Isa 60 | XteSC | STEP | Allahdi Israel nesala tep pepu. Yerusalem mutu kurum nesalao, sunda gamapmumdi, kange deipra teleppu kunkamrume. Apepsen ngeda mesum tep men pepsene. Allah er ila dirine dopra sun deiki deipserepa diripsere. Allahdi kange deipseredi, telep kupra derinkamsera tep, bukromumdi, jenek kupra kupmumnyopda, yuk neng yumadi sun dirine utopu keca, sun lyemna tep konum yankur kecada, epkamenge.

Isaiah 60

‘Allahdi Yerusalem mutu kunkameng nesala tep, tamupra telep kupra deipkamre,’ pepu upu

1 Allahdi Israel nesala tep pepu. Yerusalem mutu kurum nesalao, sunda gamapmumdi, kange deipra teleppu kunkamrume. Apepsen ngeda mesum tep men pepsene. Allah er ila dirine dopra sun deiki deipserepa diripsere. Allahdi kange deipseredi, telep kupra derinkamsera tep, bukromumdi, jenek kupra kupmumnyopda, yuk neng yumadi sun dirine utopu keca, sun lyemna tep konum yankur kecada, epkamenge. 2 Tuai mutu kunuknapu kuamudi kepdongomupa, nesala ban-ban yuma, pio ila kunungnaipu kununge. Dinino Allah er si Yahwehda, sun damai di konum yakankamre. Tonda Allah er ila dirineda, sun deiki deipseredi, jenek kupkamre. 3 Ukuprepa, nesala ban-ban yumadi, sun deiki ila dirin kurenge epmengedi, ila kange deipra sun dirinaipu diryakankamenge. Tonda sun damai di ila dirine jenek pepre pangeda, yuk karen mutu nesala, sun ila nimi deiyo kepra talenge neng Raja-Raja neng weika di, adirin beleprenge epmengedi, dipru giproprepa, sun adamaipu yakankamenge. Ada pio telep kupra deipsenepa, ange diryakankamenga tep pepsene.

4 Atep nengeda, sun dipetepso. Sun dana-dana tara di, ‘Ware keca kupmar do?’ tenen, nesala gung pio weik tamupra sun damaipu yakankamenge. Ada sun pe sal nyapu deiamrumnge weika di, pio ila karen mutu di sun kori yakankamenge. Tonda sun ner nyapu weik, sun melimna nerapudi iripra doupmangedi, duyakankamenge. 5 Ange yuma epmemdi, ‘Uo, angeda pio telepe’ tenen, pio telep kange deipra, guipkamrume. Ukupra ila kange deipmumdi aso deiki gang-gang pepkamrume. Ada, sun anesala yumadi, ban-ban yuma karen mutu kunung nesala talepra kunung keca weika di doupra sun kori duyakankamenge. Tonda ila laut mokon ortara mutu kunung nesaladi talenung keca weika di, ila gapung co kipmengedi, laut mokon deiki bengedi, sun Israel nesala damaipu yan deipmengepa. Dinipredi weik kupkamre. Adeiki pio ila kange deipkamrume.

6 Ange utopu, Midian mutu cap, Efa mutu cap di, ^{▼▼Midian, Efa – Amutu buteneda, Arabia tara neitamai kurure. Atarada, me gumai cadi, nimi weik men kurami dinin, ayala nesala buteneda, amutu neitamai embanapu kuramidi, unta bisam weik peirami.} dekankameng unta bisam yuma, karepmengepa, dopropmumdi, sun mutu yumada, sun dipapu yan dinipkamenge. Tonda Syeba tara ^{▼▼Syeba mutu peda, Arabia tara neitamai kurure. Pumun taru, amutu ila nimi deiyo kepra taleramu nerdi, ‘Raja Salomo ila kael ngebo kurura tep, er upu gekepkamne’ tenen, er kori uruna tep diryau. Syeba mutu nengda isomka weik neng kununge.} kunung nesala yumadi, pio kunumna telep keca emas cap, pio nintong telep kun keca, er sida kemenyan cap, sun damai dekankamenge. Akeca-keca dekankameng taruda, Allahdi ila mambul pel dopunge tep, sun anesala yumadi, ‘Allah erda pio mambul kurure. Erda telepe,’ pepra, gispal dopmengedi sun damaipu akeca duyankamsenge. 7 Tonda Kedar mutu nesaladi peirameng domba bisam cap, kambing bisam cap, doupra sun damai duyangedi karenkamsenge. Tonda Nebayot mutu nesaladi jem domba bisam peinung ngeda, sun damai dekankamsenge. Adomba dopropmumdi, neda Allah ne si eremna taru pona tep nengeda, ne karena telepe pua. Agam keca karepsengepa, sundi, akeca popra uku dongopmumdi, ne Allah tep, sun kange deipmumdi, telep kange doupra kunkamrume. Ukupmum pangeda, neda Allah ne si eremna ati, urasin pio telep atida, dirin weik karepnepa, telep kupyopda, nimi yuma epmengedi, ‘Uo, Allah er si eremna ati cap, Allah er capda, pio telep kurure,’ tenen, sun kange pio telep kunkamenge.

