Isa 63 | XteSC | STEP | Ila ati arum domidi kuramyai, tenpu ngebodi kalekra dinmaupa, yakanmau ngebo tep Yesayadi pepu. Edom tara neitamai dinin, Bozra mutu di yakanmau ngeboda, er kenekmau opkal deikida yapi bi bapmaupa, yapi bi kupmau. Angeboda, pio telep opkal kenekrapudi, puto di yakanmaupa, nimi ati kalekmau ngebo epudi, asipetepu. “Kanda ware ngebo yakanmarem do?” pepra asipetepu. Upepra asipetepupa, ayakanmau ngebodi tamupra pepu. “Neda dumsisi upu pena ngebo yanmane. Neda ila puto ngebo kununa cadi, Allah er mawa nesala yuma tep, sun Lyemna Deiyo Ngebo kunune. Ne puto weik kununa cadi, sun yuma tep lyepropsetene,” pepu.

Isaiah 63

Allah Yahwehdi, er tep, ‘Nun songe,’ tenepmengedi, mali kunge nesala yuma popbisipkamra tep, pepu upu

1 Ila ati arum domidi kuramyai, tenpu ngebodi kalekra dinmaupa, yakanmau ngebo tep Yesayadi pepu. Edom tara neitamai dinin, Bozra mutu di yakanmau ngeboda, er kenekmau opkal deikida yapi bi bapmaupa, yapi bi kupmau. Angeboda, pio telep opkal kenekrapudi, puto di yakanmaupa, nimi ati kalekmau ngebo epudi, asipetepu. “Kanda ware ngebo yakanmarem do?” pepra asipetepu.

Upepra asipetepupa, ayakanmau ngebodi tamupra pepu. “Neda dumsisi upu pena ngebo yanmane. Neda ila puto ngebo kununa cadi, Allah er mawa nesala yuma tep, sun Lyemna Deiyo Ngebo kunune. Ne puto weik kununa cadi, sun yuma tep lyepropsetene,” pepu. 2 Akati kalengna ngebodi, ayakanmau ngebo tep tamupra asipetepu. “Ware keca deiyo tep, kan kenekmarem opkalda, anggur tapu me purunmange neng bi bamdaramengtopu kupmarem do?” pepra asipetepu.

3 Upepra asipetepupa, ayakanmau ngebodi tamupra pepu. “Neda anggur tapu du dakra me purunmangai kunmange neng, sun opkal deiki bi keca bamamretopu, neda mali-mali kun neng weik ponmanu taruda, ne opkal deikida yapi bapdanmane. Amali nesala ponmanu taruda, yuk karen mutu neng ton men melipmanunge. Ne dipapu amali neng popbisipmandi gawal dakmane. Atep abi bapnere ngeda, anggur mokon bi gume. Ada, nimi yapi bapdanmanere. Ada, nesala ban-ban yuma mali kungepa, ne tulum kunerur nesala yuma tep, popra yaniptapmanpa, sun yapida abapmaner adano. Sun yapi weik kunmaua cadi, ne opkal yuma yapi bapmanere,” pepu. 4 Aneng poptapmana deiyoda, ake. Ada pumun taru di ne teneramsitopu, ataru konum kupmara tep, ne nyapu Israel nesala tep popbisipi neng kwangdakmane. Ne mawa nesala, Israel neng tep popbisipidi, ‘Ateng koupra deiamya neitamai di, loptapnedi lyepkamne,’ teneramsi taru konum kupmaua tep, amali kun neng popmanue.

5 Mali neng pon taruda, ‘Yuk nengdi ton melipkamneng’ tenen, enmanu dinin, ne tep melipmanto neng ton pio men epmanua tep, men melipmanenge. Melipmanto neng ton pio men kunmangua tep, ‘Uo,’ tenepmanue. Utenepmanu dingeda, ne pe puto deiki dipapu amali kun nesala yuma poptapmaue. Tonda ne yu weik kupneupa, tenpu pe ton tamna gum dipapu, anesala yuma popra gawal dakmanu. 6 Ne ila tulum kupneua deiki di, ban-ban yuma mali kurami nesala popra yaniptapmanu. Ukupmanuada, ne yu weik kupneua tep, sun anesala yuma tep kange yawaramne keca karepmanupa, sun nong yuma ikin kupmaua deiki di, ne men popmanto kupmanunga tep, ne dipapu sun tep popra gawal dakmanue. Ukupmanu di, sun yapi dopropnudi, tu deiki diktapmanupa embenmau.

