Isa 62 | XteSC | STEP | Allahdi sun Israel nesala tep pepu. Sion mutu kurum nesala tep, tupa dim penapu men kunkamne. Ange gum dinin, sun lyemna tep ne upu penkamne. Tek sisi sun Yerusalem mutu ila ati arum neitamai kurum nesala tep, tali dim pepra men bungkamne. Ange gume dinin, teknedi neda dakra men kunkamne. Menop taruda, nedi, ‘Ne nyapu sisa loptapnedi lyepropkamne ja!’ pepra, pedina upu pepsa tep, tek sisi mambul pel donedi ukuramnepane, sun Israel nesala tep, sun ikin kange doupra kunungai di loptapnedi, lyepropkamne. Ukupnyopda, ange yumada ila dirine yaredi diriramretopu kupkamre. Nimi yumadi ange epkamenge. Ange utopu, ukupmantoda, nimidi weica upmengepa, uku bu jerepa, nimi yuma diramengtopu, Israel nesala lyepropkamne ngeda, jenek kupra deipnepa, nimi yumadi epkamenge.

Isaiah 62

Allahdi Sion mutu kunge nesala lyemna tep menmena yankamra tep, pepu upu

1 Allahdi sun Israel nesala tep pepu.

Sion mutu kurum nesala tep, tupa dim penapu men kunkamne. Ange gum dinin, sun lyemna tep ne upu penkamne. Tek sisi sun Yerusalem mutu ila ati arum neitamai kurum nesala tep, tali dim pepra men bungkamne. Ange gume dinin, teknedi neda dakra men kunkamne. Menop taruda, nedi, ‘Ne nyapu sisa loptapnedi lyepropkamne ja!’ pepra, pedina upu pepsa tep, tek sisi mambul pel donedi ukuramnepane, sun Israel nesala tep, sun ikin kange doupra kunungai di loptapnedi, lyepropkamne. Ukupnyopda, ange yumada ila dirine yaredi diriramretopu kupkamre. Nimi yumadi ange epkamenge. Ange utopu, ukupmantoda, nimidi weica upmengepa, uku bu jerepa, nimi yuma diramengtopu, Israel nesala lyepropkamne ngeda, jenek kupra deipnepa, nimi yumadi epkamenge.

2 Ukupne pangeda, tuai nesala ban-ban yuma, dakunung neng yumada, nedi, ‘Ne nyapu sisa, sun Israel nesala tep loptapnedi, lyepropkamne,’ pepra, pedina upu pepsi ngeda, konum kupnepa, katuai di epkamenge. Tonda tuai mutu neitamai yuma, nimi deiyo kepra Raja kunge neng ban-ban yuma talenge nengdi, Israel neng tep, sun tamupra telep kweipsenepa, pio telep kunkamrum ngeda, ila dirine diriramretopu kuprepa, epkamkenge. Tonda ne Allah Yahwehdi, sun tep, ukupu si sipepsenepa, yuk nesala yuma ange gekepra kael kepmengopda, sundi sun Israel nesala tep, ukupu sipu sipenkamsenge. Ada, sun ka tamupra pio telep kupra deipkamsenetopu, ne Allah Yahweh dipapu sun tep, asi sipepkamsene.

3 Konum pio telep kweipsenyopda, ukupmantoda apepsene. Ada, nimi deiyo talepra kunge Raja nengdi, petenkemna tep, sun giso deiki galuna keca, urasin pio telep keca, er si mahkota ngeda, sun buru di talepra diramengedi, kange deriramengtopu, neda sun nai bo Allah Yahwehdi, ne buru deiki di, sun ton talenkamsene. Ne puto deiki di sunda pio telep kunkamruma cadi, nimi yuma epsengedi, ‘Uo, sunda urasin pio telep-telep nesala kununge,’ tenenkamsenge. Angetopu ukupmantoda, Raja neng, sun domenge nerapudi, giso kourameng lyom opkal, pio urasin telepnge akuramretopu, nedi sun Israel nesala tep, ka tamupra pio telep kupra deipsenyopda, neda sun si eremamrum Allahdi, talepsenedi, pio urasin telep kupra deipkamsene.

