Isa 6 | XteSC | STEP | Uda nimi deiyo ngebo er sida, Raja Uzia depu keteng tamun neitamaida, ken mapsa deiki di, Allah epsi. Ukupsi taruda, dinmasipa, Allahda ila nimi deiyo neng bungna keca utopu ngeda, ila eremnange deiki bukmau. Bukmaupa, er lyom opkal kenekmaunge di, Allah er si eremna ati pumbon yumada dekpepmau.

Isaiah 6

Allahdi, ‘Yesayada ne upu peipnepa, jenek kupra lap pena deiyo ngebo kunkamre’ tenen, wepra deipu upu

1 Uda nimi deiyo ngebo er sida, Raja Uzia depu keteng tamun neitamaida, ken mapsa deiki di, Allah epsi. Ukupsi taruda, dinmasipa, Allahda ila nimi deiyo neng bungna keca utopu ngeda, ila eremnange deiki bukmau. Bukmaupa, er lyom opkal kenekmaunge di, Allah er si eremna ati pumbon yumada dekpepmau. 2 Tonda dinmasipa, malaikat weik, sun si Serafimdi dana-dana tara yuma tekra, ongomgenem pepmaipa, sun urasinda utopu kupmaiyada, sun polda 6 kwamu. Sun pol butene di, sun urasin tara kepdongopmai. Ton butene polda, sun yane yuma lelipdongopmai. Utopu sun butene polda, keprapidi lakra embanmaipa, epsi.

3 Ukupra embanmaidi, ton ngebo cap, ton yuk ngebo cap, upu pedanmaipa gekepsi. Ada, sun pedi, sun pe tep, lakra embandanmaidi aupu penmai. “Allah Yahweh, akeca-keca yuma talerumdi, im deiki jen talen malaikat yuma, sun ila deiyo ngebo kurume. ^{▼▼Malaikat “Malaikat sun ila deiyo ngebo,” pepkada, Indonesia upu deiki di, ‘Allah yang Mahakuasa,’ penunge. Ibrani upu deiki di, ‘Allah Sebaot’ penunge. Aupu ‘Sebaot’ penunga deiyoda, ‘Im deiki jen talena malaikat yuma, sun deiki tara ila deiyo ngebo akurure’ tenen, ‘Sebaot’ penunge. Atep, angepu sekmupu.} Allah Yahweh kanda, mali keca tenpunge peda men kukerya tep, kanda pio Lek Ngebo, pio Lek Ngebo, pio Lek Ngebo kurume. ^{▼▼Lek Ngebo pepkada, ada bol kurun tep gum dinin, ‘Mali keca tenpu peda, men kuredi, pio dumsisi kurur ngebo’ tenen, pepke. Tonda, Indonesia upu deiki di, ‘suci’ tonda, ‘khudus’ penunge.} Kanda Lengnapu kumemdi, akeca-keca yuma talepra deiki tara, ila puto weik ngebo kurume. Atep, kan ila mambul cap, ila telep cap, ila dirine cap, kumem ngeda, tuai mutu kunge nesala yumadi, dikununge. Akeca-keca yuma dinunga deiki di, kan ila mambul kumem keca yumada, katuai kurepa, epra kael kemkamnunge.”

4 Sun malaikat Serafim yumadi, aupu penmai taruda, Allah er si eremna ati buplan dam, taplakra deiami co yuma long-long pepudi, akati pumbon neitamai yuma, ket di dekpepu. 5 Ukupupa nedi pepsi. ‘Uo, bicaue. Neda dapopnetupa, depkamtene ja. Angeda tali tep men pepne. Deiyoda, ila mambul keca epman dinin, neda, mali upu pena ngebo kunune. Tonda, ne kune mutu neitamai kikiman kupe nesala yuma peda, mali upupu pedapedi, malipu kunupe.

Ukunup dinino, ne mali ngebodi, ne asuru di ila mambul ngebo dinmane. Ne mali keca akunerepapu, akeca-keca deiki tara kuredi, nimi deiyo talepra kure ngebo, Ila Raja konum epmane. Ada, akeca-keca yuma taleredi, im deiki jen talen malaikat yuma, sun ila deiyo ngebo kuredi, ila eremna cap, ila puto cap kure ngebo, Allah er si Yahweh konum epmana tep, ne depkamne ja,’ pepsi.

6 Upepsi dinin, tenpu im deiki kure ngebo, malaikat Serafim ne damai lakra yanmaudi, uku tupa jenmau kalumda, tau di doupra duyau. Angeda, Allah er gispal dona tep, gam keca popra uku dongonungai di, tau di douprapudi, uku jenmau kalum doupra, ne damai duyaneu. 7 Adoupmaupa, uku jenmau kalumda, ne lyemu deiki deipneudi, aupu pepneu. “Aukuda kan lyemu deiki deipmakenpa, jenmakera tep, adeiki di kan mali kumem keca yumada, Allahdi ange kaukepra daepkeredi, gum kupra deipkere. Kan mali kumem keca wenemna tep, poptapketu dinin, Allahdi kan mali kumem keca konum gum kupra deipkere,” amalaikat Serafimdi peipneu.

