Isa 64 | XteSC | STEP | Allah kandi im deiki yuma bokra dana-dana deipmemdi, kwerepkamrem taruda, mutu dana-dana yumada, ila di longkamre. Ada, kan ila mambul ngebo damai yamempa, mutu yuma longkamre.

Isaiah 64

Israel nesalada, ‘Allah Yahwehdi yana lyepkamser’ tenen, moropi upu

1 Allah kandi im deiki yuma bokra dana-dana deipmemdi, kwerepkamrem taruda, mutu dana-dana yumada, ila di longkamre. Ada, kan ila mambul ngebo damai yamempa, mutu yuma longkamre. 2 Ukupmantoda, nimidi co uku dongopmengepa, uku jepra gawal dangamretopu, kupkamre. Tonda, uku jenmaredi, me bupu porepa yarukra doramre utopu, Allah kan yankamrem taruda, utopu kuprepa, kan tep yu tenekenung neng, nimi ban-ban yuma epkengedi, kwar weik kuprepa, sun nong yumada moropsemkamenge. Kan yankamrem taruda, kan tep, ‘Allahda nun songe,’ tenekenge nesala yuma, ka puto weik cap, ila mambul si cap kuker ngeda, betapra kael kepkamenge.

3 Pumun taru, nundi, ‘Allah ukupkamre,’ men tenepmepu keca, Allah kanda tuai mutu yamumdi, ^{▼▼tuai mutu yamume – Yesayadi aupu pepu ngeda, ada Allah Sinai mutu deiki kwerepu taru tep pepu.} nimi men kupmanto pel, kunupsek pen pel dopmumpa mutu ila di lokamu. 4 Pumun dordi dipra ukutaru peda, kan Allah kumemnya utopu ngebo ton kuramupa nimi diramidi, lap peramipa, men gekerami. Kan tenpu kurema tepa. Allah kan tep teka tenekenge nengdi, ‘Allah dipu melipra lyepkamsere,’ tenengedi, ketenepra dinapu kunge nesala tep, lyemdosemem ngebo utopu ton pio men kurure. Kan tenpu kurume. 5 Sundi, Allah kan peipsemumtopu teka tenepmengedi, kange deipra kan upu moupra talepra dumsisipu kunge neng tep, kandi melipra yakaserume. Dinino, Allah kandi, ‘Ukunkamenge, angeda men kunkamenge,’ tenesemem ngeda, nundi, ‘Nun songe’ tenen, kan upu yaniramepudi malipu kuramepupa, kan yu kuramkeu. Ukupra yu kuramkeua cadi, nun wenemna tep ikin keca weik nun deiki deriramsemume. Nunda, pio mali kun nesala kunupa tep, ukutaruda, ware kupra lyepsetumdi, ka telep kupra deipsetum do?

6 Nun yumada, Allah kandi, ‘Angeda, ila mali keca cadi, ne dabale,’ tenesemem keca utongepu kunupe. Tonda, nundi, ‘Telep kunup keca ake’ tenen, telep kun keca kupeteptepya peda, tek sisi ila malingepu kunupe. Nunda, pio ila mali keca opkal deiki baprepa, tamameng utopu, nunda mali nesalapu kunupa cadi, malipu kuserure. Tonda, ila kumanya yaredi, pung peprepa kouluamre co bo dopra baramretopu kunupe. Ada, nun menmena di mali kuramepyanen, wisi deipmepyopda, denupe. Ada, nun pe mali kunupa deiki di kuserure. 7 Nun pio mali weik kunup dinin, nun kan-kan di kan tep ‘Uo, naio yana melimseo,’ peprap, tenpu ngebo peda men morokenupe. Tonda nundi kan tep ‘Naio, tali lupra poptapsetum dinin, bicau tenepsetumdi, lyepsetume’ tenen, kange deipkepedi men morokenupe. Nundi kan tep pio men morokenupa cadi, kandi nun tep, ‘Dabal’ tenen, inipra amnyo karengdongoserume. Tonda, nun mali-mali weik kunupa deiki di, tapsememdi, ‘Dakwapye, anesalada, malipu dakunkamenge,’ tenen, tasemempa, mali kun kecapu kupbanupe.

8 Dinino, tek sisi kanda nun nai Allah Yahweh, nun deiyo ngebo kurume. Ukupmanto ngeda, nimidi kerah tu dopra, sun tenepmange keca petupra deriramengtopu, Allah kan pedipapu, nun tep ketenem diserume. Ketenepra derina deiyo ngeboda, kan pua. Nunda kerah tu utopu nesala kunupe. Atep kan pe buru deiki dipapu ketenem diserume. 9 Atep nengeda, nun nai Allah Yahweh, kandi nun mali kuramepenge tep, ila yu kupkerepa derepnedi, ‘Wenepkamne’ tenen, ‘Angeda, tupa men tenenkamserem’ tenen, morokenupe. Nunda kandi weamsemumdi, kan nyapu sisa kuna tep, ketenepra deiamsemumpa, kunupa cadi, nun mali kunup kecada, ‘Tupa men tenenkamserem’ tenen, morokenupe. Ange gum dinin, ‘Kandi nun tep tamupra kange deipsememdi, nun ikin kuserenge tep, makunkamserum’ tenen, morokenupe, naio.

10 Allah kandi, ‘Ne mawa mutu’ tenen, wepra deiamum mutuda, pio telep mutupu kuramu mutu dinin, yuk karen mutu nesala yaidi, uruptamipa, walang kuamu mutu yumada, akati walangpu yana tamupra donkamrume. Kan pe si deiamum mutu, Yerusalem mutu, tonda Sion penup mutuda, nimi pio men kununga cadi, walangpu kurure. 11 Nun co puna nengdi, Allah kan si eremna tep, urasin pio telep ati dopra keteneiami. Apio telep atida, yu nengdi uku dongomipa, ukudi jepra konum gawal daku. Atep nengeda, nundi, ‘Ange yumada, urasin pio telep keca, ila mambul ati’ tenen, kange deriramepu keca yumada, konum gum kupseu. 12 Nun mali kuramepunge wenemna tep, kandi peiamumpa, yuk nengdi, akeca-keca yuma konum mali kudiramsei dinin, nun nai Allah Yahweh, kandi ange yuma diserum dinin, tali kaukemnapu kunkamserum do? Tali dimpepra kumemdi, wenemna kecapu nun deiki deipsemempa, tupa kange mun kangepu doupra kunkamep do? Nabi Yesayadi Allah tep pepu.