4 Nedi sun tep ka tamupra telep kupra deipsene pangeda, yuk nesaladi, sun tep nengeda, ‘Sun Israel nesalada, Allahdi konum tapudi luproue,’ pepra, sun si tep, men sipenkamsenge. Tonda, angetopu, sun kurum mutu yuma tep nengeda, yuk mutu kunge nesaladi, ‘Uo sun Israel nesala kurami mutu yumada, Allahdi konum taproupa, ati walangyopu kwamu mutu, pio mali mutupu kurure,’ pepra, tupa men penkamenge. Ange tupa men penkameng dinino, ne Allahdi sun tep nengeda upenkamsene. ‘Sun anesala tep nengeda, tupa bicau tenenedi, sun tep ila di kange derinuna cadi, sun sida ‘Hepsiba,’ pepra, si sipenkamsene. Tonda sun kurumu tara mutu-mutu yuma tep nengeda, ukupu si, ‘Beula’ pepra, si sipenkamsene. Ada, ‘Nimi dopu ner tep, ila di bicau teneredi, aner doramretopu, sun mutu tep, neda ila di kange derinune,’ tenena tep, asi sipenkamsene. Ada, ne Allahdi sun cap, sun mutu yuma cap tep, kange deipnedi, tupa tenenkamsena tep pepsene.

5 Tonda, ukupmanto ngeda, tenpu kaber ngebodi, tenpu ner tep, mun peramreyanen, doramretopu, Yuda yala nengdi, Yudea tara mutu tu yuma tep, kange di ton cap, teleppu kange deipmengedi, atu yuma dopropkamenge. Ukupmanto ton, ner don ngebodi, er dopkamre ner yakanmarepa, epredi kange deriramretopu, sundi er sipu eremrum Allah, erdi sun Israel nesala tep, kange deipkamsere. Sun ketekepra deipsisi ngebo, ne Allahdi sun Israel nesala tep dopkamsene.

6 Ne Allahdi Yerusalem mutu ila ati arum ongopgenepra, lyom gel beilya wipyai deiki, ‘Nun podan nengdi yana popsenung,’ tenena tep, kalengna deiyo neng ton wepra deipnepa, sun amutu neitamai kurum nesala tep kalengkamsenge. Sun anengda keteng komuni pe, lukunda neitamai peda, tali dim pepra men kunkamenge. Dinino, pio tupa-tupa ne Allah Yahweh tepapu tenengedi, “Nun nai Allaho, kandi nun tep pedina upu deiki di, ‘Ukupra telep kweipkamsene,’ peipsemum ngeda, tupa tenenapu kunkamrume,” pepra kunkamenge. 7 Ne Allahdi Yerusalem mutu cap, sun Israel nesala cap, kapul tamupra dopropnedi, puto men keipsenepa, yuk mutu nesala ban-ban yumadi, men kael kepsengedi, ‘Uo, Yerusalem mutuda tek sisi pio mambul weik mutu kurure,’ kapul men penkamseng taruda, sun akalengna deiyo nengdi, ne Allah tep, sun upu tali dim pepra men kunkamrume. Kau kemna gum dipapu, sundi ne tep, upu pepra pio moronapu kunkamnerume.

8 Tek sisi, ne Allahda, ne dumsisi puto buru ereipnedi, sun tep pedina upu deiki di konum pepra deipsisi. Ada, ne ila puto buru erepra, mambul pedina upu pepsenedi, tek sisi ange kupkamsene. Aupuda, ake. “Nedi go men karepnyopda, sun karen mutu kunge yu nesaladi yana, sun Israel nesaladi kourum gandumda, upula dopra men jepropkamenge. Tonda, go karepnepa, sun ikin kange doupra pel doramrumanen, nong kepu anggur du dakra, me jena tep purupra, ketenepra mawa deiamrum meda, yuk karen mutu jen talen nengdi yana, ange dopra jepropmengedi, gawal men dangkamenge. Angeda men kupkamsenge, pepsene.