8 Upepneu tarupu, Allahda akeca-keca yuma talepra, ila puto weik deiyo ngebodi upu ton pepmaupa, gekepsi ngeda ake. “Ware ngebo wepra deipnepa, ne upu perbenkamre do? Nun upu kai perbana tep, ware ngebodi perbenkamre do?” Allahdi pepmaupa gekepsi. Upepupa nedi pepsi. “Gume, ne akunmana tep, kandi nepu wepra deipnemempa, nedi kan upu lap perbenkamne,” pepsi. 9 Upepsa tep, Allahdi peipneu. “Ne peipken upu doupra, amutu kunge nesala kan-kan peterembenkamrume. Peterembenkamrem upuda ake.

Sun Israel yala nesalada, ne upu pio gekenapu kunkamrum dinin, ‘Deiyo ace’ tenen, betapra men kael kemkamrume. Nedi mambul pel dopra kunkamne kecada, asuru di pio dinkamrum dinin, ‘Deiyo ace’ tenen, betapra men kael kemkamrume. Aupu pepkurume,” Allahdi peipneu. Upepneu dingeda, aupu ton peipneu.

10 Anesalada, ‘Sun kange dipru gat kunkamre’ tenen, ne upu men gekepmanto kuna deiyo keca karepne pangeda, sun kange dipru gatpu kunkamre. Ange utopu, amul kinidongona deiyo keca karepnepa, sun amul di telep kupra men gekepmanto kunkamenge. Tonda, sun asuru puna deiyo keca karepnepa, asuru puprepa, nedi mambul pel donkamne ngeda, betapra men dinkamenge. Ange-ange yumada, sun wenemna tep, men kupnyopda, sun asuru di epmengedi, sun amul di gekepmengedi, sun kange dipru neitamai betapra tenepmengedi, kael kepmengopda, balila kungenge yuma, tapmengedi, ‘Ne damai tamupra yanung’ tenen, pepne.

Ada, ne damai tamupra yatengopda, nedi sun malinge tep, daepnedi telep kupra deiptene dinin, sun mali-mali weik kununga cadi, ‘Ange men kupkameng’ tenen, dipru gat kuna deiyo keca karepnepa, men gekepmanto kuna deiyo kecapu talepra, pio kunkamenge. ^{▼▼Aupu pepkada, Israel nesala keteng tamun, denge pio weika di, malipu kuramya tep, ‘Anesalada, puto di wenepkamne,’ tenepudi pepke.} Allahdi aupu peipupa gekepsi.

11 Upepkopda, nedi tamupra asipetepsi. “Uo, ne nai Allah, kanda akeca-keca talememdi, ila puto weik ngebo kuruma cadi, kan tep asipetepkene. Nimi men gekepmanto kunkameng taruda, ware kuprap taru di, dipru gat nesalapu tupa kunkameng do?” pepra asipetepsi. Asipetepsipa, Allahdi tamupra upepneu.

Amul di gekena gum cap, asuru di dina gum cap, dipru gat cap kunkamenge ngeda, weikanun ton cap, pio akunkamenge. Balilapu kupra kuramengepane, sun wenemna tep, nedi peipnepa yuk mutu yu nengdi, yangopda, sun ati doraminge yuma, urupra sikke buktapkamenge. Sun ati-ati kuramengai yumada, nimi kuna gum tep, ati walangpu kupkamre. Sun wa peraminge yumada, yu nengdi dalupra dopropmengedi, yaniptapmengepa, tu yuma peda malipu kupkamre. Sun kouramenge keca tenpunge peda, telep ton men kupkamre. Ange yumada gum kupkamre.

12 Ukupne dingeda, ne Allah Yahwehdi peipnepa, yuk karen mutu yu nengdi, Israel nesala kunge mutu yuma, yana popbisipmengedi, amutu kunge nesala yumada, ateng koupmengedi, pio karenaipu dubenkamenge. Ne Allah Yahwehdi, amutu kunge nesala enepra dokotepnepa, sun mutu yuma walangpu kunkamre. Sun wenemna tep, ange yuma konum kupnyopda, amutu yumada, gopu kupkamre.

13 Ukupkamne dinin, Israel nesala gung meteka dipu taptenyopda, sepuluh persen ^{▼▼Sepuluh persen pepkada ake. Seratus (100) akaptuopda, sepuluh (10) teppu akapkamre pepu. Seribu (1.000) akapyopda, seratuspu (100) kupkamre.} utonun kutenga peda, amenda taru, ka di ton cap, yuk mutu yu neng yangedi, amutu yuma uku dongopmengepa, uku jeprepa gawal dakamre ja. Aneng peda popnapu kupkamenge. Sun wenemna tep ukunkamne dinin, kwarang co cap, kenai co cap, utopu kunkamenga tep, aco yuma kwepmengedi, co gongapu tamengepane, amenda taru ka di gapu bongoramretopu kupkamenge. Israel nesala metekanunpu tapnepa, gam kunkameng nesalada, co gonga di, ka di gapu bongoramretopu kupkamenga tep, amenda taruda, kange di gonga kepra, teleppu kupbankamenge. Ada, nedi wepra deipkamne yal keca utopu kunkamenga tep pepne. Allahdi peipupa, ne Yesayadi gekepsi.