepu mali kudiserure. Tek sisi nun pedi kan upu tapra, tupa-tupa mali kunup ngeda, moupra kael kemnupe.

13 Nun pe damai, konum mali kudidanup dinin, kandi, ‘Ukupkamrume,’ peipsemum ngeda, kaukemtamnapu kunupe. Tonda, yuk neng damaida, nundi, ‘Gume, Allah Yahwehda nun walwale, er bisi men dombanupe,’ pepra tamnupe. Nun nai Allah, kan sipu eremamupu dinin, ukutaruda kan damai mar pepkepudi, nunda balila deiprap kupedi, pio yuk gwalin bisipu konum banupe. Malipu kupedi, upu lepsisikra bongdina deiyo neng damai bepedi, yuk neng tep, mali men kupmangepapu, ‘Gume, sunda mali kupmange,’ pepmepedi, ‘Deiyo nengdi aneng wenepkameng’ tenen, minina upu di pertamnupe. Allah kan tep men melipra domyakakenupe. Nundi yuk nesala tep, nun pe kange dipru dipu tenepmepedi, ‘Ikin keca sun deiki konum derinkamepe’ tenen, upu bongdina deiyo neng damai bena, dina di tali mok upupu pepmepepa, aneng deiki ikin keca wenepra derinunge. Adeiki di kan upu yaninupe.

14 Ukupra kunupa deiki di, kandi, ‘Ange-angepu talepra kunkamrume,’ pepra deiamsemum upuda, konum tapmupka cadi, nimi upu lepsisikra bongdinungaida, tek sisi upu men penupe. Tonda, dumsisi kuna ngeda, nun damai di tapmepupa, ukupmantoda, pio karenaito kurure. Nimidi upu bongdinai cap, nimi bulupra upu sisingnungai capda, nimi yuma, dinai di telep dumsisi upu pena cap, telep kuna cap ngeda, kamet pediramengtopu kudinupe. Angetopu bouna di dumsisi kunange peda, nun tara neng yumadi, konum amnyo karekropudi tapmupka tep, tenpu ngebo peda, ange ton men gekenunge. 15 Mali kuna upu men peredi, dumsisi upupu perur ngeboda, nun damai ton men kurure. Atep, ware ngebo do yuma, sundi, “Mali men kunune. Dumsisipu kununa,” pepra pepdarur ngeboda, nun tara kunup nesaladi angebo er deikipu mali kun keca dopra derinupada, er tep mali kupra derinupe.

Allahdi er nyapu sisa, sun lyemna tep keteneipkamra tep, seku upu

Allah Yahwehdi amali-mali weik kunup ngeda, konum dirure. Erdi direpa, dumsisi telep kunange cap, nimi upu lepsisikra bongdinange cap, ton men diramudi, er kange telep men kuramnga cadi, mali kange doupu. 16 Allah erdi diramseua tep, telep dumsisi kuna ngebo tenpu peda belepra tekredi, Allah er nyapu sun malinge gum kudina cap, kange tamupra telep kupra derina cap, pel dopmanto ngebo pio men kupka cadi, erdi, ‘Uo warya tep do?’ tenen, mali kange doupudi, ‘Ne pedipapu ange lepsisikra deipnedi, ka tamupra telep kupra deipkamne,’ tenepu. Utenepka deiki di, Allahda, ila puto ngebo kurura cadi, er pe puto dipapu, er nyapu sisa porami nesala tep, popra yawa poptapu. Ada, erdi, ‘Ne nyapu sisa sun tep lyepropkamne,’ tenepudi, sun podan neng tep, poptapra gum kupra deipu. Er pio dumsisi kururya deiki di, meliprapudi, er nyapu tep lyepropu.

17 Allah erda, er pio dumsisipu kururyada, ukupmantoda, jen talena nengdi, ‘Mar dopsengdi popsenung’ tenen, sun taram damai teng kenengamengtopu kupra, Allah er nong taram deiki di dumsisi kunange deipu. Ukupmantonge ton, sun jen talena nengdi, ‘Gel dopsengdi, nun giso deiki popsenung’ tenen, besi gat keca di gat topi ketekepmengedi, galupra kemamengtopu kupra, Allahdi nimi lyemna deiyo keca doupra, er giso deiki deiprapudi, keneku.