8 Ukupmantoda, kumanya di pung peprepa, im neitamai dua dopra sepdaro embaramretopu, tonda pokpok madi, ‘Nati benkun’ tenen, sepdara baredi, er ati lakra baramretopu, ware keca sepdara banmarpa dirum do? 9 Gume, ada mokon deiki embaramre ila gapung co, Tarsis mutu nesaladi talepra embarameng gapung co, nedi peipsipa konum ketenepra deiamya tep, Israel nesala sun nyapu kipra dekankamenge. Ada, pio karen mutu, mokon dana-dana tara sekdongomu mutu neitamai, kunge Israel nesalada, Tarsis mutu talenge gapung co wekmengedi, Israel mutu tamupra dekanmangada sun yuma diso.

Tonda, kunumna weik keca emas cap, perak cap doupra, dekanmangada sun yuma diso. Ukunmanga deiyoda, ake. Ada sun si eremrum Allah, sun nai bo Allah er si Yahweh tep karenkamenge. Tonda Israel nesala pio kalekra melimrur ngebo, Pio Lek Kuna deiyo ngebo, ne Allah Yahweh, ne si eremna tep, dekanmangada sun diso. Ukunkamenga deiyoda, ake. Ada, ne Allahdi, sun Israel nesala tep, pio telep kupra deipsenepa, epmengedi, ‘Uo, angeda mambul weike’ tenen, sun gispal dupra gudina tep, akeca duyangedi, ne tep karenkamnenge.

10 Allahdi Yerusalem mutu kunkameng nesala tep pepu. Upepu, “Sun mutu ongomgenepra ila lyom gel beilya wiamrumpa, yu nengdi, uruptapra sikke buluktamami ngeda, nedi peipnepa, yuk karen mutu kunge nesaladi, yana tamupra wipkamsenge. Tonda, karen mutu kunge nesala, sun ila nimi deiyo neng, Raja-Raja neng weika di, sun Israel nesala tepapu makunkamsenge. Angeda, mesum tep men pepsene. Deiyoda, sun mali-mali weik kuramumpa, ne yu kuamneupa, pumun taru nedi sun wenemna tep, kange mun keca kareramsisi. Sun mali kurumnge tep poptapsetene dinino, ukutaruda, sun tep nedi tamupra tenenedi, bicau kunerepa, pio telep kupra deipkamsene.”

11 Ukupnedi, komuni taru pe, lukunda taru peda, sun gel beilya neitamai buplan bisida, tupa paktapnapu kupkamrume. Ukupmumpa, nedi peipne pangeda, ban-ban yuma kunung nesala, sun kunumna weik talenung keca yala-yala yumada, doupra sun Israel nesala tep kareryakankamsenge. Akeca dekankameng taruda, sun karen mutu kunge nesala, sun Yerusalem mutu neitamai mepra bangepane, sun ila nimi deiyo kepra talenung neng, Raja-Raja yumada, sun amyo tara amenda yakankamenge. Ukunkamengada, ukupmanto ton tara nengdi ton tara neng tep, popbisipmengedi, sun deiyo neng doupra, ‘Ateng koupra wenemnai derirbenkup’ tenen, nimi bisi katuai embaramenga utopu kupkamenge.