‘Allah Yahwehdi Israel nesala tep telep kupra meliamu ngeda, tupa tenenkamep’ tenen, ange tep, pepu upu

7 Allah Yahweh, er kange dipapu, Israel nesala tep telep kupra meliamu ngeda, ‘Nimi yuma gekenkamenge’ tenen, lap penkamne. Amambul pel doramunge yuma tep nengeda, nesala yumadi, Allah tep, er si erepra gispal donkamenge. Nun nai bo Yahwehdi meliamseu ngeda, men nukmanto kuretopu pio weika di lap penkamne. Yuk yala nesalada, pio men meliamu dinin, nun Israel yala nesala tep nengeda, weika di meliamseu. Nun mali kuramupunge tep, tali lupra poptapsetu dinin, bicau teneramseudi, lyemdoramseu. Allahdi nun Israel nesala tep, tamna pio gum dipapu, ila di bicau teneseredi, melimserura deiki di, lyemserure.

8 Allahdi nun Israel nesala tep lyemserurada, mesum tep gume. Allahdi upepseu. “Tek sisi Israel nesalada, ne nyapu kununge. Sunda, ne mawa nesala kununge. ‘Anengda ne nyapu sisa cadi, sundi ne tep men yanirtamkamnenge,’ teneramudi peiamseu. Allahdi uteneramnga tep, ‘Neda, sun Lyemna Deiyo Ngebo kunkamne,’ tenepudi pedina upu pepra deiamseue. 9 Allah bicau teneramseudi, ‘Israel nesala lyemkamne,’ teneramseua tep, Israel nesala nun damai ikin keca yakaramseupa, ikin weik kuramepu taru neitamai yumada, er peda ikin kange douramu.

Ukuramnga cadi, ikin kuramepuai di, lyepropseu ngeda, ada er damai kuramu malaikat dokotemamupa, men lyepramseue. Tonda, yuk melimna neng ton dokoteramupa, men lyepramsei. Ange gum dinin, nun ikin kuramseunge yumada, Allah er dipapu lyemdoramseu. Allahdi, ‘Ne nyapu bicaue, menmena men wenepkune’ tenen, melipra lyemdoramseu. Pumun taru keteng tamun denge weike neitamai yuma, Allahdi nun apu yapu Israel nesala tep, melipra doupra embaramseue.

10 Allahdi Israel nesala weika di meliamu dinino, sundi er tep, ‘Nun song’ tenen, er upu yanirtamamipa, Allah er Lek Sambaladi, ‘Uo warya tep kunung do?’ tenen, mali kange doupra dipru pu jeramu. Ukuramu pangeda, Allah er Lek Sambala dipapu Israel nesala sun wenemna tep porbisiramu.

11 Allahdi Israel nesala tep wenemamupa, adeiki sundi moupra tenerami. Pumun taru Musa cap, sun apu yapu cap, kikiman embaraminge tepapu tenipetepra kurami. Ukuramidi upepi. “Musadi nun co puna neng, Mesir mutu kuramipa, duyakaramu Allahda, ukutaru dan kunmar do? Nun apu yapu yakarami taru, Bi Laut mokon neitamai bokra, dan-dana kepropupa, aneitam bisi mepra baramupa, sun amenda barami. Dinin, nun nai bo Allahda, ukutaru dan mutu kurur do? Ukupmantoda, domba bisam peina deiyo ngebodi, er domba bisam tep melipra peiramretopu, nun apu bo Musa tep melipra pediramu Allahda, ukutaru dan mutu kurur do? Tonda, pumun taru kurami Israel nesala, sun kankan, er Lek Sambala dokotemamu Allahda, ukutaru dan mutu kurur do? Konum tapseu do?” pepra asipetedarami. Ange yumada, sun Israel nesala mali kuramipa, Allahdi sun tep wenemamu taruda, sun pe nesalapu asimpetedarami.

12 Allah Yahweh, er ila puto deiki di, Musa meliamupa, ila mokon damai yan tekudi “Melipseo,” pepra moropupa, aila mokon deiamnga, adipapu neitamai bokra, dan-dana kepropupa, aneitamai bisi gelal sepropupa, nun co puna nengdi yanipra abisi bei. Allahdi amambul pel kunupsek pepra dopunge tep, nesala ban-ban yuma gekeramidi, er si eremami. Israel nesaladi, “Apel doramu Allahda, ukutaru dan mutu kurur do?” pepra asipetepdai. 13 “Ila karu mokon deiamnga neitamai di melipupa, yanami Allahda, dan mutu kurur do?” pepra asipetepdai. Tonda, kuda bisamdi katauai mutu tali lupra embaramre utopu, Allahdi anesala meliamupa, sun aneng peda kwemdana gum di, dumsisi bisipu embarami.