9 Yuk karen mutu nengdi, sun keca upula men dopropkameng dinino, sun wa pepra, gandum koumrumnge doupra deriryakarum ngeda, sun pedi ange dopra jerumudi, ne Allah tep, ne sipu eremkamnerume. Tonda angetopu, sun anggur wa pepra kouprumupa, du mouramrenge deiprumudi, amenda taru du dakra derinkamrum ngeda, sun pe dipapu ne Allah si eremna ati damai, pio lengnaida, sun kurumu taru dipu ange jenkamrume.

10 Sun Yerusalem mutu kurum nesalao, sunda Yerusalem ila ati arum di tapra bura tara bisi bana tep, buplan bisi dipapu gupsaka bankamrume. Anesalao, sun kurum mutu tapra, bura bana tep bisi buplanda, pakrumudi, kirikra bura tara benkurume. Tonda, sundi tu palipmumdi, erepra telep pala bisi yapra deipkurume. Ayapra deipkurum bisi neitamai kwamre gelda, palipra lukrumudi, yukai donokamrume. Deiyoda, orkaren mutu nesaladi, Yerusalem mutu kunkameng nesala tep, tapmengedi, melipra duyankameng’ tenen, sun Yerusalem mutu nesala pe kurumai yakankamenga tep, pala bisi neitamai elepu gelda, dopra donokurume. ‘Karen mutu nesala yana epkameng’ tenen, “Yerusalem mutu yakan bisida ake,” pepra, sekrumudi, petenkemna tep, pala opkal deiki sekrumudi, abisi deiki bepekra gerekeipkurum opkal, er sida spanduk, sekra deipkurume.

11 Ne Allah Yahwehdi, ‘Im sirik, mutu sirik, ada tuai mutu ban-ban yuma kunung nesala yumada, aupu gekepkameng’ tenen, aupu pepra deipsene. “Sun yumadi, Sion mutu ^{▼▼Sion mutu – Sion mutu pepra sekinge deiyoda, Yerusalem mutu kurami nesala cap, Yudea tara neitamai kurami nesala cap tenena tep seki.} kunung nesala, ada Yudea tara neng yuma tep diso! Sun lyemna deiyo ngebo Allah konum yakanmasere! Neda mepra yakanmanpa amendada, ne nyapu sisa, men di yuk karen mutu dubenami dinin, ukuda nedi konum lyepramsi Israel nesala melipra yakanmange! Sun Sion mutu kunge nesala yuma tep, aupu lap penkamrume.”

12 Ne Allahdi pepsene. Yerusalem mutu tamupra yankameng nesalada, nedi ukupu si karepnepa, nesala ban-ban yumadi, sun si tep Upenkamenge. “Allahdi konum Loptapra Lyepropu Nesala, ‘Sunda ne mawa nesala kunkameng’ tenen, konum wepra deipka tep, sunda, ‘Pio Lengna Nesala,’ pepra si sipepkamsenge. Tonda, ‘Allah Yahwehdi, erda ikin kuna neitamai di, Loptapra Lyepropu Nesala,’ pepra, si sipenkamsenge. Tek sisi sun Yudea tara nesala tep pepsene. Nimi ban-ban yumadi, sun ukupu si tep, ‘Sunda Allahdi pio epetepudi, Epra Loptapra Lyepropseu Nesala,’ pepra, si sipenkamsenge. Tonda, Yerusalem mutu tep nengeda, nimi yumadi, amutu tep, ‘Allahdi Men Tapu Mutu,’ pepra si sipenkamenge.

Allahdi sun Yudea tara Israel yala nesala tep, amenda kupkamunge tep pepu.