12 Ukunkamkeng taru neitamai di, nimi deiyo kepra talengepa kunung Raja neng cap, nimi yala-yala dakunung nesala yuma capda, sun Israel nesala amutara yana bukmengedi, sun amutarapu pel men dopmengopda, ne Allahdi anesala cap, sun talenge keca cap, sun mutu cap tep poptapra gawal daknedi, sikke buluktapkamne ja. Anesala yumada, nedi popra gum kupra deipkamne.

13 Libanon mutu bura tara kapupa, ‘Ada nun mawa keca,’ tenenung nge yumada, doupra sun damaipu duyakankamsenge. Sun duyakankameng kecada, pio kunumna weik co, urasin telep co, sun sida, berangan co cap, cemara co cap, er u co cap yumada, doupra sun damai duyankamenge. Duyangepa, aurasin telep co dopramumdi, neda Allah, ne si eremna ati kamo telep kupra dopkamnereme. Tonda ne Allah yaniryakankamnaida, ne si eremna atida, pio urasin telep kupra betaipnerumpa, nedi akati dirine weik deipnedi, telep kupra deipkamne.

14 Pumun taruda, sun popbisipseidi, sun nong deiki ikin keca deriramsei neng, sundi deipipa dadeipdanen, yakankameng nyapu yumada, sun kori yangedi, sun tepapu gispal dona tep, giso genepdongopra gudinkamsenge. Tonda sun tep malya pepra yap-yap peramsei neng yumadi, sun damaipu yan genepra wekamenge. Ukupsengedi, sun mutu Yerusalem mutu tep upenkamenge. “Uo, amutuda tek sisi Allah Yahweh erdi wepra deiamu mutu, er mawa mutu kurure,” pepra penkamkenge. Tonda, “Uo, Sion mutuda, mali keca tenpunge men kuredi, Pio Lengna Deiyo Ngebo Allahda, Israel nesala kalekra melimrur ngebo, er amutu tep kange derirure,” pepra, Yerusalem mutu tep penkamenge.

15 Pumun taruda, sun mali kuramrumnge wenemna tep, nedi tamsisidi, go karepsipa, yuk karen mutu nesaladi, popbisipseipa, yuk nesala yumadi, ‘Anengda nun songe,’ pepra yap-yap peramseipa, yuk mutu nesaladi sun kori men yakarami. Dinino, ukutaruda, sun tep telep kupra deipsenepa, pio teleppu kunkamrume. Nedi ka tamupra telep kupra deipsene pangeda, yuk yala nesaladi sun Yerusalem kunkamrum nesala tepapu, tupa-tupa kange deipsengedi, pio tep gispal donkamsenge.

16 Ukupmanto, nerapudi sun nyapu tep melipra kalengameng utopu, sun tep puto kunge nesala ban-ban yuma cap, karen mutu ila nimi deiyo kepra talenung neng Raja-Raja neng cap yumadi, kalekra melimkamsenge. Ukusengedi, sun pio telep talenge keca yala-yala yuma, sun Israel nesala putasere taru yumada, kunumna gum, talipu kareryakankamsenge. Ukupmenge pangeda, ataruda, sundi ne si kael kepkamnerume. Sundi ne tep, ‘Teka erda nun Lyemna Deiyo Ngebo kuserure. Erda Allah Yahwehpu kurure,’ tenepra kael kemkamnerume. Tonda, ‘Nunda Yakubdi deipupa, dadeipdanen, yakaramepu nesala, Israel nesalada, Allah Ila Puto Ngebodi kalekra melimserure’ tenen, kael kemkamnerume.

17 Ne Allahdi, sun kunumna tep karenkamsen kecada, yambul telep keca gume. Telep gat keca, er si perunggu perameng kecapu kareptene dinin, ange gum, pio telep kunumna weik keca, emaspu karenkamsene. Ange utopu besi keca karepsetene dinin, ange gum, er yo pununa tep, kunumna weik keca er si perak karenkamsene. Tonda boun co karepsetene dinin, ange gum, er yo pununa tep, gat telep keca, er si perunggu perameng keca karepkamsene. Autopu urasin telep gel karepsetene dinin, ange gum, er yo pununa tep nengeda, gat keca, er sida besi karepkamsene. Ukupsenepa, sun kunkamrum mutuda, yuk neng podana gum dipapu, pio dimpepra, teleppu kunkamrume. Tonda, yuk yu nengdi, ateng kouprapsengedi, ikin pel men dimkamsenge. Ange gum dinin, pio dumsisi kupra, telep kupra kunangepu pepra deipsenepa, teleppu kunkamrume.

