Isa 61 | XteSC | STEP | Nabi Yesayadi pepu. Allah akeca-keca yuma talepra, pio puto weik deiyo ngebo, Allah Yahwehdi, ‘Ukupkamne,’ teneretopu kurure. Er Sambala ila puto ngeda, ne deiki deipneue. Allah Yahweh ukupneudi, ne tep ‘Erdi kai telep upu perbenkamre’ tenen, wepra deipneue. Ada kan-kan kunung nesala cap, kange mun kange doupra, kunung nesala cap tep, penkamrume. Dipru pu jerepa, ikin kange doupra kunge nesala tep, “Allahdi sun dipru kwa dipra melimkamsere,” pepra, lap penkamrume. Tonda mali men kurami dinin, wenemna ati neitamai bungnung neng tep, “Allahdi lortamkamsere,” pepra lap penkamrume. Tonda sun asuru pupupa komdangedi, kunungna kankan kunge nesala tep, “Allahdi sun asuru laipkamsere,” pepra lap penkamrume. Sun yuma tep, “Allahdi lyepropkamsere,” pepra, ‘Perbenkamre’ tenen, Allah Yahwehdi ne wepra deipneue. Nabi Yesayadi pepu.

Isaiah 61

Allahdi, “Kange mun kange doupra kunge nesala lyepropkamna tep, gekepmumdi kange deipkurume,” pepu upu

1 Nabi Yesayadi pepu.

Allah akeca-keca yuma talepra, pio puto weik deiyo ngebo, Allah ^{▼▼Allah – Acada, Ibrani upu di, ‘Yahweh’ cap, tonda, ‘Adonay’ cap pepra sekya cadi, nundi aupu deiyonge jenek kupra sekmupu.} Yahwehdi, ‘Ukupkamne,’ teneretopu kurure. Er Sambala ila puto ngeda, ne deiki deipneue. Allah Yahweh ukupneudi, ne tep ‘Erdi kai telep upu perbenkamre’ tenen, wepra deipneue. Ada kan-kan kunung nesala cap, kange mun kange doupra, kunung nesala cap tep, penkamrume. Dipru pu jerepa, ikin kange doupra kunge nesala tep, “Allahdi sun dipru kwa dipra melimkamsere,” pepra, lap penkamrume. Tonda mali men kurami dinin, wenemna ati neitamai bungnung neng tep, “Allahdi lortamkamsere,” pepra lap penkamrume. Tonda sun asuru pupupa komdangedi, kunungna kankan kunge nesala tep, “Allahdi sun asuru laipkamsere,” pepra lap penkamrume. Sun yuma tep, “Allahdi lyepropkamsere,” pepra, ‘Perbenkamre’ tenen, Allah Yahwehdi ne wepra deipneue. Nabi Yesayadi pepu.

2 Allah tenepudi wepra deipneu ngeda, Allah Yahwehdi, “Anesala, sun tep lyemna taru konum damai kupka tep perbenkurume,” pepneu. Ada kange mun kange doungedi, engepra kunge nesala tep, “Dipru kwa dipra melimkamsere,” pepra lap penkamrume. Tonda, sun podan neng tep, “Kwangdangkamsere,” pepra lap penkamrume. ‘Upepra perbenkamre’ tenen, Allahdi ne tep wepra deipneue.

3 Erdi tenepneudi keteneipneu kecada, ake. Ada, ‘Uo warya tep kupneu do?’ tenen, ikin kange doupra kunge nesala cap, kange mun kange doupmengedi, mali pepra kunung nesala cap tep, ‘Pining kange douna cap, kange deipra telep kuna cap, Allahdi anesala tep ukupra akeca karenkamra tep, lap perbenkamre’ tenen, wepra deipneue. Tonda, Allahdi nesala tep, telep kupra deipne pangeda, sun anesala ukungedi, ikin kange doungenge tapra, teleppu kungedi, kange lon mut penkamenge. Ukupmanto ngeda, anesaladi Allah teneretopu pio dumsisipu kupmengopda, yuk neng epmengedi, upenkamenge. “Uo, anesalada, ila co tekredi, teru kwangamretopu kununge. Sun anesalada, Allah Yahweh er pedi koupu co utopu nesala kununge,” penkamenge. Ukupmengedi, telep kupra kungedi, dumsisi kecapu kunge pangeda, yuk neng epmengedi, “Tek sisi Allah Yahwehda, ila telep kurure,” pepra, er si erepra gudinkamenge.

4 Allahdi Israel nesala tep pepu. “Pumun taru ati arum doramyai dinin, sun podan nengdi, urupra tamipa walangpu kupkaida, sun Israel nesaladi ka di tamupra donkamrume. Tonda nimi kurami mutu dinin, gum kupipa dimbulung peramu mutuda, sun Israel nengdi, kange di tamupra dopmengedi amutu neitamai kunkamenge. 5 Uo, ne nyapu sun tep nimi bo neng, yuk karen mutu nesaladi melimkamsenge. Ada nimi bo nengdi sun domba bisam cap, yuk yala-yala yuma peinkamrum keca yuma cap, melipra peinkamsenge. Tonda sun wa yuma cap, sun anggur tapu du wa cap melipra penkamsenge.