14 Tonda, Allah Yahwehdi doupra, sun kunkami mutupu duyanamu. Ukupmantoda mutmuta telep kupra paramyaipu, domba bisam dopra bena gerengdiramengtopu kupra duyanamu. Allah Yahweh er Lek Sambaladi anesala tep, kange deipra, dimpepra kun keca karepupa, telep kupra kurami. Nun nai Allah kandi, ange yuma ukupra kuramuma deiki di, Israel kan mawa nesala tep, doupra baramume. Ukuramumnge tep, nesala ban-ban yuma gekengedi, kan sipu erepra gispal dokenunge.” Nabi Yesayadi pepu.

‘Allahdi bicau teneseredi melimkamser’ tenen, morona upu

15 Teka nun nai Allah Yahweh, kanda im deiki alau tara pio telepai kumemdi diserume. Kanda pio ila puto ngebo kurume. Mali keca tenpu peda men kurem ngebo cadi, ila eremnapu kumemdi, im deiki pio telep lek mutu kurume. ‘Kandi bicau tenesememdi, kwar gum di balila kupra, nun tep melimsemem ngeda, ukutaru dan cei kurur do? Tonda kandi tali lupra poptapsetum dinin, lyemdosemem ngeda, dan cei kurur do?’ tenekenupe. ‘Kanda ware keca tep, nun tep namdina utopu kuserum do?’ tenekenupe. 16 Ange penupada, mesum tep gume. Ada, Allah kanda tek sisi nun nai bo kurum dinino, nun apu yapu pumun taru kuramrei neng, Abraham cap, Yakub cap, sundi nun tep men kael keamserei. Dinino, nun nai Allah Yahweh, kanda nun nai bo kuruma cadi, pumun taru di dipra, ukutaru yuma peda, nun tep konum wepra deipsemumdi lyepramsemum ngeboda, kan tenpupu kurume.

17 Teka, nun nai Allah Yahweh, kanda ware keca tep nun tep kaukeptapsemumpa, bisi walwalapdanen embanup do? Tonda, kandi nun tep dabal kange doun keca karepsemumpa, nundi kan tep, kware men kupserepa, kan tep tupa men tenekepedi, wae keca deiyo tep gwalin bisipu banup do? Ware keca deiyo tep, kandi kaukepsemumpa, nun dipru neitamaida balila kecapu kapseupa, kan tep nun men kware kuserur do? Ukunupa tep nengeda, naio, kandi melipseo. Nunda kan nyapu sisi kunupe. Tonda, nun Israel nesala yala yuk-yuk kunup neng yumada, kan mawa nesalapu kunupa cadi, kandi tamupra nun tep lyemdonkamserume. Tenpu ngebodi deprepa, er menmena deiamre mipu er taleamre keca dororamretopu, sirya taruda nun Israel nesala dopropkamseruma tep, tamupra melimkamserume. Naio, nun dipru neitamai pel dopsemempa, kange di ton cap betapra tenenkamepe. 18 Ware keca deiyo tep kandi kaukeptapsemumpa, kan podan nengdi, kan si eremna ati, Yerusalem mutu neitamai mambul atida, uruptamingepu tupa mali kudinung do? Pumun taru kandi, ‘Ne si amutu deiki deipnepa, pio lek mutupu kunkamre,’ peramum dinin, nun kan nyapudi, kepu taleamepupane, ukutaruda, mali neng dipu konum yaninunge.

19 Pumun taru dordi dipra ukutaru yumada, ikine keca neitamaipu kuramepua tep nengeda, yuk nengdi, nun tep, ‘Anengda, Allah er mawa nesala men kununge. Allah si eremengepa, erdi anesala taleredi, kalekra melimrur nesala gume,’ tenepsetenge. Ada mesum tep, gume. Nun ikin kunupnge cap, kan si eremna ati tep mali nengdi, yanipra mali kudinunga cap tep pepmepe. Atep, nun nai bo Allah kandi melipseo, pekenupe.” Sun Israel nesaladi, ‘Uo’ tenen, mali kange doupra Allah tep moropi.