Tonda, nimidi lyom opkal kenekra baramengtopu, Allahdi opkal kenengna utopu kupra, sun mali-mali kurami nengdi, telep neng tep mali kupra deiaminge tep, ‘Tamupra kwang dakamne ja’ tenen, yaudi, aneng tep wenepra popu. Ukupmanto tenpu ton, nimidi bupu opkal dopra, sun nong deiki kenengameng opkal kenekmengedi baramengtopu, Allahdi sun mali kun kecapu talepra kurami neng tep, ila yu kupu ngeda dopra, er nong deiki gwatepra deiprapudi, sun amali neng tep, yana wenepra popramu.

18 Allah erdi, ‘Sun podana nesaladi mali kunung ngeda, sun amali kununga utopu, tamupra kwang dakamne,’ tenepredi, sun damai yana kwang dakredi, menenga keca karepkamre. Atep, ware neng do yuma, sundi, ‘Allahda nun songe’ tenen, er kure keca tamenge nesala tep, ila yu deiki di aneng wenepra poptapkamre. Tonda ange utopu, sun ila laut mokon deipka, pirmanai kunung karen mutu nesala tep nengeda, sun yumadi mali kuraminge tep, erdi wenepra popkamre ja. 19 Tuai nesala ban-ban yumada, Allahdi sun mali kuraminge tep, wenepra popkamrenge konum kupyopda, keteng dangban tara kunung nesaladi ange dingeda, kael kepmengopda, Allah Yahweh er ila puto perur si cap, er cap tep nengeda, kware weik kunkamenge. Angetopu sun keteng yakan tara kunung nesala yumada, Allah Yahweh er pio telep kurya cap, er pe dirine weik cap kuryada, epmengedi kware weik kunkamenge. Allah Yahweh er sepdaro yankamrada, ukupmanto, ila embaramre me deiki, ila kumanya puto yaredi, yana kweiprepa, me kait bukra weleramretopu kupra, puto di sepdaro yankamre. Ange yuma tep nengeda, tuai nesala ban-ban yumadi, er tep kware weik kunkamenge.

20 Allah er puto deiki di, tuai mutu tamupra yankamre taruda, Yakubdi ^{▼▼Yakub – Pumun taruda, ‘Yakub’ pepra seki dinin, aupu deiyoda, ada Israel yala nesala yuma tep seki.} deiamupa dadeipdanen yakarami nesala, er nyapu sisa tep upepkamre. “Ne Yerusalem ^{▼▼Yerusalem mutu – ‘Yerusalem mutu’ pepra sekmupkada, menop taru Ibrani upu deiki di, Sion mutu seki dinin, amutuda tenpua.} mutu ila ati arum neitamai tamupra yankamnada, nimi Lyemna Deiyo Ngebo kepnedi yankamne. Ada, ne nyapu, sun yuma mali kumum keca tapmumdi, tamupra ne tamna kemdongorum nesala lyepkamna tep, yankamne,” pepkamre. Neda Allah Yahwehdi, aupu pepsena tep, tek sisi ange yuma nong kupkamre!

21 Uda, Allahdi aupu pepu. Nedi ne nyapu sisa, sun deikida, ‘Nedi ukupkamsene. Ukupsenyopda, sundi ton ukunkamrume,’ pepra, pedina upu deiki di pepsene. Ne ila puto kure Lek Sambalada, ne nyapu sisa, sun Israel nesala deiki deipkamsene. Tonda, nedi ne pesene upu dopra peterepsenedi, sun sipyal pumbon dongopkamsene. Aupu peterepsenepa, sundi, ‘Angepu akupserepa, pio tep talepra kunkamepe,’ tenepmumyopda, aupuda tupa penkamrume. Pio tep men tamkamrume. Tonda, sundi deipmumpa, dadeidanen bankameng nyapu peda, ne pesene upu dopra, sun deiki peteremkamenge. Anengdi derinkameng nyapu tep, peteremengepa, aneng peda, aupu dopra kael kepmengedi, talenkamenge. Ada, ne Allah Yahwehdi aupu pepsena cadi, tek sisi nong kupkamre ja! Ada, ataru di dipra, doryankamre taru yumada, peterepdanen banapu kunkamrume,” pepsene.

Allahdi sun Israel nesala tep upepra deipu.