6 Yuk nengdi sun Israel yala nesala tep, “Sunda Allah cap, nimi cap, antamdina deiyo neng kununge,” penkamsenge. Upepsengedi, “Sunda Allah er si eremna ati pumbon pel dona deiyo neng kununge,” penkamsenge. Yuk karen mutu nesala yumadi, sun anesala talepra kunge kunumna weik keca yuma cap, sundi dounung keca cap yuma doupra, sun Israel nesala tep kareryakankamsenge. Ukupsenge pangeda, sun akeca yuma talemumdi, pio kange deipra kunkamrume.

7 Sun Israel nesala, pumun taruda, yuk karen mutu neng amutara kuramum taru neitamai di, ‘Uo nun pio mali kuramupka tep akunmape,’ tenen, ali dangkamrume. Sun mali kuramrumnge tep, ali dangamrumpa, sun yuk mutu nengdi, sun Israel nesala tep, nyek-nyek pepra nalemamsei. Ukuramseipa, sunda kange mun kange doupra kuramruma tep, ali dangkamrume pepsene. Dinino, amenda taruda, ali dangamruma yo pununa tep nengeda, ne Allahdi pio telep keca ue butenenge utopu kupra ^{▼▼ue butene taru – Allahdi ange pepka deiyoda ake. Ada ali dangami taruda, yambul weik kurami dinin, amenda pio telep kunkameng taruda, pio weik kunkamre. “Dua lipat karenupe,” peramengetopu, pepu.} karenkamsene. Ukupra karepsene pangeda, akeca-keca yuma weik kuserepa, kange deipra pingpinga di pio kunkamrume. Angeda, men gum kupkamre, pio akunkamsere. Allahdi pepu.

8 Allah Yahwehdi pepu. Nimi wenepra upu bongdina deiyo nengdi, dumsisipu kupmenge pangeda, ukupmenga tep, ne kange derinune. Dinino, mali kun keca yala-yala yuma cap, upula dona cap, ton nengdi ton neng tep, yu kuprepa mali kudidange keca yuma cap tep, ‘Ange yumada ne songe,’ tenenune. Ne Allahdi, ‘Israel nesalada, ne mawa nesala kununga cadi, pio men tamkamne,’ tenenedi, keteng tamun weika di, kange mun kange doupra kuraminge pununa tep nengeda, nedi sun tep, pio telep kun keca kunumna karenkamsene. Ukupra nedi sun tep, “Ukunkamsene,” pepra pedina upu peipnyopda, angeda pio men gum kupkamre. Tek sisi nong kupkamre. 9 ‘Pio kunkamre,’ pedina upu pepsene pangeda, sun Israel nesaladi deipmumpa dadeipdanen, bankameng nesala yuma tep, yuk karen mutu neng yumadi, kael kepmengedi, gudinkamenge. Nedi sun tep, telep kupra deipsenyopda, yuk nesala ban-ban yuma epsengedi, “Uo, Israel nesalada, Allah Yahwehdi tek sisi telep kudirure,” penkamsenge. Allahdi Israel nesala tep peipupa, nabi Yesayadi sekra deipu.

10 Nabi Yesayadi pepu. Amenda taruda, Yerusalem mutu kunge nesaladi upenkamenge. “Nunda Allah Yahweh tepapu ila di kange derinupe,” penkamenge. Tonda, “Nun nai Allah tep, nun kange telep kuserepa, pingping kange dounupe,” penkamenge. Nimidi telep lyom opkal kenengamengtopu, Allahdi dumsisi kuna deiyo keca weika di kareserepa, teleppu kunkamepe. Tonda, opkal kenengamengtopu, Allahdi nimi lyemna keca karenkamsere. Ukupkamsera tep, ukupmanto ngeda, nimidi ner dopkure taruda, er giso deiki kwerya telep keca kupra yakaramretopu, Allahdi Israel nesala tep, pio telep kudinkamsere. Utopu, nimi dopkun tenepmenge nerapudi, kunumna weik keca, emas cap, perak cap, kunumna weik gel cap, sun nong deiki garangamengtopu, Allahdi Israel nesala tep pio telep kudinkamsere.

11 Ukupmantoda, yal keca gwekmengepa bongopredi, weikanun neramre utopu, Allah Yahwehdi pio dumsisi kupkamrenge, nimi lyemna keca kareprepa, lyemkamra deiki di, nesala weik kupbankamre. Ada, nimi lyemna upu peterep embangepa, nesala weika di teka tenepmengedi, tapakbangepa, teka tenena nesala pio weik kupbankamenge. Allah Yahwehdi, akeca-keca yuma taleredi, ila puto weik deiyo ngebo kurura cadi, erdi, ‘Ukunkamne,’ teneretopu, er puto di kunupsek pen pel dorure. Ukurura cadi, Allahdi lyemna keca weik karepyopda, nesala ban-ban yuma, Allah er kunkamre keca epmengedi, Allah er sipu erepra gudinkamenge.