18 Tonda sun kunkamrum mutu neitamai di, mali upu pepdangedi, podanapu men kunkamenge. Ange utopu, sun kunkamrum mutu tep, yuk karen mutu yu nengdi, ‘E, Yerusalem mutuda, uruptaptepepa, gum kuptu’ tenen, ‘Anesala porbepedi, sun mutu walangapu kupra deipkamepe’ tenen, men kunkamenge. Tali dimpeprappu kunkamrume. Amali upu ton pengepa, men gekenkamrume. Tonda, sun mutu Yerusalem ati arum ongomgenepra wipkamrum lyom gel beilya neitamai kurumu dingeda, ‘E ukutaruda, nun dana-dana tara abeilya kuretopu, nun nai bo Allahdi pio kalekra lyemserure,’ pepra kange derinkamrume. Tonda, sun beilya neitamai potokrum buplan wengkameng nesala yumadi, ‘Uo, Allah pio telep kurure,’ pepra er si eremengedi, sun akati damaipu wengyakankamenge.

Allahdi, Israel nesala tep, ‘Ila dirine kunkamser ngeda, ne tepa,’ pepu upu

19 Israel nesalao, Yerusalem mutu neitamai kunkamrum taruda, ‘Komuni taruda, keteng dirine ton kupsetue’ tenen, men putankamsere. Tonda lukunda taruda, ‘War dirine ton kupsetue,’ men tenenkamrume. Angeda tali tep men pepsene. Deiyoda, ne Allah Yahweh dipapu, sun kunkamrum mutu neitamaida, ne pe dirin deikipu pio tep kunkamrume. Tonda neda, sun nai bo Allah dipapu, ila dirinepu sun deiki deipsenepa, pio teleppu kunkamrume. 20 Sun mutu neitamaida, ‘Uo sintarada, keteng ortara wengbarepa kunukamsere,’ men tenenkamrume. Sun mutuda pio men kunungkamre. Tonda sun damaida, ‘Uo, lukunda neitamaida, war dirin ton metek kupbarepa, kunungkamsere,’ men tenenkamrume. Ada tali tep men pepne. Deiyoda, ne Allah Yahweh, ne dirine dipapu, sun kunkamrumai pio tep adeipsenepa, dirin pio akunkamsere. Ange yuma tep nengeda, sun ngolokra mali peramrum taruda, konum sirya gawal dasere. Ka di ton cap mali pepra, men engenkamrume.

21 Yerusalem talepra kunkamrum nesala yumada, pio teleppu kungedi, dumsisipu kunkamenge. Tonda sun kunkameng mutuda, gum men kupkamre, dinin pio tep akaprepa talepra kunkamenge. Ada tali tep gume. Nimidi, ‘Nun koun keca koupmepepa, amenda pakredi, weik bolopkamre’ tenen, yambul yal keca kouramengtopu, nedi sun Israel nesalada, ne pe Allah dipapu koupneto kuamsa tepa. Sunda pio telep-telep kunkamrumada, ne pe buru cap, ne pe puto cap deiki di, mambul pel doramsipane, siryada, pio telep kunkamrume. Ange yuma pel doramsinge deiyoda, ‘Nesala ban-ban yumadi, ne sipu eremkamneng’ tenen, pel doramsi. Atep, angeda tek sisi nong kupkamre ja. 22 Amambul pel dopsene pangeda, sun Israel nesala kan-kan di, tenpu yala neng gung metekpu kuptenga peda, amenda taruda, nyapu pio weik deipmengedi, gung weik kupbankamenge. Ware metek yala neng do yuma, ukutaru metek kutuma peda, amenda taru, nedi telep kupra deipsene pangeda, sundi nyapu weik deipmengepa, nesala pio weik kuprepa, ila puto nesala kunkamenge. Ange yumada, ne Allah Yahwehdi tenepsitopu, ataru konum kupre pangeda, nong tek sisi kupkamre ja. Angeda, men gum kuptue, tek sisi kupkamre. Ne Allah Yahwehdi pepsene. Allahdi pepu.